4 Te Lotofakamolemole

TONA FAKAʼUHIGA

Ko te fakaʼuhiga ʼo te lotofakamolemole ke ke liʼaki te loto ita mo te lotokovi taʼofi. Pea ʼe mole fakamaʼua atu ke ke meʼa noaʼi te kovi ʼae neʼe fai atu peʼe ke ke mole tokagaʼi ohage neʼe mole hoko.

PELESEPETO FAKATOHI-TAPU: “Kotou haga fekatakiʼaki, pea mo fefakamolemoleʼaki ʼaki he lotolelei, tatau aipe pe ʼe ʼi ai hokotou fihifihia mo he tahi.”—Kolose 3:13.

’E ui fenei e Aaron: “Kapau ʼe ke ʼofa ʼi he tahi pea ʼe ke fakalaka anai ʼi ʼana agahala. ʼE ke sioʼi anai ʼana faiga ʼae ke fetogi.”

TONA MAʼUHIGA

Ka ke taʼofi te loto ita ʼe fakatupu kovi ki te sino pea mo te ʼatamai. Pea, ʼe toe maumauʼi ai foki mo te nofo ʼohoana.

ʼE ui fenei e Julia: “ ʼI te tahi ʼaho, neʼe faifakalelei mai toku ʼohoana ʼo ʼuhiga mo te meʼa neʼe au loto mamahi ʼaupito ai. Neʼe faigataʼa taku maʼu te lotofakamolemole, kae neʼe au tali gafua pe. Neʼe au fakahemala ʼi taku mole fakamolemole vave. He neʼe mā hoha noa ai.”

TE MEʼA ʼAE ʼE FEALA KE KE FAI

SIVISIVI IA KOE

Ka fai atu peʼe neʼe ui atu e tou ʼohoana he meʼa ʼe ke lotomamahi ai, fai te ʼu fehuʼi ʼaeni:

• ‘ ʼE au pelepelegesi koa?’

• ‘ ʼE mamafa fau koa te aga kovi ʼae neʼe fai mai ke fakamaʼua ki ai he faifakalelei peʼe ʼe feala pe ke au fakalaka ai?’

FAIPALALAU MO TOU HOA

• ʼE vave pe koa hamā fefakamolemoleʼaki?

• Kotea ʼae ʼe tonu ke mā fai ke mā fefakamolemoleʼaki atu aipe?

TOKONI

• Kapau neʼe fai atu e tou ʼohoana he meʼa ʼe ke mamahi ai, ʼaua naʼa ke manatu neʼe ina fai ʼaki he loto ʼe kovi.

• Faigaʼi ke ke fakamolemole te aga ʼa tou ʼohoana ʼo ke manatuʼi “ ʼe lahi te ʼu lakaga ʼe tou lakahala fuli ai.”—Sakopo 3:2.

ʼE ui fenei e Kimberly: “ ʼE faigafua te fakamolemole moka neʼe mā lakahala tokolua. Kae, ʼe faigataʼa age moka neʼe ko he tokotahi pe ʼae neʼe lakahala. ʼE ʼaoga te agavaivai ke kita tali ai te ʼu faifakalelei pea mo fakamolemole gafua ki ai.”

PELESEPETO FAKATOHI-TAPU: “Foimo fakatokatoka.”—Mateo 5:25.