Kapite 14

Te ʼu ʼUluaki Tisipulo ʼa Sesu

ʼI TE ʼosi ʼo ʼaho e 40 ʼaē neʼe nofo ai ʼi te toafa, neʼe toe liliu mai ia Sesu kia Soane, ʼaē neʼe ina papitemaʼi ia ia. ʼI tana fakaōvi mai, ʼe mahino neʼe hinoʼi ia ia e Soane kia nātou ʼaē ʼe nātou nonofo mo ia, ʼo ina ʼui fēnei: “Koʼeni te Akeno ʼa te ʼAtua ʼaē ʼe ina toʼo te agahala ʼo te malamanei! ʼE ko ia ʼaenī neʼe tupu ai taku ʼui fēnei: ʼI muli ia te ʼau ʼe haʼu te tagata neʼe muʼamuʼa ia te ʼau, he neʼe kua maʼuli ia ka heʼeki ʼau tupu ʼau.” Logope neʼe muʼa ia Soane ʼi tona tēhina mataʼi tama ko Sesu, neʼe ina ʼiloʼi lelei ia ko Sesu neʼe maʼuli ʼi te lagi ko he laumālie ʼi muʼa ʼo tana haʼu ʼo tupu ko he tagata ʼi te kele.

Kae, ʼi te ʼu vāhaʼa ki muʼa atu, ʼi te temi neʼe haʼu ai Sesu ke papitemaʼi, neʼe mole heʼeki ʼiloʼi papau e Soane ko ia ʼaē ka liliu ko te Mesia. “Pea mo ʼau foki neʼe mole ʼau ʼiloʼi ia ia, ko tana ʼui age ʼaia, kae koteʼuhi ke fakahā ia ia ki Iselaele, koia neʼe ʼau haʼu ai ʼo fai papitema ʼi te vai.”

Pea ʼosi ʼaia pea ina fakamatala kia nātou ʼe nātou fagono kia ia, te meʼa ʼaē neʼe hoko ʼi te temi neʼe ina papitemaʼi ai ia Sesu: “Neʼe ʼau sio ki te laumālie ʼe hifo mai te lagi ohage he lupe hina, pea neʼe haʼu ia ʼo tuʼu kia te ia. Pea mo ʼau foki neʼe mole ʼau ʼiloʼi ia ia, kae ko Ia totonu ʼaē neʼe ina fekauʼi mai ʼau ke ʼau haʼu ʼo fai papitema ʼi te vai, neʼe ina ʼui mai kia te ʼau: ‘Ko ia ʼaē ka ke sio anai ʼe hifo ki ai te laumālie ʼo tuʼu kia te ia, ko ia ʼaia ʼaē ʼe fai papitema ʼi te laumālie maʼoniʼoni.’ Pea neʼe ʼau sio ki te meʼa ʼaia, pea neʼe ʼau fakamoʼoni ko ia nei ʼe ko te ʼAlo ʼo te ʼAtua.”

ʼI te ʼaho ake, neʼe tutuʼu ia Soane pea mo te toko lua ʼo tana ʼu tisipulo ʼi te koga meʼa ʼaia. Pea ʼi tana sio ki te haʼu ʼa Sesu, neʼe ina toe ʼui fēnei: “Koʼeni te Akeno ʼa te ʼAtua! ” ʼI te fai ʼo te ʼu palalau ʼaia, neʼe maliu te ʼu tisipulo ʼaia e lua ʼa Soane Patita ʼo muliʼi ia Sesu. Ko te tahi ia nāua ʼe higoa ko Atelea, pea ko te tahi e lagi mahalo pe ko ia totonu ʼaenī neʼe ina fakamatala mai te ʼu meʼa ʼaenī neʼe hoko; ʼe toe higoa foki mo ia ko Soane. Ko te Soane ʼaia ʼi tona maʼu mai te Tohi-Tapu ʼe ko te tahi pe tēhina mataʼi tama ʼo Sesu, heʼe ko te tama ʼa Salome, tēhina ʼo Malia.

ʼI tana maliu mai ʼo sio kia Atelea pea mo Soane ʼe mumuli age ia ia, neʼe fehuʼi age e Sesu: “Koteā te meʼa ʼaē ʼe koulua kumi? ”

“Lapi, ko tanā fehuʼi age ʼaia, ʼe ke nofo ʼifea? ”

“Koulua ʼōmai pea ʼe koulua sisio ai anai”, ko te tali age ʼaia ʼa Sesu.

Ko te vaʼevaʼe hola fā ʼaia ʼo te hoʼatā, ko Atelea pea mo Soane neʼe nā nonofo ʼi te fakaʼosiʼosi ʼo te hili hoʼatā ʼaia pea mo Sesu. Ki muli age, ʼi te lahi ʼo te loto fiafia ʼo Atelea, neʼe lele ia ʼo kumi tona tēhina, ʼe higoa ko Petelo. ʼO ina ʼui age ki ai: “Kua mātou maʼu te Mesia.” Pea ina taki ai ia Petelo kia Sesu. Pea ʼi te temi ʼaia, neʼe lagi ʼalu foki mo Soane ʼo taki mai tona tēhina ko Sake kia Sesu. Kae ʼi te agamāhani ʼa Soane, neʼe mole ina fakamatala te faʼahiga meʼa ʼaia ʼi tana Evaselio.

Pea ʼi te ʼaho ake, neʼe felāveʼi ia Sesu pea mo Filipo ko te tagata mai Petesaita, ko te kolo ʼaia neʼe ʼuluaki nonofo ai ia Atelea pea mo Petelo ʼi muʼa atu. ʼO ina fai age te fakaafe ʼaenī: “Haʼu ʼo muli mai ia te ʼau.”

Pea toe feiā, mo Filipo neʼe ina maʼu ia Natanaele ʼaē, ʼe toe higoa foki ko Paletolomeo, ʼo ina fakahā age ki ai: “Kua mātou maʼu ia ia ʼaē neʼe tohi ki ai ia Moisese, ʼi te Lao, pea mo te kau Polofeta: ko Sesu, foha ʼo Sosefo, mai Nasaleti.” Ka neʼe mole faʼa tui ki ai ia Natanaele. “ ʼE feala koa ke ʼasi he meʼa ʼe lelei mai Nasaleti?” ko tana fehuʼi age ʼaia.

“Haʼu ʼo sio”, ko te ʼui fakamalotoloto age ʼaia ʼa Filipo. ʼI tanatou fakaʼau age kia ia, neʼe ʼui age e Sesu ʼo ʼuhiga mo Natanaele: “Koʼeni ia te tagata Iselaele moʼoni, ʼaia ʼe mole ʼi ai he kākā ia te ia.”

“He koʼe ʼe ke ʼiloʼi ia ʼau? ” ko te punamaʼuli age ʼaia ʼa Natanaele.

“ ʼI muʼa ʼo te pāuiʼi ʼo koe e Filipo, ka ke nofo ʼi te lalo fuʼu fiku, neʼe ʼau sio atu kia te koe.”

“Lapi [ko tona faka ʼuhiga ko te Tagata fai akonaki], ko koe ko te ʼAlo ʼo te ʼAtua, ko koe ko te hau ʼo Iselaele”, ko te ʼui age ʼaia ʼa Natanaele ʼi tana kua ōfo.

“ ʼI taku ʼui atu ʼaē neʼe ʼau sio kia te koe ʼi te lalo fuʼu fiku, kua ke tui ai? ko te fehuʼi age ʼaia ʼa Sesu. ʼE ke sio anai ki he ʼu meʼa ʼe lalahi age ʼi te meʼa ʼaenī.” Pea ina fai age te fakapapau ʼaenī: “ ʼE ʼau tala moʼoni atu kia koutou: ʼe koutou sisio anai ki te lagi ʼe ava pea mo te kau ʼaselo ʼa te ʼAtua ʼe nātou hahake ake pea mo hihifo ifo ki te Foha ʼo te tagata.”

Pea ʼosi pe ʼaia, pea mavae ia Sesu mo tana ʼu tisipulo foʼou ʼi te potu fenua ʼo Solotane pea nātou ʼolo ki Kalilea. Soane 1:29-51.

▪ Ko ai te ʼu ʼuluaki tisipulo ʼa Sesu?

▪ Neʼe feafeaʼi ʼapē te ʼave ʼo Petelo pea mo Sake kia Sesu?

▪ Koteā te tupuʼaga ʼaē ʼo te ʼiloʼi papau e Natanaele ko Sesu ko te ʼAlo ʼo te ʼAtua?