Ko Ai ʼAē ʼe Feala Ke Ina Tali He Ako Tohi-Tapu?
1 Neʼe tala e te polofeta ko Amosi ʼe hoko anai he hoge ʼi te fenua ʼo Iselaele, “ ʼe mole ko he hoge moʼi pane, pe ko he fia ʼinu ki he moʼi vai, kae ʼe ko he hoge ki te fagono ki te ʼu folafola ʼa Sehova.” (Am. 8:11) Ke ʼaoga ki te hahaʼi ʼaē ʼe nātou fia kakai pea mo fia ʼiʼinu ʼi te faʼahi fakalaumālie, ʼe tufa e te kautahi ʼa Sehova te tuʼuga tohi faka Tohi-Tapu ʼi te malamanei katoa.
2 Kua tā te ʼu tohi Te ʼAtamai Mālama e 70 miliona pea mo te ʼu kaupepa Fakamaʼua e 91 miliona. ʼI tatatou akoʼi te moʼoni ki te hahaʼi, ʼe tou fiafia ʼi te faigafua pea mo te fua lelei ʼo te ʼu tohi ʼaia. Kae tokolahi ʼaupito te hahaʼi ʼaē kua nātou toʼo hanatou tohi kae heʼeki fai hanatou ako Tohi-Tapu. Koteā ʼaē ʼe feala ke tou fai ʼo ʼuhiga mo te faʼahi ʼaia?
3 Ko Te ʼu Tufa Fuli ʼe Feala Ke Iku Ki He Ako Tohi-Tapu! Koʼeni te faʼifaʼitaki ʼo te kaugā fai faka mafola neʼe ina kole ki te fafine ʼi tanā ʼuluaki felāveʼi, peʼe ina loto ke fai hana ako Tohi-Tapu. Neʼe tali atu aipe e te fafine. Ki muli age, neʼe ina ʼui age, “Neʼe mole heʼeki kole mai e he tahi peʼe ʼau fia ako te Tohi-Tapu.” ʼI tokotou telituale, ʼe kaugamālie koa te hahaʼi ʼaē kua nātou maʼu he ʼu tohi faka Tohi-Tapu kae heʼeki fai hanatou ako? Ko te ʼu tohi fuli ʼaē neʼe tou tufa, ʼe feala ke iku ki he ʼu ʼaʼahi pea mo he ako Tohi-Tapu.
4 Mai tona ʼuhiga ʼaē ʼe tou tau felāveʼi mo ni hahaʼi kua ʼi ai hanatou tohi faka Tohi-Tapu, ʼe tou lava fakatupu feafeaʼi tanatou fia ako te ʼu tohi ʼaia? Ko te tuagaʼane neʼe ina kole fakahagatonu ki te fafine ʼo te ʼapi peʼe ʼi ai hana ʼu fehuʼi ʼo ʼuhiga mo te Tohi-Tapu, kae neʼe tali fēnei age e te fafine “Kailoa.” Neʼe toe fai pe e te tuagaʼane tana fehuʼi, ʼo ina ʼui fēnei “ ʼE ʼau ʼiloʼi papau ʼe ʼi ai tau fehuʼi ʼe ke fia fai mai.” Neʼe moʼoni tana manatu, pea neʼe kamata ai te ako ʼa te fafine. He koʼe ʼe mole tou kole koa la ki te tagata peʼe ko te fafine ʼo te ʼapi, peʼe ina fia ʼiloʼi te manatu ʼa te Tohi-Tapu peʼe lagi ʼe ʼi ai he faʼahi ʼe ina fia ʼiloʼi tāfito? Koutou teuteuʼi he fehuʼi ʼe feala ke koutou lagaʼi mo kapau ʼe mole ʼi ai he faʼahi ʼe fia palalau kiai te tagata pe ko te fafine ʼaia. Ko te ʼu fai palalau ʼaia, ʼe feala ke iku ki te fai tuʼumaʼu ʼo he ako ʼo ʼuhiga mo te ʼu moʼoni faka Tohi-Tapu.
5 Ko te fai ʼo te ʼu ako Tohi-Tapu ʼe ko te koga tāfito ʼaia ʼo totatou minisitelio. Mai tona ʼuhiga ʼaē ʼe mole tou ʼiloʼi pe ko ai ʼaē ʼe feala ke ina tali he ako Tohi-Tapu, ʼaua naʼa tou fakameʼameʼa ʼi te fakalavelave ki te hahaʼi fuli ʼaē ʼe tou felāveʼi mo nātou, peʼe nātou loto ke fai hanatou ako. Koutou faikole kia Sehova ʼo ʼuhiga mo te faʼahi ʼaia, pea koutou gāue ke ʼalutahi mo takotou ʼu faikole. Mole tuai, pea ʼe koutou felāveʼi anai mo he tahi ʼe ina tali anai ke koutou fai hana ako Tohi-Tapu!—1 Soa. 5:14, 15.