Ko He Puleʼaga Ka Ina Puleʼi Te Kele Katoa

ʼE ke iloʼi la pe kotea te Puleʼaga ʼae ka tā talanoa ki ai?— Koia, ʼe ko te Puleʼaga ʼo te ʼAtua, ʼe ko te Puleʼaga ʼae ka ina fakaliliu anai te kele ko he palatiso. ʼE ke fia mahino koa ki he tahi age ʼu faʼahi ʼo ʼuhiga mo te Puleʼaga ʼaia?—

Ko te ʼu puleʼaga fuli ʼe ʼi ai tona hau. Pea ʼe pule ki te hahaʼi ʼo tona fenua. ʼE ke iloʼi koa la pe ko ai te Hau ʼo te Puleʼaga ʼo te ʼAtua?— ʼE ko Sesu Kilisito. ʼE maʼuli ia ʼi selo. Ka hani liliu pe ko te Hau ʼo te kele. ʼI tau manatu la, ʼe mole koa la tou fiafia anai moka pule ia Sesu ki te kele katoa?—

ʼE tou fiafia lahi anai! ʼI te Palatiso, ʼe mole toe fetauʼaki anai te hahaʼi. ʼE natou feʼofaʼaki anai. ʼE mole toe mahaki peʼe mate anai he tahi. ʼE sisio anai te kau kivi, mo logo te kau tuli pea ko natou ʼae ʼe mole lava haʼele ʼe natou lele anai pea mo makahikihiki anai. ʼE mahu anai te meʼa kai. ʼE feʼofaʼofani anai te ʼu manu pea mo natou felogoʼi lelei mo te hahaʼi. ʼE fakatuʼuake anai ia natou ʼae kua mamate. Ko te ʼu tagata mo te ʼu fafine ʼae neʼe tou vakaʼi ʼi te kaupepa lahi ʼaeni, ohage la ko Lepeka, mo Laape, mo Tavite, pea mo Elia ʼe toe fakatuʼuake anai natou. ʼE ke fakaʼamu koa la ke ke felaveʼi mo natou moka toe fakatuʼuake natou?—

ʼE ʼofa ia Sehova ia koe pea ʼe ina loto ke ke fiafia. Kapau ʼe ke hoko atu tau iloʼi ia Sehova pea mo fakalogo kia te ia, ʼe feala anai ke ke maʼuli ʼo heʼe gata ʼi te palatiso matalelei. Ko te meʼa ʼaia ʼe ke fakaʼamu ki ai?—