ʼE Li Koa e Te Kau Fakamoʼoni ʼa Sehova Ia He Vahe Hogofulu Ki Te Lotu?

Kailoa, ʼe mole li e te kau Fakamoʼoni ʼa Sehova ia he vahe hogofulu ki te lotu. Koteʼuhi ’e fakapa’aga tamatou gaue ʼaki te ʼu meʼa ʼofa ʼae ʼe foaki mo he lotolelei. Kaʼe kotea koa te vahe hogofulu ʼaia? Pea he ko ʼe ʼe mole li e te kau Fakamoʼoni ʼa Sehova ia he vahe hogofulu ki te lotu?

Ko te fakatotonu ʼae ke kita li ia he vahe hogofulu, ʼe haʼu ia mai te Lao ʼae neʼe foaki ki te Puleʼaga ʼo Iselaele ʼi te temi muʼa. Pea ʼe fakaha lelei pe ʼi te Tohi-Tapu ko te Lao ʼaia, ʼo feia mo te “fakatotonu ke natou tanaki te vaega hogofulu,” ʼe mole fakaʼuhiga ki te kau Kilisitiano.—Hepeleo 7:5, 18; Kolose 2:13, 14.

Koia, ʼe mole li e te kau Fakamoʼoni ʼa Sehova ia te vahe hogofulu ʼae ʼe fakamaʼua, kaʼe ’e natou mulimuli ki te faʼifaʼitaki ’o te ʼu ʼuluaki Kilisitiano pea mo lagolago ki tanatou gaue faifakamafola ia faʼahi ’e lua: ʼe natou kau ki ai kaʼe ’e mole totogi natou pea ʼe natou foaki he ’u meʼa ʼofa ’aki he lotolelei.

ʼE matou mulimuli ki te tokoni Fakatohi-tapu ʼaeni ne’e fai ki te kau Kilisitiano: “Ke foaki e te tagata takitahi o mulimuli ki te mea ae kua fakapapau ki ai i tona loto, kae mole i te loto mamahi, pee i te fakamaua, koteuhi e ofa te Atua ki ae e foaki mo te fiafia.”—2 Kolinito 9:7.