Kapite Tolu

Tou Tāʼofi Maʼu Te Folafola ʼa Te ʼAtua

1. (a) Neʼe ʼiloʼi feafeaʼi e te kau Iselaele ʼo te temi muʼa ko te folafola ʼa te ʼAtua ʼe tāu mo te falala? (b) He koʼe ʼe ʼaoga te faʼahi ʼaia kia tatou?

“ ʼE KOUTOU ʼiloʼi papau ʼaki tokotou loto katoa pea mo tokotou nefesi katoa, neʼe mole he folafola neʼe mole hoko ʼi te ʼu folafola lelei fuli ʼaē neʼe tala atu e Sehova, tokotou ʼAtua. Neʼe hoko fuli ia maʼa koutou.” (Sosue 23:​14-16) Ko te ʼu palalau ʼaia neʼe fai e Sosue ki te ʼu tagata ʼāfea ʼo Iselaele, ʼi tanatou kua nonofo ʼi te Kele ʼo Te Fakapapau. ʼE moʼoni, neʼe feala hanatou falala ki te ʼu fakapapau ʼa Sehova. Ko te fakamatala ʼaia​—pea mo te ʼu fakamatala fuli ʼo te Tohi-Tapu— neʼe taupau maʼa tatou “ke tou maʼu te ʼamanaki.”​—Loma 15:4.

2. (a) Koteā te faka ʼuhiga ʼo te ʼui ʼaē “ko te Tohi-Tapu katoa ʼe haʼu mai te ʼAtua”? (b) Koteā koa totatou maʼua mo kapau kua tou ʼiloʼi ʼe haʼu te Tohi-Tapu mai te ʼAtua?

² Logola neʼe fakaʼaogaʼi te ʼu tagata e toko 40 moʼo tohi te Tohi-Tapu, kae ʼe haʼu te Tohi-Tapu mai ia Sehova totonu. Ko tona faka ʼuhiga koa neʼe ina takitaki totonu te tohi ʼo te ʼu folafola fuli ʼaē ʼe tuʼu ʼi loto? Ei. Neʼe ina fai te faʼahi ʼaia ʼaki tona laumālie maʼoniʼoni mālohi, tona mālohi gāue. ʼAki he loto falala neʼe ʼui fēnei e te ʼapositolo ko Paulo: “Ko te Tohi-Tapu katoa ʼe haʼu mai te ʼAtua . . . ke katoa te faiva ʼo te tagata ʼa te ʼAtua, pea mo katoa ia meʼa fuli ʼe ʼaoga ki te gāue lelei fuli pe.” Ko te hahaʼi fuli pe ʼaē ʼe nātou tui ki te faʼahi ʼaia, ʼe nātou tokagaʼi te Tohi-Tapu pea ʼe nātou mulimuli ʼi tonatou maʼuli ki te ʼu akonaki ʼaē ʼe tuʼu ai.​—2 Timoteo 3:​16, 17; 1 Tesalonika 2:13.

Tou Tokoni Ki Te Hahaʼi Ke Nātou Leleiʼia Te Maʼuhiga ʼo Te Tohi-Tapu

3. Koteā te meʼa lelei ʼe feala ke tou fai moʼo tokoni ki te tokolahi ʼaē ʼe mole nātou tui ko te Tohi-Tapu ʼe ko te Folafola ʼa te ʼAtua?

³ Tokolahi te hahaʼi ʼaē ʼe tou fai faka mafola ki ai, ʼe mole nātou tui ko te Tohi-Tapu ʼe ko te Folafola ʼa te ʼAtua. ʼE tou lava tokoni feafeaʼi kia nātou? ʼI te agamāhani, ʼe lelei age hatatou avahi te Tohi-Tapu pea mo tou fakahā age pe koteā ʼaē ʼe tuʼu ai. “Ko te folafola ʼa te ʼAtua ʼe maʼuli pea mo mālohi, pea mo māsila age ʼi te heletā mata lua fuape, . . . pea ʼe feala ke sio tonu ki te ʼu manatu pea mo te ʼu fakatuʼutuʼu ʼo te loto.” (Hepeleo 4:12) Ko “te folafola ʼa te ʼAtua” ʼe maʼuli, kae ʼe mole ko he tohi pe ʼe fakamatala ai he ʼu hisitolia! ʼE mahino papau ia ʼe hoko moʼoni anai te ʼu fakapapau ʼa te Tohi-Tapu. Ko te malave ʼo te logo ʼo te Tohi-Tapu ki te ʼu fakatuʼutuʼu moʼoni ʼo te loto ʼe mālohi age ia ʼi he ʼu palalau ʼe feala ke tou fai.

4. Koteā te ʼu fakamahino ʼo te ʼu moʼoni ʼo te Tohi-Tapu neʼe ina fetogi te manatu ʼa ʼihi hahaʼi ʼo ʼuhiga mo te Tohi-Tapu, pea koteā tona tupuʼaga?

⁴ ʼI tanatou sio ʼe tuʼu ai te huafa ʼo te ʼAtua, tokolahi neʼe nātou fia ʼiloʼi lahi age te Tohi-Tapu. Ko te tahi ʼu hahaʼi neʼe nātou tali ke nātou ako te Tohi-Tapu, ʼi te temi ʼaē neʼe fakahā age te ʼu manatu ʼaē ʼe tuʼu ai ʼo ʼuhiga mo te fakatuʼutuʼu ʼo te maʼuli, te tupuʼaga ʼo te fakagafua e te ʼAtua ia te agakovi, te faka ʼuhiga ʼo te ʼu meʼa ʼaē ʼe hoko, pea mo te ʼamanaki ki te maʼuli heʼegata ʼi te palatiso ʼi te kele. ʼI te ʼu fenua ʼaē neʼe gaohi ai te hahaʼi e te ʼu laumālie kovi ʼuhi ko te ʼu meʼa faka lotu, neʼe tupu te fia ʼiloʼi ʼo te Tohi-Tapu e te hahaʼi, ʼuhi ko tona fakamahino ia te tupuʼaga ʼo te faʼahi ʼaia pea mo tana faka ʼāteaina nātou mai ai. He koʼe neʼe malave te ʼu faʼahi ʼaia ki te hahaʼi loto moʼoni? Koteʼuhi ko te Tohi-Tapu pe ʼaē ʼe ina foaki he ʼu tokoni ʼe tāu mo te falala ʼo ʼuhiga mo te ʼu faʼahi maʼuhiga fuli ʼaia.​—Pesalemo 119:130.

5. (a) Ka ʼui e he tahi ʼe mole tui ia ki te Tohi-Tapu, koteā ʼapē tona ʼu tupuʼaga? (b) ʼE tou lava tokoni feafeaʼi kia ia?

⁵ Kae e feafeaʼi koa mo kapau ʼe ʼui mai e he tahi ʼe mole tui ki te Tohi-Tapu? ʼE tonu koa ke gata ai te fai palalau? ʼE mole tonu ke gata ai mo kapau ʼe nātou lotolelei ke tou fai palalau kiai. ʼE lagi nātou faka ʼuhiga te Tohi-Tapu ko he tohi ʼo te Keletiate. Lagi ʼe mole kei nātou leleiʼia te Tohi-Tapu, ʼuhi ko te malualoi ʼa te Keletiate, tana fai politike, pea mo tana kole falā tuʼumaʼu. He koʼe koa ʼe mole koutou fehuʼi age ki ai peʼe ko tona tupuʼaga koa la ʼaia? Ko te tautea ʼa te Tohi-Tapu ia te fakatahi ʼa te Keletiate mo te mālama, mo tona fakahā te kehekehe ʼa te Keletiate pea mo te Lotu Faka Kilisitiano moʼoni, ʼe lagi feala ke tupu ai hanatou fia ʼiloʼi te Tohi-Tapu.​—Mikea 3:​11, 12; Mateo 15:​7-9; Sakopo 4:4.

6. (a) He koʼe ʼe koutou tui papau ko te Tohi-Tapu ʼe ko te Folafola ʼa te ʼAtua? (b) Koteā he ʼu faʼahi ʼe feala ke fakaʼaogaʼi moʼo tokoni ki te hahaʼi ke nātou tali ko te Tohi-Tapu ʼe haʼu moʼoni mai te ʼAtua?

⁶ Ki te tahi ʼu hahaʼi, ʼe feala ke tou tokoni kia nātou mo kapau ʼe tou fai palalau fakahagatonu age ki te ʼu fakamoʼoni ʼaē ʼe ina fakahā mai ko te Tohi-Tapu ʼe haʼu mai te ʼAtua. Koteā ʼaē ʼe ina fakamoʼoni lelei kia koutou ʼe haʼu te Tohi-Tapu mai ia Sehova ʼAtua? Ko tana fakahā totonu koa ʼaē ʼo tona haʼuʼaga? Peʼe ko te ʼu tuʼuga lea faka polofeta, ʼaē ʼe ʼiloga mai ai te ʼatamai mālama totonu ʼo ʼuhiga mo te ka haʼu, ʼaē ʼe mole feala ia ke haʼu mai he poto fakatagata? (1 Petelo 1:​20, 21) Peʼe lagi ʼuhi ko te felogoi lelei ʼo te Tohi-Tapu katoa, logola neʼe ko tagata e toko 40 ʼaē neʼe nātou tohi lolotoga taʼu e 1 600? Peʼe ko tona kehekehe mo te ʼu tohi ʼo tona temi, koteʼuhi ʼe totonu tana ʼu manatu ʼo ʼuhiga mo te ʼu meʼa fakapoto lalahi? Peʼe ko te ʼu palalau fakahagatonu ʼa te ʼu tagata ʼaē neʼe nātou tohi? Peʼe ko tona hāo mai te ʼu faiga mālohi ʼaē ke maumauʼi? Ko meʼa fuli neʼe malave kia koutou totonu, ʼe toe feala ke fakaʼaogaʼi moʼo tokoni ki niʼihi age.a

Tatatou Lau Te Tohi-Tapu

7, 8. (a) Koteā ʼaē ʼe tonu ke tou fai ʼaki te Tohi-Tapu? (b) ʼO hilifaki ki tatatou lau takitokotahi ia te Tohi-Tapu, koteā ʼaē ʼe tonu ke tou fai? (c) Neʼe feafeaʼi koa takotou mahino ki te ʼu fakatuʼutuʼu ʼa Sehova?

⁷ ʼE tou tokoni ki te hahaʼi ke nātou tui ki te Tohi-Tapu, kae ʼe toe ʼaoga foki kia tatou ke tou toʼo he temi moʼo lau tuʼumaʼu te Tohi-Tapu. ʼE koutou fai koa te faʼahi ʼaia? ʼI te ʼu tohi fuli pe, ʼe ko te tohi pe ʼaia ʼaē ʼe maʼuhiga ʼaupito. Kae ʼe mole faka ʼuhiga leva kapau ʼe tou lau tokotahi pea ʼe tou feʼauga ai. ʼE fakatokaga mai e te Tohi-Tapu ke ʼaua naʼa tou manatu feiā. ʼE mole tonu ke tou manatu, ʼaki tatatou ʼu kumi tokotahi, ʼe tou lava maʼu anai te ʼu tali ki te ʼu fehuʼi fuli. ʼE tonu ke tou fai hatatou ako takitokotahi pea mo tou kau tuʼumaʼu ki te ʼu fono ʼa te hahaʼi ʼa te ʼAtua, ke tou liliu ai ko he ʼu Kilisitiano aga fakapotopoto.​—Tāʼaga Lea 18:1; Hepeleo 10:​24, 25.

⁸ ʼO ʼuhiga mo te faʼahi ʼaia, ʼe talanoa te Tohi-Tapu ʼo ʼuhiga mo te ofisie Etiopea neʼe ina lolotoga lau te lea faka polofeta ʼa Isaia. Neʼe ʼeke e te ʼaselo ia Filipo, te Kilisitiano faka mafola Evaselio ke ina fehuʼi fēnei ki te tagata: “ ʼE ke mahino moʼoni koa ki te meʼa ʼaē ʼe ke lau?” ʼAki he agavaivai, neʼe tali fēnei age e te Etiopea: “ ʼO feafeaʼi haku mahino, mo kapau ʼe mole he tahi ʼe ina taki ʼau?” Neʼe ina kole age kia Filipo ke ina fakamahino age te vaega faka Tohi-Tapu. Ko Filipo neʼe mole ko he tagata neʼe ina lau tokotahi te Tohi-Tapu pea mo ina fakamahino ʼaki tana ʼu manatu. Neʼe felogoi lelei mo te kautahi ʼa te ʼAtua ʼi te kele. ʼAki te faʼahi ʼaia, neʼe feala ai hana tokoni ki te Etiopea ke ina maʼu te ako ʼaē neʼe foaki e Sehova ʼaki te kautahi ʼaia. (Gaue 6:​5, 6; 8:​5, 26-35) ʼO toe feiā ia ʼaho nei, ʼe mole ko kita totonu ʼaē ʼe kita maʼu he mahino totonu ki te ʼu fakatuʼutuʼu ʼa Sehova. ʼE ʼaoga kia tatou fuli te tokoni ʼofa ʼaē ʼe foaki mai e Sehova ʼaki tana kautahi ʼaē ʼi te kele.

9. Koteā te polokalama lautohi ʼo te Tohi-Tapu ʼe feala ke fua lelei kia tatou fuli?

⁹ Moʼo tokoni kia tatou ke tou mahino ki te Tohi-Tapu, ʼe foaki mai e te kautahi ʼa Sehova te ʼu tohi faka Tohi-Tapu ʼe lelei ʼaupito pea mo kehekehe. Pea neʼe fai maʼa tatou te polokalama lau Tohi-Tapu ʼi te Ako ʼo Te Minisitelio Faka Teokalatike, ʼi te ʼu kokelekasio ʼa te kau Fakamoʼoni ʼa Sehova ʼi te malamanei katoa. ʼE lahi te ʼu fua lelei ʼe feala ke tou maʼu mo kapau ʼe tou lau takitokotahi te Tohi-Tapu. (Pesalemo 1:​1-3; 19:​7, 8) Koutou faiga mālohi ʼo lau tuʼumaʼu te Tohi-Tapu. Tatau aipe peʼe mole koutou mahino katoa ki te Tohi-Tapu, kae ko takotou mahino ki tona ʼu moʼoni tāfito ʼe fua lelei ʼaupito anai kia koutou. Ohage la, kapau ʼe koutou lau pasina e fā peʼe nima ʼi te ʼaho fuli, pea ʼe koutou lava lau anai te Tohi-Tapu katoa ʼi he taʼu e tahi.

10. (a) Ko te temi fea ʼaē ʼe koutou lau ai te Tohi-Tapu? (b) Ko ai ʼaē ʼe tonu ke kau ki te lau ʼo te Tohi-Tapu, pea he koʼe ʼe maʼuhiga ke fai tuʼumaʼu?

¹⁰ Ko te temi fea ʼaē ʼe feala ke koutou lau ai te Tohi-Tapu? Kapau ʼe koutou fakaʼaogaʼi minuta e 10 peʼe 15 ʼi te ʼaho fuli moʼo lau te Tohi-Tapu, pea ʼe lahi anai tona ʼu fua lelei kia koutou. Kapau ʼe mole feala, koutou fakatuʼutuʼu ke koutou fakaʼaogaʼi he ʼu kiʼi temi kae fai putuputu ʼi te vāhaʼa fuli, pea koutou mulimuli ki te polokalama ʼaia. Kapau kua kita ʼohoana, ʼe feala ke kita lau leʼolahi te Tohi-Tapu, ʼo fetogitogi mo tokita hoa. Kapau kua poto takotou fānau ʼi te lautohi, pea ʼe feala ke nātou fefakahoahoaʼaki ʼo lau leʼolahi te Tohi-Tapu. Ohage pe ko tatatou māhani ʼi te kai, ʼe tonu ke tou fakamāhani ʼo lau ia te Tohi-Tapu ʼi totatou maʼuli katoa. ʼE koutou ʼiloʼi, kapau ʼe mole kai lelei he tahi, pea ʼe mahaki anai. Pea ʼo feiā pe, ʼe fakalogo totatou maʼuli lelei fakalaumālie pea mo tatatou maʼuli heʼegata ki tatatou fakamāhani ʼo kai tuʼumaʼu ki “te folafola fuli pe ʼe haʼu mai te gutu ʼo Sehova.”​—Mateo 4:​4.

Tatatou Fakatuʼutuʼu

11. Koteā tatatou fakatuʼutuʼu mokā tou lau te Tohi-Tapu?

¹¹ Koteā tatatou fakatuʼutuʼu mokā tou lau te Tohi-Tapu? ʼE mole tou faiga anai ke lahi te ʼu pasina ʼaē ʼe tou lau. ʼE tou fai te lautohi ʼaia heʼe tou fia ʼiloʼi lelei age ia te ʼAtua, ke tuputupu tatatou ʼofa kia te ia pea mo tou fai te tauhi ʼaē ʼe loto kiai. (Soane 5:​39-42) ʼE tonu ke tou manatu ohage ko te tagata faitohi ʼo te Tohi-Tapu, ʼaē neʼe ina ʼui fēnei: “Fakahā mai kia te ʼau tou ʼu ala, Ê Sehova! Akoʼi mai kia te ʼau tou ʼu ala foufou.”​—Pesalemo 25:4.

12. (a) He koʼe ʼe ʼaoga ke tou maʼu “te ʼatamai mālama totonu,” pea ka tou lautohi koteā ʼaē ʼe tonu ke tou faiga kiai ke tou maʼu ai te ʼatamai mālama? (b) Koteā te ʼu manatu e fā ʼe feala ke tou fakaʼaogaʼi ke fua lelei tatatou vakaʼi te ʼu faʼahi ʼaē ʼe tou lau ʼi te Tohi-Tapu? (Vakaʼi te talanoa ʼi te pasina 30.) (c) Koutou fai he ʼu faʼifaʼitaki ʼo ʼuhiga mo te ʼu manatu ʼaia moʼo tali ki te ʼu fehuʼi ʼaē ʼe tuʼu ʼi te palakalafe ʼaenī. Koutou lau te ʼu vaega ʼaē ʼe mole tohi katoa.

¹² Ka akoʼi tatou e Sehova, ʼe tonu ke tou fia maʼu “te ʼatamai mālama totonu.” Kapau ʼe mole tou maʼu te faʼahi ʼaia, pea ʼe feafeaʼi anai hatatou maʼuliʼi lelei te Folafola ʼa te ʼAtua peʼe ko tona fakamahino lelei ki te hahaʼi? (Kolose 3:10; 2 Timoteo 2:15) Ke feala hatatou maʼu te ʼatamai mālama totonu, ʼe tonu ke tou lau fakalelei, pea kapau ʼe faigataʼa hatatou mahino lelei ki he vaega, pea tou lau liuliuga ke tou mahino ai ki tona faka ʼuhiga. ʼE toe fua lelei anai kia tatou, mo kapau ʼe tou toʼo he temi moʼo metitasio kiai, ke tou vakaʼi te ʼu faʼahi kehekehe ʼo te vaega ʼe tou lau. ʼI te pasina 30, ʼe tuʼu ai te ʼu faʼahiga fai e fā moʼo tokoni ki te lau ʼo te Tohi-Tapu. ʼE lahi te ʼu vaega faka Tohi-Tapu ʼe feala ke fua lelei tonatou vakaʼi, mo kapau ʼe tou fakaʼaogaʼi te ʼu faʼahiga fai ʼaia. Ko takotou tali ki te ʼu fehuʼi ʼi te ʼu pasina ka hoa mai, ʼe koutou mahino anai peʼe feafeaʼi tona fai.

(1) Ko te koga ʼo te Tohi-Tapu ʼaē ʼe koutou lau ʼe ina tautau fakahā mai te ʼulugaaga ʼo Sehova. Ohage la, ia Pesalemo 139:​13, 14, ʼe tou ʼiloʼi ai te tokaga lahi ʼa te ʼAtua ki te tamasiʼi ʼaē ʼe ʼamanaki tupu: “Ko koe, neʼe ke fakatupu toku ʼu ifiifi; neʼe ke puipui ʼau ʼi te fatu ʼo taku faʼe. ʼE ʼau vikiviki anai kia te koe, heʼe fakamanavahe pea mo fakaofoofo toku faʼu. ʼE fakatalakitupua tau ʼu gāue, pea ʼe mahino lelei toku nefesi ki te ʼu meʼa ʼaia.” ʼE fakatalakitupua te ʼu meʼa ʼaē neʼe fakatupu e Sehova! Ko tana faʼahiga faʼu ʼo te tagata ʼe ko he fakamoʼoni ʼaia ki tona ʼofa lahi kia tatou.

ʼO ʼuhiga mo te ʼu manatu ʼaē ʼe tuʼu ia Soane 14:​9, 10, ka tou lau te ʼu ʼaluʼaga pea mo te ʼu aga ʼa Sesu ki te hahaʼi, ʼe tou sio lelei ai ki te aga ʼa Sehova mo kanapaula neʼe ko ia. ʼAki te manatu ʼaia, koteā ʼaē ʼe feala ke tou ʼui mo kapau neʼe ko Sehova totonu ʼaē neʼe sio ki te ʼu ʼaluʼaga ʼaē ʼe fakamatala ia Luka 5:​12, 13 pea mo Luka 7:​11-15?

(2) Koutou fakakaukauʼi peʼe koteā te pikipikiga ʼo te fakamatala pea mo te kupu tāfito ʼo te Tohi-Tapu, ʼaē ko te faka lākatonuʼi ʼo te ʼuhiga pule ʼa Sehova pea mo tāpuhā tona huafa ʼaki te Puleʼaga ʼaē ʼe taki e Sesu Kilisito, te Hāko ʼaē neʼe fakapapauʼi mai.

Neʼe fakahā lelei feafeaʼi e Esekiele pea mo Taniela te kupu tāfito ʼo te Tohi-Tapu? (Esekiele 38:​21-23; Taniela 2:44; 4:17; 7:​9-14)

ʼE fakamoʼoni lelei feafeaʼi e te Tohi-Tapu ko Sesu te Hāko ʼaē neʼe fakapapauʼi mai? (Kalate 3:16)

ʼE fakamatala feafeaʼi e te tohi ʼo Apokalipesi te ikuʼaga lahi ʼo te kupu tāfito ʼo te Puleʼaga? (Apokalipesi 11:15; 12:7-10; 17:​16-18; 19:​11-16; 20:1-3; 21:​1-5)

(3) Koutou fakakaukauʼi peʼe feafeaʼi hakotou fakaʼaogaʼi kia koutou takitokotahi te meʼa ʼaē ʼe koutou lau. Ohage la, ʼe tou lau mai ia Ekesote kia Teutalonome te ʼu aga heʼeʼaoga ʼo Iselaele pea mo tana agatuʼu. ʼE tou mahino ai, ko ʼanatou fakakaukau pea mo ʼanatou gāue neʼe fua kovi kia nātou. Koia ʼe tonu ke tou fakafiafia ia Sehova ʼo mole tou mulimuli ki te faʼifaʼitaki kovi ʼa Iselaele. “Ko te ʼu meʼa ʼaia neʼe hoko kia nātou ohage ko he ʼu faʼifaʼitaki, pea neʼe tohi ia moʼo fakatokagaʼi ʼo tatou, ia tatou ʼaē kua hoko mai ki ai ia te fakaʼosi ʼo te ʼu tuʼu ʼo te ʼu faʼahiga meʼa ʼaenī.”​—1 Kolonito 10:​11.

Koteā te ako ʼe tou tāʼofi mai te hisitolia ʼo Kaino ʼi tana matehi ia Apele? (Senesi 4:3-12; Hepeleo 11:4; 1 Soane 3:10-15; 4:​20, 21)

Ko te ʼu tokoni ʼaē ʼe fai e te Tohi-Tapu ki te kau Kilisitiano ʼaē ka ʼolo ki selo, ʼe toe faka ʼuhiga koa kia nātou ʼaē ʼe nātou ʼamanaki maʼuʼuli ʼo heʼegata ʼi te kele? (Faka au 15:16; Soane 10:16)

Tatau aipe peʼe leleiʼia tatou ʼi te kokelekasio faka Kilisitiano, he koʼe ʼe tonu ke tou fakakaukauʼi peʼe feafeaʼi hatatou hikihiki tatatou maʼuliʼi ia te ʼu tokoni ʼaē kua tou ʼiloʼi? (2 Kolonito 13:5; 1 Tesalonika 4:1)

(4) Koutou fakakaukauʼi peʼe feafeaʼi anai hakotou fakaʼaogaʼi te ʼu manatu ʼaē ʼe koutou lolotoga lau moʼo tokoni ki te hahaʼi. ʼE tuʼania te hahaʼi fuli ʼo ʼuhiga mo te mahaki, koia ʼe feala ke tou lau age kia nātou te ʼu meʼa ʼaē neʼe fai e Sesu moʼo fakahā te ʼu gāue ʼaē ka ina fai ʼi te malamanei katoa ʼi te pule ʼo tona Puleʼaga: “Pea neʼe ʼunuʼunu age ai kia te ia te ʼu hahaʼi tokolahi, ʼo ʼolo age mo nātou te ʼu ketu, te ʼu māʼimoa, te ʼu kivi, te ʼu hahaʼi ʼalelo mate, pea mo ʼihi ʼatu mahahaki tokolahi, . . . pea ina fakamālōlō nātou.”​—Mateo 15:30.

Ko ai koa ʼaē ʼe feala ke tokoni ki ai te fakamatala ʼo te fakatuʼuake ʼo te ʼofafine ʼo Sailusi? (Luka 8:​41, 42, 49-56)

13. Koteā te ʼu fua lelei ʼe feala ke tou maʼu mo kapau ʼe tou lau tuʼumaʼu ia te Tohi-Tapu pea mo ako fakatahi mo te kautahi ʼa Sehova?

¹³ ʼE fua lelei ʼaupito te lau ʼo te Tohi-Tapu mo kapau ʼe tou fakaʼaogaʼi te ʼu manatu e fā ʼaē ʼe tuʼu ʼi ʼoluga! ʼE moʼoni ʼe feala ke faigataʼa te lau ʼo te Tohi-Tapu. Kae ʼe fualoa tona ʼu fua lelei kia tatou, heʼe ka tou lau te Tohi-Tapu pea ʼe tou mālolohi anai ʼi te faʼahi fakalaumālie. Kapau ʼe tou lau tuʼumaʼu te Tohi-Tapu, pea ʼe tou fakaōvi lelei ai ki tatatou Tāmai ʼofa, ko Sehova, pea mo totatou ʼu tēhina mo tuagaʼane. ʼE tokoni mai anai kia tatou ke tou manatuʼi te tokoni ʼaē ke tou “tāʼofi maʼu te folafola ʼo te maʼuli.”​—Filipe 2:16.

[Kiʼi nota]

Fakamanatu

• He koʼe neʼe tohi pea mo taupau te Tohi-Tapu ʼo aʼu ki totatou temi?

• ʼE tou lava tokoni feafeaʼi ki te hahaʼi ke nātou leleiʼia te maʼuhiga ʼo te Tohi-Tapu?

• He koʼe ʼe tou maʼu he ʼu fua lelei mo kapau ʼe tou lau takitokotahi pea mo tuʼumaʼu te Tohi-Tapu? Koteā te ʼu manatu e fā ʼe feala ke tou sivisivi ke fua lelei te meʼa ʼaē ʼe tou lau?

[Talanoa/Paki ʼo te pasina 30]

KA KOUTOU LAU TE TOHI-TAPU, KOUTOU FAKAKAUKAUʼI

Peʼe koteā ʼaē ʼe koutou ako ai ʼo ʼuhiga mo Sehova

Tona pikipikiga mo te kupu tāfito ʼo te Tohi-Tapu

Tona faka ʼuhiga ki takotou maʼuli

Peʼe feafeaʼi hakotou fakaʼaogaʼi moʼo tokoni ki te hahaʼi