Faʼahi 7
Koteā Koa Te ʼu Fua ʼo Te Fakafeagai?
1-3. ʼE feafeaʼi koa te hā ʼaki te temi ʼaē kua hili ʼe moʼoni ia Sehova?
ʼO ʼUHIGA mo te fehuʼi ki te pule faʼifaʼitaliha ʼa te ʼAtua, neʼe koteā koa te ʼu fua ʼo te pule ʼa te tagata ʼaē neʼe fai lolotoga te ʼu sēkulō loaloaga ʼaia neʼe mole ina tokagaʼi ai te ʼAtua? Neʼe hā ai koa ko te hahaʼi ʼe takitaki lelei age ʼi te ʼAtua? Kailoa, ʼe tou vakaʼi te fahaʼi ʼaia ʼi te gaohi koviʼi ʼo te tagata lolotoga te ʼu sēkulō ʼaia.
2 Ko te fakafisi ʼo tatatou ʼu ʼuluaki mātuʼa ki te pule fakaʼatua neʼe tou to ai ki te malaʼia. Neʼe hoko ai kia nāua te ʼu mamahi ʼo feiā ai foki ki tonā hōloga. ʼE tonu pe ke nā ʼiʼita kia nāua. ʼE tou lau ʼi te Folafola ʼa te ʼAtua: “Neʼe nātou fai te ʼu meʼa ʼe kovi ʼaupito; ko nātou ʼe mole ko hana ʼu fānau, ko te meʼa ʼaē ʼe kovi ʼe ʼanātou ia.” — Teutalonome 32:5.
3 Neʼe fakatokaga age e te ʼAtua kia Atama pea mo Eva kapau ʼe nā mavae mai te ʼu fakatuʼutuʼu fakaʼatua ʼe hifohifo mamalie anai tona ʼu sino pea ʼe nā mamate anai. ʼE hā ʼi te hisitolia ʼo te tagata te moʼoni ʼo te fakatokaga ʼaia (Senesi 2:17; 3:19). Neʼe nā lituʼa ki te pule ʼa te ʼAtua pea, ʼaki te temi, neʼe hifohifo mamalie ai tona ʼu sino ʼo nā aʼu ai ki te mate.
4. He koʼe koa ʼe tou tutupu heʼe haohaoa, pea mo tou kau ki te mahaki pea mo te mate?
4 Ia Loma 5:12 ʼe ina fakamahino mai te meʼa ʼaē neʼe hoko ki tonā hōloga: “ ʼAki te tagata pe e tahi [ia Atama, te tāmai ʼo te famili katoa] ko te agahala neʼe hu ki te malamanei, pea ʼaki te agahala te mate, pea ko te mate neʼe mafola leva ki te tagata fuli koteʼuhi ko te hahaʼi fuli kua agahala.” Koia, ʼi tana fakafeagai ki te leʼoleʼo fakaʼatua, neʼe liliu ai tatatou ʼu ʼuluaki mātuʼa ko te ʼu agahala ʼe lahi tona ʼu kovi. ʼO mulimuli pe ki te ʼu lao ʼo te ʼu meʼa ʼaē ʼe tuku holo e te sino, neʼe mole feala ke nā toe foaki he tahi meʼa ʼe kehe age ʼi te heʼe haohaoa ki tonā hōloga. Koia ʼaē ʼe tou tutupu ai mo te ʼu kovi, pea mo tou kau ai ki te mahaki pea mo te mate.
5, 6. Koteā ʼaē ʼe fakahā mai e te hisitolia ʼo ʼuhiga mo te ʼu faiga ʼa te tagata ke ina fakatuʼu te tokalelei pea mo te maʼuli fīmālie moʼoni?
5 Kua lahi te ʼu sēkulō kua hili talu mai ai. Neʼe hā te ʼu puleʼaga pea pupuli atu. Neʼe ʼahiʼahiʼi te ʼu faʼahiga puleʼaga kehekehe. Kae, ko te famili ʼo te tagata ʼi te malamanei neʼe ina ʼiloʼi tuʼumaʼu pe te ʼu meʼa fakalialia. ʼI te kua ʼosi ʼo taʼu e ono afe, neʼe feala pe ke tou falala ko te hahaʼi ʼe haʼele anai ki muʼa ʼo feala ke nātou fakatuʼu te tokalelei, te faitotonu, pea mo te maʼuli fīmālie ʼi te malamanei katoa pea mo feala hanatou maʼuliʼi te ʼu kalitate ohage, ko te agalelei, te manavaʼofa, pea mo te fetokoniʼaki.
6 Kae ko te meʼa ia ʼaē ʼe tou sio ki ai ʼe kehe age ia. ʼE mole he faʼahiga puleʼaga fakatagata neʼe lavaʼi te ʼaumai ʼo te tokalelei moʼoni pea mo te maʼuli fīmālie. ʼI totatou 20 sēkulō pe, neʼe tou mamata ai ki te fakapogi ʼo te ʼu miliona hahaʼi ʼi te Holocauste pea neʼe laka ʼi te toko 100 miliona hahaʼi neʼe mamate ʼi te ʼu tau. ʼI totatou temi, tokolahi te ʼu hahaʼi neʼe fakamamahiʼi, fakapogi peʼe pilisoniʼi ʼuhi ko te mole tali peʼe ko te logo kehekehe ʼi te ʼu meʼa faka politike.
Te ʼu meʼa ʼe hoko ʼi te temi nei
7. Fakahāhā mai te agaaga ʼo te famili fakatagata katoa ʼi te temi nei.
7 Tou vakaʼi muʼa te agaaga ʼo te famili fakatagata katoa ʼo te malamanei ʼi te ʼaho nei. Ko te fakapō pea mo te tokakovi kua hoko pe ia ʼi te koga meʼa fuli. Ko te fakaʼaogaʼi ʼo te toloke kua lahi ʼaupito. Kua lahi te ʼu mahaki fakalialia ʼe maʼu ʼi te felāveʼi fakasino. Ko te hahaʼi ʼe lauʼi miliona kua nātou maʼu te mahaki ʼaē ko te SIDA. Ko te hahaʼi ʼe lauʼi hogofulu miliona ʼe mamate pakupaku peʼe mahahaki ʼi te taʼu fuli, kae ʼe ʼi ai pe te hahaʼi tokosiʼi ʼe maʼu paʼaga lahi ʼaupito. Ko te hahaʼi ʼe nātou ʼulihi pea mo gaohi koviʼi te kele. ʼI te fahaʼi fuli pe, ko te maʼuli faka famili pea mo te ʼu aga ʼaē ʼe tonu ke fai kua puli ia. ʼIo, ko te maʼuli ʼi te temi nei ʼe ʼiloga ai te pule ʼa te ‘ ʼatua ʼo te mālama ʼaenī’, ia Satana. Ko te mālama ʼaē ʼe pule ki ai, ʼe mole manavaʼofa, ʼe mole ʼi ai te ʼofa pea ʼe fakalialia ʼaupito. — 2 Kolonito 4:4.
8. He koʼe koa ʼe mole feala ke tou ʼui ko te ʼu meʼa ʼaē ʼe fai e te tagata ʼe mole ko he laka moʼoni ki muʼa ʼo te poto?
8 Neʼe tuku e te ʼAtua ki te tagata te temi ke ina faigaʼi ʼo aʼu ki te gataʼaga ʼo tona poto ʼi te ʼu meʼa fakapoto lalahi pea mo te ʼu meʼa fakakoloa. Kae ʼe feala koa hatatou lau kua laka ki muʼa te poto ʼi te kua fetogi ʼo te kalolo pea mo te nahau e te mitalausi, te tānike tau, te vakalele tau pea mo te pulu tu fenua? ʼE ko he laka koa ki muʼa ʼo te poto mokā kua feala te folau ʼa te tagata ʼi te ʼaele, ka mole poto ʼi te maʼuli ʼi te tokalelei ʼi te kele? ʼE ʼifea te laka ki muʼa ʼo te poto mo kapau ʼe matataku te hahaʼi ʼi te haʼele ʼi te ʼu ala mokā poʼuli pea, ʼi ʼihi fahaʼi, tatau aipe pe ʼe ʼaho?
Te meʼa ʼaē neʼe fakahā e te temi
9, 10. a) Koteā ʼaē neʼe hā lelei mai ʼi te ʼu sēkulō ʼaē ʼe fefakahoaʼaki? b) He koʼe ʼe mole pulihi anai e te ʼAtua te loto faʼitaliha?
9 Ko te ʼu sēkulō ʼaē ʼe fefakahoaʼaki ʼe hā mai ai ʼe mole feala te taki e te ʼu tagata tonatou ʼu ala ʼo lelei age mokā ʼe mole nātou tokagaʼi te pule ʼa te ʼAtua. ʼE mole nātou fealagia te fahaʼi ʼaia, ohage pe ko tanatou mole feala tanatou nonofo mole kakai, mole ʼiʼinu peʼe mole mānanava. Ko te ʼu fakamoʼoni ʼe hā lelei ai te fahaʼi ʼaenī: neʼe fakatupu tatou ke tou fakalogo ki te taki ʼo totatou Tupuʼaga, ohage pe ko totatou fakatupu ʼo fakalogo totatou maʼuli ki te meʼa kai, te meʼa ʼinu pea mo te ʼaele.
10 ʼAki te fakagafua ʼo te agakovi, neʼe fakahā ai e te ʼAtua te ʼu fua fakaʼofaʼofa ʼo te fakaʼaogaʼi kovi ʼo te loto faʼitaliha. Kae ko te loto faʼitaliha ʼe ko te meʼa ʼofa maʼuhiga ʼo te ʼAtua, koia neʼe mole ina loto ke hāla te tagata ʼi te meʼa ʼofa ʼaia ka neʼe fakagafua e te ʼAtua ke nātou sio mata ki te ʼu fua kovi ʼo te mole lelei ʼo tona fakaʼaogaʼi. ʼE moʼoni te Folafola ʼa te ʼAtua ʼi tana ʼui ʼaē: “ ʼE mole ʼa te tagata ʼaē ʼe haʼele te fili ʼo tona ala.” ʼE moʼoni foki tana ʼui mai ʼaē: “Ko te tagata ʼe ina puleʼi pe te tagata ki tona tuʼutāmaki.” — Selemia 10:23; Tagata Tānaki 8:9.
11. Neʼe ʼi ai koa he faʼahiga pule fakatagata neʼe ina lavaʼi te pulihi ʼo te mamahi?
11 Ko te fakagafua fakaʼatua ʼo te pule fakatagata lolotoga taʼu e ono afe ʼe hā lelei mai ai ʼe mole feala ke pulihi e te tagata te mamahi. Neʼe mole ina lavaʼi te fai ʼo te fahaʼi ʼaia. Koʼeni te faʼifaʼitaki, logope te lahi ʼo tona poto, mo tona ʼu koloā pea mo tona mālohi, ko Salomone, hau ʼo Iselaele, neʼe mole ina lavaʼi te pulihi ʼo te masiva ʼi tona temi ʼaē ʼe tupu mai te pule ʼa te tagata (Tagata Tānaki 4:1-3). ʼO tatau aipe mo te ʼaho nei, logope te laka ki muʼa ʼo te poto, ko te kau takitaki ʼe mole lavaʼi te pulihi ʼo te ʼu mamahi. Tahi ʼaē meʼa, ʼe hā mai ʼi te hisitolia ko te hahaʼi ʼaē ʼe fakafisi ki te pule ʼa te ʼAtua neʼe nātou toe fakalahi te ʼu mamahi ka neʼe mole nātou pulihi te ʼu meʼa ʼaia.
Ko te ʼAtua ʼe sio mamaʼo
12-14. Koteā te ʼu lelei heʼegata ʼe maʼu mai te fakagafua fakaʼatua ʼo te mamahi?
12 Ko te fakagafua fakaʼatua ʼo te mamahi neʼe tou ʼiloʼi ai te mamahi. Kae ko te ʼAtua neʼe ina fili he temi loaloaga, heʼe ina ʼiloʼi te ʼu fua lelei ʼe maʼu ai. Ko te faʼahi ʼaē neʼe fili e te ʼAtua ʼe fua lelei anai ki tana ʼu meʼa ʼaē neʼe ina fakatupu, ke gata pe ʼi he ʼu taʼu veliveli peʼe ko he ʼu taʼu ʼe lauʼi afe, kae ki he ʼu taʼu ʼe lauʼi miliona, ʼio, ki te heʼegata.
13 Kapau ʼi te temi ki ʼa muli ʼe ʼi ai he tahi ʼe ina fakaʼaogaʼi kovi tona loto faʼitaliha ʼo fakafeagai ki te ʼAtua, ʼe mole toe ʼaoga ke tuku age ki ai he temi ke ina fakahā ai te tonu ʼo tana manatu. ʼI tana tuku ia nātou neʼe fakafeagai ke maʼuʼuli lolotoga te ʼu taʼu ʼe lauʼi afe, neʼe fakatuʼutuʼu e te ʼAtua ia he faʼifaʼitakiʼaga ʼe feala anai hona fakaʼaoga ʼo heʼegata, ʼi he fahaʼi pe ʼo te ʼatulaulau.
14 ʼI te fakagafua e Sehova te agakovi pea mo te mamahi ʼo aʼu mai ki te temi nei, ʼe hā ai ʼe mole feala ke lava lelei te ʼu meʼa ʼaē ʼe fakatutuʼu kia te ia. ʼE hā ai ʼe mole he fakatuʼutuʼu fakatagata peʼe fakalaumālie ʼe tou maʼu mai ai he ʼu lelei ʼe fualoa. Koia, ʼe fakalakatonu lelei anai te ʼAtua mokā ina faka ʼauha anai ia te meʼa maʼuli fuli pe ʼe fakafeagai kia te ia. “ ʼE ina faka ʼauha anai te kau agakovi fuli.” — Pesalemo 145:20; Loma 3:4.
[Paki ʼo te pasina 15]
ʼI te fili ʼaē ʼe tatatou ʼu ʼuluaki mātuʼa ke nā ʼāteaina mai te ʼAtua, neʼe kamata ai tonā matutuʼa ʼo aʼu ki tonā mamate.
[Paki ʼo te pasina 16]
Ko te pule fakatagata ʼaē ʼe mole ina tokagaʼi te ʼAtua neʼe hā lelei mai tona kovi ʼaupito.
[Haʼuʼaga ʼo te paki]
U.S. Coast Guard photo