Kapite 25

Neʼe ʼOfa Ia Sesu Ki Te Tagata Kilia

ʼI TE lolotoga ʼo te foli ʼa Sesu, pea mo tana ʼu tisipulo ʼaē e fā ʼo fai faka mafola ʼi te ʼu kolo ʼo Kalilea, ko te talanoa ʼaē ʼo ʼuhiga mo te ʼu meʼa fakatalakitupua ʼaē neʼe ina fai neʼe mafola ʼi te tisitilike katoa, ʼo aʼu ki te kolo ʼe nofo ai te tagata kilia. Neʼe fakahā e te tōketā ko Luka ko te tagata ʼaia neʼe “fonu ʼi te kilia”. Ko te mahaki ʼaia mokā kua fualoa tona maʼu ʼe ina kaina mamalie te ʼu faʼahi kehekehe ʼo te sino. Ko te tagata kilia ʼaia neʼe kua kovi ʼaupito tona mahaki.

ʼI te kaku mai ʼa Sesu ki te kolo ʼaia, neʼe ʼalu atu te tagata kilia ʼo fakatau atu ki ai. ʼI te Lao ʼa te ʼAtua, ʼe tonu ke fakahā e te tagata kilia fuli pe ki te hahaʼi ʼe fakaōvi mai kia ia ʼo pāui fēnei: “Heʼemaʼa, heʼemaʼa!” ko te faiga ʼaia ke ʼaua naʼa ōvi fau mai te hahaʼi kia ia pea feala ke nātou maʼu ai te mahaki. Ko te tagata kilia neʼe hū age kia te ia pea ina ʼui maʼa ia kia Sesu: “ ʼAliki, kapau ʼe ke loto kiai, pea ʼe feala ke ke fakaliliu ʼau ke ʼau maʼa.”

ʼI ʼana tui leva kia Sesu! Kae, ʼaki tona mahaki, kua fakaʼofaʼofa ʼaupito te tagata ʼaia. Koteā te meʼa ka fai e Sesu? Koteā te meʼa ʼe koutou fai anai? ʼAki te lahi ʼo tona ʼofa, neʼe faoʼi atu te nima ʼo Sesu ʼo fāfā ki te tagata ʼo ʼui maʼana: “ ʼE ʼau loto kiai. Ke ke liliu ʼo maʼa.” ʼI te temi pe ʼaia, neʼe puli ai te kilia ia te ia.

ʼE koutou fakaʼamu anai koa ki he hau manavaʼofa fēnei? Ko te aga ʼa Sesu ki te tagata kilia ʼaia ʼe feala ai ke tou falala ko te lolotoga ʼo Tona temi hau ʼe ina fakahoko anai te lea faka polofeta ʼaenī: “ ʼE ʼofa anai ia kia ia ʼaē ʼe veliveli pea mo ʼaē ʼe masiva, pea ʼe ina hāofaki anai te ʼu nefesi ʼo te kau masiva.” ʼIo, ʼe fakahoko anai e Sesu te meʼa ʼaē ʼe loto tāfito kiai: ʼaē ko te tokoni kia nātou fuli ʼe nonofo ʼi te mamahi.

Ko te minisitelio ʼo Sesu neʼe kua lave ki te kau Sutea ʼi muʼa atu ʼo tana fakamālōlō te tagata kilia. Kae neʼe toe fakahoko e Sesu te tahi lea faka polofeta ʼa Isaia ʼi tana ʼui age ʼaē ki te tagata ʼaē neʼe ina fakamālōlō: “Vakaʼi naʼa ke tala ki he tahi.” Pea ina toe fai age ki ai te fakatotonu ʼaenī: “ ʼAlu ʼo hā ki te pelepitelo pea ke foaki ʼo ʼuhiga mo tou fakamaʼa ia te mōlaga ʼaē neʼe fakatotonu e Moisese, ko te fakamoʼoni kia nātou.”

Kae ʼi te lahi ʼaupito ʼo te fiafia ʼo te tagata ʼaia neʼe mole ina lavaʼi ia ke ina tukunoaʼi te milakulo ʼaia. Neʼe ʼalu ia pea ina faka mafola te logo ʼaia ʼi te ʼu potu fuli. ʼE ʼiloga mai ia, neʼe ina fakatupu te fia ʼiloʼi ʼo te ʼu meʼa ʼaia e te hahaʼi, koia neʼe mole kei feala ai ke haʼu fakahāhā ia Sesu ki he kolo. Koia neʼe nofo ai ia ʼi te ʼu potu lāvaki ʼe mole nofoʼi, pea neʼe lahi te ʼu hahaʼi neʼe ʼōmai kia ia mai te ʼu potu fuli, ko tonatou fia logo ki ai pea mo fakamālōlō ia nātou mai tonatou ʼu mahaki. Luka 5:12-16; Maleko 1:40-45; Mateo 8:2-4; Levitike 13:45; 14:10-13; Pesalemo 72:13; Isaia 42:1, 2.

▪ ʼE feala ke feafeaʼi te kilia ki he tahi, pea ko te fakatokaga feafeaʼi ʼaē ʼe tonu ke fai e he tagata kilia?

▪ Ko te kole mamahi feafeaʼi ʼaē neʼe fai e te tagata kilia kia Sesu, pea koteā tatatou maʼu ki te aga ʼa Sesu?

▪ Koteā te meʼa ʼaē neʼe mole fakalogo ai te tagata ʼaia kia Sesu ʼi tona ʼosi fakamālōlō, pea koteā tona ʼu fua?