Tou Aga Fakapotopoto ʼi Te Fai Fakamafola
1. He koʼē ʼe tonu ke tou aga fakapotopoto ʼi te fai fakamafola?
1 “O hage ko ni ovi ki lotomalie o ni lupo,” ko te ʼu kaugana ʼa te ʼAtua ʼe natou fai fakamafola “i te lotolotoga o he taitupu kaka mo maveuveu.” (Mat. 10:16; Filp. 2:15) Ko te ʼu logo fakamataku ʼo ʼuhiga mo te ʼu tokakovi ʼo he fenua, mo te agamālohi ʼa te hahaʼi, pea mo te kaihaʼa te hahaʼi, ʼe ko he ʼu meʼa kua hoko māhani. ʼE ko he fakamoʼoni ʼaia, ko te agakovi ʼa te tagata kua “asilisili kovi” age. (2 Tim. 3:13) Koteā te ʼu pelesepeto Fakatohi-tapu ʼaē ʼe tokoni mai anai ke tou aga fakapotopoto ʼi te fai fakamafola?—Mat. 10:16.
2. Ko te ʼu ʼaluʼaga fea ʼaē ʼe feala ai ke tou aga fakapotopoto ʼo mavae mai te telituale, ʼo tou ʼolo ʼo fai fakamafola ʼi he tahi age koga meʼa?
2 Tou Aga Fakapotopoto: ʼE fakahā lelei iā Taaga Lea 22:3 ko ia ʼaē ʼe poto ʼe nono mai te malaʼia. Ke tou nofo tokaga! ʼE lagi ko he telituale ʼi te agamāhani ʼe tokalelei, kae ʼi ʼihi temi ʼe feala pē ke fetogi. ʼE feala ke tou sio kua lahi te ʼu feʼoloʼaki ʼo te kau polisi peʼe kua fakapupu ia te hahaʼi ʼi te ala. ʼI ʼihi temi, ʼe foaki atu anai ia he fakatokaga e he tahi ʼe agalelei. ʼE fakapotopoto age ia hatatou mavae fakavilivili ki he tahi koga meʼa ʼo hoko atu te gāue, ʼi hatatou fakatuatuai ʼo fia ʼiloʼi meʼa fuli.—Taag. 17:14; Soa. 8:59; 1 Tes. 4:11.
3. ʼE feafeaʼi hatatou muliʼi ia te pelesepeto ʼo Ekelesiasi 4:9 ʼi te fai fakamafola?
3 Tou Gāue Fakatahi: ʼE ʼui fēnei iā Ekelesiasi 4:9: “E lelei age te toko lua i te toko tahi.” Kua lagi tou māhani ʼi te gāue tokotahi ʼi te fai fakamafola, kae ʼe ko he aga fakapotopoto koa? ʼI ʼihi fenua, ʼe fai te faʼahi ʼaia. Kae ki ʼihi atu fenua, ʼe mole ko he aga fakapotopoto ki he tuagaʼane peʼe ko he tūpulaga hana ʼalu tokotahi ʼi te ʼu ʼapi, tāfito lā mokā kua pōʼuli. ʼI te ʼaluʼaga ʼaia ʼe mahino papau ia, ʼe fakapotopoto age hatatou ʼolo mo he kaugā fagona. (Ekl. 4:10, 12) Tou tokaga ki te kūtuga ʼaē ʼe fai fakamafola mo tātou. Tou fakamāhani ʼo fakahā kiā nātou ia te temi ʼaē ʼe tou mavae ʼi te telituale.
4. ʼE tou lava gāue feafeaʼi ia te haofaki ʼo te kōkelekāsio kātoa?
4 ʼE ko te maʼua ʼa te kau tagata ʼāfea ke natou foaki he ʼu tokoni ʼe ʼalutahi mo te ʼu ʼaluʼaga ʼaē ʼe hoko ʼi te telituale ohagē ko ni hahaʼi ʼe natou leʼoleʼo ʼotatou maʼuli. (Hep. 13:17) ʼI tatatou fakahā ia te agavaivai fakakilisitiano pea mo tou lagolago kātoa kiā nātou, ʼe mahino ia ʼe tapuakina anai tātou e Sehova. (Mik. 6:8; 1 Ko. 10:12) ʼE tou fakaʼamu pē, ke fua lelei ia te fai fakamafola ʼa te ʼu kaugana ʼa te ʼAtua ʼi tatatou telituale, kae ʼaki tuʼumaʼu pē ia he aga fakapotopoto.