Kapite Tahi
Ko Te Tauhi ʼi Te Logo Tahi ʼi Totatou Temi—Koteā Tona Faka ʼUhiga?
1, 2. (a) Koteā te meʼa fakafiafia ʼaē ʼe hoko ʼi totatou temi? (b) Koteā te ʼamanaki taulekaleka ʼe maʼu e te hahaʼi faitotonu?
ʼI TE malamanei katoa ʼe hoko te meʼa fakafiafia, ko te tauhi ʼa te hahaʼi ʼi te logo tahi. Ko te logo tahi ʼaia ʼe ina fakatahiʼi te lauʼi miliona hahaʼi mai te ʼu puleʼaga, mo te ʼu telepi, pea mo te ʼu lea fuli pe. ʼI te taʼu fuli, ʼe hilifaki kiai te tahi ʼu hahaʼi. ʼE ʼui e te Tohi-Tapu ko nātou ʼaia ko te kau “fakamoʼoni” ʼa Sehova, pea ʼe fakahigoa nātou ko te “toe hahaʼi tokolahi.” “ ʼE nātou foaki [ki te ʼAtua] te tauhi fakataputapu ʼi te ʼaho mo te po.” (Isaia 43:10-12; Apokalipesi 7:9-15) Koteā tona tupuʼaga? He kua nātou ʼiloʼi ko Sehova ko te ʼAtua moʼoni pe e tahi. ʼE uga ai nātou ke nātou mulimuli ʼi tonatou maʼuli ki tana ʼu lekula faitotonu. Pea neʼe nātou ako ʼe tou maʼuʼuli nei ʼi “te ʼu ʼaho fakamuli” ʼo te tuʼu agakovi ʼaenī, ʼaē kua vave fakaʼauha e te ʼAtua, pea ʼe ina fetogi anai ʼaki tana mālama foʼou faka palatiso.—2 Timoteo 3:1-5, 13; 2 Petelo 3:10-13.
2 ʼE fakapapau fēnei e te Folafola ʼa te ʼAtua: “Kei toe he kiʼi temi siʼipe, pea pulihi anai te tagata agakovi . . . Kae ko te kau agavaivai ʼe nātou maʼu anai te kele, pea ʼe moʼoni papau ʼe nātou fiafia anai ʼi te mahu ʼo te tokalelei.” (Pesalemo 37:10, 11) “ ʼE maʼu anai te kele e te kau faitotonu, pea ʼe nātou nonofo ai anai ʼo talu ai.” (Pesalemo 37:29) “[Ko te ʼAtua] ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe pulihi anai ia; ʼe mole toe ʼi ai anai he putu, he lāuga, he mamahi. Ko te ʼu meʼa ʼāfea kua puli ia.”—Apokalipesi 21:4.
3. ʼE hoko feafeaʼi te logo tahi moʼoni ʼi te tauhi?
3 ʼI te temi nei ko nātou ʼaē ʼe logo tahi ʼi te tauhi moʼoni, ʼe ko nātou te ʼu ʼuluaki hahaʼi ʼaē ka maʼuʼuli ʼi te mālama foʼou. ʼE nātou ako te finegalo ʼo te ʼAtua pea mo nātou faiga mālohi ke nātou fakahoko. Neʼe fakahā e Sesu te maʼuhiga ʼo te faʼahi ʼaia, ʼi tana ʼui fēnei: “Ko te faka ʼuhiga ʼaenī ʼo te maʼuli heʼegata, ke nātou ako te ʼiloʼi ʼo koe, te ʼAtua moʼoni pe ʼaē e tahi, pea mo ia ʼaē neʼe ke fekauʼi mai, ia Sesu Kilisito.” (Soane 17:3) Neʼe tohi fēnei e te ʼapositolo ko Soane: “ ʼE lolotoga fakalaka nei te malamanei pea mo tona loto, kae ko ʼaē ʼe ina fai te finegalo ʼo te ʼAtua ʼe nofo ia ʼo talu ai.”—1 Soane 2:17.
Tona Faka ʼUhiga Moʼoni
4. (a) Koteā te faka ʼuhiga moʼoni ʼi totatou temi, ʼo te fakatahitahi ʼa te hahaʼi tokolahi ke nātou tauhi ʼi te logo tahi? (b) ʼE fakamatala feafeaʼi e te Tohi-Tapu te fakatahitahi ʼaia?
4 Koteā te faka ʼuhiga moʼoni ʼi totatou temi, ʼo te fakatahitahi ʼaia ʼa te hahaʼi tokolahi ke nātou tauhi ʼi te logo tahi? ʼE fakamoʼoni ai kua tou ōvi ki te fakaʼosi ʼo te tuʼu agakovi ʼaenī, pea hili pe ʼaia pea fakatuʼu te mālama foʼou ʼa te ʼAtua. ʼE tou sio ki te hoko ʼo te ʼu lea faka polofeta ʼa te Tohi-Tapu ʼaē neʼe nātou fakakikite te fakatahitahi lahi ʼaia. ʼE ʼui fēnei e te tahi ʼi te ʼu lea faka polofeta ʼaia: “ ʼE mahino papau ia, ʼi te ʼu ʼaho fakaʼosi [te ʼu ʼaho fakamuli ʼaenī], ko te moʼuga ʼo te fale ʼo Sehova [tana lotu moʼoni māʼoluga] ʼe tuʼu mālohi anai ʼi te fuga tumutumu ʼo te ʼu moʼuga [ʼo māʼoluga age ʼi te tahi ʼu lotu], . . . pea ʼe tonu anai ke ʼolo kiai te ʼu puleʼaga fuli pe. Pea ʼe mahino papau ia ʼe lahi te ʼu fenua ʼe nātou ʼolo anai pea ʼe nātou ʼui anai: ‘Koutou ʼōmai, pea ke tou hake ki te moʼuga ʼo Sehova pea ki te ʼapi ʼo te ʼAtua ʼo Sakopo; pea ʼe ina akoʼi anai kia tatou tona ʼu ala, pea ʼe tou haʼele anai ʼi tona ʼu ala foufou.’ ”—Mikea 4:1, 2; Pesalemo 37:34.
5, 6. (a) ʼE hoko feafeaʼi te maliu ʼa te ʼu puleʼaga kia Sehova? (b) Koteā te ʼu fehuʼi ʼe tonu ke tou fai kia tatou?
5 Logola ʼe mole ko te ʼu puleʼaga katoa ʼaē ʼe nātou ʼolo ki te fale fakalaumālie ʼa Sehova moʼo atolasio ai, kae ko te lauʼi miliona hahaʼi mai te ʼu fenua fuli ʼe nātou fai te faʼahi ʼaia. ʼI te malave ʼo tonatou loto, ʼi tanatou mahino ki te fakatuʼutuʼu fonu ʼi te ʼofa ʼo Sehova pea mo tona ʼulugaaga makehe, ʼaki he agavaivai ʼe nātou fia ʼiloʼi pe koteā ʼaē ʼe ina fakamaʼua age kia nātou. ʼE nātou faikole ohage ko te faikole ʼa te tagata fai pesalemo, ʼaē neʼe ina kole fēnei: “Akoʼi ʼau ke ʼau fai tou finegalo, heʼe ko koe ko toku ʼAtua.”—Pesalemo 143:10.
6 ʼE koutou kau koa ʼi te hahaʼi tokolahi ʼaē ʼe fakatahitahi e Sehova ʼi te temi nei ke nātou tauhi ʼi te logo tahi? Ko takotou tali ke akoʼi koutou ʼaki tona Folafola, ʼe ina fakahā koa ʼe koutou fiafia moʼoni heʼe ko Sehova te Matapuna ʼo te ako ʼaia? E feafeaʼi takotou ‘haʼele ʼi tona ʼu ala foufou’?
ʼE Hoko Feafeaʼi Te Logo Tahi ʼAia?
7. (a) ʼE fakahoko feafeaʼi anai ia te logo tahi ʼi te tauhi? (b) He koʼe ʼe maʼuhiga ke tou liliu ko he kau atolasio ʼa Sehova ʼi te temi nei, pea ʼe tou lava tokoni feafeaʼi ki niʼihi ake ke nātou fai te potu ʼaia?
7 Neʼe fakatuʼutuʼu e Sehova ke logo tahi te hahaʼi fuli pe ʼi te kele ʼi te tauhi moʼoni. ʼE tou atalitali ʼaki he ʼamanaki ke hoko vave, ia te ʼaho ʼaē ka tauhi anai ia te hahaʼi maʼuʼuli fuli ki te ʼAtua moʼoni pe e tahi! (Pesalemo 103:19-22) Kae ʼi muʼa ʼo tana hoko mai, ʼe tonu ke pulihi e Sehova te hahaʼi fuli ʼaē ʼe mole nātou fai tona finegalo faitotonu. ʼAki he loto manavaʼofa, ʼe ina fakahā fakatomuʼa te meʼa ʼaē ka ina fai anai, ke feala ai ki te hahaʼi ʼi te potu fuli pe ke nātou fetogi tanatou aga. (Isaia 55:6, 7) Koia ʼi totatou temi ʼe fai ki “te puleʼaga kehekehe, te telepi kehekehe, te lea kehekehe pea mo te hahaʼi kehekehe” te pāui maʼuhiga ʼaenī: “Koutou manavasiʼi ki te ʼAtua pea mo koutou faka kolōlia kia te ia, heʼe kua hoko mai te hola ʼo tana fakamāu, pea ke koutou atolasio kia te Ia ʼaē neʼe ina faʼu te lagi mo te kele mo te tai pea mo te ʼu matapuna vai.” (Apokalipesi 14:6, 7) Neʼe koutou tali koa te fakaafe ʼaia? Kapau koia, pea ʼe ko takotou pilivilesio ke koutou fakaafe te tahi ʼu hahaʼi ke nātou ʼiloʼi pea mo atolasio ki te ʼAtua moʼoni.
8. Hili tatatou ako te ʼu akonaki tāfito ʼo te Tohi-Tapu, koteā te tuputupu ʼe tonu ke tou faiga moʼoni kiai?
8 ʼE mole loto e Sehova ke atolasio age kia te ia he ʼu hahaʼi ʼe nātou ʼui ʼe nātou tui kia te ia, kae hoha pe nātou ki te ʼu lelei ʼo nātou totonu. ʼE loto e te ʼAtua ke faiga te hahaʼi ke nātou maʼu te “ ʼatamai mālama totonu ʼo tona finegalo,” pea ke hā ʼi tonatou maʼuli. (Kolose 1:9, 10) Koia ko te hahaʼi loto fakafetaʼi ʼaē kua nātou ako te ʼu akonaki tāfito ʼo te Tohi-Tapu, ʼe nātou fia tuputupu ʼo aʼu ki te katoa ʼo te ʼuhiga tagata faka Kilisitiano. ʼE nātou fia ʼiloʼi lelei age ia Sehova, mo mahino lahi age pea mo mahino loloto age ki tana Folafola pea mo lahi age tanatou maʼuliʼi. ʼE nātou faiga ke nātou maʼuliʼi te ʼu kalitate ʼo totatou Tāmai ʼi selo pea mo manatu ohage ko ia. ʼE uga ai nātou ke nātou kumi he ʼu ʼaluʼaga ke nātou kau ai ki te gāue ʼaē ʼe ina hāofaki te ʼu maʼuli, ʼaē neʼe fakatuʼutuʼu e Sehova ke fai ʼi te kele ʼi totatou temi. ʼE koutou loto koa la mo koutou kiai?—Maleko 13:10; Hepeleo 5:12–6:3.
9. ʼE lava maʼu feafeaʼi ia ʼaho nei te logo tahi?
9 ʼE fakahā mai e te Tohi-Tapu ko nātou ʼaē ʼe tauhi kia Sehova ʼe ko he hahaʼi ʼe logo tahi. (Efeso 4:1-3) ʼE tonu ke maʼu te logo tahi ʼaia ia ʼaho nei, logola ʼe tou maʼuʼuli ʼi he mālama ʼe maveuveu pea mo logola ʼe kei tou tauʼi totatou ʼuhiga agahala. Neʼe faikole fakamalotoloto ia Sesu ke liliu tana ʼu tisipulo ʼo tahi, ke nātou logo tahi moʼoni. Koteā tona faka ʼuhiga? ʼUluaki, ʼe nātou felogoi lelei mo Sehova pea mo tona ʼAlo. Lua, ʼe nātou logo tahi. (Soane 17:20, 21) Moʼo fakahoko te faʼahi ʼaia, ko te fakatuʼutuʼu ʼaē ʼe fakaʼaogaʼi e Sehova moʼo akoʼi tana hahaʼi ʼe ko te kokelekasio.
Koteā Te ʼu Faʼahi ʼAē ʼe Lagolago Ki Te Logo Tahi
10. (a) Koteā ʼaē ʼe tou fakatuputupu mo kapau ʼe tou fakaʼaogaʼi te Tohi-Tapu moʼo fakakaukauʼi te ʼu tali ki te ʼu fehuʼi ʼaē ʼe malave kia tatou? (b) Koutou vakaʼi te ʼu faʼahi ʼaē ʼe lagolago ki te logo tahi faka Kilisitiano, ʼo koutou tali ki te ʼu fehuʼi ʼaē ʼe tuʼu ʼi te palakalafe ʼaenī.
10 ʼI lalo ifo, ʼe talanoa kia faʼahi tāfito e fitu ʼi te logo tahi ʼi te tauhi. ʼI takotou tali ki te ʼu fehuʼi ʼaē ʼe pipiki kiai, koutou fakakaukauʼi peʼe malave feafeaʼi te ʼu faʼahi takitahi ʼaia ki takotou felogoi mo Sehova pea mo te ʼu tēhina mo tuagaʼane. Kapau ʼe koutou fakakaukauʼi te ʼu puani ʼaia pea mo lau te ʼu vaega ʼaē ʼe mole tohi katoa ai, pea ʼe tokoni atu anai ke tuputupu ia koutou te poto fakaʼatua, te fealagia fakakaukau, pea mo te fakasiosio tonu—te ʼu kalitate ʼaē ʼe ʼaoga kia tatou fuli. (Tāʼaga Lea 5:1, 2; Filipe 1:9-11) Koutou vakaʼi takitahi te ʼu faʼahi ʼaia.
(1) ʼE tou tali ʼe tāu mo Sehova ke ina fakatuʼutuʼu he ʼu lekula ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi. “Falala kia Sehova ʼaki tou loto katoa pea ʼaua naʼa ke falala ki tou ʼatamai. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou.”—Tāʼaga Lea 3:5, 6.
He koʼe ʼe tonu ke tou kumi te tokoni pea mo te takitaki ʼa Sehova, mokā tou fai he ʼu tonu? (Pesalemo 146:3-5; Isaia 48:17)
(2) ʼE takitaki tatou e te Folafola ʼa te ʼAtua. “ ʼI takotou maʼu te folafola ʼa te ʼAtua ʼaē neʼe koutou logoʼi ia mātou, neʼe koutou tali ʼo mole hage ko he folafola ʼa te tagata, kae neʼe koutou tali ʼaki tona ʼuhiga totonu, ʼaē ko te folafola ʼa te ʼAtua, ʼaē ʼe toe gāue ia koutou, ko te hahaʼi tui.”—1 Tesalonika 2:13.
Koteā te tuʼutāmaki ʼaē ʼe lava hoko ʼi te fai pe ʼo te meʼa ʼaē ʼe tou “manatu” ʼe lelei? (Tāʼaga Lea 14:12; Selemia 10:23, 24; 17:9)
Kapau ʼe mole tou ʼiloʼi te tokoni ʼaē ʼe fai e te Tohi-Tapu ʼo ʼuhiga mo he faʼahi, koteā ʼaē ʼe tonu ke tou fai? (Tāʼaga Lea 2:3-5; 2 Timoteo 3:16, 17)
(3) Ko tatou fuli ʼe tou maʼu te meʼa kai fakalaumālie e tahi. “Ko tou ʼu foha fuli ʼe nātou liliu anai ko he ʼu hahaʼi neʼe akoʼi e Sehova.” (Isaia 54:13) “Tou fetokagaʼaki ke tou uga ia tatou ki te ʼofa pea mo te ʼu gāue matalelei, ʼo mole tou tuku tatatou ʼu fakatahi, ohage ko te agamāhani ʼa ʼihi, kae ke tou fefakaloto mālohiʼaki, tāfito la he kua koutou sio ki te fakaōvi mai ʼo te ʼaho [ʼo te fakaʼauha].”—Hepeleo 10:24, 25.
Koteā te ʼu fua lelei ʼe maʼu e nātou ʼaē ʼe nātou fakaʼaogaʼi te ʼu fakatuʼutuʼu ʼa Sehova ko hanatou meʼa kai fakalaumālie? (Isaia 65:13, 14)
(4) Ko Sesu Kilisito tatatou Takitaki, kae mole ko he tagata. “ ʼAua naʼa fakahigoaʼi koutou ko Lapi, heʼe ko te tokotahi pe ʼe ko tokotou tagata faiako, pea ko koutou ʼe koutou tautēhina fuli. Pea tahi foki, ʼaua naʼa koutou fakahigoa he tahi ko hakotou tāmai ʼi te kele, heʼe ko te tokotahi pe ʼe ko takotou Tāmai, ia Ia ʼaē ʼe ʼi selo. ʼAua naʼa fakahigoaʼi koutou ko he ‘kau takitaki,’ heʼe ko te tokotahi pe ʼe ko tokotou Takitaki, ko Kilisito.”—Mateo 23:8-10.
ʼE tonu koa ke manatu he tahi ia tatou ʼe māʼoluga age ʼi ʼihi? (Loma 3:23, 24; 12:3)
(5) Kia tatou, ko te Puleʼaga ʼa te ʼAtua ʼe ko te ʼamanaki pe ʼaia e tahi ki te malamanei. “ ʼE tonu ke koutou faikole fēnei: ‘Ko tamatou Tāmai ʼe ʼi selo, ke tāpuhā tou huafa! Ke hoko mai tou puleʼaga. Ke fai tou finegalo ʼi te kele, ohage ko selo.’ Ke koutou haga kumi muʼa te puleʼaga pea mo tona faitotonu.”—Mateo 6:9, 10, 33.
Ko te “kumi muʼa te puleʼaga” ʼe lagolago feafeaʼi ki te puipui ʼo tatatou logo tahi? (Mikea 4:3; 1 Soane 3:10-12)
(6) Ko te laumālie maʼoniʼoni ʼe ina fakatupu ʼi te kau atolasio ʼa Sehova te ʼu kalitate ʼaē ʼe maʼuhiga ki te logo tahi faka Kilisitiano. “Ko te fua ʼo te laumālie ʼe ko te ʼofa, te fiafia, te tokalelei, te kātaki fualoa, te lotoʼofa, te agalelei, te tui, te agamālū, te loto lolomi.”—Kalate 5:22, 23.
Koteā ʼaē ʼe tonu ke tou fai ke tupu ia tatou te ʼu fua ʼo te laumālie ʼa te ʼAtua? (Gaue 5:32)
ʼE malave feafeaʼi te laumālie ʼa te ʼAtua ki tatatou ʼu felogoi mo te ʼu tēhina mo tuagaʼane? (Soane 13:35; 1 Soane 4:8, 20, 21)
(7) Ko te kau atolasio moʼoni fuli ʼa te ʼAtua ʼe nātou faka mafola te logo lelei ʼo tona Puleʼaga. “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.”—Mateo 24:14.
Koteā ʼaē ʼe tonu ke ina uga tatou ke tou fia gāue mālohi ʼi te gāue fai faka mafola ʼaia? (Mateo 22:37-39; Loma 10:10)
11. Ka tou maʼuliʼi te ʼu moʼoni ʼo te Tohi-Tapu, koteā tona fua?
11 ʼI tatatou atolasio kia Sehova ʼi te logo tahi, ʼe ina fakaōvi tatou kia te ia, pea ʼe tou fiafia ai ʼi tatatou fakatahi mo te ʼu tēhina mo tuagaʼane. ʼE ʼui fēnei ia Pesalemo 133:1: “Koutou sisio! ʼE ko he meʼa lelei pea mo fakafiafia ki he ʼu tēhina hanatou nonofo fakatahi ʼi te logo tahi!” ʼE ko he meʼa fakaloto fīmālie hatatou mavae mai te mālama ʼaē ʼe manatu pe te hahaʼi kia nātou, mo aga heʼeʼaoga, pea mo agamālohi, ʼo fakatahi mo nātou ʼaē ʼe ʼoʼofa moʼoni kia Sehova pea mo fakalogo ki tana ʼu lao!
Tou Tekeʼi Te ʼu Faʼahi ʼAē ʼe Fakatupu Maveuveu
12. He koʼe ʼe tonu ke tou tekeʼi te mole fia fakalogo?
12 Kapau ʼe mole tou fia maumauʼi te logo tahi maʼuhiga ʼaē ʼe tou maʼu ʼi te kele katoa, ʼe tonu ke tou tekeʼi te ʼu faʼahi ʼaē ʼe fakatupu maveuveu. ʼE kau ki te ʼu faʼahi ʼaia te mole fia fakalogo ki te ʼAtua pea mo tana ʼu lao. Moʼo tokoni kia tatou ke tou fakafeagai ki te faʼahi ʼaia, ʼe fakahā mai e Sehova ko Satana te Tevolo ʼaē ʼe ina ʼeke te faʼahiga manatu ʼaia. (2 Kolonito 4:4; Apokalipesi 12:9) Ko Satana ʼaē neʼe ina uga ia Atama mo Eva ke mole nā fakalogo ki te meʼa ʼaē neʼe ʼui age e te ʼAtua, pea mo nā fai he ʼu tonu ʼe fakafeagai ki Tona finegalo. Neʼe iku ai ki te malaʼia, kia nāua pea mo tatou. (Senesi 3:1-6, 17-19) ʼE tokolahi te hahaʼi ʼi te malamanei ʼe mole nātou fia fakalogo ki te ʼAtua pea mo tana ʼu lao. Koia ʼe ʼaoga ai ke tou tekeʼi te manatu ʼaia ʼi totatou loto.
13. Koteā ʼaē ka ina fakahā anai, ʼe tou teuteu moʼoni ke tou maʼuʼuli ʼi te mālama foʼou pea mo faitotonu ʼaē neʼe fakapapau mai e te ʼAtua?
13 Ohage la, koutou tokagaʼi te fakapapau fakafiafia ʼa Sehova, ke ina fetogi te mālama agakovi ʼaenī ʼaki he ʼu lagi foʼou pea mo he kele foʼou ʼe “nofoʼi anai e te faitotonu.” (2 Petelo 3:13) ʼE mole ina uga koa la tatou ke tou kamata teuteu ke tou maʼuʼuli ʼi te temi ʼaia, ʼaē ka fakatuʼu ai te faitotonu? Koia ʼe tonu ke tou tokagaʼi te tokoni ʼaenī ʼa te Tohi-Tapu: “ ʼAua naʼa koutou manako ki te malamanei peʼe ko te ʼu meʼa ʼaē ʼe ʼi te malamanei. Kapau ʼe ʼi ai he tahi ʼe manako ki te malamanei, ko te ʼofa ki te Tāmai ʼe mole ia ia.” (1 Soane 2:15) Koia, ʼe tou tekeʼi ai te manatu ʼaia ʼo te mālama—tana mole fia fakalogo, tana manatu pe kia ia, tana ʼu aga heʼeʼaoga pea mo tana agamālohi. Kua liliu ko he agamāhani hatatou fakalogo ki te ʼu meʼa ʼe ʼui mai e Sehova pea mo tou fakalogo katoa kia te ia, ʼo fakafeagai ki te vaivaiʼaga fuape ʼo totatou kakano heʼe haohaoa. ʼE hā lelei ʼi totatou maʼuli katoa, ko tatatou ʼu manatu, te ʼu meʼa ʼaē ʼi ʼotatou loto, ʼe fakatafito ki te fakahoko ʼo te finegalo ʼo te ʼAtua.—Pesalemo 40:8.
14. (a) He koʼe ʼe maʼuhiga ke tou fakaʼaogaʼi ʼi te temi nei, te ʼu faigamālie fuli moʼo ako te ʼu ala ʼa Sehova pea mo mulimuli kiai? (b) Koteā tona faka ʼuhiga kia tatou takitokotahi ia te ʼu vaega ʼaē ʼe tuʼu ʼi te palakalafe?
14 Ka hoko mai anai te temi ʼaē neʼe fakakatofa ai e Sehova ke ina fakaʼauha te tuʼu agakovi ʼaenī pea mo nātou fuli ʼaē ʼe nātou leleiʼia te tuʼu ʼaia, pea ʼe mole ina toe holoʼi anai te tuʼakoi ʼaia. ʼE mole ina faka holomuli te temi ʼaia peʼe ina fetogi tana ʼu lekula, maʼa nātou ʼaē kei faiga ke nātou pipiki ki te mālama kae ʼe mole nātou ako katoa te finegalo ʼo te ʼAtua pea mo maʼuliʼi. Ko te temi ʼaē ʼo te gāue! (Luka 13:23, 24; 17:32; 21:34-36) Koia ʼe ko he meʼa fakafiafia hatatou sio ki te toe hahaʼi tokolahi ʼe nātou fakaʼaogaʼi te faigamālie ʼaia, moʼo kumi fakamalotoloto te ako ʼaē ʼe foaki mai e Sehova ʼi tana Folafola pea mo tana kautahi, pea mo nātou haʼele ʼi te logo tahi ʼi tona ʼu ala ki te mālama foʼou! Pea ka lahi anai te ʼu meʼa ʼaē ʼe tou ako ʼo ʼuhiga mo Sehova, pea ʼe toe lahi pe anai mo tatatou ʼofa pea mo fia tauhi kia te ia.
Fakamanatu
• Koteā te fakatuʼutuʼu ʼa Sehova ʼo ʼuhiga mo te tauhi?
• Hili tatatou ako te ʼu akonaki tāfito ʼa te Tohi-Tapu, koteā te ʼu faʼahiga tuputupu ʼe tonu ke tou kumi moʼoni ke tou fai?
• Koteā ʼaē ʼe feala ke tou fai takitokotahi ke tou logo tahi mo te kau atolasio ʼaē ʼa Sehova?
[Paki ʼo te pasina 4]
‘ ʼE maʼu anai e te kau agavaivai te kele pea ʼe nātou fiafia anai ʼi te mahu ʼo te tokalelei’