Kapite 99

ʼE Fai Akonaki Ia Sesu ʼi Seliko

KO SESU pea mo te hahaʼi ʼaē ʼe kaugā fagona mo ia neʼe vave pe tanatou kaku ki Seliko, ʼaē e ʼaho katoa mai Selusalemi te ʼalu lalo kiai. ʼE hage ko Seliko ʼe ko he kolo e faʼahi lua, ko te kolo ʼāfea ʼaē e sutea e kilometa tahi vaelua tona mamaʼo ʼi te kolo foʼou ʼaē e loma. Ko te hahaʼi ʼaē ʼe mavae mai te kolo ʼāfea pea nātou ʼolo ki te kolo foʼou ʼe nātou logoaʼa ʼo tokagaʼi e te ʼu tagata kainono kivi e toko lua. Ko te tahi ia nāua ʼe higoa ko Paletimeo.

ʼI tanā ʼiloʼi ʼaē ko Sesu ʼe fakalaka, neʼe kalaga ia Paletimeo pea mo tona kaumeʼa: “ ʼAliki, ʼofa mai kia māua, ʼAlo ʼo Tavite!” Ka neʼe muna age te hahaʼi ke nā fakalogologo, kae neʼe nā ʼāsili kalaga ʼo fēnei: “ ʼAliki, ʼofa mai kia māua, ʼAlo ʼo Tavite!”

ʼI te logoaʼa, neʼe tuʼu ia Sesu pea ina ʼui age kia nātou ʼaē ʼe kaugā fagona mo ia ke nātou pāuiʼi te ʼu tagata ʼaē ʼe kalaga. Neʼe fakaōvi atu tona ʼu kaumeʼa ki te ʼu kivi pea nātou ʼui age ki te tahi ia nāua: “Ke ke lotomālohi, tuʼu ake, heʼe ina pāuiʼi mai koe.” ʼI te lahi ʼo tona fiafia, neʼe ina līaki tona pulupulu, pea tuʼu ake aipe ki ʼoluga, pea ʼalu kia Sesu.

“Koteā te meʼa e koulua loto ke ʼau fai maʼa koulua?” ko te fehuʼi age ʼaia ʼa Sesu.

“ ʼAliki, ke ava ʼoma mata!” ko te kole mamahi age ʼaia ʼa te ʼu kivi e toko lua.

ʼI tona ʼofa ʼaē kia nāua, neʼe fāfā ia Sesu ki ʼonā mata pea, ohage ko tona fakahā ʼi te evaselio ʼa Maleko, neʼe ina ʼui age ki te tahi ia nāua: “ ʼAlu la, he kua ke lelei ʼi tau tui.” ʼI te lakaga pe ʼaia, neʼe ava ai te ʼu mata ʼo te ʼu kivi kainono; ʼe mahino papau ia neʼe nā faka kolōlia toko lua ki te ʼAtua. ʼI te sisio ʼa te hahaʼi ki te faʼahi ʼaia, neʼe toe kau mo nātou ki te fakavikiviki ki te ʼAtua. Neʼe mole toe ʼi ai he fakameʼameʼa ʼa Paletimeo pea mo tona kaumeʼa ʼo nā mulimuli ai ia Sesu.

ʼI te lolotoga ʼo tana fakalaka ʼi Seliko neʼe takatakai ia Sesu e te toe hahaʼi tokolahi. ʼE fia sio te hahaʼi fuli kia ia ʼaē neʼe ina fakamālōlō te ʼu kivi. Neʼe fakaʼefihi mai te hahaʼi kia Sesu mai te ʼu faʼahi fuli, ʼo mole kei feala ai te sisio ʼa ʼihi kia ia. Ia nātou ʼaia neʼe kau ai ia Sakeo, te pule ʼo te kau tagata tānaki tukuhau ʼo Seliko pea mo ʼona tafaʼaki. Ko te tagata ʼaia neʼe veliveli fau ke feala hana sio ki te meʼa ʼaē ʼe hoko.

Koia neʼe lele ia ʼi muʼa pea kake ʼi te fuʼu fiku ʼi te vaʼe ala ʼaē ʼe ʼalu ai ia Sesu. ʼI te faʼahi ʼaia, ʼe feala ai tana sio ki te ʼu meʼa fuli ʼaē ʼe hoko. ʼI te fakaōvi mai ʼa te hahaʼi, neʼe sio ake ia Sesu ki te fuʼu fiku pea pāui fēnei: “Sakeo, foimo hifo ki lalo, heʼe ʼi te ʼaho ʼaenī ʼe tonu ke ʼau nofo ʼi tou ʼapi.” ʼI tona fiafia, neʼe hifo ia Sakeo pea lele ki tona ʼapi ʼo teuteuʼi te meʼa ʼaē ʼe ʼaoga ki tana tagata fakaafe ʼaē ʼe ʼiloga kehe.

Kae, ʼi te sisio ʼa te hahaʼi ki te meʼa ʼaia, neʼe nātou kamata tologulu ai, heʼe nātou fakafuafua ʼe mole ko he meʼa ʼe tonu ke fai te fakaafe ʼo Sesu e he tagata ohage ko Sakeo. ʼE tonu ke tou ʼiloʼi ko Sakeo neʼe paʼaga koteʼuhi neʼe ina kaihaʼa te falā ʼa te hahaʼi ʼaki tana gāue ʼaē ko te tānaki ʼo te ʼu tukuhau.

Neʼe tokolahi te hahaʼi ʼe mulimuli ia Sesu pea, ʼi tana hū ki te ʼapi ʼo Sakeo, neʼe nātou meo ʼo ʼui maʼa nātou: “Kua hū ia ʼo nofo ʼi te ʼapi ʼo te tagata ʼe agahala.” Kae, neʼe sio ia Sesu ki te loto fia fakahemala ʼo Sakeo. Pea neʼe mole fakahemala ia Sesu ʼi tana hū ki tona ʼapi he neʼe tuʼu ia Sakeo ki ʼoluga pea ina fakahā te meʼa ʼaenī: “Koʼeni, ʼAliki, ʼe ʼau foaki te vaelua ʼo toku ʼu koloā maʼa te hahaʼi māsisiva pea, kapau neʼe ʼau maʼu he meʼa ʼa he tahi ʼaki he talaʼakiʼi hala, ʼe ʼau totogi anai ʼo liuga fā kia te ia.”

Neʼe fakahā e Sakeo tana fakahemala fakamalotoloto ʼi tana foaki te vaelua ʼo tona ʼu koloā maʼa te kau māsisiva pea ko tona toe neʼe ina huʼi ʼaki te ʼu meʼa ʼa te hahaʼi ʼaē neʼe ina kaihaʼa. ʼE mahino ia neʼe feala pe tana tānaki peʼe fia tona maʼua ki te hahaʼi ʼaki te ʼu tohi ʼaē neʼe tohi ai. Koia neʼe ina fakapapau age ai ʼe ina huʼi ʼo liuga fā tona lahi, ʼo ʼalutahi mo te lao ʼaē neʼe fakatuʼutuʼu e te ʼAtua: Kapau ʼe kaihaʼa e he tagata he akeno e tahi, pea ʼe tonu anai ke ina totogi ʼaki he ʼu manu e fā te akeno ʼaia.

Neʼe lahi ʼaupito te fiafia ʼo Sesu ʼi te fakapapau age ʼaē e Sakeo ʼe ina vaevae anai tona ʼu koloā, he neʼe ina ʼui fēnei: “ ʼI te ʼaho nei kua haʼu te fakamaʼuli ki te ʼapi ʼaenī, koteʼuhi he ko ia foki ʼaenī ʼe ko te tahi foha ʼo Apalahamo. Heʼe ko te Foha ʼo te tagata neʼe haʼu ʼo kumi pea mo hāofaki te meʼa ʼaē neʼe kua puli.”

ʼI he kiʼi temi ki muʼa atu, neʼe fakatātā e Sesu te ʼaluʼaga ʼo te kau ‘agahala ʼaē neʼe kua pupuli’ ʼaki te hisitolia ʼo te foha maumau koloā. ʼI henī, ʼe tou maʼu te faʼifaʼitaki ʼo te tagata neʼe kua puli pea kua toe maʼu. Logope la te muhumuhu mo te fakaʼāga ʼa te kau takitaki lotu mo tanatou hahaʼi ʼuhi ko te tokaga ʼa Sesu ki te hahaʼi ohage ko Sakeo, neʼe ina haga kumi aipe pea mo fakamālōlō te ʼu foha ʼaia ʼo Apalahamo ʼaē neʼe kua pupuli. Mateo 20:29-34; Maleko 10:46-52; Luka 18:35 ki te 19:10; Ekesote 22:1.

▪ Ko te faʼahi fea ʼaē, neʼe felāveʼi ai Sesu mo te ʼu kivi kainono, pea koteā te meʼa ʼaē neʼe ina fai maʼa nāua?

▪ Ko ai ia Sakeo, pea he koʼe neʼe kake ia ʼi te fuʼu ʼakau?

▪ Neʼe feafeaʼi te fakahā e Sakeo tana fakahemala?

▪ Koteā te ako ʼe feala ke tou maʼu mai te aga ʼa Sesu kia Sakeo?