He ʼu Manatu Fakalotomamahi​—Ka Tou ‘Lotomamahi ʼi He Meʼa’

NEʼE kua ke logoʼi koa te lotomamahi ʼae neʼe tau mo Linda? Meʼa fakaʼofaʼofa foki, neʼe tukia ʼihi ʼi te aga ʼo ʼonatou tehina mo tuagaʼane, ʼo fakatupu kovi ai ki tonatou maʼuli fakalaumalie. ʼE toe feia koa mo koe?

ʼE Feala Koa Ke ‘Fakamavae Tatou e He Tahi Mai Te ʼOfa ʼo Te ʼAtua’?

ʼE mahino ia, ʼe faigataʼa ʼaupito hatatou fakamolemole ki he tehina peʼe ko he tuagaʼane neʼe ina fai mai he meʼa ʼo lavea ai totatou loto. Kaʼe, e tonu ki te kau Kilisitiano ke natou feʼofaʼofani. (Soane 13:34, 35) Kapau ʼe hoko te aluʼaga fakalotovaivai mo fakalotomamahi ʼaia kia tatou, ʼe feala ke mole tou faʼa katakiʼi.—Pesalemo 55:13.

ʼE moʼoni, ʼe fakaha ʼi te Tohi-Tapu, ʼe feala pe ʼi ʼihi temi ke lotomamahi he tahi ʼi he meʼa ki he tahi age Kilisitiano. (Kolose 3:13, MN) Ka hoko te aluʼaga ʼaia kia kita totonu, ʼe lagi faigataʼa ia tona tauʼi. Kaʼe kotea ʼae ʼe feala ke tokoni mai? Tou vakaʼi te ʼu pelesepeto Fakatohi-tapu ʼaeni ʼe tolu:

Ko tatatou Tamai ʼi selo ʼe ina iloʼi ia meʼa fuli. ʼE sio ia Sehova kia meʼa fuli ʼae ʼe hoko, ʼo feia pe mo te ʼu aluʼaga ʼae ʼe mole faitotonu ʼe tou tau mo ia pea fakatupu lotomamahi. (Hepeleo 4:13) Pea tahi, ʼe toe lotomamahi ia Sehova mo kapau ʼe tou lotomamahi. (Esaia 63:9) ʼE mole he temi ʼe ina fakagafua ai te mamahi, te tuʼania peʼe ko he tahi age meʼa, maʼia mo hana kaugana, ke ina “fakamavae tatou mai te ofa o te Atua.” (Loma 8:35, 38, 39) Koia ʼe mole tonu ke tou tuku ia he meʼa peʼe ko he tahi ke ina fakamavae tatou mai ia Sehova.

Ko te lotofakamolemole ʼe mole fakaʼuhiga ʼe tou tukunoaʼi te ʼu hala ʼae neʼe fai mai. Ka tou fakamolemole kia natou ʼae neʼe fakalotomamahiʼi tatou, ʼe mole tou meʼa noaʼi, mo fakalakatonuʼi, pea mo tukunoaʼi tanatou aga. Tou manatuʼi, ʼe mole he temi ʼe tali ai e Sehova ia te agahala, kaʼe ʼe ina fakamolemole mo kapau ʼe ʼi ai hona tupuʼaga. (Pesalemo 103:12, 13; Hapakuke 1:13) Kapau ʼe uga tatou e Sehova ke tou fakamolemole ki ʼihi, ʼe ina kole mai ke tou faʼifaʼitakiʼi ia ia. Pea ʼe mole nofo ita ia ʼo talu ai.—Pesalemo 103:9; Mateo 6:14.

Kapau ʼe tou pulihi te loto ita ia tatou, ʼe fua lelei pe anai kia tatou. ʼO feafeaʼi? Tou fakakaukauʼi te aluʼaga ʼaeni. ʼE ke puke he foʼi maka pea ko tona mamafa ʼe lagi ko he ʼu kilo. Kaʼe ʼe ke faoʼi leva tou nima. ʼE lagi faigafua anai kia koe ia te puke feia ʼo te foʼi maka ʼi he kiʼi temi siʼi. Kaʼe ʼe feafeaʼi mo kapau ʼe ke faigaʼi ke ke puke te foʼi maka ʼi he temi loaloaga? ʼE ke lavaʼi anai tona puke ʼi ni minuta? ʼi he hola? peʼe laka atu? ʼE mahino ia, ʼe vaivai anai tou nima. ʼE moʼoni, ko te mamafa ʼo te foʼi maka ʼe mole fetogi anai ia. Kaʼe kapau ʼe loaloaga ia tona puke pea ʼe hage anai kia koe kua mamafa. ʼE toe feia pe mo te ita. Kapau ʼe tou taupau fualoa totatou ita, tatau aipe pe ʼe tou meʼa noaʼi, ʼe toe fakatupu mamahi pe kia tatou. Koia ʼae ʼe fakalotomalohiʼi ai tatou e Sehova ke tou liakī te ita. Pea ʼe mahino papau ia, ʼe fua lelei anai kia tatou.—Taaga Lea 11:17.

“Neʼe Hage Ko Sehova Totonu ʼAe Neʼe Palalau Mai”

Kotea ʼae neʼe tokoni kia Linda ke ina tekeʼi ia tona ita ki te tuagaʼane? ʼI te ʼu aluʼaga ʼae neʼe tokoni kia ia, neʼe kau ki ai ia tana metitasio ki te ʼu tupuʼaga Fakatohi-tapu ʼae ke tou lotofakamolemole ai. (Pesalemo 130:3, 4) Ko te faʼahi ʼae neʼe lotomalohi ai ia Linda, neʼe ko tana mahino ʼae ʼe fakamolemole anai ia Sehova kia tatou mo kapau ʼe tou lotofakamolemole. (Efeso 4:32–5:2) Neʼe malave te ʼu manatu ʼaia kia ia, ʼo ina ui fenei: “Neʼe hage ko Sehova totonu ʼae neʼe palalau mai.”

ʼAki te temi, neʼe feala kia Linda ke lituʼa ki tona ita. Neʼe lotolelei ʼo fakamolemole ki te tuagaʼane pea kua nā kaumeʼa lelei ʼi te temi nei. Pea kua toe tuputupu ia Linda ʼi tana tauhi ʼae kia Sehova. ʼOfa pe ke ke tui papau, ʼe fia tokoni atu ia Sehova ke ke toe fai feia mo koe.