Kapite 88

Te Tagata Maʼu Meʼa Pea Mo Lasalo

NEʼE palalau ia Sesu ki tana ʼu tisipulo ʼo ʼuhiga mo te fakaʼaogaʼi lelei ʼo te ʼu koloā fakamālama, ʼo fakamahino age ʼe mole feala hakita kaugana ki te ʼu koloā pea mo te ʼAtua. Ko te kau Faliseo neʼe nātou toe fagono age foki mo nātou, pea neʼe nātou kamata vāʼi ai ia Sesu koteʼuhi heʼe nātou manako ki te paʼaga. Koia neʼe ina ʼui age ai kia nātou: “Ko koutou, ʼaē ʼe koutou ʼui ʼe koutou faitotonu ia muʼa ʼo te tagata, kae ʼe ʼiloʼi e te ʼAtua tokotou ʼu loto; heʼe ko te meʼa ʼaē ʼe māʼoluga ʼi te tagata ʼe ko he meʼa fakalialia ia ia mata ʼo te ʼAtua.”

Kua hoko mai te temi ʼaē ke fulihi ai te ʼu ʼaluʼaga ʼo kovi kia nātou ʼaē ʼe maʼu koloā, pea mo maʼu te mālohi faka politike, ʼo feiā pe ki te maʼu ʼo te mālohi pea mo te pule ʼi te faʼahi faka lotu. ʼE tonu ke tuku ia nātou ki lalo, ka ko nātou ʼaē ʼe nātou ʼiloʼi te maʼuhiga ʼo te ʼu meʼa fakalaumālie kia nātou, ʼe tonu ke hikihiki ki ʼoluga. Neʼe talanoa ia Sesu ki te fetogi ʼaia ʼi tana tala fēnei ki te kau Faliseo:

“ ʼO aʼu kia Soane [Patita] neʼe ko te Lao pea mo te kau Polofeta. Pea talu mai ai ko te puleʼaga ʼo te ʼAtua kua fagonogono ko te logo lelei, pea ko te hahaʼi kehekehe ʼe nātou laka fakamālohi kiai. ʼIo, ʼe faigafua ake ke mole te lagi pea mo te kele, ʼi he mole hoko ia ʼo he kiʼi kogaʼi mataʼi tohi e tahi ʼo te Lao.”

Ko te kau sekelipa pea mo te kau Faliseo ʼe nātou tala fakahāhā tanatou pipiki ʼaē ki te Lao ʼa Moisese. Koutou manatuʼi ʼi te fakamālōlō faka milakulo e Sesu te tagata ʼe kivi ʼi Selusalemi, neʼe fēnei te fakalakilaki ʼa te kau Faliseo: “Ko mātou, ko te kau tisipulo ʼa Moisese. ʼE mātou ʼiloʼi neʼe folafola te ʼAtua kia Moisese.” Kae ʼi te temi nei, ko te Lao ʼa Moisese kua ʼosi tana gāue: neʼe ina taki te hahaʼi agavaivai kia Sesu Kilisito, te Hau ʼaē neʼe fili e te ʼAtua. Talu mai te kamata ʼo te minisitelio ʼo Soane, ko te hahaʼi kehekehe, kae tāfito te kau agavaivai pea mo te kau māsisiva, ʼe nātou faiga ke nātou liliu ko he hahaʼi fakalogo ʼo te Puleʼaga ʼo te ʼAtua.

Kapau ko te Lao ʼa Moisese e lolotoga nei tona fakahoko, pea ʼe ko te fakamaʼua ʼaē ke mulimuli kiai ʼe fakagata anai. Neʼe fakagafua e te Lao te mavete ʼohoana ʼi he ʼu faʼahiga meʼa pe, kae neʼe ʼui fēnei e Sesu “ko te tagata ʼaē ʼe mavete mo tona ʼohoana, pea toe ʼohoana ia mo he tahi fafine, ʼe tono ia pea ko te tagata ʼaē ʼe ʼohoana mo he fafine neʼe kua mavete mo tona ʼohoana ʼe tono ia”. Ko te ʼu taʼi palalau ʼaia neʼe ʼiʼita ai te kau Faliseo, koteʼuhi heʼe nātou fakagafua te mavete ʼohoana ʼuhi ko he ʼu faʼahiga tupuʼaga kehekehe.

ʼI tana kei palalau ki te kau Faliseo, neʼe fai age e Sesu kia nātou te lea fakatātā ʼo talanoa ai ki te ʼu tagata e lua neʼe fakamulimuli ʼo fetogi ʼosi tona ʼu tuʼulaga, peʼe ko tona ʼu ʼaluʼaga. ʼE feala anai koa hakotou fakahā mai pe ko ai ʼaē ʼe fakatātā e te ʼu tagata ʼaia pea koteā te faka ʼuhiga ʼo te fetogi ʼo tonā ʼu ʼaluʼaga?

“ ʼI tona fakamahino e Sesu, neʼe ʼi ai te tagata maʼu meʼa, pea neʼe kofu ia ki he kula fakapōʼuli mo he lino pea neʼe fakafiafia ia ʼi te ʼaho fuli pe ʼaki he ʼu meʼa faka taulekaleka. Pea neʼe ʼi ai mo te tagata kainono, neʼe ʼaofi tona sino ko te mataʼi papala, ʼe higoa ko Lasalo, neʼe ʼaumai tuʼumaʼu ʼo tuku ʼi tona muʼa matapā pea neʼe holi ia ke kai ki te ʼu meʼa ʼaē ʼe maluku ifo mai te laupapa ʼo te tagata maʼu meʼa. ʼIo, neʼe ʼōmai mo te ʼu kuli ʼo ʼemo tona ʼu papala.”

ʼI te fakamatala ʼaenī neʼe fakaʼaogaʼi e Sesu te tagata maʼu meʼa moʼo fakatātāʼi ʼo te kau takitaki lotu Sutea, ʼaē neʼe mole gata pe ʼi te kau Faliseo pea mo te kau sekelipa, kae neʼe toe kau ai foki mo te kau Satuseo pea mo te kau pelepitelo pule. ʼE nātou maʼu meʼa ʼuhi ko tonatou ʼu pilivilesio pea mo tonatou ʼu lelei fakalaumālie, pea ʼe hage pe tanatou aga ko te tagata maʼu meʼa ʼaē neʼe palalau ki ai ia Sesu. Ko tonatou ʼu kofu ʼaē ʼe lanu kula fakapōʼuli matalelei ʼe nātou fakatātā tonatou tuʼulaga ʼaē ʼe leleiʼia, pea ko te lino hina, ʼe ina fakatātā te faitotonu ʼaē ʼe nātou lau pe kia nātou.

Ko te kalasi ʼaia ʼo te tagata maʼu meʼa, pea mo fia lahi, ʼe nātou sioʼi te hahaʼi māsisiva pea mo te hahaʼi māhani ʼaki he sio vaʼiganoa lahi, ʼo nātou higoaʼi ia nātou ko te kau ‘am haʼarèts, ko tona faka ʼuhiga, ko te hahaʼi ʼo te kele. Ko te tagata kainono, ia Lasalo, ʼe ina fakatātā te hahaʼi ʼaē neʼe mole fia foaki e te kau takitaki lotu kia nātou te meʼa kai fakalaumālie, pea mo te ʼu pilivilesio fakalaumālie, ʼaē ʼe tau mo nātou. Ohage pe ko te ʼaofi ʼo te sino ʼo Lasalo ko te mataʼi papala, ko te hahaʼi māhani ʼe sioʼi nātou ohage he ʼu meʼa noa pea mo mahahaki ʼi te faʼahi fakalaumālie, ʼo ʼaoga pe ia nātou ke nātou kaugā nonofo mo te faga kuli. Kae, ko nātou ʼaē ʼe kau ki te kalasi ʼo Lasalo ʼe nātou fia kakai pea mo fia ʼiʼinu ki he meʼa kai fakalaumālie pea ʼe nātou nonofo ʼi te muʼa matapā ʼaki tanatou fakatuʼatuʼa ke nātou maʼu hanatou ʼu māʼaga meʼa kai fakalaumālie, tatau aipe peʼe veliveli, ʼe maluku ifo anai mai te laupapa ʼo te tagata maʼu meʼa.

ʼE fakamatala leva e Sesu ʼi te temi nei te ʼu fetogi ʼo te ʼu ʼaluʼaga takitokotahi ʼo te tagata maʼu meʼa pea mo Lasalo. Koteā te ʼu fetogi ʼaia? Koteā te ʼu meʼa ʼaē ʼe nātou fakatātā?

Te ʼu fetogi ki te tagata maʼu meʼa pea mo Lasalo

Ko te tagata maʼu meʼa ʼe ina fakatātā te kau takitaki lotu ʼaē ʼe nātou maʼu te ʼu pilivilesio pea mo te ʼu lelei ʼi te faʼahi fakalaumālie. Kae kia Lasalo, ʼe ina fakatātā te hahaʼi māhani ʼaē ʼe hālofia ʼi te meʼa kai fakalaumālie. ʼI te hoko atu ʼo tana fakamatala, neʼe fakamatalatala e Sesu te fetogi fakatalakitupua ʼo te ʼaluʼaga ʼo te ʼu tagata ʼaia e lua.

“Pea, ki muli age, ko te ʼui ʼaia ʼa Sesu, pea mate te tagata kainono pea neʼe ʼave ia e te kau ʼaselo kia tafa ʼo Apalahamo, ki te nofoʼaga ʼofaina. Pea toe mate foki mo te tagata maʼu meʼa pea ʼave ia ʼo tanu. Pea ʼi te Hatesi neʼe hiki ake ai ʼona mata ki ʼoluga, he neʼe nofo ia ʼi te mamahi pea neʼe sio atu ʼi mamaʼo kia Apalahamo pea mo Lasalo ʼi ʼona tafa, ʼi te nofoʼaga ʼofaina.”

Ko te tagata maʼu meʼa pea mo Lasalo neʼe mole ko he ʼu tagata moʼoni ia, kae ko te fakatātā ʼo he ʼu kalasi ʼo ni faʼahiga hahaʼi, ʼo toe feiā aipe foki mo tonā mamate, ʼe ko he tahi pe ia fakatātā. Koteā koa te faka ʼuhiga ʼo te ʼu faʼahi ʼaia e lua?

Neʼe hoki ʼosi ifo te fakahā e Sesu te fetogi ʼo te ʼaluʼaga, ʼaki tana ʼui ʼaē ‘ ʼo aʼu kia Soane Patita neʼe ko te Lao pea mo te ʼu Polofeta, kae talu mai ai ko te puleʼaga ʼo te ʼAtua kua fakaʼiloʼilo’. Koia ko te fai faka mafola ʼaē ʼa Soane pea mo Sesu Kilisito ʼaē ʼe tupu ai te mate ʼo te tagata maʼu meʼa pea mo Lasalo, ʼo ʼuhiga mo te ʼaluʼaga ʼo nāua, ʼi muʼa atu.

Ko te hahaʼi agavaivai pea mo fakahemala ʼaē ʼe nātou faʼufaʼu te kalasi ʼo Lasalo ʼe nātou mamate ʼo ʼuhiga mo tanatou hala mo meʼa fakalaumālie ʼaē neʼe nātou mamahi ai ʼo kaku ki te temi ʼaia, pea kua tuku ifo kia nātou he tuʼulaga foʼou: ʼaē ko te ʼofa ʼo te ʼAtua. Ka neʼe ki muʼa atu neʼe nātou haga ki te kau takitaki lotu ke nātou tae te ʼu eveeve ʼaē ʼe maluku ifo mai tonatou laupapa fakalaumālie, ʼi te temi nei ko te ʼu moʼoni faka tohi-tapu ʼaē ʼe fakahā e Sesu ʼe nātou makokona ai. ʼE fenā la tonatou ʼave ʼaē kia tafa ʼo te ʼAtua, te Apalahamo Lahi, ki te nofoʼaga ʼofaina, peʼe ko te tuʼulaga ʼaē ʼe leleiʼia.

Kae, ko nātou ʼaē ʼe nātou faʼufaʼu te kalasi ʼo te tagata maʼu meʼa ʼe nātou fakatupu kia nātou te mole ʼofa fakaʼatua koteʼuhi heʼe nātou fakafisi mo tonatou loto katoa ki te logo ʼo te Puleʼaga ʼaē ʼe akonakiʼi e Sesu. ʼI tanatou fai te meʼa ʼaia, ʼe nātou mamate ʼo ʼuhiga mo tonatou tuʼulaga ʼāfea, ʼaē ko te hage neʼe nātou maʼu te ʼofa ʼo te ʼAtua. ʼE ʼui ʼo ʼuhiga mo nātou ʼe nātou nonofo ʼi te ʼu mamahi fakatātā. Tou fakalogo muʼa ki te palalau ʼa te tagata maʼu meʼa:

“Tāmai Apalahamo, ke ke ʼofa mai kia te ʼau pea ke fekau ia Lasalo ke ʼalu ʼo fufūʼi tona muʼamuʼaʼi kauʼi tuhi ki te vai moʼo fakamokomoko ʼaki toku ʼalelo, heʼe ʼau nofo nei ʼi te mamahi ʼaupito ʼi te afi ulo ʼaenī.” Koteā ʼaē ʼe mamahi ai te hahaʼi ʼaē ʼe kau ki te kalasi ʼo te tagata maʼu meʼa? Ko te ʼu logo ʼaē ʼe momofi ʼo te fakamāu ʼaē ʼe haʼu mai te ʼAtua, ʼaē ʼe faka mafola e te ʼu tisipulo ʼa Sesu. ʼE loto te hahaʼi ʼaia ke tuku te fakahā e te ʼu tisipulo te ʼu taʼi logo ʼaia, ke nātou maʼu ai he fīmālie ʼi ʼonatou mamahi.

“Kae neʼe ʼui age e Apalahamo: ‘Tama, ke ke manatuʼi e koe ʼi te lolotoga ʼo tou maʼuli neʼe ke maʼu tau ʼu meʼa lelei, ʼo katoa, pea ʼo feiā aipe mo Lasalo neʼe ina maʼu ia te ʼu meʼa ʼaē ʼe kovi. Pea ʼi te temi nei ʼe ina maʼu ʼi henī te fīmālie, kae ko koe ia, ʼe ke nofo ʼi te mamahi ʼaupito. Pea ʼaki te ʼu meʼa fuli ʼaia, kua ʼi ai te vanu lahi ʼi te vaha ʼo koutou pea mo mātou, ʼo mole feala ai kia nātou ʼaē ʼe fia ʼolo atu ʼi henī kia koutou ke nātou ʼolo atu, pea ʼe mole feala foki mo te haʼu mai henā ki henī.’ ”

ʼE ko he meʼa totonu ia pea mo lelei ke hoko te fetogi fakatalakitupua ʼaia ʼo te ʼu ʼaluʼaga ʼo te kalasi ʼo Lasalo pea mo ʼaē ʼo te tagata maʼu meʼa. ʼE hoko anai ʼi he ʼu māhina ki muli age, ʼi te Penikosite ʼo te taʼu 33, ʼi te fakaʼosi ʼo te fuakava ʼo te Lao, pea mo fetogi anai e te fuakava foʼou. ʼO hā lelei ai leva ʼe ko te kau tisipulo, ka mole ko te kau Faliseo pe ko niʼihi ʼatu kau takitaki lotu, ʼaē ʼe nātou maʼu te ʼofa fakaʼatua. Ko te “vanu lahi” ʼaē ʼe ina vaevae te tagata maʼu meʼa fakatātā pea mo te ʼu tisipulo ʼa Sesu ʼe ina fakatātā te fakamāu ʼaē ʼe mole fetogi pea mo faitotonu ʼa te ʼAtua.

Neʼe toe kole e te tagata maʼu meʼa ki te “tāmai ko Apalahamo”: “[Fekauʼi ia Lasalo] ki te ʼapi ʼo taku tāmai, heʼe ʼi ai ʼoku tēhina e toko nima.” ʼAki te ʼu palalau ʼaia, ʼe fakamoʼoni ai e te tagata maʼu meʼa ʼe felogoi lelei ia mo te tahi atu tāmai, ʼaē ko Satana te Tevolo. ʼE ina kole ke fakamalūlū e Lasalo te ʼu logo fakaʼatua ʼo ʼuhiga mo te fakamāu, koteʼuhi ke ʼaua naʼa ʼave tona ʼu “tēhina ʼaē e toko nima”, peʼe ko tona ʼu kaumeʼa faka lotu, ki te “koga meʼa mamahi ʼaia”.

“Kae neʼe ʼui e Apalahamo: ‘ ʼE nātou nonofo mo Moisese pea mo te kau Polofeta; ke nātou fagono kia nātou!’ ” ʼIo, kapau ko te ʼu “tēhina ʼaia e toko nima” ʼe nātou fia hāo mai te mamahi, ʼe tonu ke nātou fakasiosio lelei te ʼu tohi ʼa Moisese pea mo te kau Polofeta ʼaē ʼe nātou fakahā ia Sesu ko te Mesia, pea ke nātou liliu ko hana ʼu tisipulo. Ko te tagata maʼu meʼa neʼe ina tali fakafeagai ia ʼo fēnei: “Kailoa, tāmai Apalahamo, kae kapau ʼe ʼi ai he tahi mai te kau mate ʼe ʼalu kia nātou, pea ʼe nātou fakahemala anai.”

Kae neʼe tali age ki ai: “Kapau ʼe mole nātou fagono kia Moisese pe ko te kau Polofeta, pea ʼe mole nātou tui anai mo kapau ʼe fakatuʼuake he tahi mai te kau mate.” ʼE mole toe fai anai e Sehova he fakaʼiloga peʼe ko he milakulo makehe moʼo faka tui ʼo te hahaʼi. Kapau ʼe nātou loto ke nātou maʼu tona ʼofa, pea ʼe tonu ke nātou lau te Tohi-Tapu pea mo nātou fakaʼaoga te ʼu meʼa ʼaē ʼe nātou ako. Luka 16:14-31; Soane 9:28, 29; Mateo 19:3-9; Kalate 3:24; Kolose 2:14; Soane 8:44.

▪ He koʼe ko te mate ʼo te tagata maʼu meʼa, ʼo feiā pe mo Lasalo, ʼe ko he fakatātā pe ia, pea koteā te faka ʼuhiga ʼo tonā mamate?

▪ ʼI te ʼu palalau ʼa Sesu, koteā te fetogi ʼaē neʼe hoko ʼi te kamata ʼo te minisitelio ʼo Soane?

▪ Koteā te meʼa ʼaē ka fakagata ʼi te mate ʼo Sesu, pea ʼe koteā anai tona faka ʼuhiga ki te fehuʼi ʼaē ʼo ʼuhiga mo te mavete ʼohoana?

▪ ʼI te lea fakatātā ʼaē ʼa Sesu, ko ai ʼaē ʼe fakatātā e te tagata maʼu meʼa? pea mo Lasalo?

▪ Koteā te ʼu mamahi ʼaē ʼe tali e te tagata maʼu meʼa, pea koteā te meʼa ʼaē ʼe ina kole ke maʼamaʼa ai te ʼu mamahi ʼaia?

▪ Koteā ʼaē ʼe fakatātā e te “vanu lahi”?

▪ Ko ai te tāmai moʼoni ʼa te tagata maʼu meʼa, pea ko ai tona ʼu tēhina ʼaē e toko nima?