FAʼAHI 2

Kolua Feagatonuʼaki

“Ke aua naa veteki e te tagata te mea ae kua hai e te atua.”—Maleko 10:9

ʼE fakamaʼua mai e Sehova ke tou “[ʼoʼofa] ki te agatonu.” (Mikea 6:8, MN) ʼE maʼuhiga tafitō ia te faʼahi ʼaeni ʼi tokolua maʼuli fakataumatuʼa, koteʼuhi kapau ʼe mole kolua feagatonuʼaki pea ʼe puli ia te falala. Kaʼe ʼe maʼuhiga ʼaupito ia te falala ke tuputupu ai ia te ʼofa.

Ia ʼaho nei, kua faigataʼa ia te feagatonuʼaki ʼi te maʼuli fakataumatuʼa. Koia, moʼo puipui tokolua maʼuli fakataumatuʼa, ʼe tonu ke kolua faiga ke kolua fai ia te ʼu faʼahi ʼaeni ʼe lua.

1 KOLUA FAKAMUʼAMUʼA TOKOLUA MAʼULI FAKATAUMATUʼA

KOTEA TE MANATU ʼI TE TOHI-TAPU? “Ke koutou filifili te u mea e lelei tukupau.” (Filipe 1:10) ʼE kau ia tokolua maʼuli fakataumatuʼa ki te ʼu meʼa ʼae ʼe maʼuhiga tafitō ʼi tokolua maʼuli. ʼE tonu ke kolua fakamuʼamuʼa ia te faʼahi ʼaia.

ʼE loto e Sehova ke ke tokaga fakalelei ki tou hoa pea ke kolua “mauli fiafia.” (Ekelesiasi 9:9) ʼE mahino ia, ʼe mole tonu ke ke tuku keheʼi tou hoa kaʼe ke kolua kumi ia te ʼu faʼahi ʼae ʼe kolua fiafia tokolua ai. (1 Kolinito 10:24) Faiga ke logoʼi e tou hoa ʼe ʼi ai tona ʼaoga pea ʼe ke ʼofa ai.

A husband brings his wife a hot beverage; a husband comes home and finds his wife cooking

KOTEA ʼAE ʼE FEALA KE KOLUA FAI?

Kolua fakaʼaogaʼi tuʼumaʼu he temi ke kolua fai ai he ʼu gaue fakatahi, ʼo kolua fetokagaʼaki
ʼAua naʼa kolua tahi manatu pe kia koulua

A husband and wife spend time together on a picnic

2 TAUPAU ʼOKOLUA LOTO

KOTEA TE MANATU ʼI TE TOHI-TAPU? “Ko ae e sio ki he fafine i he sio manumanu, kua tono ia ia mo te fafine aena i tona loto.” (Mateo 5:28) Kapau ʼe maʼu tuʼumaʼu e he tahi ia he ʼu manatu heʼe ʼaoga, ʼe hage pe ʼe heʼe agatonu ki tona hoa.

Neʼe ui e Sehova ʼe tonu ke ke “taupau tou loto.” (Taaga Lea 4:23; Selemia 17:9) Koia, ʼe tonu ke kolua tokakaga ki te ʼu meʼa ʼae ʼe kolua sioʼi. (Mateo 5:29, 30) Kolua mulimuli ki te faʼifaʼitaki ʼo Sopo, ʼae neʼe ina fai he fuakava moʼona mata ke mole sio ʼaki he holi ki he tahi age fafine. (Sopo 31:1) Kolua fakatotonu ke mole kolua sioʼi te ʼu ʼata kovi. Pea kolua fakatotonu ke ʼaua naʼa kolua manako ki he tahi age.

A husband has a picture of his wife on his desk at work

KOTEA ʼAE ʼE FEALA KE KOLUA FAI?

Kolua fakaha fakalelei ki te hahaʼi ʼe kolua feʼofaʼaki moʼoni
Fakaʼapaʼapa ki te ʼu meʼa ʼae ʼe logoʼi e tou hoa pea mo ke foimo fakagata ia te ʼu felogoʼi mo he tahi ʼe feala ke mamahi ai tona loto