Kapite 124

Tuku Kia Nātou Pea ʼAve

NEʼE lave kia Pilato te ʼalikiʼaga fakatokatoka ʼa Sesu ʼi te temi ʼaē neʼe fakamamahiʼi ai, ʼo ina toe faigaʼi ke fakahāo ia Sesu, kae neʼe toe ʼāsili age te ʼiʼita ʼa te kau pelepitelo pule. Kua nātou fakapapau ʼosi ke ʼaua naʼa ʼi ai he meʼa ʼe ina tāʼofi tanatou fakatuʼutuʼu kovi. Koia neʼe nātou toe kalaga ai: “Haʼi ia ia ki he pou! Haʼi ia ia ki he pou!”

“Koutou toʼo ʼe koutou totonu ia ia pea ke koutou haʼi ia ia ki he pou”, ko te tali ʼaia ʼa Pilato. (ʼO kehe mo te meʼa ʼaē ki te laukovi ki te ʼAtua ʼaē neʼe nātou tala ʼi muʼa atu, ʼe feala ke matehi e te kau Sutea he tagata fai fakapō neʼe hala mamafa ki te lotu.) Pea, ko te tuʼa nima leva ʼaenī ʼo te fakahā e Pilato ʼe mole he hala ʼa Sesu ʼo ʼui maʼana: “ ʼE mole ʼau maʼu he hala ia te ia.”

ʼI te sio ʼa te kau Sutea ʼe mole he fua ʼo tanatou ʼu fakakovi faka politike, neʼe nātou toe fakaʼaogaʼi te talaʼakiʼi ʼaē ki te laukovi ki te ʼAtua ʼaē neʼe nātou fakaʼaogaʼi ʼi he ʼu hola ki muʼa atu ʼi te fakamāuʼi ʼaē ʼo Sesu ia muʼa ʼo te Sanetualio. “ ʼE ʼi ai tamatou lao, ko tanatou ʼui ʼaia, pea, ʼi te lao, ʼe tonu ke matehi ia ia, koteʼuhi neʼe ina ʼui ko ia ko te ʼAlo ʼo te ʼAtua.”

ʼE foʼou kia Pilato te talaʼakiʼi ʼaia, pea neʼe toe ʼāsili ai tona mataku. Kua hoki ina tokagaʼi leva nei, ko Sesu ʼe mole tatau mo te tagata fuli, ohage ko tona fakahā e te misi ʼo tona ʼohoana pea mo te ʼatuga mālohi kehe ʼo ia ʼaē neʼe ina fakahā. Kae ki te ʼui leva ʼaē ko ia ko te “ ʼAlo ʼo te ʼAtua”? ʼE ʼiloʼi e Pilato ko Sesu ko te Kalilea. Kae, neʼe feala ʼapē koa la ia ke ʼi ai hona ʼuluaki maʼuli? ʼI tana toe fakahū ia ia ki tona fale, neʼe fehuʼi age e Pilato ki ai: “ ʼE ke haʼu maifea?”

Neʼe nofo fakalogologo pe ia Sesu. ʼI he kiʼi moʼi temi ki muʼa atu, neʼe ina ʼui age kia Pilato ko ia ko te hau, kae ko tona Puleʼaga ʼe mole kau ia ki te mālama ʼaenī. Koia ʼe mole he ʼuhiga anai ʼo hana toe fai he tahi ʼu fakamatala. Kae, ʼi tona kua lavea kovi ʼaē ʼi te mole tokagaʼi ʼo ia koteʼuhi neʼe mole tali age ia Sesu ki tana fehuʼi, neʼe ʼita ia Pilato kia Sesu ʼo ʼui maʼana: “ ʼE mole ke fia palalau mai koe kia te ʼau? ʼE mole ke ʼiloʼi koa la koe ʼe ʼau nofo mo te pule ʼaē ke toe tuku age koe pea mo te pule ʼaē ke haʼi koe ki he pou?”

“ ʼE mole ke maʼu tuʼa tahi anai he pule kia te ʼau, mokā na pau neʼe mole foaki atu kia te koe mai ʼoluga”, ko te tali ʼaia ʼa Sesu ʼaki he aga fakaʼapaʼapa. ʼE palalau ia ʼi henī ʼo ʼuhiga mo te pule ʼaē ʼe foaki e Sehova ki te kau tagata takitaki ʼo te malamanei ke nātou puleʼi te ʼu meʼa ʼo te kele. Neʼe toe hoko atu te palalau ʼa Sesu: “Koia ko te tagata ʼaē neʼe ina ʼaumai ʼau kia te koe ʼe lahi ake tana agahala.” ʼIo, ko te pelepitelo lahi ko Kaifa pea mo nātou ʼaē neʼe kau mo ia, ʼo feiā aipe mo Sutasi Isikaliote, ʼe nātou hala mamafa age ia Pilato ʼo ʼuhiga mo te tautea heʼe faitotonu ʼaē neʼe fai kia Sesu.

ʼI tana toe ʼāsili ōfo ʼaē ʼi te ʼu palalau ʼa Sesu pea mo tana tuʼania ʼaē naʼa ʼe ʼi ai hona faʼahi ʼatua, neʼe toe faigaʼi e Pilato ke fakahāo ia ia. Kae, neʼe mole fakalogo te kau Sutea kia Pilato. Neʼe nātou toe hoko atu tanatou fakakovi faka politike, ʼo nātou ʼui fakakākā age ki ai: “Kapau ʼe ke tuku age te tagata ʼaenā, pea ʼe mole ko he kaumeʼa koe ʼo Sesale. Ko ʼaē ʼe ina ʼui ko ia ko te hau ʼe palalau fakafeagai ia kia Sesale.”

Logope la te ʼu palalau mamafa ʼaia, neʼe toe ʼave e Pilato ia Sesu ki tuʼa. Pea ʼi tana fakaʼoʼono neʼe ina toe ʼui age ki te kau Sutea: “Koʼena tokotou hau! ”

“Toʼo ia ia! Toʼo ia ia! Haʼi ia ia ki he pou!”

“ ʼE ʼau haʼi anai koa tokotou hau ki he pou?” ko te fehuʼi ʼaia ʼa Pilato, he mole kei ina ʼiloʼi he tahi puleʼaki.

Ko te fatogia ʼaē ki Loma ʼe fakatupu ʼiʼita ki te kau Sutea. ʼI tona faka ʼuhiga totonu, ʼe nātou fehiʼa ki te pule ʼaē ʼa Loma. Kae logope te meʼa ʼaia, neʼe tala fakamalualoi e te kau pelepitelo pule: “ ʼE mole ʼi ai homatou tahi hau age ia Sesale.”

ʼI tana tuʼania ʼaē ki tona tuʼulaga pea mo naʼa koviʼia e te hahaʼi, neʼe fakamulimuli pea fai ia Pilato ki te kole mālohi ʼa te kau Sutea. Pea ina tuku age ai ia Sesu ke matehi. Neʼe toʼo e te kau solia te pulupulu lanu kula ʼo nātou fetogi ʼaki tona ʼu kofu tuʼa. Lolotoga tona ʼave, neʼe ʼamo tonu e Sesu te pou ʼaē ka haʼi ia ia kiai.

Ko te vaelua leva ʼaenī ʼo te uhu ʼo te feliaono ʼaho 14 ʼo Nisani; kua lagi ōvi pe te fetapā. Ko te talu ʼaē ʼo te tuʼu ʼa Sesu mai te felianima māfoatā, pea neʼe mole heʼeki gata talu mai ai mo tana tau mo te ʼu moʼi lakaga mamahi. ʼE mahino gafua pe te mole kei ʼi ai ʼaē ʼo hona mālohi ʼi te mamafa ʼo te pou. Koia neʼe fekauʼi fakamālohi ai te tagata ke ina ʼamo te pou, ʼe higoa ko Simone, mai Silene ʼi Afelika. Neʼe tokolahi te hahaʼi, ʼo kau ai mo te hahaʼi fafine, neʼe nātou muli mai ia nāua, ʼo nātou tuki ʼonatou fatafata ʼi tonatou lotomamahi pea mo nātou tagilāulau kia Sesu.

ʼI tana maliu ki te hahaʼi fafine, neʼe ʼui maʼa Sesu: “Kau taʼahine ʼo Selusalemi, tuku takotou fetagihi ʼaē kia te ʼau. Kae ke koutou fetagihi pe kia koutou totonu pea mo ʼakotou fānau; he koʼeni ka hoko mai te ʼu ʼaho ʼe ʼui ai anai: ‘Manuʼia ia nātou ʼaē ʼe paʼa, pea mo te ʼu falega fānau ʼaē neʼe mole fanaunau, pea mo te ʼu huhu ʼaē neʼe mole fakahuhu tamaliki!’ (...) Heʼe kapau ʼe nātou fai te ʼu meʼa ʼaenī ka kei mata te fuʼu ʼakau, ʼe koteā anai te meʼa ka hoko mokā ʼosi moamoa anai?”

Neʼe palalau ia Sesu ki te fuʼu ʼakau ʼaē ko te puleʼaga ʼo te kau Sutea, te fuʼu ʼakau ʼaia ʼaē ʼe kei mata veliveli pe ʼaē ʼe kei ʼi ai pe tona maʼuli, ʼaki te ʼi ai ʼa Sesu pea mo te toe ʼo te hahaʼi ʼe tui kia te ia. Kae ka toʼo kehe anai te kau Sutea ʼaia ʼi te puleʼaga, ko te meʼa pe anai ka toe ʼi te puleʼaga ʼaia ko he fuʼu ʼakau mate ʼi te faʼahi fakalaumālie, ko he kautahi fakafenua kua moamoa. ʼE lahi anai he ʼu meʼa ka fakatupu ʼaki ai te fetagihi mokā ʼōmai anai te ʼatu kautau loma, ʼaē ko he meʼa gāue ʼe fakaʼaogaʼi e te ʼAtua, ʼo maumauʼi te puleʼaga faka sutea! Soane 19:6-17; 18:31; Luka 23:24-31; Mateo 27:31, 32; Maleko 15:20, 21.

▪ Koteā te meʼa ʼaē neʼe talaʼakiʼi ai e te kau takitaki lotu ia Sesu ʼi tanatou sisio ʼaē ʼe mole he fua ʼo tanatou ʼu fakakovi faka politike?

▪ Koteā te tupuʼaga ʼaē ʼo te ʼāsili mataku ʼa Pilato?

▪ Ko ai ʼaē ʼe agahala lahi ake ʼo ʼuhiga mo te meʼa ʼaē neʼe fai kia Sesu?

▪ Neʼe lava feafeaʼi te faiga ʼaē ʼa te kau takitaki lotu ke tuku age e Pilato ia Sesu ke matehi?

▪ Koteā te meʼa ʼaē neʼe ʼui age e Sesu ki te hahaʼi fafine ʼaē ʼe fetagihi kia te ia, pea koteā te faka ʼuhiga ʼo tana ʼu palalau ʼo ʼuhiga mo te fuʼu ʼakau ʼaē kei “mata” pea mokā ʼosi “moamoa” anai?