Kapite 53

ʼE Nātou Loto Ki He Pule ʼe Māʼoluga Ake ʼi Te Tagata

ʼI TANATOU sisio ki te fafaga faka milakulo e Sesu te hahaʼi ʼe lauʼi afe, neʼe ōfo te hahaʼi. ʼO nātou kalaga: “Ko ia nei ʼe ko te polofeta moʼoni ʼaē ʼe tonu ke haʼu ki te malamanei.” Neʼe nātou manatu ai ʼo mole gata ʼaki pe tanatou ʼui ʼaē ko Sesu e lagi ko te polofeta ʼaē ʼe lahi ake ia Moisese, kae ʼe ko he pule lelei ʼaupito anai ia. Neʼe nātou fakakaukau ai ke nātou puke ʼo fakanofo ko he hau.

Kae ʼe ʼiloʼi e Sesu te ʼu manatu ʼa te hahaʼi. Koia neʼe foimo puli fakavilivili ai ke ʼaua naʼa ʼave fakakinau. Neʼe ina fekauʼi te hahaʼi ke ʼolo pea ina fakamaʼua tana kau tisipulo ke nātou heheka ki tonatou vaka pea ke nātou ʼolo ki Kapenaume. ʼOsi ʼaia pea hake ia ki te moʼuga ko te faikole. Ko te po ʼaia, neʼe nofo tokotahi ia Sesu.

ʼI muʼa ʼo te hegihegi ʼo te māfoatā, ʼi te potu māʼoluga ʼaē ʼe nofo ai, neʼe sio ia Sesu ko te tai kua hou koteʼuhi ʼe lalahi te matagi. ʼI te mālama ʼaē ʼo te māhina, ʼaē kua teitei katoa heʼe kua ōvi mai te Pāsikate, neʼe ʼiloʼi atu e Sesu te vaka, pea mo tana kau tisipulo ʼe nātou faiga ke ʼalu ki muʼa tonatou vaka ʼi te tai ʼaē kua tokakovi. ʼO nātou tau ʼaʼalo ʼaki tonatou mālohi katoa.

ʼI te sio ʼa Sesu ki te meʼa ʼaia, neʼe hifo ia mai te moʼuga pea haʼele ʼi te ʼu vāhaʼa peau ʼo ʼalu ki te vaka. Ko te mamaʼo ʼo te ʼalu ʼo te vaka ko kilometa e nima ki te ono ʼi te temi ʼaē neʼe aʼu atu kiai ia Sesu. Kae neʼe haga haʼele pe ia Sesu ohage ʼe hoko atu tona fagona. ʼI tanatou sisio atu ki ai, neʼe kalaga fēnei te kau tisipulo: “Ko te laumālie!”

Kae neʼe lea atu ia ʼo fakafimālieʼi ia nātou: “Ko ʼau pe; ʼaua naʼa koutou matataku.”

Pea tali e Petelo ʼo ʼui maʼana kia te ia: “ ʼAliki, kapau ko koe, pea fakatotonu mai kia te ʼau ke ʼau ʼalu atu kia te koe ʼi te fuga tai.”

“Haʼu!” ko te tali age ʼaia ʼa Sesu.

Pea ʼi te hifo ʼa Petelo ʼi te vaka, neʼe haʼele ʼi te fuga tai ʼo ʼalu kia Sesu. Kae, ʼi tana sio ki te afā, neʼe mataku ia pea ʼi tana kua kamata moū, neʼe kalaga ia: “ ʼAliki, hāofaki ʼau!”

Pea neʼe faoʼi atu aipe e Sesu tona nima ʼo ina puke pea mo ʼui maʼana kia te ia: “Tagata tui vaivai, koteā ʼaē neʼe ke lotolotolua ai?”

ʼI te ʼosi heka ʼa Petelo pea mo Sesu ki te vaka, pea gona ai te matagi, ʼo punamaʼuli ai tana ʼu tisipulo. Kae neʼe tonu koa ke nātou punamaʼuli? Ka na neʼe nātou mahino la ki te “faka ʼuhiga ʼo te ʼu pane” ʼo mahino ki te maʼuhiga ʼo te milakulo ʼaē neʼe fai e Sesu ʼi te ʼu hola ki muʼa atu, ʼi tana fafaga te hahaʼi ʼe lauʼi afe ʼaki pe te ʼu foʼi pane e nima pea mo te ʼu kiʼi ika e lua, ka na ʼaua la ʼe mole nātou punamaʼuli ki tana haʼele ʼi te fuga tai pea mo tana faka gona te matagi. Kae ʼi te temi leva ʼaē, ʼe hu te kau tisipulo kia Sesu, ʼo ʼui maʼa nātou: “Ko koe ko te ʼAlo moʼoni ʼo te ʼAtua.”

Mole fuafualoa, pea nātou tau ki Senesaleti, ko te potu fenua tokalelei mo taulekaleka pea mo kele lelei ʼe ōvi atu ki Kapenaume, pea nātou tuku tau ai. Kae ʼi tanatou hake ki ʼuta, neʼe ʼiloʼi e te hahaʼi ia Sesu, pea nātou ʼolo ai ʼi te potu fenua katoa ʼe tafa mai ʼo kumi ia nātou ʼe mahahaki. ʼI te ʼaumai ʼo te ʼu mahaki ʼi tonatou ʼu palepale taki pea mo nātou fāfā ki te tapa ʼo tona kofu, neʼe nātou mālōlō ʼosi ai.

ʼI te temi ʼaia, neʼe fakatokagaʼi e te hahaʼi ʼaē ʼe lauʼi afe ʼaē neʼe fafaga faka milakulo e Sesu kua ʼalu ia. Koia, ʼi te tau mai ʼo te ʼu vaka liliki mai Tipeliate, neʼe nātou heheka kiai pea nātou ʼolo ki Kapenaume, ko te kumi ʼo Sesu. Pea ʼi tanatou maʼu, neʼe nātou fehuʼi age ki ai: “Lapi, ko ʼanafea ʼaē neʼe ke tau mai ai ki henī?” Ohage ko te meʼa ka tou vakaʼi anai, ʼe fakatonutonuʼi anai ia nātou e Sesu. Soane 6:14-25; Mateo 14:22-36; Maleko 6:45-56.

▪ ʼI te ʼosi ʼo te fafaga faka milakulo e Sesu te hahaʼi ʼe lauʼi afe, koteā te meʼa ʼaē neʼe faigaʼi e te hahaʼi kia ia?

▪ Koteā te meʼa ʼaē neʼe sio kiai ia Sesu mai te moʼuga ʼaē neʼe nofo ai, pea koteā te meʼa neʼe ina fai?

▪ He koʼe neʼe mole tonu ke punamaʼuli te kau tisipulo ʼo ʼuhiga mo te meʼa ʼaē neʼe fai e Sesu?

▪ Koteā te meʼa neʼe hoko ʼi tanatou tau ki te kauvai?