Te ʼu Kokelekasio Moʼo Fakaloto Mālohi ʼi Te ʼOfa Pea Mo Te Logo Tahi
Lagi neʼe koutou ʼolo ki he ʼu fono ʼi he kokelekasio ʼa te kau Fakamoʼoni ʼa Sehova ʼe ōvi atu ki tokotou ʼapi. ʼE ʼi ai te hahaʼi ʼe ʼōmai mai te ʼu famili kehekehe, te hahaʼi selipatea, te ʼu matuʼa pea mo te kau tūpulaga. ʼE nātou logo tahi fuli ʼi tanatou tauhi pea ʼe nātou tokakaga ʼo tokoni ki niʼihi.
Ka fia gāue he hahaʼi tokolahi ʼi te logo tahi, pea ʼe ʼaoga ke fai he fakatuʼutuʼu. Ko te ʼAtua ʼe ko te ʼAtua ʼo te tokalelei; koia la ʼaē ʼe tonu ke hā ai te faʼahi ʼaia ʼi te kokelekasio ʼaē ʼe faʼufaʼu e tana hahaʼi. Ohage pe ko te ʼuluaki sēkulō, ia ʼaho nei, ko he kau Kilisitiano faiva, mo fakapotopoto pea mo māhani ʼe fakanofo ia nātou ko he kau tagata ʼāfea. ʼE nātou takitaki te kokelekasio pea mo nātou foaki kiai te ʼu meʼa ʼe ʼaoga ʼi te faʼahi fakalaumālie. ʼE lagolago kia nātou te tahi ʼu tagata agatonu ʼe higoa ko te ʼu tagata faifekau faka minisitelio. ʼE mole totogi te ʼu tagata ʼaia peʼe foaki age kia nātou he koloā kae nātou gāue mo tonatou loto katoa, ko te ʼu meʼa ʼaē ʼe ʼaoga kia nātou ʼe nātou maʼu mai tanatou gāue ki tonatou ʼu patolo.—1 Kolonito 14:33, 40; Filipe 1:1; 1 Timoteo 3:8, 9.
E feafeaʼi koa tonatou fili? ʼE ʼaoga ke fili ʼi te kau kaugana agatonu ki te ʼAtua ʼaē ʼe nātou maʼuliʼi te ʼu fakamaʼua faka Tohi-Tapu. Koʼeni te ʼu fakamaʼua ʼi te ʼu fakamaʼua faka Tohi-Tapu ʼaia: ke ‘nātou agapoto, ke nātou maʼu he ʼatamai ʼe lelei, ke nātou aga fakatokatoka; ke nātou maʼu te ʼofa kāiga; ke nātou faiva ʼi te fai akonaki, ke nātou fakapotopoto; ke mole nātou kaumeʼa mo te paʼaga; ke nātou puleʼi fakalelei ʼonatou loto fale; ʼe mole tonu ko he ʼu tagata ʼe kei foʼofoʼou ʼi te moʼoni; ʼe toe tonu foki ke nātou maʼu he fakamoʼoni lelei mai te hahaʼi ʼaē ʼo tuʼa’; ‘ke nātou pipiki mālohi ki te folafola agatonu ʼo ʼuhiga mo tanatou fai akonaki.’—1 Timoteo 3:1-15; Tito 1:7-9.
Ko te ʼu tagata ʼaia neʼe mole fakanofo e te kokelekasio, ʼaē ko te tokolahi ia nātou ko te kau Kilisitiano foʼou. Kae, ʼe hinoʼi nātou e te ʼu tagata kua māhani pea mo fakapotopoto, te ʼu tagata ʼāfea pea ʼe nātou maʼu te fakasiosio tonu, ke feala ai hanatou fakatokagaʼi peʼe feafeaʼi te maʼuliʼi e te ʼu tagata ʼaia te ʼu lekula ʼe fakamaʼua kia nātou e te Tohi-Tapu. Ko te fili ʼo te ʼu tagata ʼāfea pea mo te ʼu tagata faifekau faka minisitelio ʼe toe fai foki ʼi te takitaki ʼa te Kolesi Pule ʼa te kau Fakamoʼoni ʼa Sehova, ʼi te faʼahi ʼaia ʼe nātou mulimuli ki te faʼifaʼitaki ʼa te kokelekasio faka Kilisitiano ʼo te ʼuluaki sēkulō.
Ko te ʼu tagata ʼāfea ʼaia, peʼe tagata taupau, ʼe mole nātou faʼufaʼu he kalasi ʼo he kau takitaki lotu; ʼe mole nātou pule fakamālohi ki niʼihi. Ohage ko te ʼui e Sesu, ko ʼaē ʼe fia takitaki ki te faga ōvi ʼe tonu ke liliu ko te kaugana ʼo nātou fuli. ʼI te kokelekasio ʼa te kau Fakamoʼoni ʼa Sehova, ko te ʼu tagata ʼāfea ʼe ko te ʼu kaugā gāue moʼoni ʼo te Puleʼaga ʼo te ʼAtua.—Mateo 20:26, 27; 23:8-11; Loma 12:8; 1 Kolonito 3:5; 4:1, 2; Kolose 4:11; 1 Tesalonika 5:12-14.
ʼI tonatou ʼuhiga tagata taupau, ʼe nātou takitaki te ako ʼaē ʼe fai ʼi te ʼu fono pea ʼe nātou tuku he faʼifaʼitaki ʼi te gāue fai faka mafola. Ko te fai faka mafola ʼo te logo lelei ʼi te telituale ʼaē neʼe tuku age ki ai, ʼe ko te ʼuluaki fakatuʼutuʼu ʼaia ʼa te kokelekasio. Ko te ʼu tagata taupau ʼe nātou gāue foki ko te ʼu tagata tauhi ōvi, ʼo nātou ʼaʼahi ia nātou ʼo te kokelekasio ʼo fakaloto mālohiʼi ia nātou ʼo fai pe ki te ʼu meʼa ʼaē ʼe ʼaoga kia nātou.—Mateo 24:14; Gāue 1:8; 1 Tesalonika 2:11, 12; 5:14, 15; 2 Timoteo 2:24-26; Hepeleo 13:17; Sake 5:13-16; 1 Petelo 5:1-4.
Ko te ʼu tagata ʼāfea ʼe nātou toe maʼu foki mo te maʼua ʼaē ko te akonakiʼi pea mo te fakatonutonuʼi ʼo he tahi, neʼe ina muliʼi he ala ʼe kovi pea ʼe feala ke fakatupu tuʼutāmaki ki te ʼuhiga maʼa ʼi te faʼahi fakalaumālie, pea mo te aga ʼaē ʼe tonu ke fai ʼo feiā mo te logo tahi ʼo te kokelekasio.—1 Kolonito 5:4, 5, 7, 11-13; Tito 1:9; 2:15; 3:10, 11.
Ko te fakatahi tuʼumaʼu mo te kokelekasio ʼe ina foaki atu anai kia koutou he ʼu kaugā fagona lelei pea mo he ʼu lelei lahi ʼi te faʼahi fakalaumālie.—Pesalemo 35:18; 84:10.
• Ko ai ʼaē ʼe tokaga ki te haʼele lelei ʼo te ʼu kokelekasio takitahi?
• ʼE fakatafito kiteā te fili ʼo te ʼu tagata taupau ʼaia?
• Koteā koa tonatou ʼu maʼua?
[Paki ʼo te pasina 13]
Ko te ʼu tagata taupau ʼe nātou ako te kokelekasio, mo nātou tuku he faʼifaʼitaki ʼi te gāue fai faka mafola ʼi te ʼu ʼapi, mo nātou fakaloto mālohiʼi te kau Kilisitiano ʼaki tanatou ʼu ʼaʼahi faka tauhi ōvi, mo foaki he ʼu tokoni pea mo fakatonutonuʼi ia nātou mokā ʼe ʼaoga