“Mai Te u . . . Faahiga Fuli, Mo Te u Hahai Fuli, Mo Te u Lea Fuli”
1. ʼE maʼuhiga koa kiā mata ʼo Sehova ia te fai fakamafola ʼo te logo lelei ʼi “te u lea fuli”?
1 Iā ʼaho nei, ʼe lahi te ʼu lea ʼe fakaʼaogaʼi ʼi te gāue fai fakamafola. Neʼe fakakikite ko te toe hahaʼi tokolahi ʼe mole nātou ʼomai pē mai te ʼu fenua fuli, kae neʼe nātou ʼomai foki mai te “u faahiga fuli, pea mo te ʼu hahai fuli, pea mo te u lea fuli.” ʼO mulimuli ki te faʼahi ʼaia, neʼe fakakikite e Sehova ʼaki ia Sakalia: “E too anai e ni tagata e toko hogofulu mai te u lea kehekehe fuli o te atu puleaga he tagata Sutea e toko tahi i te tapatapa o tona kofu, o ui: E matou olo anai mo koe, koteuhi kua matou iloi e nofo te Atua mo koutou.” (Sakl. 8:23) Logolā ʼe mole kei maʼu e te kau Fakamoʼoni ʼa Sehova ia te fealagia ʼo te ʼu lea, kae ʼe nātou mahino ki te maʼuhiga ʼo te akoʼi ʼo te hahaʼi ʼi te lea ʼaē ʼe nātou mahino kiai.
2. He koʼē ʼe lelei age ia te fai fakamafola ki te hahaʼi ʼaki he Tohi-Tapu ʼi tanatou lea?
2 Ko te fakamafola peʼe ko te akoʼi ia te logo ʼo te Tohi-Tapu ki te hahaʼi ʼaki he lea ʼe mole nātou māhani kiai, ʼe feala ke malave ki ʼonatou ʼatamai. Kae ke feala hona malave ki ʼonatou loto, ʼi te agamāhani ʼe lelei age ke tou palalau ʼi tanatou lea—te lea ʼaē kā malave ki tanatou ʼu fakaʼamu, mo te ʼu meʼa ʼaē ʼe ina uga nātou, pea mo tanatou ʼu ʼamanaki. (Luka 24:32) ʼE mahino papau ia, ʼe ako vave age te hahaʼi, pea ʼe nātou leleiʼia ʼaupitō te ako ʼaia mokā ʼe nātou ako ʼi tanatou lea.—Gaue 2:8, 14, 41.
3. Koteā te maʼua ʼa te kau fai fakamafola takitokotahi moʼo fai he kau tisipulo ʼo “te u puleaga fuli”?
3 ʼE tonu ki te kau fai fakamafola takitokotahi ke nātou fakahā ia te logo ʼo te Tohi-Tapu ki “te tagata fuli pe” ʼi te lea ʼaē ʼe nātou mahino kiai. (Soa. 1:7) ʼE moʼoni te faʼahi ʼaia ʼi tatatou fakaʼaogaʼi ia te Tohi-Tapu. Koia, ʼe tonu ai ki te kau fai fakamafola ke natou fakaʼaogaʼi ia he Tohi-Tapu ʼi te lea ʼo te hahaʼi ʼo te telituale, ke malave ai ki ʼonatou loto.
4. Koteā ʼaē ʼe tonu ke tou fai mokā ʼe mole tou maʼu ia te Traduction du monde nouveau ʼi tatatou lea pea koteā tona tupuʼaga?
4 Tatau aipē peʼe mole tou maʼu ia te Traduction du monde nouveau ʼi tatatou lea, kae ʼe lelei ke tou fakaʼaogaʼi ia te ʼu Tohi-Tapu ʼaē ʼe tou maʼu ʼi tatatou lea. ʼE moʼoni ia, ʼe feala ke tou tokagaʼi ia he koga tohi ʼe mole totonu tona fakaliliu, kae ʼe feala pe ke tou toe fakaʼaogaʼi ia he tahi age ʼu vaega ʼe tatau tona manatu. ʼE malave ai anai ia te ʼatamai ʼo te hahaʼi ʼaē ʼe fakaʼapaʼapa lahi ki te Folafola ʼa te ʼAtua. Ko te faʼahi ʼaia ʼaē ʼe lelei ʼaupitō ke malave ai tonatou loto pea mo taki ai natou ki te moʼoni.—Soa. 17:17.