Kapite 96

Ko Sesu Pea Mo Te Pule Tūpulaga Maʼu Koloā

ʼI TE hoko atu ʼo te fagona ʼo Sesu ʼi te tisitilike ʼo Pele ʼo ʼalu ki Selusalemi, neʼe lele mai te tūpulaga pea neʼe fakatō ʼo tuʼutuli ʼi ʼona muʼa. Ko te tagata ʼaia neʼe fakahigoa ko te pule, ko tona ʼuhiga e lagi ina maʼu he tuʼulaga ʼe tokagaʼi ʼi he sinakoka ʼo te kolo peʼe lagi ʼe kau ia ʼi te Sanetualio. ʼE maʼu koloā ʼaupito ia. “Faiako agalelei, ko tana fehuʼi age ʼaia, koteā te meʼa ʼe tonu ke ʼau fai ke ʼau maʼu ai te maʼuli heʼegata?”

“He koʼe ʼe ke fakahigoa ʼau ko te agalelei? ko te tali age ʼaia ʼa Sesu. ʼE mole he tahi ʼe agalelei, gata pe ko te tokotahi, ia te ʼAtua.” Neʼe lagi fakaʼaogaʼi e te tūpulaga te kupu ʼaē “agalelei” ohage ko he kupu ʼo ʼuhiga mo he higoa fakatuʼulaga, pea koia ʼaē neʼe fakahā age ai e Sesu ko te taʼi higoa fakatuʼulaga ʼaia ʼe tau pe ia mo te ʼAtua tokotahi.

“Kae kapau ʼe ke fia hū ki te maʼuli, ko te hoko atu ʼaia ʼa te palalau ʼa Sesu, taupau te ʼu folafola, tuʼumaʼu.”

“Te ʼu folafola fea?” ko te fehuʼi age ʼaia ʼa te tagata.

ʼI tana lau te ʼu folafola e nima ʼi te ʼu Folafola ʼaē e Hogofulu, neʼe tali age e Sesu: “ ʼAenī la: ʼAua naʼa ke fakapō, ʼaua naʼa ke tono, ʼaua naʼa ke kaihaʼa, ʼaua naʼa ke fai he fakamoʼoni loi; faka maʼuhiga tau tāmai pea mo tau faʼe.” Pea, ʼi tana toe lau age te folafola ʼe maʼuhiga ake, neʼe ʼui maʼana: “ ʼE tonu ke ke ʼofa ki tou kāiga ohage pe ko koe totonu.”

“Ko te ʼu meʼa fuli ʼaia, kua ʼau taupau ʼau talu mai taku kei veliveli, ko te tali fakamalotoloto age ʼaia ʼa te tagata. Koteā te meʼa ʼaē kei toe ke ʼau fai?”

ʼI tana logo ki te fehuʼi fakalave loto pea mo fakavilivili ʼaia, neʼe hake ia Sesu te ʼofa ki te tūpulaga ʼaia. Kae, ʼi tana fakasiosio lelei ʼaē ki tana pipiki ki te ʼu koloā fakamālama, neʼe ina fakahā age te meʼa ʼaē ʼe ʼaoga kia te ia: “Ko te meʼa e tahi ʼe kei ke hala ai: ʼAlu, ʼo fakatau te ʼu meʼa fuli ʼe ke maʼu, pea ke foaki ki te kau māsisiva, pea ʼe ke maʼu ai anai hou koloā ʼi te lagi; pea ke haʼu ʼo mulimuli mai ia te ʼau.”

Pea neʼe tuʼu ake ai te tagata ʼo ʼalu, mo tona lotomamahi, neʼe lagi hake he ʼofa ia Sesu, ʼi tana lolotoga sio ʼaē ki tana ʼalu. Ko te ʼu koloā ʼo te tagata ʼaia ʼe nātou pupunu kia ia ke ʼaua naʼa ina ʼiloʼi te maʼuhiga ʼo te koloā moʼoni. “ ʼE faigataʼa anai kia nātou ʼaē ʼe maʼu paʼaga tanatou hū ki te puleʼaga ʼo te ʼAtua!” ko te ʼui ʼaia ʼa Sesu.

Neʼe punamaʼuli te kau tisipulo ʼa Sesu ʼi tana ʼu palalau ʼaia. Kae neʼe lahi foki tanatou toe punamaʼuli ʼi tana fakahā age te manatu ʼaenī: “ ʼE faigafua age ki he kamelo tana hū ʼi he pu ʼo he hui tuitui ʼi he tagata maʼu koloā ke hū ki te puleʼaga ʼo te ʼAtua.”

“Ko ai pe ʼaē ʼe feala ke hāo?” ko te fehuʼi age ʼaia ʼa tana kau tisipulo.

Neʼe haga fakalelei age ia Sesu kia nātou, ʼo ina tali age: “Ki te tagata ʼe mole feala ia, kae mole feiā ia ki te ʼAtua heʼe ko meʼa fuli ʼe feala ki te ʼAtua.”

Neʼe fakatokagaʼi age e Petelo ko ia pea mo te tahi ʼu tisipulo neʼe nātou fai tanatou fili ʼe kehe ʼosi ia mo te fili ʼa te pule tūpulaga maʼu koloā, ʼo ina tala age kia Sesu: “Koʼeni, kua mātou tuku ia meʼa fuli pea kua mātou mulimuli ia te koe.” Pea neʼe ina fehuʼi age: “Koteā anai te meʼa ka mātou maʼu ai?”

“ ʼI te fakafoʼou ʼo te meʼa fuli, ko te fakapapau age ʼaia ʼa Sesu, mokā heka anai te Foha ʼo te tagata ki tona hekaʼaga faka hau faka kolōlia, ko koutou ʼaē neʼe koutou mulimuli ia te ʼau, ʼe koutou toe heheka anai mo koutou ki ni hekaʼaga faka hau e hogofulu-ma-lua ʼo fakamāuʼi te ʼu faʼahiga ʼaē e hogofulu-ma-lua ʼo Iselaele.” ʼIo, ʼe fakahā e Sesu ʼe ʼi ai anai he fakafoʼou ʼo te ʼu agaaga ʼo te maʼuli ʼi te kele, ʼo feala ai ke toe liliu ʼo tatau mo te temi muʼa ʼi te ʼōloto ʼo Eteni. Pea tahi, ʼe maʼu anai e Petelo pea mo te tahi kau tisipulo tonatou fakapale: ʼe nātou hau anai mo Kilisito ʼi te Palatiso ʼaia, ʼaē ka mafola anai ʼi te kele katoa. Ko he fakapale taulekaleka feiā ʼe tau ia mo he fai ʼo he faʼahiga sakilifisio pe.

Kae, ʼo kamata atu nei ʼe maʼu e te kau tisipulo te ʼu fakapale, ʼaia ʼe fakamoʼoni ki ai ia Sesu ʼaki te ʼu palalau ʼaenī: “ ʼE mole he tahi kua ina tuku hona fale, pe ko hona ʼu tēhina, pe ko hona ʼu tuagaʼane, pe ko tana faʼe, pe ko tana tāmai, pe ko tana fānau, peʼe ko ʼana gāueʼaga, ʼuhi ko ʼau pea ʼuhi ko te logo lelei, ʼe hala mo tana maʼu nei ʼo liuga teau, ʼi te ʼu temi ʼaenī, ia te ʼu fale, te ʼu tēhina, te ʼu tuagaʼane, pea mo te ʼu faʼe, te ʼu fānau, te ʼu gāueʼaga, pea mo he ʼu fakataga, pea ʼi te tuʼu ʼo te ʼu faʼahiga meʼa ka haʼu, te maʼuli heʼegata.”

Ohage ko te fakapapau age ʼa Sesu, ʼi he faʼahi pe ʼe ʼolo kiai tana kau tisipulo ʼi te malamanei, ʼe nātou maʼu aipe te ʼu vāhaʼa lelei mo tonatou ʼu kaumeʼa kilisitiano ʼo maʼuhiga age ia ʼi totatou ʼu vāhaʼa lelei mo totatou ʼu famili totonu. ʼE ʼiloga mai ia ko te pule tūpulaga sutea, ʼe fakatafa ia ʼi te fakapale ʼaia pea mo te maʼuli heʼegata ʼi te Puleʼaga ʼo te ʼAtua ʼaē ʼi selo.

ʼOsi ʼaia, neʼe toe ʼui age e Sesu: “Kae tokolahi ia nātou ʼaē neʼe mumuʼa ʼe nātou mumuli anai, pea ko nātou ʼaē neʼe mumuli ʼe nātou mumuʼa anai.” Koteā koa te faka ʼuhiga ʼo tana palalau?

Ko tona faka ʼuhiga e tokolahi ia nātou ʼaē ʼe “mumuʼa” ʼo maʼu te ʼu pilivilesio faka lotu, ohage ko te pule tūpulaga maʼu koloā, ʼe mole nātou hū anai ki te Puleʼaga. ʼE nātou liliu anai ʼo “mumuli”. Kae, ʼe liliu anai ʼo “mumuʼa” te tokolahi ia nātou ʼaē neʼe vaʼiganoaʼi e te kau Faliseo ʼaki tanatou faitotonu ʼa nātou, ʼo nātou ʼui ko te kau “mumuli” — ko te hahaʼi ʼo te kele, peʼe ‛am haʼarèts —, ʼaē ʼe kau ai mo te kau tisipulo agavaivai ʼa Sesu. Ko te liliu ʼaē ʼo “mumuʼa” ko tona faka ʼuhiga ʼe nātou maʼu anai te pilivilesio ʼaē ko te hau mo Kilisito ʼi te Puleʼaga. Maleko 10:17-31; Mateo 19:16-30; Luka 18:18-30.

▪ Ohage ko tona hā mai, ʼe ko te tagata feafeaʼi ia te pule tūpulaga maʼu koloā?

▪ He koʼe neʼe fakafisi ia Sesu ki tona fakahigoaʼi ko te agalelei?

▪ Koteā ʼaē ʼe fakatātā mai ai ʼo ʼuhiga mo te pule tūpulaga, ia te tuʼutāmaki ʼaē ʼo te maʼu koloā?

▪ Koteā te ʼu fakapale ʼaē neʼe fakapapau age kiai e Sesu ki tana kau tisipulo?

▪ E feafeaʼi te liliu ʼa nātou ʼaē neʼe mumuʼa ʼo mumuli, pea mo nātou ʼaē neʼe mumuli ʼo mumuʼa?