Kapite 82

ʼE Toe ʼAlu Ia Sesu Ki Selusalemi

KUA vave pe te hoko atu ʼo te fagona ʼo Sesu, ʼo fai akonaki ʼi te ʼu kolo lalahi pea mo te ʼu kolo liliki. E lagi nofo nei ia ʼi te tisitilike ʼo Pele, ʼaē ʼe haga ki Sutea ʼi te tahi kauvai ʼo Solotane. Kae ko Selusalemi ia ʼaē ʼe ʼalu ki ai.

ʼI te filosofia faka sutea, ʼe ko te hahaʼi tokosiʼi pe ʼaē ka nātou maʼu anai te maʼuli. E lagi ko te tupuʼaga la ʼaia ʼo te fehuʼi e te tagata: “ ʼAliki, ko nātou ʼaē kua hāofaki e tokosiʼi pe koa la ia nātou ia?” ʼI tana tali, neʼe faigaʼi e Sesu te hahaʼi ke nātou fakakaukau ki te meʼa ʼaē ʼe tonu ke nātou fai moʼo maʼu ʼo te maʼuli. Neʼe ina ʼui age kia nātou: “Koutou fetolomālohi [peʼe: ke koutou tau fakamālohi, koutou tapalutu] ke koutou hū ʼi te matapā fāveliveli.”

ʼE maʼuhiga foki te gāue fakamālohi, “heʼe, ko te hoko atu ʼaia ʼa te palalau ʼa Sesu, e tokolahi, ʼe ʼau tala atu, ʼe nātou faiga anai ke nātou hū kae ʼe mole nātou lavaʼi anai”. Koteā tona tupuʼaga? Neʼe fakamahino age e Sesu ‘ ʼi te tuʼu ake pe ʼa te pule ʼo te ʼapi, ʼo kalaviʼi te matapā, pea ka tutuʼu anai ni hahaʼi ʼi tuʼa pea nātou tukituki anai te matapā, ʼo ʼui fēnei: “ ʼAliki, avahi mai kia mātou!”, ʼe ina ʼui age anai: “ ʼE mole ʼau ʼiloʼi peʼe koutou ʼōmai maifea. Koutou fakamamaʼo atu ia te ʼau, ia koutou fuli, ʼaē ko te kau gāue ʼo te heʼe faitotonu!” ’

ʼE hā mai ko te hahaʼi ʼaē neʼe tuku ʼi tuʼa neʼe ʼōmai pe nātou ʼi te hola ʼe lelei kia nātou totonu pe. Kae ko te matapā, te faigamālie lelei kua ʼosi māpunuʼi ia pea kua kalaviʼi. Moʼo hū ki loto neʼe tonu ke nātou ʼōmai fakatomuʼa, tatau aipe peʼe mole nātou leleiʼia te hola. ʼE moʼoni ia, ko te malaʼia ʼe tō anai kia nātou ʼaē ʼe nātou toloaki te temi ʼaē ʼe tonu ai ke nātou tuku te tauhi ʼaē kia Sehova ki muʼa ʼi tonatou maʼuli!

Ko te kau Sutea ʼaē neʼe fekauʼi ki ai ia Sesu ke gāue kia nātou neʼe mole fakaʼaoga e te tokolahi, te faigamālie taulekaleka ʼaē ke nātou tali te fakatuʼutuʼu ʼaē neʼe fai e te ʼAtua ʼo ʼuhiga mo tonatou fakamaʼuli. Koia neʼe ʼui ai e Sesu ʼe nātou fetagihi anai pea ʼe nātou makiki nifo anai mokā laku anai ia nātou ki tuʼa. Kae, ko nātou ʼaē ʼe “ ʼōmai anai mai te ʼu potu fenua ʼo te potu hahake pea mo te ʼu potu fenua ʼo te potu hihifo pea mo te potu tokelau pea mo te potu toga”, ʼio, mai te ʼu fenua fuli, “ ʼe nātou heheka anai ʼi te laupapa kai ʼi te puleʼaga ʼo te ʼAtua”.

Neʼe hoko atu te palalau ʼa Sesu: “ ʼE ʼi ai te kau mumuli [te hahaʼi mole ko he kau Sutea neʼe manukinukiʼi, ʼo feiā aipe mo te kau Sutea ʼaē neʼe gaohi koviʼi] ʼe nātou mumuʼa anai, pea ʼe ʼi ai te kau mumuʼa ko [te kau Sutea ʼaē neʼe maʼu meʼa ʼi te faʼahi fakakoloa pea mo faka lotu] ʼe nātou mumuli anai.” Ko te kau tagata pikoʼelo pea mo maʼuli galo ʼaia ʼe nātou mumuli anai mai tona ʼuhiga ʼaē ʼe mole nātou hū anai ki te Puleʼaga ʼo te ʼAtua.

Pea ʼōmai ai te kau Faliseo kia Sesu pea nātou ʼui age ki ai: “ ʼAlu pea ke mavae ʼi henī, heʼe loto ia Helote [Atipasi] ke tāmateʼi koe.” E lagi ko Helote totonu pe ʼaē neʼe ina fakatupu te logo ʼaia, ke tupu ai he mavae ʼa Sesu ʼi te telituale. ʼE mahino ia, e lagi ina tuʼania ia naʼa toe kau ia ia ki te matehi ʼo he tahi polofeta ʼa te ʼAtua, ohage ko te matehi ʼo Soane Patita. Kae neʼe tala age e Sesu ki te kau Faliseo: “Koutou ʼolo ʼo ʼui age ki te lenato ʼaia: ‘Koʼeni ʼe ʼau kapu te ʼu temonio pea mo fai te ʼu fakamālōlō ʼi te ʼaho nei pea mo ʼapogipogi, pea ʼi te tolu ʼaho ʼe ʼosi ai leva taku gāue.’ ”

ʼI te ʼosi ʼo tana gāue ʼi te fenua ʼaia, neʼe hoko atu te fagona ʼo Sesu ki Selusalemi, heʼe, ina fakamahino fēnei age, “ ʼe mole tonu ia ke matehi he polofeta ʼi tuʼa atu ʼo Selusalemi”. He koʼe ʼe tonu ke tou ʼamanaki ʼe matehi anai ia Sesu ʼi Selusalemi? Koteʼuhi heʼe ko te kolo muʼa ʼaia, ʼaē ʼe fono ai te Sanetualio, te Telepinale lahi ʼaē ʼe faʼufaʼu e te toko 71, pea ʼe fai ai te ʼu sakilifisio ʼaki te ʼu manu. Koia ʼe mole tonu ai ke matehi “te Akeno ʼa te ʼAtua” ʼi tuʼa atu ʼo Selusalemi.

“Selusalemi, Selusalemi, te kolo ʼaē ʼe ina matehi te kau polofeta pea mo taumakaʼi ia nātou ʼaē ʼe fekauʼi kia te ia, ko te lāuga ʼaia ʼa Sesu, — kua tuʼa fia taku fia tatānaki tau ʼu fānau ohage ko he matuʼa moa ʼe ina tānaki tona ʼu ʼuhi ʼi tona ʼu lalo kapakau, kae neʼe mole koutou loto ki ai! Koʼeni ko tokotou ʼapi kua līaki atu kia koutou.” ʼI tana fakafisi ki te ʼAlo ʼo te ʼAtua, neʼe fakatūʼa ai te fenua.

ʼI te hoko atu ʼo te fagona ʼo Sesu ki Selusalemi, neʼe fakaafe ia ia ki te ʼapi ʼo te pule ʼo te kau Faliseo. Neʼe sioʼi ia pe koteā te meʼa ka ina fai, heʼe ko te ʼaho ʼo te sapato, pea neʼe ʼi ai te tagata neʼe kau ʼi te mahaki ko te fefulafulani vai, ko te fetatānaki ʼo te vai ʼi tona lagi ʼu nima pea mo tona ʼu vaʼe. Pea ʼi tana palalau ki te kau Faliseo pea mo te kau tagata ʼe popoto ʼi te lao ʼaē neʼe ʼi ai, neʼe fehuʼi age e Sesu kia nātou: “ ʼE gafua koa peʼe kailoa te fai ʼo he fakamālōlō ʼi te lolotoga ʼo te sapato?”

Neʼe nātou nonofo fakalogologo fuli. Neʼe fakamālōlō ai e Sesu te tagata ʼaia pea ina fekau ke ʼalu, pea ʼosi ʼaia pea ina fai age te fehuʼi ʼaenī kia nātou: “Ko ai ʼaē ia koutou, kapau ʼe tō hona foha pe ko hana vitulo ki he vai keli, ʼe mole ina foimo toʼo ake aipe ʼi te temi ʼaia, ʼi te ʼaho ʼo te sapato?” ʼO toe feiā aipe, neʼe mole gū he tahi. Luka 13:22 ki te 14:6; Soane 1:29.

▪ ʼI te ʼu palalau ʼa Sesu, koteā te meʼa ʼaē ʼe ʼaoga ke maʼu ai te maʼuli, pea koteā te tupuʼaga ʼo te tuku ʼo te tokolahi ʼi tuʼa?

▪ Ko ai ia nātou ʼaē “ ʼe mumuli” ʼaē ʼe liliu ʼo mumuʼa, pea mo nātou ʼaē ʼe “mumuʼa” ʼaē ʼe liliu ʼo mumuli?

▪ Koteā te tupuʼaga ʼo te lagi ʼui ʼaē, neʼe loto ia Helote ke tāmateʼi ia Sesu?

▪ He koʼe ʼe mole tonu ke matehi he polofeta ʼi tuʼa atu ʼo Selusalemi?