Tou Tufa Te Kaupepa Koteā ʼAē ʼe Fakamaʼua Mai e Te ʼAtua Kia Tatou?
1 Ko te kaupepa Koteā ʼAē ʼe Fakamaʼua Mai e Te ʼAtua Kia Tatou? neʼe fai moʼo tokoni ki te hahaʼi ke nātou maʼu fakavilivili te ʼatamai mālama totonu ʼo ʼuhiga mo te moʼoni. ʼI Novepeli, ʼe tou tufa anai te kaupepa ʼaia ʼi totatou telituale. Koteā te ʼu palalau ʼaē ʼe feala ke tou fai ke fia toʼo e te hahaʼi te kaupepa ʼaia?
2 Koʼeni te ʼu palalau ʼaē ʼe feala ke koutou fai ki he tahi kua vaivai tana tui ki te ʼAtua:
◼ “ ʼE tokolahi te hahaʼi neʼe nātou lalahi ake ʼi he famili ʼe tui ki te ʼAtua, kae kua nātou fakatokagaʼi ʼi te temi ʼaenī, ʼe mole kei faʼa mālohi tanatou tui. ʼI tau manatu, koteā tona tupuʼaga? [Tuku ke fai hana tali.] ʼE fakamālohiʼi anai tatatou tui ki te ʼAtua mo kapau ʼe tou sivisivi te ʼu meʼa fakaofoofo ʼo te ʼatulaulau. [Lau ia Pesalemo 19:1.] Ko Ia ʼaē neʼe ina fai te ʼu lao moʼo puleʼi te ʼu meʼa ʼaia ʼi selo, neʼe ina toe fai mo he ʼu tokoni moʼo takitaki ʼo tatou. [Lau ia Pesalemo 19:7-9.] ʼE hā mai ʼi te ʼu vaega ʼaia, te maʼuhiga ʼaē ke lahi te ʼu meʼa ʼaē ʼe tou ako ʼo ʼuhiga mo te ʼAtua pea mo tana ʼu fakatuʼutuʼu. [Fakahā te paki ʼi te pasina 4 pea mo te 5, pea mo lau te kiʼi talanoa.] Kapau ʼe ke fia maʼu te ʼatamai mālama makehe ʼaia, pea ʼe ʼau fiafia anai ʼi haku tuku atu te kiʼi kaupepa ʼaenī.”
3 Ka koutou toe ʼaʼahi te tagata pe ko te fafine ʼaia, pea ʼe feala ke koutou ʼui fēnei:
◼ “ ʼI taku ʼuluaki haʼu, neʼe tā talanoa ki te maʼuhiga ʼaē ke tou ʼiloʼi takitokotahi te ʼAtua. ʼE mahino papau ia, ʼe tou fia ʼiloʼi lelei totatou Tupuʼaga. ʼI te kaupepa ʼaē neʼe ʼau tuku atu, neʼe ʼi ai te fehuʼi maʼuhiga. [Lau te fehuʼi ʼo te ʼu palakalafe 1 pea mo te 2 ʼi te pasina 4, pea mo fakahā tāfito te lua koga ʼo te fehuʼi] ʼE feafeaʼi anai tau tali?” Tuku ke fai atu hana tali, pea lau age te ʼu palakalafe, pea mo koutou talanoa leva ki te ʼu vaega faka Tohi-Tapu ʼaē ʼe tuʼu ʼi te fakaʼosi ʼo te palakalafe 2. ʼOsi ʼaia, pea feala ke koutou toe ʼui fēnei: “ ʼE lahi ʼaupito te tahi ʼu fehuʼi ʼo ʼuhiga mo te ʼAtua. Koʼeni tona faʼifaʼitaki.” Lau te fehuʼi 3, pea kole age peʼe feala hakotou toe liliu ʼo ʼaʼahi ia ia.
4 Kapau ʼe koutou felāveʼi mo he tāmai pe ko he faʼe, pea ʼe feala ke koutou talanoa ki te famili:
◼ “Tokolahi te ʼu mātuʼa ʼe nātou ʼui, ʼe kita tau mo ni ʼu fihifihia mokā kita faiga ke maʼuli fiafia tokita famili. ʼI tau manatu, koteā te ʼu fihifihia ʼaia? [Tuku ke fai hana tali.] Ko tatou fuli ʼe tou faiga ke lelei totatou maʼuli faka famili, kae ʼi te agamāhani ʼe tou leleiʼia mo kapau ʼe fai mai he ʼu tokoni ke tou lava fai te faʼahi ʼaia. ʼE tuku mai e te Tohi-Tapu he ʼu tokoni ʼe lelei ʼaupito. [Lau ia Kolose 3:12, 18-21.] ʼE lahi te tahi ʼu fakamatala ʼa te Tohi-Tapu ʼo ʼuhiga mo te faʼahi ʼaia, ohage ko tona fakahā mai e te kaupepa ʼaenī ʼi te ako 8, ko tona kupu tāfito ‘Ko Te Maʼuli Faka Famili ʼAē ʼe Leleiʼia e Te ʼAtua.’ ʼE tuku mai ai te ʼu tokoni faka Tohi-Tapu ki te fakatokatoka ʼo te ʼu fihifihia faka taumatuʼa, pea mo te ʼu faigataʼaʼia ʼaē ʼe tau mo te fānau. ʼE ʼau ʼiloʼi ʼe ke fia lau anai.”
5 Peʼe feala ke koutou ʼui fēnei: “ ʼI tau manatu, neʼe fakatuʼutuʼu koa e te ʼAtua ke tou maʼuʼuli mo te ʼu fihifihia ʼaē ʼe tau mo tatou ia ʼaho nei?” ʼI te ʼosi tali atu ʼa te tagata pe ko te fafine, ʼe feala ke koutou ʼui fēnei: “Lagi kua ke ʼiloʼi lelei te faikole ʼaē neʼe akoʼi e Sesu ki tana kau tisipulo, ʼaē ʼe tou kole ai ke haʼele mai te Puleʼaga ʼa te ʼAtua. Kua ke fakakaukauʼi koa pe koteā koa te faka ʼuhiga moʼoni ʼo te Puleʼaga ʼa te ʼAtua?” Fuli ki te ako 6 ʼo te kaupepa Fakamaʼua, pea mo lau te ʼu fehuʼi ʼaē ʼe fai ʼi te kamata ʼo te ako. ʼOsi ʼaia, pea koutou lau te palakalafe 1, ʼo fakahā te tali ki te ʼuluaki fehuʼi. Fakamahino age, ʼe faigafua feiā te tali ki te tahi ʼu fehuʼi fuli. Tuku age te kaupepa, pea mo fakahā age te fakatuʼutuʼu ʼo ʼuhiga mo te ʼu meʼa ʼofa, pea kole age peʼe loto ke koutou ʼaʼahi ia ia ke ina ʼiloʼi he tahi ʼu meʼa ʼo ʼuhiga mo te Puleʼaga.
6 Kapau ʼe koutou fia fai he ʼu palalau nounou ʼaki te tohi Te ʼAtamai Mālama, pea ʼe feala ke koutou ʼui fēnei:
◼ “Kua ke feʼekeʼaki koa la pe koʼe ʼe tou matutuʼa pea mo mamate? Ko te kapite 6 ʼo te tohi ʼaenī Te ʼAtamai Mālama, ʼe ina fakamahino mai te tupuʼaga ʼo te mate pea mo te fakatuʼutuʼu ʼa te ʼAtua moʼona pulihi. ʼE ʼui mai e te Tohi-Tapu, neʼe fakapapauʼi mai e te ʼAtua te maʼuli heʼegata maʼa nātou fuli ʼaē ʼe nātou ʼoʼofa ia te ia. [Lau ia Soane 17:3.] Kapau ʼe ke fia lau he tahi ʼu meʼa ʼo ʼuhiga mo te faʼahi ʼaia, pea ʼe ke fiafia anai ʼi tau lau te tohi ʼaenī.”
7 ʼE toe feala foki ke koutou fai te ʼu palalau faigafua ʼaenī:
◼ Ka koutou fakahā te kaupepa Fakamaʼua, koutou fakaʼaogaʼi te pasina 2, ʼaē ʼe fakamahino ai “ko te kaupepa lahi ʼaenī ʼe ko he kaupepa moʼo fai ʼaki he ako Tohi-Tapu.” Fakahā te palakalafe 3 ʼi te pasina 3 moʼo fakamahino age pe koʼe ʼe ʼaoga ke kita ako te Tohi-Tapu. Koutou faiga ke ina fia lau te kaupepa ʼo koutou talanoa ki ʼihi kupu tāfito ʼaē ʼe hā ai te ʼu moʼoni faka Tohi-Tapu. Koutou fakahā ʼaki te kaupepa ʼaenī, ko te ako ʼe ko he meʼa fakafiafia, pea koutou kole age kia ia peʼe loto ke koutou tokoni age ki ai.
8 Kapau ʼe tou teuteuʼi lelei, pea ʼe feala anai ke tou fakaʼaogaʼi te kaupepa ʼaia moʼo ‘fakaava mai te Tohitapu’ ki te hahaʼi ke feala hanatou fiafia ai!—Luka 24:32.