Tou Lototokaga Ki ʼIhi

Te Meʼa ʼAe Neʼe Fai e Sesu

ʼATA VITEO: Ko Sesu Mo Te Fafine Samalitana

1. Sioʼi te ʼATA VITEO, peʼe lau ia Soane 4:6-9. Pea tali ki te ʼu fehuʼi ʼaeni:

1. Kotea ʼae neʼe tokagaʼi e Sesu ʼi muʼa ʼo tana palalau ki te fafine?

2. Neʼe ui age e Sesu: “Foaki mai he moʼi vai ke au inu.” He koʼe neʼe ko he faʼahiga fai ʼaia ʼe lelei moʼo kamata he faipalalau?

Kotea ʼAe ʼe Tou Ako Mai Ai?

2. Kapau ʼe ke loto ke lelei hau faipalalau mo he tahi, talanoa ki he manatu ʼe fia logo ki ai.

Faʼifaʼitakiʼi Ia Sesu

3. Fetofetogi ʼau manatu. ʼAua naʼa ke foimo palalau ki he manatu neʼe ke teuteuʼi kae talanoa ki he manatu ʼe tuʼania ki ai te hahaʼi ʼi te temi ʼaia. Fai te ʼu fehuʼi ʼaeni:

1. ‘Kotea ʼae ʼe talanoa tafito ki ai ʼi te ʼu tala logo?’

2. ‘Kotea ʼae ʼe palalau ki ai ʼoku vahaʼa fale, peʼe kauga gaue, peʼe kauga ako?’

4. Mata Siosio. Pea ke fai te ʼu fehuʼi ʼaeni:

1. ‘Kotea ʼae ʼe lolotoga fai e te tagata peʼe ko te fafine ʼaia? Kotea ʼape ʼe manatu ki ai?’

2. ‘Kotea ʼae ʼe ha ʼi ʼona teu mo tona agaaga peʼe ko tona ʼapi ʼo ʼuhiga mo te ʼu akonaki ʼe tui ki ai mo te ʼu faʼahi ʼae ʼe ina leleiʼia?’

3. ‘ ʼE ko he temi lelei koa ki ai ke faipalalau?’

5. Fagono Lelei.

1. ʼAua naʼa lahi fau tau palalau.

2. Tokoni ki te tagata peʼe ko te fafine ke ina fakaha tana manatu. Kapau ʼe ʼaoga, fai he ʼu fehuʼi.