He Koʼē ʼe Tonu Ke Hoko Atu Tau Ako Te Tohi-Tapu?

1. Koteā te ʼu lelei ʼe ke maʼu anai ʼi tau haga ako te Tohi-Tapu?

ʼE mahino papau ia, ko tau ako te ʼu akonaki tāfito ʼo te Tohi-Tapu neʼe ina fakamālohiʼi tou ʼofa ʼaē kiā Sehova. Ko te ʼofa ʼaia ʼe tonu ke gāueʼi tuʼumaʼu ke mālohi age. (1 Petelo 2:2) Ko tau ʼamanaki ʼaē ki te maʼuli heʼegata ʼe fakalogo anai ki tau haga ako tana Folafola pea mo tau fakaovi ʼaē kiā te ia.​—Lau ia Soane 17:3; Suta 21.

ʼAki te tuputupu ʼo tau ʼiloʼi ʼaē ia te ʼAtua, ʼe mālohi anai tau tui. Ko te tui ʼaia ʼe tokoni anai kiā koe ke ke fakafiafiaʼi te ʼAtua. (Hepeleo 11:1, 6) ʼE ina uga anai ia koe ke ke fakahemala pea mo fai he ʼu fetogi ʼe ʼaoga ki tou maʼuli.​—Lau ia Gaue 3:19.

2. ʼE fua lelei feafeaʼi anai ki ʼihi ia tau ʼiloʼi ʼaē ia te ʼAtua?

ʼI te agamāhani ʼe tou fiafia ʼi te fakahā ʼo he ʼu logo ʼe lelei. ʼE lagi ke fia vaevae anai mo ʼihi ia te ʼu meʼa ʼaē kua ke ʼiloʼi. ʼAki tau haga ako te Tohi-Tapu ʼe ke poto anai ʼi te fakaʼaoga ʼo te Tohi-Tapu moʼo fakamahino tau tui ʼaē kiā Sehova pea mo ʼana logo ʼaē ʼe lelei.​—Lau ia Loma 10:13-15.

ʼE hahaʼi ia nātou ʼaē neʼe kamata palalau ʼo ʼuhiga mo te ʼu logo lelei ʼaia ki ʼonatou kaumeʼa pea mo ʼonatou kāiga. Palalau fakapotopoto. ʼE mole ke ʼui age anai ʼe hala tanatou lotu, kae ʼe ke talanoa age anai ʼo ʼuhiga mo te ʼu fakapapau ʼa te ʼAtua. Manatuʼi ko ʼau aga ʼaē ʼe lelei ʼe lave age ki te hahaʼi ʼi te ʼu meʼa ʼaē ʼe ke lau.​—Lau ia 2 Timoteo 2:24, 25.

3. ʼE feala ke ke felōgoi feafeaʼi mo te ʼAtua?

Ko te ako ʼo te Folafola ʼa te ʼAtua ʼe tokoni anai kiā koe ke ke tuputupu ʼi te faʼahi fakalaumālie. ʼAki te temi, ʼe feala ke ke maʼu he ʼu felōgoi lelei pea mo Sehova. ʼE feala ke ke kau ki tona fāmili.​—Lau ia 2 Kolinito 6:18.

4. ʼE feafeaʼi he hoko atu ʼo tau tuputupu ʼi te faʼahi fakalaumālie?

ʼE feala ke ke tuputupu ʼi te faʼahi fakalaumālie ʼaki tau haga ako ia te Folafola ʼa te ʼAtua. (Hepeleo 5:13, 14) Kole ki he Fakamoʼoni ʼa Sehova ke ina fai hau ako Tohi-Tapu ʼaki te tohi Koteā ʼAē ʼe Akoʼi Moʼoni Mai ʼi Te Tohi-Tapu? Kā lahi tau ako ia te Folafola ʼa te ʼAtua, pea ʼe toe lahi te lelei ʼo tou maʼuli.​—Lau ia Pesalemo 1:1-3; 73:27, 28.

Ko te ʼu logo lelei ʼe haʼu mai ia Sehova, te ʼAtua fiafia. ʼE feala ke ke fakaovi kiā te ia, ʼaki tau fakaoviovi ki tana hahaʼi. (Hepeleo 10:24, 25) ʼAki tau faiga ʼaē ke ke haga fakafiafia ia Sehova, ʼe ke maʼu ai anai ia te maʼuli moʼoni, ʼaē ko te maʼuli heʼegata. Ko te fakaovi ʼaē ki te ʼAtua ʼe ko te meʼa lelei pē ʼaia e tahi ʼe feala ke ke fai.​—Lau ia 1 Timoteo 1:11; 6:19.