Te Hahaʼi ʼAē ʼe Fiafia Lahi ʼi Te Kele
1 “Manuʼia te hahaʼi ʼaē ko tonatou ʼAtua ko Sehova!” (Pes. 144:15) ʼE fakahā e te ʼu palalau ʼaia ko te kau Fakamoʼoni ʼa Sehova ʼe ko te hahaʼi ʼaē ʼe fiafia ʼaupito ʼi te kele. ʼE mole he tahi age meʼa ʼe fakafiafia lahi age ʼi te tauhi ʼaē ki te ʼAtua moʼoni tokotahi pea mo maʼuli, ia Sehova. Mai tona ʼaluʼaga ʼaē ko ia ko “te ʼAtua fiafia,” koia ko nātou ʼaē ʼe nātou tauhi kia te ia ʼe nātou toe fiafia mo nātou. (1 Tim. 1:11, MN ) Koteā te ʼu faʼahi ʼo tatatou tauhi ʼe tupu ai tatatou fiafia lahi?
2 Te ʼu Tupuʼaga ʼo Tatatou Fiafia: Neʼe ʼui fakalelei mai e Sesu ʼe tou fiafia heʼe tou “ ʼiloʼi [totatou] masiva fakalaumālie.” (Mat. 5:3, MN ) ʼE fafaga tatou ʼi te faʼahi fakalaumālie, mokā tou ako tuʼumaʼu te Tohi-Tapu pea mo tou kau ki te ʼu fono fuli. Ko tatatou ako te moʼoni ʼo te Folafola ʼa te ʼAtua neʼe ina faka ʼāteaina ai tatou mai te ʼu akonaki faka lotu loi pea mo hala. (Soa. 8:32) Neʼe toe akoʼi mai e te Tohi-Tapu kia tatou te maʼuli ʼaē ʼe lelei tokotahi. (Isa. 48:17) Koia ʼe tou fiafia ai ʼi tatatou fakatahi lelei mo totatou ʼu tēhina mo tuagaʼane fiafia.—1 Tes. 2:19, 20; 1 Pet. 2:17.
3 ʼE tou maʼu he toe fiafia lahi ʼi tatatou fakalogo ki te ʼu lekula māʼoluga ʼa te ʼAtua ʼo ʼuhiga mo te aga ʼaē ʼe tonu ke fai, heʼe tou ʼiloʼi ʼe puipui ai tatou pea ʼe fiafia ai Sehova. (Taag. 27:11) Neʼe ʼui fēnei e te tagata ʼe gāue ʼi te sulunale: “Logola tanatou ʼu lekula fuli ʼaē ʼe māʼoluga, kae ko te kau Fakamoʼoni ʼa Sehova ʼe mole ko ni ʼu hahaʼi lotomamahi. Kailoa ia. Ko te kau tūpulaga ʼo feiā mo te kau matutuʼa [ʼaē ʼe kau kia nātou], ʼe ʼasi mai ko he ʼu hahaʼi ʼe nātou fiafia ʼaupito pea mo aga fakapotopoto.” ʼE tou lava tokoni feafeaʼi ki te hahaʼi ke nātou maʼu mo nātou tatatou maʼuli fiafia?
4 Tou Tokoni Ki Te Hahaʼi Ke Nātou Fiafia: Ko te tokolahi ʼi te malamanei ʼe mole nātou fiafia, pea ʼe mole hanatou ʼamanaki ki te ka haʼu. Kae ʼe tou maʼu tatou he ʼamanaki fakafiafia, heʼe tou ʼiloʼi ʼe hoko mai anai te ʼaho ʼaē ʼe mole toe ʼi ai anai he mamahi. (Apk. 21:3, 4) Koia ʼe tou faiva lahi ai ʼi te minisitelio, ʼo tou kumi te hahaʼi ʼaē ʼe nātou loto moʼoni ke tou vaevae mo nātou ia tatatou ʼamanaki pea mo tatatou tui ʼo ʼuhiga mo Sehova.—Esk. 9:4.
5 Neʼe ʼui fēnei e te tuagaʼane pionie: “ ʼE mole he tahi age meʼa ʼe fakafiafia ʼi te tokoni ʼaē ki te hahaʼi ke nātou ʼiloʼi ia Sehova pea mo tana moʼoni.” Tou faiga ʼo fakaloto mālohiʼi te tokolahi ke nātou tali hanatou ako Tohi-Tapu. ʼE tou maʼu he fiafia lahi ʼi tatatou tauhi kia Sehova pea mo tatatou foaki ia tatou moʼo tokoni ki te hahaʼi ke nātou tauhi kia te ia.—Gaue 20:35.