Koutou Fakaōvi Ki Te ʼAtua ʼi Te Faikole

1, 2. He koʼe ʼe tonu ke tou faka ʼuhiga te faikole ohage ko he pilivilesio lahi, pea he koʼe ʼe tonu ke tou ʼiloʼi peʼe koteā ʼaē ʼe akoʼi mai ʼi te Tohi-Tapu ʼo ʼuhiga mo te faʼahi ʼaia?

ʼE VELIVELI ʼaupito te kele mokā fakatatau ki te ʼatulaulau. ʼI tona fakahagatonu, kiā Sehova ʼaē ko “te Tupuʼaga ʼo te lagi mo te kele,” ko te ʼu puleʼaga ʼe nātou hage ko he mosiʼi vai ʼi he pākete. (Pesalemo 115:15; Isaia 40:15) ʼE ʼui ʼi te Tohi-Tapu: “ ʼE ōvi ia Sehova kiā nātou fuli ʼaē ʼe fetapā kiā te ia, ia nātou fuli ʼaē ʼe fetapā kiā te ia ʼi te agatonu. ʼE ina fakahoko anai te meʼa ʼaē ʼe loto kiai ia nātou ʼaē ʼe manavasiʼi kiā te ia, pea ʼe logo anai ki tanatou pāui ʼaē ke tokoni age.” (Pesalemo 145:​18, 19) Koutou fakakaukauʼi age muʼa! Ko te Tupuʼaga māfimāfi ʼe ōvi mai kiā tatou pea ʼe logo anai ki ʼatatou faikole mo kapau ʼe tou “fetapā kiā te ia ʼi te agatonu.” Ko he toe pilivilesio ʼe tou maʼu, ʼaē ko te fakaōvi ki te ʼAtua ʼi te faikole!

² Kae kapau ʼe tou loto ke fagono ia Sehova ki ʼatatou faikole, pea ʼe tonu ke tou fai te ʼu faʼahiga faikole ʼaē ʼe ina tali leleiʼi. ʼE tonu muʼa ke tou mahino ki te meʼa ʼaē ʼe akoʼi mai ʼi te Tohi-Tapu ʼo ʼuhiga mo te faikole pea ʼe hoki feala ai leva ke tou fai he ʼu kole ʼe ina tali leleiʼi. ʼE maʼuhiga kiā tatou ke tou ʼiloʼi te meʼa ʼaē ʼe ʼui ʼi te Tohi-Tapu ʼo ʼuhiga mo te faikole, koteʼuhi ʼe tokoni mai kiā tatou ke tou fakaōvi kiā Sehova.

HE KOʼE ʼE TONU KE TOU FAIKOLE KIĀ SEHOVA

3. Koteā te ʼuluaki tupuʼaga tāfito ʼaē ʼe tonu ai ke tou faikole kiā Sehova?

³ Ko te ʼuluaki tupuʼaga tāfito ʼaē ʼe tonu ai ke tou faikole kiā Sehova, he neʼe ina kole mai ke tou fai ia te faʼahi ʼaia. ʼE fakaloto mālohiʼi fēnei tatou ʼi tana Folafola: “Aua naa koutou tuania i he mea, kae i te meafuape aki te faikole mo te lauga fakatahi mo te u fakafetai, koutou fakaha ki te Atua autou u kole. Pea ko te tokalelei o te Atua aia e fakalaka i te atamai fuape, e ina malui anai outou loto mo autou fakakaukau ia Kilisito Sesu.” (Filipe 4:​6, 7) ʼE mahino ia ʼe mole tou fia meʼa noaʼi te taʼi fakatuʼutuʼu ʼaia neʼe fai maʼa tatou e te Pule Lahi Tokotahi ʼo te ʼatulaulau!

4. ʼE fakamālohiʼi feafeaʼi e te faikole ia takotou ʼu felogoi mo Sehova?

⁴ Ko te lua tupuʼaga ʼaē ke tou faikole tuʼumaʼu ai kiā Sehova, heʼe ko he faʼahi ʼe ina fakamālohiʼi tatatou ʼu felogoi mo ia. Ko te ʼu kaumeʼa moʼoni ʼe mole nātou felogoi pe mokā ʼe ʼaoga age he meʼa kiā nātou. Kae ʼe nātou fetokagaʼaki, pea ʼe mālohi tonatou fakakaumeʼa koteʼuhi ʼe nātou fakahā faʼifaʼitaliha tanatou ʼu manatu, mo te ʼu meʼa ʼaē ʼe nātou hoha kiai, pea mo te ʼu meʼa ʼaē ʼi tonatou loto. ʼI ʼihi ʼaluʼaga, ʼe feiā tatatou ʼu felogoi mo Sehova ʼAtua. ʼAki te tokoni ʼo te tohi ʼaenī, kua lahi te ʼu meʼa kua koutou ako ʼi te Tohi-Tapu ʼo ʼuhiga mo Sehova, mo tona ulugaaga, pea mo tana ʼu fakatuʼutuʼu. Kua koutou ʼiloʼi ʼe ko he ʼAtua ʼe maʼuli moʼoni. ʼAki te faikole ʼe feala ai ke koutou fakahā ki takotou Tāmai ʼaē ʼe ʼi selo takotou ʼu manatu, pea mo te ʼu meʼa ʼaē ʼe koutou logoʼi ʼi tokotou loto. Kapau ʼe koutou fai te ʼu faʼahi ʼaia, ʼe koutou fakaōvi lahi anai kiā Sehova.​—Sakopo 4:8.

TE ʼU FAKAMAʼUA ʼAĒ ʼE TONU KE TOU MULIʼI

5. Koteā ʼaē ʼe hā mai ʼe mole fakalogo ia Sehova ki te ʼu faikole fuli?

⁵ ʼE fakalogo koa ia Sehova ki te ʼu faikole fuli? Koutou tokagaʼi age muʼa te meʼa ʼaē neʼe ina ʼui ki te kau Iselaele agatuʼu ʼi te temi ʼo te polofeta ko Isaia: “Logo aipe te lahi ʼo te ʼu kole ʼaē ʼe koutou fai, mole au fakalogo; kua liliu ʼokotou nima ʼo fonu ʼi te fakapō.” (Isaia 1:15) Koia ʼe feala ke mole logoʼi e te ʼAtua tatatou ʼu faikole ʼuhi ko hatatou ʼu aga. Kapau ʼe tou loto ke ina logoʼi tatatou ʼu faikole, ʼe tonu ke tou muliʼi ʼihi fakamaʼua tāfito.

6. Ke fagono te ʼAtua ki ʼatatou faikole, koteā ʼaē ʼe fakamaʼua tāfito mai, pea ʼe tou lava maʼu feafeaʼi?

⁶ Ko te meʼa ʼaē ʼe fakamaʼua tāfito mai ʼo ʼuhiga mo te faikole, ʼe ko tatatou tui. (Maleko 11:24) Neʼe tohi fēnei e te ʼapositolo ko Paulo: “E mole feala ki he tahi ke lelei ki te Atua, kapau e mole ina mau te tui, he ko ae e laka ki te Atua, e maua ke tui, e mauli pea e ina fakapale natou e natou kumi iaʼia.” (Hepeleo 11:6) Ko te maʼu ʼo te tui moʼoni ʼe mole gata ʼaki pe tatatou ʼiloʼi ʼe maʼuli moʼoni te ʼAtua pea ʼe logo ki te ʼu faikole pea mo tali kiai. Ko te tui ʼe fai ʼaki tatatou ʼu gāue. ʼE tonu ke hā ʼi totatou faʼahiga maʼuli ʼo te ʼaho fuli, ʼe tou maʼu te tui.​—Sakopo 2:26.

7. (a) He koʼe ʼe tonu ke tou fakaʼapaʼapa mokā tou palalau kiā Sehova ʼi te faikole? (b) Ka tou faikole ki te ʼAtua, e feafeaʼi hatatou fakahā te agavaivai pea mo te fakamalotoloto?

⁷ ʼE toe fakamaʼua e Sehova kiā nātou ʼaē fakaōvi age kiā te ia ʼi te faikole ke nātou agavaivai pea mo fakamalotoloto. ʼE tonu ke tou agavaivai mokā tou palalau kiā Sehova. Ka tou maʼu te faigamālie ʼaē ke tou palalau ki he hau peʼe ki he pelesita, ʼi te agamāhani ʼe tou palalau fakaʼapaʼapa, heʼe tou tokagaʼi te tuʼulaga māʼoluga ʼo te pule ʼaia. Koia ʼe tonu ai ke tou fakaʼapaʼapa lahi mokā tou fakaōvi kiā Sehova! (Pesalemo 138:6) ʼI tona fakahagatonu, ko ia “te ʼAtua Māfimāfi.” (Senesi 17:1) Ka tou faikole ki te ʼAtua, ʼe tonu ke hā ʼi tatatou faʼahiga fakaōvi kiā te ia ʼe tou tali ʼaki he agavaivai totatou ʼuhiga hahaʼi fakalogo kiā te ia. ʼE uga anai tatou e te taʼi agavaivai ʼaia ke tou faikole fakamalotoloto, ʼo mole tou fai he ʼu kole ʼe lau fakaʼatamai peʼe lau liuliuga.​—Mateo 6:​7, 8.

8. E feafeaʼi hatatou maʼuliʼi te ʼu meʼa ʼaē ʼe tou kole?

⁸ Ko te tahi fakamaʼua ke logoʼi tatatou faikole e te ʼAtua, ko te maʼuliʼi ʼo te ʼu meʼa ʼaē ʼe tou kole ʼi tatatou ʼu faikole. ʼE fakaʼamu e Sehova ke tou fai te ʼu meʼa fuli ʼaē ʼe tou lava fai moʼo maʼuliʼi te ʼu meʼa ʼaē ʼe tou kole. Ohage la, kapau ʼe tou kole fēnei, “Foaki mai kia matou tamatou meakai i te aho-nei,” pea ʼe tonu ke tou gāue kinakina ʼi he faʼahiga gāue pe ʼe tou lava fakahoko. (Mateo 6:11; 2 Tesalonika 3:10) Kapau ʼe tou faikole ki te ʼAtua ke tokoni mai moʼo tauʼi ʼo he vaivaiʼaga fakasino, pea ʼe tonu ke tou tōkakaga ʼo fakamamaʼo mai te ʼu ʼaluʼaga ʼaē ʼe tou lava tō ai ki te fakahala. (Kolose 3:5) ʼO hilifaki ki te ʼu fakamaʼua ʼaenī, ʼe ʼi ai te ʼu fehuʼi ʼo ʼuhiga mo te faikole ʼe tonu ke tou tali kiai.

TE ʼU TALI KI TE ʼU FEHUʼI ʼO ʼUHIGA MO TE FAIKOLE

9. Ko ai ʼaē ʼe tonu ke tou faikole ki ai, pea ʼe tonu ke tou momoli ʼaki ia ʼai?

⁹ Ko ai ʼaē ʼe tonu ke tou faikole ki ai? Neʼe akoʼi e Sesu tana ʼu tisipulo ke nātou faikole ki ‘tanatou Tāmai ʼaē ʼe ʼi selo.’ (Mateo 6:9) Koia ʼe tonu aipe ke tou fai tatatou ʼu kole kiā Sehova ʼAtua tokotahi pe. Kae ʼe fakamaʼua mai e Sehova ke tou tokagaʼi te tuʼulaga ʼo tona ʼAlo ʼulu tokotahi, ko Sesu Kilisito. Ohage ko te meʼa ʼaē kua tou ako ʼi te Kapite 5 ʼo te tohi, neʼe fekauʼi mai ia Sesu ki te kele ke ina foaki tona maʼuli moʼo totogi ʼo tatou mai te agahala pea mo te mate. (Soane 3:16; Loma 5:12) Kua fakanofo ia ia ke Pelepitelo Lahi pea mo Tuʼi Fakamāu. (Soane 5:22; Hepeleo 6:20) Koia ʼe fakahā mai ai ʼi te Tohi-Tapu ke tou momoli tatatou ʼu kole ʼaki ia Sesu. Neʼe ʼui totonu e Sesu: “E ko au te Ala, mo te Mooni pea mo te Mauli; e mole he tahi e haù ki te Tamai, kapau e mole fakalaka ia te au.” (Soane 14:6) Ke logoʼi tatatou ʼu kole, ʼe tonu ke tou faikole kiā Sehova tokotahi pe, ʼo momoli ʼaki tona ʼAlo.

10. He koʼe mole fakamaʼua mai ke tou tuʼutuli, peʼe tou tuʼupou, peʼe ke tou tutuʼu totonu mokā tou faikole?

¹⁰ Ka tou faikole, ʼe tonu koa ke tou heheka, peʼe tou tuʼutuli, peʼe tou tuʼupou peʼe ke tou tutuʼu totonu? Kailoa ia. Ko Sehova ʼe mole ina fakamaʼua mai ia he meʼa feiā, peʼe ʼo ʼuhiga mo te fakaʼaogaʼi ʼo te ʼu nima peʼe ko he ʼu faʼahi ʼo totatou sino kātoa. ʼE hā mai ʼi te Tohi-Tapu ko te faikole kae tou heheka, peʼe tou tuʼutuli, peʼe tou tuʼupou peʼe tou tutuʼu totonu, ʼe lelei pe ia. (1 Fakamatala 17:16; Nehemia 8:6; Taniela 6:10; Maleko 11:25) Ko te meʼa ʼaē ʼe takimuʼa, ʼe mole ko takita faikole heka, peʼe tuʼutuli, peʼe tuʼupou peʼe tuʼu totonu, kae ʼe ko te lelei ʼo te loto. Ohage la, lolotoga tatatou ʼu gāue ʼaē ʼi te ʼaho fuli peʼe ka hoko fakapunamaʼuli mai he faigataʼaʼia, ʼe feala pe hakita faikole fakalogologo ʼi he potu pe ʼe tou ʼi ai. Ko Sehova ʼe fakalogo ki te faʼahiga faikole ʼaia, tatau aipe mo kapau ʼe mole tokagaʼi he tahi iā nātou ʼaē ʼi ʼotatou tafaʼaki.​—Nehemia 2:​1-6.

11. Koteā ʼaē ʼe feala ke tou kole ʼi tatatou ʼu faikole?

¹¹ Koteā ʼaē ʼe feala ke tou kole ʼi tatatou ʼu faikole? ʼE fakamahino fēnei ʼi te Tohi-Tapu: “Kapau e tou kole he mea o fai ki tona finegalo, [ko Sehova] e ina fakalogo tatou.” (1 Soane 5:14) Ko tona faka ʼuhiga, ko meʼa fuli ʼaē ʼe tou kole ʼe tonu ke ʼalutahi mo te finegalo ʼo te ʼAtua. ʼE ʼalutahi koa mo tona finegalo ke tou faikole age kiā te ia ʼo ʼuhiga mo te ʼu meʼa ʼaē ʼe tou tuʼania kiai? Ei! Ko te faikole ki te ʼAtua ʼe hage pe hakita fai palalau mo hokita kaumeʼa lelei. ʼE feala hatatou palalau faʼifaʼitaliha, ‘ ʼo ʼavahi totatou loto’ ki te ʼAtua. (Pesalemo 62:8) ʼE lelei hatatou kole te laumālie maʼoniʼoni, koteʼuhi ʼe tokoni mai anai ke tou fai te meʼa ʼaē ʼe totonu. (Luka 11:13) ʼE tou toe lava kole foki ke ina takitaki tatou moʼo fai ʼo he ʼu tonu ʼe fakapotopoto pea mo ina foaki mai te mālohi moʼo tauʼi ʼo te ʼu fihifihia. (Sakopo 1:5) Ka tou agahala, ʼe tonu ke tou kole ki te ʼAtua ke ina fakamolemole mai ʼo fakatafito ki te sākilifisio ʼa Kilisito. (Efeso 1:​3, 7) ʼE mahino ia, ʼe mole tonu pe ke tou manatu ki te ʼu meʼa ʼaē ʼe ʼaoga kiā tatou totonu mokā tou faikole. ʼE tou lava faikole maʼa niʼihi kehe​—ohage ko totatou famili peʼe ko totatou ʼu tēhina mo tuagaʼane.​—Gaue 12:5; Kolose 4:12.

12. ʼE tou lava fakahā feafeaʼi ʼi tatatou ʼu faikole ʼe takimuʼa kiā tatou te ʼu meʼa ʼo ʼuhiga mo tatatou Tāmai ʼaē ʼe ʼi selo?

¹² Ka tou faikole, ʼe tonu ke takimuʼa te ʼu meʼa ʼo ʼuhiga mo Sehova ʼAtua. ʼE mahino ia ʼe tāu mo feʼauga ke tou fakavikiviki fakamalotoloto kiā te ia pea mo fakafetaʼi ʼo ʼuhiga mo tona ʼu ʼofa fuli ʼaē kiā tatou. (1 Fakamatala 29:​10-13) Neʼe tuku e Sesu ia te faikole faʼifaʼitaki, ʼaē ʼe tuʼu iā Mateo 6:​9-13, ʼaē neʼe ina akoʼi mai ke tou faikole ke tāpuhā te huafa ʼo te ʼAtua, ko tona faka ʼuhiga ke liliu ko he meʼa ʼe taputapu. Pea ʼe hoko atu te faikole ʼo talanoa ki te haʼu ʼo te Puleʼaga ʼo te ʼAtua pea ke hoko tona finegalo ʼi te kele ohage ko selo. ʼI te ʼosi ʼo tana talanoa ki te ʼu meʼa maʼuhiga ʼaia ʼo ʼuhiga mo Sehova, pea hoki palalau ai leva ia Sesu ʼo ʼuhiga mo te ʼu meʼa ʼaē ʼe tou hoha kiai. ʼO toe feiā pe, mokā tou fakamuʼamuʼa ia Sehova ʼi ʼatatou faikole, ʼe tou fakahā ai ʼe lahi age tatatou tokaga ki ai ʼi hatatou tokaga kiā tatou totonu.

13. Koteā ʼaē ʼe fakahā mai ʼi te Tohi-Tapu ʼo ʼuhiga mo te ʼu faikole ʼaē ʼe leleiʼia e te ʼAtua?

¹³ E feafeaʼi te loaloaga ʼo tatatou ʼu faikole? ʼE mole fakatuʼu mai he tuʼakoi ʼo te loaloaga ʼo tatatou ʼu faikole takitokotahi peʼe ko te ʼu faikole maʼa te kaugamālie. ʼE lagi feala ke tou fai he kole nounou ʼi muʼa ʼo te temi kai, peʼe ko he kole loaloaga atu mokā tou tokotahi, ʼo fakahā ai kiā Sehova te ʼu meʼa ʼaē ʼi totatou loto. (1 Samuele 1:​12, 15) Kae neʼe tauteaʼi e Sesu te hahaʼi ʼaē neʼe nātou manatu ʼe nātou faitotonu age ʼi te hahaʼi ʼaē, pea mo nātou fai he ʼu kole fakahāhā pea mo loaloaga ʼi muʼa ʼo te hahaʼi. (Luka 20:​46, 47) Ko te ʼu taʼi faikole ʼaia ʼe mole maʼuhiga kiā Sehova. Ko te meʼa ʼaē ʼe maʼuhiga, ko tatatou ʼu faikole ʼaē ʼe haʼu mai totatou loto. Koia ʼe mole lauʼia te loaloaga ʼo te ʼu faikole ʼaē ʼe leleiʼia e te ʼAtua, heʼe tahi mulimuli pe ki te ʼu meʼa ʼe ʼaoga kiā kita pea mo te ʼu ʼaluʼaga ʼo kita.

14. Koteā te faka ʼuhiga ʼo te fakaloto mālohiʼi ʼo tatou ʼi te Tohi-Tapu ke tou “faikole tuʼumaʼu,” pea he koʼe ʼe fakaloto fīmālie ia te manatu ʼaia?

¹⁴ ʼE tonu ke tuʼa fia tatatou faikole? ʼE fakaloto mālohiʼi tatou ʼi te Tohi-Tapu ke tou “kataki . . . i te faikole,” pea mo tou “faikole tuumau.” (Mateo 26:41; Loma 12:12; 1 Tesalonika 5:17) ʼE moʼoni ia, ʼe mole fia ʼui ʼi te ʼu vaega ʼaenī ke tou faikole kiā Sehova ʼi te temi fuli ʼo te ʼaho. Kailoa ia, kae ʼe uga tatou ʼi te Tohi-Tapu ke tou faikole tuʼumaʼu, ʼo fakafetaʼi tuʼumaʼu kiā Sehova ki tona lotoʼofa mai kiā tatou, pea mo tou haga kiā te ia ke ina takitaki tatou, mo fakaloto fīmālieʼi tatou pea mo fakaloto mālohiʼi tatou. Ko he meʼa fakaloto fīmālie hatatou ʼiloʼi neʼe mole fakatuʼakoi mai e Sehova ia te loaloaga pea mo te temi ʼaē ʼe tou lava palalau age kiā te ia ʼi te faikole! Kapau ʼe tou leleiʼia te pilivilesio ʼo te faikole, ʼe tou maʼu lahi anai he ʼu faigamālie ke tou faikole ki tatatou Tāmai ʼaē ʼe ʼi selo.

15. He koʼe ʼe tonu ke tou ʼui “Ameni” ʼi te fakaʼosi ʼo hata faikole ʼāteaina peʼe ʼi te fakaʼosi ʼa he ʼu faikole ʼe fai iā muʼa ʼo te kaugamālie?

¹⁵ He koʼe ʼe tonu ke tou ʼui “Ameni” ʼi te fakaʼosi ʼo te faikole? Ko te kupu “ameni” ko tona faka ʼuhiga ʼe kita “ ʼio,” peʼe kita ʼui “ke fai kiai.” ʼE hā ʼi te ʼu faʼifaʼitaki faka Tohi-Tapu ʼe lelei hata ʼui “Ameni” ʼi te fakaʼosi ʼo hakita ʼu faikole ʼāteaina peʼe ko he ʼu faikole iā muʼa ʼo te kaugamālie. (1 Fakamatala 16:36; Pesalemo 41:13) Ka kita ʼui “Ameni” ʼi hata ʼosi faikole tokotahi, ʼe kita fakamoʼoni ai neʼe kita fai fakamalotoloto tata ʼu palalau, pea kita ʼui “Ameni”​—leʼo veliveli peʼe leʼo lahi​—ʼi te ʼosi ʼo he faikole neʼe fai maʼa te kaugamālie, ʼe kita fakahā ai ʼe kita ʼio ki te ʼu manatu ʼaē neʼe tala ʼi te faikole ʼaia.​—1 Kolonito 14:16.

TE TALI ʼA TE ʼATUA KI ʼATATOU FAIKOLE

16. Koteā ʼaē ʼe feala ke tou tui papau kiai ʼo ʼuhiga mo te faikole?

¹⁶ ʼE tali moʼoni koa ia Sehova ki te ʼu faikole? Ei! ʼE tou tui papau ‘ ʼe fagono ki te faikole’ ʼo tali ki te ʼu faikole fakamalotoloto ʼaē ʼe fai e te toko lauʼi miliona hahaʼi. (Pesalemo 65:2) ʼE lahi te ʼu faʼahiga tali mai ʼa Sehova ki ʼatatou faikole.

17. He koʼe ʼe tou lava ʼui ʼe fakaʼaogaʼi e te ʼAtua tana kau ʼāselo pea mo tana kau kaugana ʼi te kele moʼo tali ki ʼatatou faikole?

¹⁷ Moʼo tali ki te ʼu faikole, ʼe fakaʼaogaʼi e Sehova ia te kau ʼāselo pea mo tana ʼu kaugana ʼi te kele. (Hepeleo 1:​13, 14) ʼE lahi te ʼu fakamatala ʼo te ʼu hahaʼi neʼe nātou faikole ki te ʼAtua ke tokoni age kiā nātou ke nātou mahino ki te Tohi-Tapu, pea hili pe tanatou faikole pea nātou felāveʼi atu aipe mo te ʼu kaugana ʼa Sehova. Ko te ʼu taʼi fakamatala ʼaia ʼe nātou fakamoʼoni ki te takitaki ʼa te kau ʼāselo ia te gāue fai faka mafola ʼo te Puleʼaga. (Apokalipesi 14:6) Moʼo tali ki ʼatatou faikole ʼaē neʼe tou fai ʼi he temi neʼe ʼaoga moʼoni mai he tokoni kiā tatou, ʼe lagi uga e Sehova he Kilisitiano ke haʼu ʼo tokoni mai kiā tatou.​—Tāʼaga Lea 12:25; Sakopo 2:16.

18. ʼE fakaʼaogaʼi feafeaʼi e Sehova tona laumālie maʼoniʼoni pea mo tana Folafola moʼo tali ki te ʼu faikole ʼo tana ʼu kaugana?

¹⁸ ʼE toe fakaʼaogaʼi foki e Sehova ʼAtua tona laumālie maʼoniʼoni pea mo tana Folafola, ia te Tohi-Tapu, moʼo tali ki te ʼu faikole ʼo tana ʼu kaugana. ʼE feala hana tali mai mokā tou faikole age ke tokoni mai moʼo tauʼi ʼo he ʼu ʼahiʼahi, ʼo ina foaki mai te mālohi pea mo te takitaki ʼo tona laumālie maʼoniʼoni. (2 Kolonito 4:7) ʼI te agamāhani, ka tou kole kiā Sehova ke ina takitaki tatou, pea ʼe tou maʼu te tali ki tatatou ʼu faikole ʼi te Tohi-Tapu, moʼo fai he ʼu tonu ʼe fakapotopoto. ʼE feala ke tou maʼu he ʼu vaega faka Tohi-Tapu ʼaoga lolotoga tatatou ako Tohi-Tapu takitokotahi, pea mokā tou lau he tohi ʼi te ʼu tohi faka Tohi-Tapu ohage ko te tohi ʼaenī. Ko te ʼu manatu faka Tohi-Tapu ʼaē ʼe ʼaoga mai kiā tatou ʼe lagi tou logo anai kiai ʼi he akonaki lolotoga te fono faka Kilisitiano peʼe ʼi he ʼu tali ʼa he tagata ʼāfea ʼe taupau ki te lelei ʼo te kokelekasio.​—Kalate 6:1.

19. Koteā ʼaē ʼe tonu ke tou manatuʼi mo kapau ʼe hage mai ʼi ʼihi temi ʼe mole tali tatatou ʼu faikole e Sehova?

¹⁹ Ka hage ʼe tou matatuaiʼia te tali mai ʼa Sehova ki tatatou ʼu faikole, ʼaua naʼa tou manatu ʼe mole ina lava tali mai. Kae ʼe tonu ke tou manatuʼi ko Sehova ʼe tali ki te ʼu faikole ʼo mulimuli ki tona finegalo pea ʼe hoki ina tali pe anai ʼi tona temi totonu. ʼE ina ʼiloʼi te ʼu meʼa ʼaē ʼe ʼaoga kiā tatou pea mo te puleʼaki ʼaē ʼe lelei age ki totatou ʼu fihifihia. ʼE ina tau tuku ke tou ‘haga kole, mo kumi, pea mo fisifisi.’ (Luka 11:​5-10) Kapau ʼe tou haga kole ki te ʼAtua, pea ʼe ina ʼiloʼi ai anai totatou loto moʼoni ki te meʼa ʼaia pea mo tatatou tui moʼoni. Pea tahi ʼaē meʼa, ʼe lagi tali mai ia Sehova ki tatatou ʼu faikole ʼi he faʼahiga ʼaluʼaga ʼe lagi mole tou sio mata kiai. Ohage la, ʼe lagi tali mai ki tatatou ʼu faikole ʼo ʼuhiga mo he faʼahiga ʼahiʼahi, ʼo mole ina pulihi te fihifihia ʼaia, kae ʼe ina foaki mai te mālohi moʼo kātakiʼi te ʼahiʼahi ʼaia.​—Filipe 4:13.

20. He koʼe ʼe tonu ke tou fakaʼaogaʼi kātoa te pilivilesio maʼuhiga ʼaē ko te faikole?

²⁰ ʼE tou lava fakafetaʼi ki te Tupuʼaga ʼo te ʼatulaulau ʼi tana fakaōvi kiā nātou fuli ʼaē ʼe faikole age kiā te ia ʼi he ʼaluʼaga ʼe tāu mo feʼauga! (Pesalemo 145:18) ʼOfa pe ke tou fakaʼaogaʼi kātoa te pilivilesio maʼuhiga ʼaē ko te faikole. Kapau ʼe tou fai feiā, ʼe tou fiafia anai ʼi tatatou toe fakaōvi ʼaupito kiā Sehova, ia Ia ʼaē ʼe fagono ki ʼatatou faikole.