ʼE Maʼuhiga Ke Tou Fakakaugā Mo Te Kau Kilisitiano
1 “ ʼE mole he tagata ʼe hage ko he kiʼi motu.” Ko te ʼu palalau ʼaia neʼe fai e te tagata fai tuketuke ʼo te 17 sēkulō, pea ʼe fia talanoa ki te meʼa ʼaē neʼe ʼui e te Tohi-Tapu ʼe ʼaoga ʼaupito ki te tagata—te fakakaugā mo te hahaʼi. (Taag. 18:1) ʼE tou maʼu te faʼahi ʼaia ʼi tatatou fakatahitahi mo te kau Kilisitiano. He koʼe ʼe ʼaoga te fakakaugā ʼaia?
2 ʼI Te Minisitelio: ʼE ʼaoga tāfito kia tatou ʼi te minisitelio, te tokoni pea mo te fakaloto mālohi ʼo totatou ʼu tēhina. Neʼe fekauʼi e Sesu tana ʼu tisipulo “taki tokolua” ke nātou fai faka mafola. (Mko. 6:7; Lu. 10:1) Moʼo faʼifaʼitaki ki te faʼahi ʼaia, ka tou gāue mo ʼihi ʼi te fai faka mafola, pea ʼe tou ʼiloʼi ai te moʼoni ʼo te koga tohi ʼo Tagata Tānaki 4:9, 10. ʼI tatatou fakahoko fakatahi totatou minisitelio, ko te tui, te fakalogo pea mo te ʼofa ʼo totatou ʼu tēhina, ʼe ina foaki mai kia tatou te lototoʼa pea mo fakafoʼou tatatou faʼafai.
3 Ko He Tokoni Kia Tatou Takitokotahi: Pea ko totatou fale tautēhina ʼe ko he matapuna fakaloto mālohi, pea ʼe ko he takitaki moʼo tauʼi ʼo totatou ʼu faigataʼaʼia pea mo te ʼu fakahala. Ko totatou ʼu kaugā fagona Kilisitiano ʼe feala ke nātou fakatokagaʼi mai kia tatou he ʼu vaega ʼe ʼalutahi mo totatou ʼu fihifihia takitokotahi. ʼE feala ke nātou hūfakiʼi tatou, ohage ko tatatou hūfakiʼi nātou. (2 Ko. 1:11) Pea ʼe mahino papau ia, ko tanatou faʼifaʼitaki lelei ʼe ina uga tatou ke tou fai he ʼu gāue lelei pea mo fakaloto mālohiʼi tatou.
4 ʼI Te ʼu Fono: ʼE tou maʼu te ʼu tapuakina ʼo te fakakaugā faka Kilisitiano mokā tou fakatahi tuʼumaʼu ʼi te ʼu fono. (Hep. 10:24, 25) ʼE lahi te ʼu meʼa ʼe tou ako ai pea ʼe tou felogoi lelei ai mo totatou ʼu tēhina mo tuagaʼane. ʼE tou maʼu ʼi te ʼu fakatahi ʼaia te fealagia ʼaē ke tou fagono mokā fakahā e totatou ʼu tēhina mo tuagaʼane tanatou tui, mai muʼa peʼe ʼi tonatou hekaʼaga. (Loma 1:12) ʼE mālohi tatatou ʼu felogoi mokā tou fai palalau ʼi muʼa ʼo te kamata ʼo te ʼu fono pea mokā ʼosi te ʼu fono. ʼE faka fealagia e te ʼu lakaga ʼaia, ke tou fakamatala ai te ʼu meʼa neʼe hoko kia tatou, pea mo fakaloto mālohiʼi ai te tui. ʼE lave lelei ki totatou ʼulugaaga mokā tou fakatahi mo nātou ʼaē ʼe ʼoʼofa kia Sehova, mo tana Folafola, mo tana gāue pea mo tana hahaʼi.—Filp. 2:1, 2.
5 ʼE ʼaoga kia tatou totatou ʼu kaugā fagona Kilisitiano. Kapau ʼe mole tou fakatahi mo nātou, pea ʼe faigataʼa ʼaupito anai tatatou haʼele ʼi te ala foufou ʼaē ʼe ina taki ki te maʼuli. Kae ʼaki tonatou ʼofa pea mo tanatou fakaloto mālohi, ʼe tou lava haga haʼele anai ki te mālama foʼou faitotonu ʼa Sehova.—Mat. 7:14.