Ako 12
Tou Fakaʼapaʼapa Ki Te Maʼuli Pea Mo Te Toto
ʼE tonu ke tou faka ʼuhiga feafeaʼi te maʼuli? (1) mo te fakatō fatu? (1)
ʼE fakahā feafeaʼi e te kau Kilisitiano ʼe nātou tokakaga ke ʼaua naʼa nātou fakatupu he tuʼutāmaki? (2)
ʼE kovi koa te matehi ʼo te ʼu manu? (3)
Koteā te ʼu aga ʼaē ʼe mole ko he ʼu aga fakaʼapaʼapa ki te maʼuli? (4)
Koteā te lao ʼa te ʼAtua ʼo ʼuhiga mo te toto? (5)
ʼE kau koa ki te faʼahi ʼaia te ʼu foʼi huki toto? (6)
1. Ko Sehova te Matapuna ʼo te maʼuli. Ko te ʼu meʼa maʼuli fuli ʼe nātou maʼuʼuli ʼuhi ko te ʼAtua. (Pesalemo 36:9) Ko te maʼuli ʼe taputapu ia ki te ʼAtua. Māʼiape la mo te maʼuli ʼo te kiʼi tamasiʼi ʼaē ʼe fuafatuʼi e tana faʼe ʼe maʼuhiga kia Sehova. Ko te fakatuʼutuʼu ʼaē ke matehi ia te kiʼi toe ʼaē ʼe lolotoga tuputupu, ʼe kovi ia kia mata ʼo te ʼAtua.—Ekesote 21:22, 23; Pesalemo 127:3.
2. Ko te kau Kilisitiano moʼoni ʼe nātou tokakaga ke ʼaua naʼa nātou fakatupu he tuʼutāmaki. ʼE nātou vakaʼi tanatou motokā pea mo tonatou loto fale peʼe mole ʼi ai he meʼa ʼe feala ke tuʼutāmaki ai he tahi. (Teutalonome 22:8) Ko te kau kaugana ʼa te ʼAtua ʼe mole tonu ke nātou fakatupu tuʼutāmaki ka mole hona ʼaoga ki tonatou maʼuli ʼaki pe hanatou manako ki te meʼa ʼaia peʼe ko hanatou fia logoʼi he meʼa ʼe mālohi. Koia, ʼe mole nātou kau ki te ʼu faigaoʼi agamālohi ʼaē ʼe fakatupu tuʼutāmaki ai ki te maʼuli ʼo ʼihi hahaʼi. ʼE nātou līaki te ʼu meʼa ʼaē ʼe nātou fakaneke te hahaʼi ke nātou leleiʼia te ʼu agamālohi.—Pesalemo 11:5; Soane 13:35.
3. ʼE toe taputapu foki mo te maʼuli ʼo te ʼu manu ki te Tupuʼaga. ʼE lagi matehi anai e he Kilisitiano he ʼu manu maʼana kai peʼe ke ina maʼu ai hona meʼa vala, peʼe moʼo puipui ʼo ia mai te mahaki pea mo te tuʼutāmaki. (Senesi 3:21; 9:3; Ekesote 21:28) Kae ʼe kovi te gaohi koviʼi ʼo te ʼu manu peʼe ko he matehi ʼo nātou ʼuhi pe ko he gaoʼi peʼe ko he meʼa ʼe tou leleiʼia.—Tāʼaga Lea 12:10.
4. Ko te suluka, te kaikai pata, pea mo te fakaʼaogaʼi ʼo te ʼu toloke ʼuhi pe ko he meʼa moʼo nātou fakafiafia, ʼe mole ko he ʼu meʼa ʼe tonu ke fai e te kau Kilisitiano. ʼE kovi te ʼu aga ʼaia koteʼuhi (1) ʼe tou liliu ʼo kaugana ki te ʼu meʼa ʼaia, (2) ʼe fakatupu kovi ki totatou sino, pea (3) ko te ʼu meʼa ʼaia ʼe heʼemaʼa. (Loma 6:19; 12:1; 2 Kolonito 7:1) ʼE feala ke faigataʼa ʼaupito te līaki ʼo te ʼu agamāhani ʼaia. Kae ʼe tonu ke tou fai te faʼahi ʼaia ke leleiʼia tatou e Sehova.
5. ʼE toe taputapu foki mo te toto kia mata ʼo te ʼAtua. ʼE ʼui e te ʼAtua ko te nefesi, peʼe ko te maʼuli, ʼe ʼi te toto. Koia ʼe kovi te kai ʼo te toto. ʼE toe kovi foki te kai ʼo te kanoʼi manu ʼaē neʼe mole fakaʼalu lelei tona toto. Kapau ʼe tege te manu peʼe mate ʼi tana tō ki he hele, ʼe mole tonu ke kai. Kapau neʼe hukiʼi pe neʼe fanahi, ʼe tonu ke foimo fakahali te toto mo kapau ʼe tonu ke kai.—Senesi 9:3, 4; Levitike 17:13, 14; Gāue 15:28, 29.
6. ʼE kovi koa te tali ʼo he ʼu foʼi huki toto? Koutou manatuʼi, ʼe fakamaʼua e Sehova ke tou fakamamaʼo mai te toto. Ko tona faka ʼuhiga ʼaē ʼe mole tonu ke ʼai ki totatou sino te toto ʼo ʼihi age ʼi he ʼu faʼahiga ʼaluʼaga pe, ʼo toe feiā aipe la mo totatou toto ʼaē ʼe taupau ke fakaʼaogaʼi ki ʼamuli. (Gāue 21:25) Koia ʼe fakafisi anai te kau Kilisitiano moʼoni ki te ʼu foʼi huki toto. ʼE nātou tali anai niʼihi ʼatu ʼu faʼahiga faitoʼo, ohage ko te ʼu faitoʼo ʼaē ʼe mole fakaʼaoga ai he toto. ʼE nātou fia maʼuʼuli, kae ʼe mole nātou faigaʼi anai ke nātou hāofaki tonatou maʼuli ʼo maumauʼi te ʼu lao ʼa te ʼAtua.—Mateo 16:25.
[Paki ʼo te pasina 25]
Ke leleiʼia tatou e te ʼAtua, ʼe tonu ke tou fakafisi ki te toto, te ʼu agamāhani heʼemaʼa, pea mo te ʼu meʼa ʼaē ʼe feala ke tou tuʼutāmaki ai