Faʼahi 4

Ko Te ʼAtua ʼe Ina Fakahā Mai Tana ʼu Fakatuʼutuʼu Kia Tatou

1, 2. ʼE feafeaʼi koa tatatou ʼiloʼi ko te ʼAtua ʼe ina foaki te ʼu tali kia nātou ʼe fai fehuʼi fakamalotoloto?

KO HE ʼAtua fonu ʼi te ʼofa ʼe ina fakahā tana ʼu fakatuʼutuʼu kia nātou ʼaē ʼe nātou kumi fakamalotoloto ia ia. ʼE ina fakahā te ʼu tali ki te hahaʼi ʼaē ʼe nātou fai fehuʼi pe koʼe neʼe ina fakagafua te mamahi.

² Neʼe ʼui fēnei e te Tohi-Tapu: “Kapau ʼe ke kumi ia ia [te ʼAtua], pea ʼe ina faka fealagia anai ke ke maʼu ia ia.” “ ʼE ʼi ai te ʼAtua ʼi te lagi ʼe ko ia ko te Fakahāhā ʼo te ʼu meʼa fakalilo.” “Ko te Tuʼi ʼAliki ko Sehova ʼe mole ina fai anai he meʼa ka heʼeki ina fakahā tana meʼa fakafūfū ki tana ʼu kaugana, te kau polofeta.” — 1 Fakamatala 28:9; Taniela 2:28; Amosi 3:7.

ʼE tuʼu koa ʼifea te ʼu tali?

3. ʼE tou maʼu koa ʼifea te ʼu tupuʼaga ʼo te fakagafua e te ʼAtua ia te mamahi?

³ Ko te ʼu tali ʼo te ʼu fehuʼi ohage ko te fehuʼi ʼaē ʼo ʼuhiga mo te fakagafua fakaʼatua ʼo te mamahi pea mo te meʼa ka ina fai anai moʼo fakatokatoka ʼo te ʼu meʼa ʼaia ʼe tuʼu ʼi te tohi ʼaē neʼe ina takitaki tona tohi ke ʼaoga kia tatou. Ko te tohi ʼaia, ko tana Folafola, te Tohi-Tapu Maʼoniʼoni. “Ko te Tohi-Tapu katoa ʼe haʼu ia mai te ʼAtua moʼo akoʼi, moʼo fakatotonuʼi ʼo te ʼu meʼa fuli, moʼo fakatotonu ʼo te faitotonu, ke liliu te tagata ʼa te ʼAtua ko he tagata faiva katoa ia meʼa fuli moʼo fai ʼo he gāue lelei.” — 2 Timoteo 3:16, 17.

4, 5. Koteā te ʼu agaaga ʼaē ʼe hā mai ai ko te Tohi-Tapu ʼe ko te tohi makehe ʼe mole hona fakatatau?

⁴ Ko te Tohi-Tapu ʼe moʼoni ko he tohi mole hona fakatatau. ʼE tuʼu ai te fakamatala totonu ʼo te hisitolia ʼo te tagata, ʼo talanoa ki te temi neʼe fakatupu ai te tagata pea ʼe toe talanoa ki muʼa atu. ʼE toe ʼalu tahi foki mo te ʼu logo ʼo te malamanei, heʼe ko tana ʼu lea faka polofeta ʼe faka ʼuhiga ki te ʼu meʼa ʼe hoko ʼi totatou temi ʼo toe feiā foki ki te temi ka haʼu.

⁵ ʼE mole he tahi tohi ʼe moʼoni tona hisitolia. ʼE ʼi ai ʼi te temi nei te ʼu tohi ʼa te ʼu tagata faitohi ʼo te Temi Muʼa kae mole faʼa lahi. Kae, ʼe lahi te ʼu tohi ʼo te Tohi-Tapu ʼe nofo nei mo tatou, ko ʼihi ʼe mole katoa, ka ko ʼihi ʼe katoa: ko te ʼu tohi neʼe tohi nima e 6 000 ʼo te ʼu Tohi faka hepeleo (ko te ʼu tohi ʼaē e 39 ʼo te “Tauhi ʼĀfea”) pea ʼe ko te ʼu tohi e 13 000 ʼo te ʼu Tohi faka keleka faka kilisitiano (ko te ʼu tohi ʼaē e 27 ʼo te “Tauhi Foʼou”).

6. He koʼe ʼe tou ʼiloʼi papau ko te Tohi-Tapu ʼo te temi ʼaenī ʼe tatau ʼosi mo te ʼu tohi ʼuluaki ʼaē neʼe haʼu mai te ʼAtua?

⁶ Ko te ʼAtua Māfimāfi, ʼaē neʼe ina takitaki te tohi ʼo te Tohi-Tapu, neʼe tokaga lelei ia ke katoa tuʼumaʼu tana ʼu manatu mo taupau fakaleleiʼi te ʼu hiki tohi ʼaia. Ko tatatou ʼu Tohi-Tapu ʼi te temi nei ʼe ʼalu tahi ʼosi ia mo te ʼu ʼuluaki tohi. Ko te tahi puani ʼe fakamoʼoni ʼaki mai kia tatou ʼe ko ʼihi ʼu hiki tohi ʼo te ʼu Tohi faka keleka faka kilisitiano neʼe fai ia ka heʼeki ʼosi te sēkulō ʼaē neʼe fai ai te ʼu ʼuluaki tohi. Ko he ʼu hiki tohi ʼo te ʼu tohi ʼa te kau tagata faitohi ʼo te Temi Muʼa ʼaē ʼe tou maʼu ʼi te temi nei ʼe vaha atu ia mo nātou ʼaia ʼi te ʼu sēkulō.

Ko he meʼa ʼofa ʼo te ʼAtua

7. Ko te ʼu tohi ʼe fia ʼo te Tohi-Tapu kua ʼosi mafola?

⁷ Ko te Tohi-Tapu ko te tohi ʼaia ʼe lahi ʼaupito tona mafola ʼi te Hisitolia. Ko he ʼu lauʼi miliale e tolu neʼe ta. ʼE mole he tahi tohi ʼe ōvi mai ki ai. Tahi ʼaē meʼa, neʼe fakaliliu te Tohi-Tapu, katoa pe ʼe kogakoga, ʼi te ʼu lea e 2 000. ʼE feala nei ia ke lau e te toko 98 ki te teau ʼo te hahaʼi ʼo te malamanei.

8-10. Fakahāhā he ʼu tupuʼaga lelei ʼo te fakasiosioʼi ʼo te Tohi-Tapu

⁸ Ko he tohi ʼe ina fakamoʼoni mai ʼe haʼu mai te ʼAtua pea ʼe ina tuku mai te ʼu fakamoʼoni ʼi tuʼa pea mo loto ʼo te Tohi-Tapu ʼe ʼaoga moʼoni ke tou fakasiosioʼia. ʼE fakamahino mai e te Tohi-Tapu te ʼuhiga ʼo te maʼuli, te ʼu meʼa ʼe hoko ʼi te malamanei pea mo te meʼa ka hoko anai ʼi te temi ka haʼu. ʼE mole he tahi age tohi ʼe feala ke ina fai te fahaʼi ʼaia.

⁹ ʼIo, ko te Tohi-Tapu ʼe ko te logo ʼa te ʼAtua ki te tagata fuli ʼo te kele. Neʼe ina takitaki tana tohi ʼaki tona mālohi gāue, tona laumālie, pea ko te ʼu tagata e fāgofulu ʼaē neʼe nātou tohi. ʼE palalau mai kia tatou te ʼAtua ʼaki tana Folafola, ia te Tohi-Tapu. Neʼe tohi fēnei e te ʼapositolo ko Paulo: “ ʼI takotou maʼu te folafola ʼa te ʼAtua ʼaē neʼe koutou logoʼi ia mātou, neʼe koutou tali ʼo mole hage ko he folafola ʼa te tagata, kae, ohage ko tona ʼuhiga totonu, ko te folafola ʼa te ʼAtua.” — 1 Tesalonika 2:13.

¹⁰ Ko Abraham Lincoln, ko te 16 pelesita ʼo Amelika, neʼe palalau ia ki te Tohi-Tapu ohage ko he “meʼa ʼofa maʼuhiga ʼaupito neʼe foaki e te ʼAtua ki te tagata (...). Ka na ʼaua la ia te tohi ʼaia, ʼe mole feala hatatou ʼiloʼi kehekehe te lelei mo te kovi.” Tou vakaʼi pe neʼe feafeaʼi, ʼaki te ʼofa ʼaia ʼe mole hona tatau, te hā mai ʼa te mamahi, he koʼe neʼe fakagafua e te ʼAtua te fahaʼi ʼaia pea koteā te meʼa ʼaē ka ina fai anai moʼo fakatokatoka ʼo te fahaʼi ʼaia.

[Nota]

[Paki ʼo te pasina 10]

Ko te Tohi-Tapu, ʼaē ʼe haʼu mai te ʼAtua, ʼe ko he logo ia ʼe ina fakahā ki te tagata fuli ʼo te kele.