Te ʼu Fehuʼi ʼa Te Kau Lautohi
ʼE gata anai ʼafea te gaue faifakamafola?
Neʼe ui fenei e Sesu: “Ko te logo lelei ʼaeni ʼo te Puleʼaga ʼe fakamafola anai ʼi te kele katoa ko he fakamoʼoni ki te atu puleʼaga, pea hoki hoko mai anai ia te fakaʼosi.” (Mat. 24:14) Ko te kupu Fakakeleka ʼae neʼe fakaliliu ʼaki te kupu “fakaʼosi” ʼi te vaega ʼaeni, ʼo feia mo te vaega 6 mo 13, ʼe ko te kupu teʹlos. ʼE fakaʼuhiga ki te fakaʼosi ʼo te malama ʼo Satana ʼi Alamaketone. (Fkha. 16:14, 16) Ko tona fakaʼuhiga ʼe tou fakamafola anai te logo lelei ʼo te Puleʼaga ʼi muʼa ʼo te kamata ʼo Alamaketone. ʼE fetogi ai tatatou mahino ki te fahaʼi ʼae neʼe tou iloʼi ʼi muʼa atu.
ʼI muʼa atu, neʼe tou mahino ʼe gata anai te tala ʼo te logo lelei moka kamata te mamahi lahi ʼaki te fakaʼauha ʼo Papiloni Lahi. (Fkha. 17:3, 5, 15, 16) Neʼe tou ui ʼe ko te fakaʼosi ʼaia ʼo ‘te taʼu manavaʼofa ʼo Sehova.’ (Esa. 61:2) Neʼe tou toe manatu ko natou ʼae ka hao ʼi te mamahi lahi, ʼe ko natou anai ka natou fakaha ʼe natou tauhi agatonu kia Sehova ʼi muʼa ʼo te kamata ʼo te mamahi lahi. Neʼe tou fakatatau ia natou ʼaia ki te kau Sutea ʼae neʼe hao mai te fakaʼauha ʼo Selusalemi ʼi te 607 I.M.T.S. Neʼe fakailoga te hahaʼi ʼaia ki tonatou haofaki he neʼe natou fakaha ʼi muʼa atu tanatou tauhi agatonu kia Sehova pea mo fehihiʼa ki te agakovi. (Esk. 5:11; 9:4) Kae, neʼe mole alu tahi mo te ʼu palalau ʼa Sesu ʼae ia Mateo 24:14. ʼE fakaha ʼi te vaega ʼaia, ʼe feala ki te hahaʼi ke natou fia tali te logo lelei ʼi muʼa pe ʼo te hoko mai ʼo Alamaketone.
ʼAki te fakamahino foʼou ʼae ia Mateo 24:14, neʼe toe fetogi ai tatatou mahino ki te logo ʼae ʼe talanoa ki ai ia Fakaha 16:21, ʼae ʼe fakata ai ki he toe ʼua maka lahi. Neʼe toe vakavakaʼi lelei te vaega ʼaia, pea neʼe ha ai ʼe fefakakatoaʼaki te ʼu vaega ʼaia ʼe lua. ʼO feafeaʼi? ʼE tou maʼu tona tali moka tou sio ki te faʼahiga tali ʼa te hahaʼi ki te logo lelei ʼo te Puleʼaga. Neʼe ui e te apositolo ko Paulo, “kia natou ʼae ʼe ʼi te ala ki te haofaki,” ko te logo ʼaia ʼe ko he logo lelei, ko “he ʼaele magoni ʼo te maʼuli.” Kae ʼe ko he logo kovi ia ki te ʼu fili ʼo te ʼAtua, ʼe ko “he ʼaele ʼo te mate.” (2 Ko. 2:15, 16) ʼE natou fehihiʼa ki te logo ʼo te Puleʼaga, koteʼuhi ʼe fakaha ai ʼe leleiʼia e te malama ʼae ʼe puleʼi e Satana te meʼa ʼae ʼe kovi, pea ʼe kua vave pulihi pe.—Soa. 7:7; 1 Soa. 2:17; 5:19.
ʼE tou toe tokagaʼi ai ko te ʼua maka fakata ʼaia, ʼe “lahi ʼaupito anai.” Ko tona fakaʼuhiga, ʼe fakaofoofo anai te gaue faifakamafola lolotoga te mamahi lahi, he ʼe iloʼi moʼoni anai e te hahaʼi te huafa ʼo Sehova. (Esk. 39:7) ʼI te lakaga ʼaia, hili te fakaʼauha ʼo Papiloni Lahi, ʼe taki mai anai koa ʼihi ʼuhi ko te logo ʼae ʼe hage ko he ʼaele magoni? ʼE mahino ia. ʼE lagi ʼe natou manatuʼi peʼe natou logo neʼe tala e te kau Fakamoʼoni ʼa Sehova lolotoga ni taʼu te fakaʼauha ʼo te lotu hala.
Pea ʼe hage pe te aluʼaga ʼaia ko te aluʼaga ʼae neʼe hoko ʼi Esipito, hili te ʼu malaʼia ʼe hogofulu. Hili te ‘tauteaʼi e Sehova te ʼu ʼatua fuli ʼo Esipito,’ neʼe fakatahi age ki tana hahaʼi “he faʼahiga hahaʼi kehekehe pea mo kaugamalie,” ʼe mole ko he kau Iselaele. (Eke. 12:12, 37, 38) ʼE lagi neʼe natou maliu mai kia Sehova ʼi tanatou sisio ki te hoko moʼoni ʼo te ʼu fakatokaga ʼa Moisese, ʼo ʼuhiga mo te ʼu malaʼia ʼe hogofulu.
Ko ʼae pe ʼe maliu mai kia Sehova hili te fakaʼauha ʼo Papiloni Lahi, ʼe natou maʼu anai te pilivilesio ʼae ke natou lagolago ki te ʼu tehina ʼo Kilisito, ʼae ʼe kei nonofo anai ʼi te kele. (Mat. 25:34-36, 40) ʼE mahino ia, ʼe gata anai te fakamauʼi ʼo natou ʼae ʼe ui ko he ʼu ovi ʼi muʼa pe ʼo te kamata ʼo Alamaketone, moka maʼu anai e te kau fakanofo ʼae ʼe kei toe tonatou fakapale ʼi selo.
ʼE ha ʼi te fakamahino foʼou ʼaeni ia te fakamaʼuhigaʼi ʼo te ʼofa mo te manavaʼofa lahi ʼo Sehova. ʼEi, ‘ ʼe mole ina loto ia ke fakaʼauha he tahi, kae ʼe loto ia ke kaku te hahaʼi fuli ki te fakahemala.’—2 Pet. 3:9.