Kapite 76

Ko Te Kai ʼi Te ʼApi ʼo Te Faliseo

NEʼE fakamālōlō e Sesu te tagata ʼalelo mate pea mo tali ki te ʼu fehuʼi ʼa nātou ʼaē neʼe nātou fakatutuʼu ki te haʼuʼaga ʼo tona mālohi. Koʼeni leva ia ia ʼi te temi nei kua fakaafe ke kai ʼi te ʼapi ʼo te Faliseo. ʼI muʼa ʼo te kakai, ko te agamāhani ʼa te kau Faliseo ko te fanofanoʼi ʼonatou nima ʼo aʼu ki ʼonatou tuli nima. ʼE nātou fai te meʼa ʼaia ʼi muʼa pea mo te ʼosi ʼo tanatou kakai pea ʼe nātou toe fai feiā pe ʼi te temi ʼe fetogi ai he faʼahi meʼa kai ʼaki he tahi meʼa kai. Ko te talatisio ʼaia, tatau aipe peʼe mole fakafeagai ki te lao ʼa te ʼAtua ʼaē neʼe tohi, ʼe fakalaka mamaʼo ia ʼi te ʼu maʼua fakaʼatua ʼaē ʼo ʼuhiga mo te maʼa faka toʼotoʼoga.

ʼI tana sio ʼaē ki te mole fai ʼa tana tagata fakaafe ki te talatisio ʼaia, neʼe punamaʼuli te Faliseo, tatau aipe pe neʼe mole gū ia ki he meʼa. ʼI te fakatokagaʼi ʼaē e Sesu tana punamaʼuli, neʼe ina ʼui ki ai: “Koia ko koutou, kau Faliseo, ʼe koutou fakamaʼa te tuʼa ʼo te ipu pea mo te pa, kae ko te loto ʼaē ʼo koutou ʼe fonu ko te kaihaʼa pea mo te agakovi. ʼAē hahaʼi vavale! Ko ia ʼaē neʼe ina fai ia tuʼa neʼe mole ina toe fai koa la mo loto?”

Neʼe fakahā ai foki e Sesu te malualoi ʼa te kau Faliseo ʼaē ʼe nātou fufulu ʼonatou nima ʼo mulimuli ki te talatisio, kae mole nātou tokakaga ʼo fakamaʼa tonatou loto mai te agakovi. Neʼe ina fai age kia nātou te tokoni ʼaenī: “Koutou foaki ia te ʼu meʼa ʼaē ʼi loto ko he ʼu meʼa ʼofa ʼaki te loto manavaʼofa, pea koʼeni ko meʼa fuli ia koutou ʼe maʼa.” Ko tanatou ʼu meʼa ʼofa ʼe tonu ke nātou fai ʼaki te ʼofa kae mole tonu ke nātou fai ke vikiviki ia nātou e niʼihi ʼaki hanatou faʼahiga faitotonu.

“Malaʼia kia koutou, kau Faliseo, ko te hoko atu ʼaia ʼa te palalau ʼa Sesu, heʼe koutou foaki te vaega hogofulu ʼo te menite, pea mo te lue, pea mo te ʼu kiʼi ʼakau fuli ʼo te ʼōloto, kae ʼe koutou lotonoa ki te faitotonu pea mo te ʼofa ki te ʼAtua! Neʼe tonu ke fai te ʼu meʼa ʼaenī, kae ʼaua te tuku ʼo te ʼu meʼa ʼaia.” Ko te Lao ʼaē neʼe foaki e te ʼAtua ki te kau Iselaele neʼe fakatuʼutuʼu ai te totogi ʼo te time, peʼe ko te vaega hogofulu, ki te ʼu ʼakau ʼo te ʼu gāueʼaga. Ko te menite pea mo te lue, ʼe ko te ʼu kiʼi ʼakau magoni ʼe fakaʼaogaʼi ki te gaohi meʼa kai. Ko te kau Faliseo ʼe nātou totogi fakalelei te time ʼo te ʼu kiʼi ʼakau ʼaia ʼe mole honatou maʼuhiga, kae neʼe valoki nātou e Sesu ʼuhi ko tanatou mole maʼu te ʼofa, te agalelei, pea mo te fia mālalo, ʼaia ʼe ko te ʼu maʼua ʼe maʼuhiga age ia.

Neʼe toe hoko atu e Sesu tana valoki: “Malaʼia kia koutou, kau Faliseo, heʼe koutou manako ki te ʼu ʼuluaki hekaʼaga ʼi te ʼu sinakoka pea mo te ʼu fetapā ʼi te ʼu lapalasi fakatauʼaga meʼa! Malaʼia kia koutou, heʼe koutou hage ko te ʼu falemaka fakamanatu ʼaē ʼe mole hā mai, ʼo liu haʼeleʼi e te hahaʼi ka mole nātou ʼiloʼi!” Koia, ko te aga heʼemaʼa ʼa te kau Faliseo ʼe mole hā mai ia ki tuʼa. Ko tanatou lotu ʼe ko he vanisi moʼo fakamatamatalelei, ʼe ko te lotu malualoi ʼātea pe ia.

ʼI tana logo ki te meʼa ʼaia, ko te tagata ʼe poto ʼi te lao, ʼe ina ʼiloʼi lelei te Lao ʼa te ʼAtua, neʼe mole ina leleiʼia tana ʼu palalau pea ina ʼui age ki ai: “Faiako, ʼi tau talanoa ki te ʼu meʼa ʼaia, ʼe ke toe tauveleʼi ai foki mo mātou.”

Ko Sesu, ʼi tana toe fakakau ai mo te kau tagata ʼe popoto ʼi te lao, neʼe ina tali fēnei: “Malaʼia pea mo koutou foki, kau tagata ʼe popoto ʼi te lao, koteʼuhi ʼe koutou hili ki te hahaʼi te ʼu kavega ʼe faigataʼa tona fua, kae ʼe mole pe la koutou fāfā ia koutou totonu ki te ʼu kavega ʼaia ʼaki he kauʼi tuhi e tahi ʼi tokotou ʼu kauʼi tuhi! Malaʼia kia koutou, koteʼuhi ʼe koutou laga te ʼu falemaka fakamanatu ʼo te kau polofeta, kae neʼe ko ʼakotou kui ʼaē neʼe nātou fakapogi!”

Ko te ʼu kavega ʼaenī ʼe palalau kiai ia Sesu ʼi henī, ʼe ko te ʼu talatisio gutu ʼaia ʼe mole pe la fia fakamaʼamaʼa siʼisiʼipe hona potu e te kau tagata ʼe popoto ʼi te lao ke fīmālie ai te hahaʼi. Neʼe fakahā e Sesu neʼe fakamoʼoni te kau tagata ʼe popoto ʼi te lao ki te fakapogi ʼo te kau polofeta, pea neʼe ina tala age kia nātou ʼe kumi age anai ki “te taʼiake ʼaenī te toto ʼo te kau polofeta fuli ʼaē neʼe liligi talu mai te kamataʼaga ʼo te malamanei, mai te toto ʼo Apele ʼo aʼu ki te toto ʼo Sakalia, ʼaē neʼe matehi ʼi te vaha ʼo te ʼaletale pea mo te fale”. “ ʼIo, ʼe ʼau tala atu kia koutou, ko te toe ʼui age ʼaia ʼa Sesu, ʼe toe kumi age anai ki te taʼiake ʼaenī.”

Ko te malamanei ʼo te hahaʼi ʼaē ʼe feala ke totogi neʼe kamata ʼaki te maʼu ʼo te ʼu tamaliki ʼa Atama pea mo Eva; ʼe feala ai foki hatatou ʼui neʼe maʼuli ia Apele ʼi te “kamataʼaga ʼo te malamanei”. ʼI te ʼosi fakapogi ʼo Sakalia, ko te fenua ʼo Suta neʼe hūfi pea maumauʼi e te kau Silia. Koia, neʼe fakahā ai e Sesu ʼuhi ko te lahi ʼo tanatou agakovi ʼe nātou felāveʼi anai mo he maumau ʼo kovi ʼosi age. Neʼe hoko te faʼahi ʼaia ʼi te ʼosi ʼo taʼu e 38 ki muli age, ʼi te taʼu 70 ʼo totatou temi.

Neʼe hoko atu te fakamāu ʼa Sesu: “Malaʼia kia koutou, kau tagata ʼe popoto ʼi te lao, koteʼuhi neʼe koutou toʼo te kalavi ʼo te mālama; ko koutou totonu neʼe mole koutou hū, pea ko nātou ʼaē neʼe hū, neʼe koutou tāʼofi ia nātou!” Ko te maʼua ʼo te kau tagata ʼe popoto ʼi te lao ko te akoʼi ʼo te Folafola ʼa te ʼAtua ki te hahaʼi pea mo fakamahino kia nātou tona ʼuhiga. Kae neʼe mole nātou fai te faʼahi ʼaia, pea, ʼe nātou pupunu ki te hahaʼi te fealagia ʼaē ke nātou mahino.

Ko te kau Faliseo pea mo te kau tagata ʼe popoto ʼi te lao neʼe nātou ʼiʼita kovi ʼaupito ʼi tonatou akonakiʼi ʼaē e Sesu. Neʼe nātou fakakinauʼi ʼaupito ia ia ʼi te temi neʼe hū ai ki tuʼa ʼi te ʼapi pea mo nātou fai ki ai te ʼu tuʼuga fehuʼi, ko tanatou loto ʼaē ke nātou maʼu hana hala ʼi tana ʼu palalau ke feala ai hona puke. Luka 11:37-54; Teutalonome 14:22; Mikea 6:8; 2 Fakamatala 24:20-25.

▪ He koʼe neʼe faka lākahalaʼi e Sesu te kau Faliseo pea mo te kau tagata ʼe popoto ʼi te lao?

▪ Koteā te ʼu kavega ʼaē neʼe hili e te kau tagata ʼe popoto ʼi te lao ki te hahaʼi?

▪ Neʼe kamata ʼanafea “te kamataʼaga ʼo te malamanei”?