Kau Tūpulaga—Koutou Laga He Fakatafito Taulekaleka Ki Te Ka Haʼu
1. He koʼe koa ʼe ʼaoga ke fakatuputupu e te kau tūpulaga Kilisitiano he tui mālohi?
1 Koteā ʼaē ʼe hoha tāfito kiai tokotou ʼatamai? Koteā ʼaē ʼe koutou manatu kiai? ʼE koutou hoha tāfito koa ki te ʼu meʼa ʼo te mālama ʼaenī, peʼe koutou hoha koa ki te ka haʼu pea mo fakakaukau ki te ʼu meʼa ʼaē neʼe fakapapauʼi mai e te ʼAtua? (Mat. 6:24, 31-33; Luka 8:14) ʼE ʼaoga he tui mālohi ke tou faka ʼalutahi tatatou ʼu gāue mo te ʼu fakapapau ʼa te ʼAtua, ohage ko te meʼa ʼaē ʼe feala ke tou sio kiai ʼi te faʼifaʼitaki ʼa Apalahamo pea mo Moisese. (Hep. 11:8-10, 24-26) ʼE koutou lava fakatuputupu feafeaʼi he tui feiā pea mo laga “he fakatafito taulekaleka ki te ka haʼu”?—1 Tim. 6:19, MN.
2. Koteā te ako ʼe tou maʼu mai te faʼifaʼitaki ʼo Sosiasi?
2 Koutou Kumi Ia Sehova: Kapau kua ʼi ai hakotou polokalama ʼo te ʼu gāue fakalaumālie mo tokotou famili, ʼe ko he meʼa lelei. Kae ʼaua naʼa koutou ʼui ʼe koutou maʼu anai he tui mālohi ʼaki pe te taʼi polokalama ʼaia ʼe fai māhani. Ke feala hakotou maʼu “te ʼatamai mālama ʼo ʼuhiga mo te ʼAtua,” ʼe tonu kia koutou totonu ke koutou kumi ia Sehova. (Taag. 2:3-5; 1 Fkma. 28:9) Neʼe fai te faʼahi ʼaia e te Hau tūpulaga ko Sosiasi. Logola neʼe lahilahi ake ʼi he ʼaluʼaga neʼe mole faigafua kia ia hana tuputupu ʼi te faʼahi fakalaumālie, kae ʼi tona taʼu 15 “neʼe ina kamata kumi te ʼAtua ʼo Tavite tana kui.”—2 Fkma. 34:3.
3. ʼE lava kumi feafeaʼi e te kau tūpulaga Kilisitiano ia Sehova ʼi te temi nei?
3 ʼE koutou lava kumi feafeaʼi ia Sehova? ʼAki hakotou vakavakaʼi fakalelei te meʼa ʼaē ʼe koutou tui kiai pea mo ‘ ʼahiʼahi e koutou totonu’ peʼe ko te moʼoni ʼaia. (Loma 12:2) Ohage la ʼe koutou lava fakamahino koa peʼe koteā ʼaē ʼe ʼui e te Tohi-Tapu ʼo ʼuhiga mo te toto, peʼe koutou fakamoʼoni neʼe kamata ʼafio te Puleʼaga ʼo te ʼAtua ʼi te lagi ʼi te taʼu 1914? Ko te maʼu ʼo he “ ʼatamai mālama totonu ʼo te moʼoni” ʼe ko he koga maʼuhiga moʼo laga he fakatafito taulekaleka ki te ka haʼu.—1 Tim. 2:3, 4, MN.
4. E feafeaʼi ki he tahi kua kaugā fagona hana fakahā tana tuputupu ʼi te faʼahi fakalaumālie?
4 Ko te faiga ʼa Sosiasi ke ina kumi te ʼAtua neʼe ʼi ai tona ʼu fua lelei. ʼI muʼa ʼo tona taʼu 20, ʼaki he lototoʼa neʼe ina pulihi ʼi te fenua ia te tauhi hala. (2 Fkma. 34:3-7) ʼO toe feiā pe mo koutou, ʼe ʼiloga anai takotou tuputupu ʼi te faʼahi fakalaumālie ʼaki takotou ʼu gāue. (1 Tim. 4:15) Kapau kua koutou kaugā fagona, koutou faigaʼi ke koutou hikihiki takotou minisitelio ke toe lelei age. ʼAua naʼa koutou ʼui ʼe feʼauga pe ʼaki takotou tufa te ʼu tohi. Koutou fakatuʼutuʼu ke koutou fakaʼaogaʼi te Tohi-Tapu, ke koutou fakakaukau mo te hahaʼi ki te Tohi-Tapu, pea mo koutou fakatuputupu te fia logo ʼa te hahaʼi. (Loma 12:7) ʼE tokoni atu anai te faʼahi ʼaia ke koutou tuputupu ʼi te faʼahi fakalaumālie.
5. Koteā te ʼu faigamālie ʼe maʼu e te kau Kilisitiano kua papitema ke nātou fakalahi tanatou minisitelio?
5 Koutou Foaki Te Meʼa ʼAē ʼe Lelei ʼAupito Ia Koutou Kia Sehova: Ka koutou papitema ʼo fakahā ai ki te ʼAtua kua koutou foaki tokotou maʼuli kia te ia, ʼe koutou liliu ai ko he minisi kua fakanofo e te ʼAtua. (2 Ko. 3:5, 6) ʼE maʼu ai te ʼu faigamālie ke koutou tauhi kia Sehova ʼi te selevisi temi katoa. ʼE kau kiai ia te gāue pionie, mo te gāue ʼi te Petele, mo te gāue misionea, pea mo te gāue ʼi te malamanei katoa. Kae ʼe ʼi ai te tahi ʼu puleʼaki ke koutou fakalahi takotou minisitelio, ohage ko te ako he tahi lea peʼe ko te ʼolo ʼo gāue ʼi te ʼu koga meʼa ʼaē ʼe ʼaoga lahi ai he kau fai faka mafola.
6. ʼE lava feafeaʼi kia tatou fuli hatatou laga he fakatafito taulekaleka ki te ka haʼu?
6 ʼE mahino ia ʼe mole feala kia tatou fuli ke tou kau ki te ʼu pilivilesio gāue ʼaia, kae ʼe tou lava foaki kia Sehova ia te meʼa ʼaē ʼe lelei ʼaupito ia tatou takitokotahi. (Mat. 22:37) Logope tokotou ʼu ʼaluʼaga, kae koutou fakatuʼutuʼu tāfito ʼi tokotou maʼuli ke koutou tauhi kia Sehova. (Pes. 16:5) ʼI takotou fai ia te faʼahi ʼaia, ʼe koutou laga anai he fakatafito taulekaleka ki te ka haʼu.