Kapite 69

Fehuʼi ʼo ʼUhiga Mo Te Tupuʼaga

LOLOTOGA te lafeti, kua lahi te fepalalauʼaki ʼa Sesu pea mo te ʼu pule ʼo te kau Sutea. “ ʼE ʼau ʼiloʼi ko koutou ko te hōloga ʼo Apalahamo, ko te ʼui age ʼaia ʼa Sesu; kae e koutou faiga ke koutou matehi ʼau, heʼe ko taku folafola ʼe mole tuputupu ia koutou. Ko te meʼa ʼaē neʼe ʼau sio kiai ʼi te nofoʼaga ʼo taku Tāmai, ʼe ʼau fakahā; pea ko koutou, e koutou fai te ʼu meʼa ʼaē neʼe koutou logo kiai mai takotou tāmai.”

Neʼe fakahā fakalelei age e Sesu ko tanatou tāmai, ʼe kehe ia mo tana Tāmai, tatau aipe pe neʼe mole ina hinoʼi age tona higoa. ʼI tanatou mole mahino peʼe ko ai ʼaē ʼe manatu Sesu ki ai, neʼe tali age e te ʼu pule ʼo te kau Sutea: “Ko tamatou tāmai, ko Apalahamo.” Neʼe ʼui maʼa nātou ʼe tatau tanatou tui pea mo Apalahamo, ʼaē neʼe ko te kaumeʼa ʼo te ʼAtua.

Kae, neʼe faka galivaleʼi nātou e Sesu ʼaki tana tali ʼaenī: “Kapau ko koutou ko te ʼu fānau ʼa Apalahamo, koutou fai te ʼu gāue ʼa Apalahamo.” ʼE moʼoni foki, ko he foha moʼoni ʼe ina faʼifaʼitakiʼi tana tāmai. “Kae ʼi te temi nei ʼe koutou faigaʼi ke koutou matehi ʼau, ia ʼau, ko he tagata neʼe ʼau ʼui atu te moʼoni ʼaē neʼe ʼau logo kiai mai te ʼAtua. Neʼe mole fai e Apalahamo te meʼa ʼaia.” ʼO ina toe ʼui age: “ ʼE koutou fai, koutou, te ʼu gāue ʼo takotou tāmai.”

Ko te ʼu pule ʼo te kau Sutea ʼe tuʼu aipe tanatou mole mahino pe ko ai ʼaē ʼe faka ʼuhiga ki ai te ʼu palalau ʼa Sesu. ʼO nātou toe ʼui age ko nātou ko te ʼu foha totonu ʼo Apalahamo: “Neʼe mole mātou tupu mai te folonikasio.” Koia ʼaē, ʼi tanatou fakamoʼoni ko nātou ko te ʼu hahaʼi atolasio moʼoni ohage ko Apalahamo, neʼe nātou ʼui age: “Ko tamatou Tāmai pe e tahi, ko te ʼAtua.”

Kae ko tanatou Tāmai moʼoni koa te ʼAtua? “Kapau ko te ʼAtua ko takotou Tāmai, ko te ʼui age ʼaia ʼa Sesu, ʼe koutou ʼoʼofa anai kia te ʼau, koteʼuhi neʼe ʼau haʼu mai te ʼAtua, pea kua ʼau nofo ʼi henī. Kailoa, neʼe mole ʼau haʼu ʼi toku loto faʼifaʼitaliha, kae ko Ia ʼaē neʼe ina fekauʼi mai ʼau. He koʼe ʼe mole koutou mahino ki taku palalau?”

Neʼe faiga Sesu ʼo fakahā ki te kau takitaki lotu ʼaia te ʼu ikuʼaga ʼe hoko anai kia nātou ʼuhi ko tanatou fakafisi ʼaē kia te ia. Kae ʼi te temi nei ʼe ina ʼui age fakahagatonu kia nātou: “ ʼE koutou ʼōmai, koutou, mai tokotou tāmai, te Tevolo, pea ʼe koutou fia fakahoko te ʼu meʼa ʼaē ʼe holi ki ai takotou tāmai.” Kae ko he faʼahiga tāmai feafeaʼi koa te Tevolo? Neʼe fakahā e Sesu ko te tagata fai fakapō pea neʼe ina toe ʼui age: “ ʼE gutuloi ia pea ʼe ko te tāmai ʼo te loi.” Pea neʼe ina fakaʼosi fēnei tana palalau: “Ko ʼaē ʼe haʼu mai te ʼAtua ʼe fakalogo ki te ʼu folafola ʼa te ʼAtua. Heʼe koia la ʼaē, ʼe mole koutou fakalogo ai, koteʼuhi ʼe mole koutou ʼōmai mai te ʼAtua.”

ʼI tonatou ʼiʼita ʼi te tautea ʼa Sesu, neʼe tali fēnei age e te kau Sutea: “Neʼe mole moʼoni koa la tamatou ʼui atu: Ko koe ko te Samalitana pea ʼe ia te koe te temonio?” Neʼe ʼui maʼa nātou ko ia ko he “Samalitana” ʼi tonatou fehiʼa ki ai pea mo tana ʼu palalau, heʼe fehiʼaʼinaʼi te kau Samalitana e te kau Sutea.

ʼI tana mole ina fakaʼaogaʼi te palalau fakalainoa ʼo ʼuhiga mo te kau Samalitana, neʼe tali age fēnei e Sesu: “ ʼE mole ia te ʼau he temonio, kae ʼe ʼau fakavikiviki taku Tāmai, pea ko koutou, ʼe koutou fakamelemeleʼi ʼau.” ʼO hoko atu tana palalau ʼaki te fakapapau fakaofoofo ʼaenī: “Kapau ʼe ʼi ai he tahi ʼe ina maʼuliʼi taku folafola, ʼe mole ina ʼiloʼi anai te mate.” ʼE moʼoni, neʼe mole fia ʼui e Sesu ʼi henī ko nātou fuli ʼaē ʼe faʼifaʼitaki ki ai ʼe mole nātou mamate anai ʼi he ʼaho. ʼE hā mai ʼi tana ʼu palalau, ʼe mole nātou tau anai mo te mate heʼegata, peʼe ko te “lua mate”, ʼaē ʼe mole feala te toe fakatuʼuake ai.

Kae, ko te kau Sutea mole nātou mahino ki te lea fakatātā ʼa Sesu. Neʼe nātou toe ʼui age: “ ʼI te temi nei kua mātou ʼiloʼi ʼe ia te koe te temonio. Kua mate ia Apalahamo ʼo feiā foki mo te kau polofeta, pea koʼeni ʼe ke ʼui mai koe: ‘Kapau ʼe ʼi ai he tahi ʼe ina maʼuliʼi taku folafola, ʼe mole ina ʼiloʼi anai te mate.’ ʼE ke lahi ake koa la koe ʼi tamatou tāmai ko Apalahamo, ʼaē kua mate? Pea ko te kau polofeta foki kua mamate. Koteā koa tau ʼui ʼo ʼuhiga mo koe?”

Lolotoga te fai palalau ʼaia, neʼe hā ʼaki mai neʼe fia fakahā age e Sesu ki te ʼu tagata ʼaia ko ia ko te Mesia ʼaē neʼe fakapapauʼi mai. Kae, neʼe mole ina tali fakahagatonu ki tanatou fehuʼi ʼo ʼuhiga mo ia, ka neʼe ina fakamahino age: “Kapau ʼe ʼau fakavikiviki ia ʼau totonu, pea ʼe ʼalunoa toku kolōlia. Ko taku Tāmai ʼaē ʼe ina fakavikiviki ʼau; ia ia ʼaē ʼe koutou ʼui ko tokotou ʼAtua; kae ʼe mole koutou ʼiloʼi ia ia. Kae ko ʼau ʼe ʼau ʼiloʼi ia ia. Pea kapau ʼe ʼau ʼui atu ʼe mole ʼau ʼiloʼi ia ia, ʼe ʼau hage anai ko koutou, ko he tagata gutuloi.”

ʼOsi ʼaia pea toe palalau ia ʼo ʼuhiga mo Apalahamo te tagata agatonu: “Ko Apalahamo, takotou tāmai, neʼe fakafiafia ia ʼi tana falala ʼaē ke sio anai ki toku ʼaho, pea neʼe sio ia kiai pea neʼe fakafiafia.” ʼE moʼoni, ʼaki te ʼu mata ʼo te tui, neʼe fakafiafia fakatomuʼa ia Apalahamo ki te haʼu ʼa te Mesia ʼaē neʼe fakapapauʼi mai. ʼI tanatou mole tui, neʼe ʼui age e te kau Sutea kia Sesu: “ ʼE mole heʼeki ke taʼu nimagofulu, ka ke ʼui mai koe neʼe kua ke sio kia Apalahamo?”

ʼO tali age ai e Sesu: “ ʼE moʼoni ʼe ʼau ʼui atu kia koutou: ʼi muʼa ʼo te tupu ʼo Apalahamo ki malamanei, neʼe ku ʼau tupu ʼau.” ʼIo, ʼe talanoa ia ki tona maʼuli ʼaē ʼi te lagi, ʼi te temi ʼaē neʼe maʼuli ai ia ko he laumālie mālohi fakapulipuli ʼi te lagi.

ʼI tonatou ʼiʼita ʼi te fakamoʼoni age ʼaē e Sesu neʼe maʼuli ia ʼi muʼa atu ʼo Apalahamo, neʼe tae ai e te kau Sutea te ʼu maka ke nātou tuki aki. Kae neʼe nono ia pea mo hāo mai ai ʼo ʼulu ki tuʼa ʼi te fale lotu. Soane 8:37-59; Fakahā 3:14; 21:8.

▪ Neʼe feafeaʼi te fakahā age e Sesu ko ia pea mo tona ʼu fili ʼe mole nātou tāmai tahi?

▪ Koteā ʼaē neʼe fia fakahā e te kau Sutea ʼi tanatou ʼui ʼaē ko Sesu ko te Samalitana?

▪ Koteā te faka ʼuhiga ʼo te ʼui ʼa Sesu ʼe mole ʼiloʼi anai e tana ʼu tisipulo te mate?