Ko Te Fīmālie Heʼe Gata ʼe ʼAmanaki Maʼu ʼe Natou ʼAē ʼe Natou Foaki Ohage Ko Te ʼAtua
“Heʼe ko te ʼAtua neʼe ʼofa ʼaupito ki te malamanei ʼo ina foaki ai tona ʼAlo ʼulu tokotahi, koteʼuhi ko ʼaē ʼe haga tui kia te ia ke ʼaua naʼa fakaʼauha, kae ke ina maʼu te maʼuli heʼe gata.” — Soane 3:16.
1, 2. a) Ko ai te tufa lahi, pea koteā te meʼa ʼofa matalelei neʼe ina fai maʼa te tagata? b) ʼI te foaki ʼo te meʼa ʼofa matalelei ʼaia, koteā te kalitate neʼe fakahā e te ʼAtua?
KO SEHOVA ʼATUA ko ia tokotahi ko te tufa lahi ʼi te hahaʼi fuli. ʼO ʼuhiga mo ia, ko ia ko te Tupuʼaga ʼo te lagi pea mo te kele, neʼe tohi e te tisipulo ko Sake: “Ko te meʼa ʼofa matalelei fuli pea mo te mōlaga haohaoa fuli ʼe haʼu ia mai ʼoluga, heʼe hifo mai te Tamai ʼo te ʼu mālama ʼi selo, ia ia ʼaē ʼe mole ʼi ai he fetogi ʼo te ʼaluʼaga ʼo te ʼata.” (Sake 1:17). Pea ko Sehova ko te tufa ʼo te mōlaga lahi ʼe mole ʼi ai hona fakatatau. ʼO ʼuhiga mo tona molōga lahi ki te malamanei, neʼe fēnei te ʼui: “Heʼe ko te ʼAtua neʼe ʼofa ʼaupito ki te malamanei ʼo ina foaki ai tona ʼAlo ʼulu tokotahi, koteʼuhi ko ʼaē ʼe haga tui kia te ia ke ʼaua naʼa fakaʼauha, kaʼe ke ina maʼu te maʼuli heʼe gata.” — Soane 3:16.
2 Ko te tagata ʼaē neʼe ina fai te ʼu palalau ʼaia, ko te ʼAlo ʼulu tokotahi totonu ʼo te ʼAtua. ʼE fai mahani ko te foha ʼulu tokotahi ʼe ina maʼu te fakamalo mo te ʼofa maʼa tana tamai heʼe ko ia ko te matapuna ʼo tona maʼuli pea mo te ʼu meʼa fuli neʼe ina fai ke fīmālie ai tona maʼuli. Kae ko te ʼofa ʼo te ʼAtua neʼe mole fakagataʼaki pe tona ʼAlo ʼaia e tahi. ʼI tana foaki he mōlaga feiā ki niʼihi ʼana ʼu meʼa maʼuli ʼe fakahā ʼaki aipe e te ʼAtua tona ʼofa faka talakitupua maʼoluga (Fakatatau Loma 5:8-10). ʼE tou mahino ki te faʼahi ʼaia mokā ʼe tou fakakaukauʼi te kupu ʼaē “neʼe foaki” ʼi te ʼu tafa ʼo te vaega ʼaia.
Te mōlaga ʼo te ʼAtua ko te “ ʼAlo ʼo tona ʼofa”
3. Ko ai niʼihi age ʼi te “ ʼAlo ʼo tona ʼofa”, neʼe natou maʼu te fiafia ʼo te ʼofa ʼo te Tamai?
3 Neʼe ʼi ai te temi, neʼe fiafia te ʼAtua ʼi tana gāue fakatahi mo tona ʼAlo ʼulu tokotahi ʼaia — ”te ʼAlo ʼo tona ʼofa” ʼi te lagi. (Kolose 1:13). Lolotoga ʼo te temi ʼaia, ko te feʼofaniʼaki ʼaē ʼa te Tamai mo te ʼAlo neʼe ʼasili tuputupu aipe, ʼo mole ʼi ai foki he ʼofa ʼe fakatatau ki ai. Neʼe toe ʼofa foki te ʼAtua ki ʼihi meʼa maʼuli neʼe ina fakatupu ʼaki tona ʼAlo ʼuluaki, ko te ʼu meʼa maʼuli ʼaia ʼe natou kau ki te famili fakaʼatua. Pea, ko te ʼofa neʼe nofo ia ʼi te famili katoa ʼo te ʼAtua. ʼE fakaha lelei e te Tohi-Tapu ko te “ ʼAtua ʼe ʼofa”. (1 Soane 4:8). Ko te famili fakaʼatua neʼe faʼufaʼu ʼe natou ʼaē ʼe ʼofa ki ai te Tamai, ia Sehova ʼAtua.
4. Heʼe koʼe ʼe feala hatatou ʼui ʼi te foaki ʼaē ʼo tona ʼAlo, neʼe lahi age te puli ʼo te ʼAtua ʼi te logotahi ʼaē pea mo tona ʼAlo, pea ko ai neʼe ʼaoga ki ai?
4 ʼI te mālohi ʼo te logotahi ʼa Sehova pea mo tona ʼAlo ʼuluaki tupu neʼe ko he puli lahi ia mo kapau e nā mavete (Kolose 1: 15). Kae, ʼi tana foaki te ʼAlo ʼulu tokotahi ʼaia neʼe ina fai ia te meʼa ʼe laka age ʼi tana lituʼa ki te fakatahi mo te “ ʼAlo ʼo tona ʼofa.” Neʼe fakagafua e Sehova ke tali ʼe tona ʼAlo ia te mate pea ke mavae faka temi ai mai te famili faka ʼatulaulau ʼo te ʼAtua. Ko te mate ʼaia ʼe fakaʼaoga ānai kia natou ʼaē neʼe mole heʼeki kau ki te famili ʼo te ʼAtua. Neʼe mole ʼi ai he tahi meʼa ʼofa ʼe lahi age ʼe feala ke foaki e Sehova maʼa te malamanei malaʼia ʼi te ʼAlo ʼulu tokotahi ʼaia, ʼaē ʼe toe faka higoa e te Tohi-Tapu ko te “kamataʼaga ʼo te fakatupu ʼa te ʼAtua.” — Fakahā 3:14.
5. a) Koteā te meʼa neʼe hoko ki te hōloga ʼo Atama, pea koteā ʼaē ʼe fakamaʼua e te faitotonu ʼa te ʼAtua ki he tahi ʼo tona ʼu foha agatonu? b) Koteā te meʼa ʼaē neʼe fakamaʼua ki te ʼAtua e te meʼa ʼofa lahi ʼaia?
5 Ko te ʼuluaki taumatuʼa, ko ʼAtama mo Eva, neʼe mole nā malava ʼo taʼofi tanā kau ki te famili ʼo te ʼAtua. Neʼe kapu nāua ʼi te ʼoloto ʼo Eteni koteʼuhi neʼe nā agahala ki te Tupuʼaga. Pea neʼe mole gata ʼaki pe tanā mole kei kau ki te famili ʼo te ʼAtua kaʼe neʼe kua tau mo nāua te ʼauha ʼaē ko te mate. Ko ia ʼaē, neʼe mole gata ʼaki pe ke foaki ki tona hōloga te ʼofa ʼaē ʼo te ʼAtua ke natou kau ki tona famili; kae ke toe toʼo foki te ʼauha fakaʼatua ʼaē ko te mate. Ke feala ke hoko te faitotonu fakaʼatua, ʼe tonu ko he tahi pe ʼi te ʼu foha agatonu ʼo Sehova ʼAtua ke mate moʼo fetogi te meʼa ʼaia, pe ʼe ko he totogi. ʼO tupu ai te fai ʼo te fehuʼi lahi ʼaeni: ko ʼaē ka fili ʼe ina tali lelei ānai koa te mate ʼaia maʼa te hahaʼi agahala? Ke hoko te meʼa ʼaia ʼe tonu ke ʼi ai he milakulo ʼa te ʼAtua mafimafi. ʼE tonu foki ke toe maʼoluga makehe ake te ʼofa ʼo te ʼAtua. — Loma 8:32.
6. He koʼe ko te ʼAlo pe ʼo te ʼAtua neʼe feala ke ina fakatokatoka te malaʼia ʼaē neʼe to ki ai te hahaʼi agahala, pea koteā ʼaē neʼe ina ʼui ki te faʼahi ʼaia?
6 Ko te ʼAlo ʼuluaki tupu pe ʼaē ʼa Sehova neʼe feala ke ina fakatokatoka te faʼahi ʼaia kua to ki ai te hahaʼi agahala. Ko ia ko te fakatātā ʼo tana Tamai ʼe ʼi selo ʼo ʼuhiga mo te fakahā ʼofa ʼaē ki te hahaʼi ʼo te famili fakaʼatua. Koteʼuhi ko te ʼu meʼa maʼuli ʼatamai fuli neʼe fakatupu mai ia te ia, e tou mahino ai te lahi ʼaē ʼo tona ʼofa kia natou. Ko ia, ko te ʼofa, e ko te kalitate maʼuhiga ia ʼo te ʼAlo ʼulu tokotahi ʼa Sehova, ia Sesu Kilisito, heʼe “ko ia ko te ʼata ʼo te kololia [ʼo te ʼAtua] pea ko te fakafofoga totonu ʼo ia.” (Hepeleo 1:3). ʼI tana fakaha tona lotolelei neʼe ina faka maʼoluga ʼaupito te ʼofa ʼaia ʼo ina foaki tona maʼuli maʼa te hahaʼi agahala, ʼaē neʼe ʼui ai e Sesu ki tana kau ʼapositolo e 12: “Ko te Foha ʼo te tagata, neʼe mole haʼu ia ke tauhi, kae ke kaugana pea mo foaki tona nefesi ko he totogi moʼo fetogi ʼaki te tokolahi.” — Maleko 10:45; vakaʼi mo Soane 15:13.
7, 8. a) Kotea ʼaē neʼe ina uga ia Sehova ke ina fekauʼi mai Sesu Kilisito ki te malamanei? b) Ko te gāue feafeaʼi ʼaē neʼe fekauʼi mai ai e te ʼAtua tona ʼAlo ʼulu tokotahi ki te kele?
7 Neʼe ʼi ai te fakatuʼutuʼu makehe ʼa Sehova ʼAtua ʼi tana fekauʼi ia Sesu ki te mālama fakaʼofaʼofa ʼo te tagata. ʼAki te ʼu palalau ʼa Sesu, neʼe ko te ʼofa pe ʼaē neʼe ina uga ia ia: “Heʼe neʼe ʼofa ʼaupito te ʼAtua ki te malamanei ʼaē neʼe ina foaki ai tona ʼAlo ʼulu tokotahi, koteʼuhi ko ʼaē ka haga tui kia te ia ʼe mole fakaʼauha, kaʼe ke ina maʼu te maʼuli heʼe gata. He neʼe fekauʼi e te ʼAtua tona ʼAlo ki te malamanei, neʼe mole ke ina fakamāuʼi te malamanei, kae ke hāofaki te malamanei mai ia te ia.” — Soane 3:16, 17.
8 Neʼe ko te gāue ia moʼo faka maʼuli ʼaē neʼe fekauʼi ifo ai e Sehova ʼaki tona ʼofa ia tona ʼAlo ʼulu tokotahi. Neʼe mole fekauʼi mai e te ʼAtua tona ʼAlo ki te kele moʼo fakamāuʼi te malamanei. Ka na pau la neʼe fekauʼi mai te ʼAlo ʼo te ʼAtua ki he gāue fakamāu, ka na ʼaua la ʼe mole ʼi ʼai he ʼamanaki ʼa te hahaʼi katoa. Ko te tautea mamafa ʼaē neʼe tonu ke puʼaki e Sesu ki te malamanei katoa e ko te tautea ki te mate (Loma 5:12). Ko ia ʼaē ʼaki te fakahā ʼo te ʼofa fakaʼatua ʼaia e tahi, neʼe haga ai te ʼAtua ʼo fakamatatau te tautea ki te mate ʼaē ʼe fakamaʼua e te faitotonu.
9. Koteā te manatu ʼa te pesalemo ko Tavite ʼo ʼuhiga mo te manavaʼofa ʼa Sehova?
9 ʼI te ʼu faʼahi fuli, ʼe fakahā aipe e Sehova ʼAtua te ʼofa ohage ko he meʼa malohi ia ʼo tona natula. Ko ia ʼaē ʼe feala ai ke tou ʼui fakalelei ko te ʼAtua ʼe ina foaki fakaʼofa mo fakalahi te ʼu meʼa lelei fuli ki tana kau ʼatolasio agatonu ʼi te kele. Neʼe mahino ki ai te pesalemo ko Tavite, ʼi te temi ʼaē neʼe ina ʼui ai ʼo ʼuhiga mo te ʼAtua: “ ʼE lahi ʼaupito, tou finegaloʼofa, ʼaē neʼe ke taupau fakalelei maʼa natou ʼe manavasiʼi kia te koe, pea ke fai kia natou ʼe fakatauga mai kia te koe, ia muʼa ʼo te ʼu foha ʼo te ʼu tagata!” (Pesalemo 31:19). ʼI te lolotoga ʼo te hau ʼa Tavite ki te hahaʼi fuli ʼo Iselaele — pea mo te lolotoga ʼo tona maʼuli katoa ʼi te hahaʼi ʼaē neʼe fili e te ʼAtua — neʼe tautau ʼiloʼi e Tavite te finegaloʼofa ʼo Sehova, pea neʼe sio ia e lahi ʼaupito.
Neʼe pulihi e Iselaele te meʼa ʼofa lahi ʼo te ʼAtua
10. He koʼe neʼe mole tatau te Iselaele ʼafea mo he tahi age fenua ʼi te kele?
10 ʼI tanatou fili Sehova ko tonatou ʼAtua, neʼe mole tatau te Iselaele ʼafea mo he tahi age fenua ʼi te kele. ʼAki te faka felogoʼi ʼa te polofeta ko Moisese, neʼe fakahu e Sehova te ʼu hakoga ʼo Apalahamo, ʼo Isaake, pea mo Sakopo ki he fuakava. Neʼe mole heʼeki ina fai feiā ki he tahi age fenua. Ko ia ʼaē neʼe feala ke ʼui ai e te pesalemo ʼaē neʼe fakafonu e te laumālie maʼoniʼoni: “Neʼe ina fakahā tana folafola kia Sakopo, tana ʼu fakatuʼutuʼu pea mo tana ʼu fakatotonu fakamāu kia Iselaele. Neʼe mole ina fai feiā ki he tahi fenua; pea ʼo ʼuhiga mo tana ʼu fakatotonu fakamāu, neʼe mole natou ʼiloʼi. Fakavikiviki kia Sehova!” — Pesalemo 147:19, 20.
11. Neʼe kaku ki te temi fea te felogoʼi lelei ʼa ʼIselaele mo te ʼAtua, pea neʼe feafeaʼi te fakahā e Sesu te fetogi ʼaia?
11 Ko te fenua ko Iselaele neʼe nofo aipe ʼi tana felogoʼi mo te ʼAtua ʼo kaku ki te temi ʼaē neʼe ina liaki ai Sesu Kilisito te Mesia ʼi te taʼu 33 ʼo totatou temi. Neʼe ko te ʼaho loto mamahi ʼo Iselaele ʼi te temi ʼaē neʼe ʼui age ai e Sesu te palalau ʼaeni: “Selusalemi, Selusalemi, te kolo ʼaē ʼe ina matehi te ʼu polofeta pea mo ina tau makaʼi ia natou ʼaē ʼe fekauʼi kia ia — kua tuʼa fia taku fia fakatahiʼi tau ʼu fānau ohage ko he mātuʼa moa ʼe ina fakatahiʼi tona ʼu ʼuhi ʼi tona ʼu lalo kapakau! Kae neʼe mole koutou loto ki ai. Koʼeni ko tokotou ʼapi ʼe liaki atu”. (Mateo 23:37, 38). ʼI te ʼu palalau ʼaia ʼa Sesu ʼe ina fakahā ai ko te fenua ko Iselaele, ʼaē ʼi muʼa atu neʼe vahaʼa lelei mo Sehova, neʼe mole natou taʼofi te faigamalie ʼaē ke natou maʼu he meʼa ʼofa makehe ʼo te ʼAtua. ʼAē koteā?
12. Ko ai te ʼu ‘fānau ʼo Selusalemi’, pea koteā tona fakaʼuhiga kia Sesu ʼi tana ʼui ʼaē ʼe ina faka māʼopoʼopo fakatahi ia natou ?
12 ʼI te kupu ʼaē ko te “fānau”, neʼe manatuʼi tāfito ʼe Sesu te kau Sutea kua silikosisioʼi ʼaē ʼe nonofo ʼi Selusalemi pea ko natou ʼaia ʼe natou fakafofoga te fenua ʼo Sutea katoa. Kia Sesu ko te faka māʼopoʼopo fakatahi ʼo te ʼu ‘fānau ʼo Selusalemi’ ko tona fakaʼuhiga kia ia ko te ʼu “fānau” ʼaia ʼe fakahu ki te fuakava foʼou mo te ʼAtua, pea ko ia totonu Sesu ka ina faka felogoʼi ia te vahaʼa ʼo Sehova pea mo te kau Sutea ʼaia (Selemia 31:31-34). Ko te ’fuakava ʼaia, ko tanatou ʼu agahala ʼe fakamolemole ānai, heʼe ko te ʼuhiga ʼaia ʼo te folahi ʼo te ʼofa ʼo te ʼAtua (Fakatatau mo Malakia 1:2). Neʼe ko he meʼa ʼofa matalelei ʼaupito.
13. Koteā te meʼa ʼaē neʼe hoko ki Iselaele ʼi tana lituʼa ki te ʼAlo ʼo te ʼAtua, pea he koʼe neʼe mole vaivai ai te fiafia ʼa Sehova?
13 ʼAki tana Palalau fakakikite, neʼe talitali ia Sehova ʼi he temi neʼe ina fakaʼutaʼuta lelei pea hoki na foaki ai leva kia natou ʼaē ʼe mole Sutea te fealagia ke natou kau ki te fuakava foʼou. Kae ʼi te situʼa ʼaē ki te ʼAlo totonu ʼo te ʼAtua, te Mesia, ko te hahaʼi ʼo Iselaele neʼe mole kei tau mo natou te meʼa ʼofa makehe ʼaia. Ko ia neʼe fakamatatau ai e Sehova te tekeʼi ʼo tona ʼAlo ʼaki tana foaki te meʼa ʼofa ʼaia ki he hahaʼi neʼe mole kau ki te fenua ʼo Iselaele. Ko ia ko te fiafia ʼaē neʼe maʼu e Sehova ʼi tana foaki neʼe mole vaivai ia.
Te fiafia ʼi te foaki
14. He koʼe ko Sesu Kilisito ʼe laka maumau tona fiafia ʼi te ʼatulaulau katoa?
14 Ko Sehova ko te “ ʼAtua fiafia.” (1 Timoteo 1:11). Pea ko te foaki ko he meʼa ia ʼe fiafia ai. ʼI te ʼuluaki sekulo ʼo totatou temi, ko tona ʼAlo ulu tokotahi neʼe ina ʼui: “E lahi age te manuʼia ia ʼo tata foaki ʼi ʼaē ia ʼo tata tali.” (Gāue 20:35). ʼO ʼuhiga mo te lekula ʼaia, ko Sesu neʼe laka maumau tana fakafiafia ʼi te ʼu meʼa maʼuli ʼa te Tupuʼaga ʼo te ʼatulaulau. ʼI tea la? Neʼe ko Sesu neʼe hoko atu kia Sehova ʼi te foaki ʼaē ʼo te meʼa ʼofa lahi ʼaupito ʼi tana mōlagaʼi tona maʼuli maʼa te hahaʼi. ʼE mole koa la ko ia ko he “Tuʼi fiafia” (1 Timoteo 6:15)? Ko Sesu totonu ko te faʼifaʼitakiʼaga lelei ʼo ʼuhiga mo te fiafia ʼi te foaki.
15. Koteā te faʼifaʼitaki ʼe fakahā tuʼumaʼu aipe e Sehova, pea ʼe feafeaʼi he ʼahiʼahiʼi e tana ʼu meʼa maʼuli ʼatamai ʼi te kele ia he faʼahi ʼo tona fiafia?
15 ʼAki ia Sesu Kilisito, ʼe foaki tuʼumaʼu aipe ʼe Sehova ʼAtua te ʼu mōlaga manavaʼofa ki tana ʼu meʼa maʼuli ʼatamai fuli pea ko ia tuʼumaʼu pe ko tonatou faʼifaʼitakiʼaga lelei ʼi te faʼahi ʼaia. Ohage pe ko tana leleiʼia te foaki, neʼe ina tuku te laumālie manavaʼofa ki te loto ʼo tana ʼu meʼa maʼuli ʼatamai ʼi te kele. ʼO feala ai ke natou fakaʼata pea mo faʼifaʼitaki tona natula pea mo natou maʼu aipe he faʼahi ʼo tona fiafia (Senesi 1:26; Efesi 5:1). ʼE tou mahino ai leva ki te ʼui ʼaē ʼa Sesu ki tana kau tisipulo: “Koutou tokaga ʼo foaki, pea ʼe toe foaki atu ānai. ʼE huaʼi atu ānai ki te taga ʼo tokotou kofu he fua ʼe matalelei, kua lolomi, pea kua lulululu pea tauopeope. Heʼe ki te fua ʼaē ka koutou fua ʼaki ānai ʼe toe fua ʼaki ānai maʼa koutou.” — Luka 6:38.
16. Koteā ʼaē neʼe fakahā e Sesu ʼi tana palalau ʼaē ia Luka 6:38 ʼo ʼuhiga mo te foaki?
16 Ko Sesu neʼe ina foaki ki tana kau tisipulo he faʼifaʼitaki lelei ʼo ʼuhiga mo te maʼuliʼi ʼo te foaki. Neʼe ina fakahā ko natou ʼaē ʼe natou talifaki te ʼu mōlaga ʼe natou fiafia ānai. ʼIa Luka 6:38, neʼe mole talonoa pe ia Sesu ki he ʼu meʼa ʼofa fakakoloa. Neʼe mole ina tokoniʼi tana kau tisipulo ke natou fai he ʼu meʼa ke fakatupu masiva ānai kia natou. Kailoa, neʼe ina fakaloto malohiʼi natou ki he ala ʼe na fakakoloaʼi ānai tonatou maʼuli fakalaumālie.
Te fiafia heʼe gata kua ʼiloʼi fakapapau
17. Koteā te meʼa ʼofa taulekaleka neʼe foaki e te ʼAtua ki te kau Fakamoʼoni ʼi te ʼu ʼaho fakaʼosi ʼaeni?
17 Koteā te meʼa ʼofa taulekaleka ʼa Sehova, te Pule ʼo te meʼa fuli, neʼe ina fai maʼa tana kau Fakamoʼoni ʼi te ʼu ʼaho fakamuli ʼaeni! Neʼe ina foaki mai kia tatou te logo lelei ʼo tona Puleʼaga. ʼE tou maʼu te pilivilesio lahi ko te faka mafola ʼo te Puleʼaga kua fakatuʼu ʼo te ʼAtua ʼaē neʼe ina foaki age ki tona ʼAlo, ko te Hau ko Sesu Kilisito (Mateo 24:14; Maleko 13:10). ʼI tatatou liliu ko te kau Fakamoʼoni ʼa te ʼAtua Maʼoluga, ko he meʼa ʼofa ia ʼe mole ʼi ai hona fakatatau, pea ki he meʼa lelei ke tou faʼifaʼitaki ai ki te ʼAtua ʼo ʼuhiga mo te foaki, ʼe ko he fagonogono ʼo te logo ʼo te Puleʼaga ki niʼihi ia muʼa ʼo te fakaʼosi ʼo te ʼu faʼahiga meʼa ʼo te tuʼu ʼaeni.
18. ʼI totatou ʼuhiga ʼaē ko te kau Fakamoʼoni ʼa Sehova, koteā ʼaē ʼe tonu ke tou foaki ki niʼihi?
18 Neʼe palalau foki te ʼapositolo ko Paulo ki te ʼu ʼahiʼahi neʼe tau mo ia ʼi tana faka mafola te logo ʼo te Puleʼaga (2 Kolonito 11:23-27). Tatau aipe mo te kau Fakamoʼoni ʼa Sehova ʼi te temi nei ʼe natou tau foki mo te ʼu ʼahiʼahi pea mo natou fakafisi ki ni ʼu faʼahiga meʼa ʼe natou lelei ia takitokotahi ke feala hanatou foaki ki niʼihi te falala ʼo te Puleʼaga. ʼE mole ʼi totatou natula te ʼalu ʼo fakasiosio ki niʼihi, tāfito la mo kapau e tou aga ufiufi. Kae ko te ʼu tisipulo ʼa Kilisito ʼaē ko tatou ʼe mole feala ke natou tekeʼi te pilivilesio ʼaē ko te foaki he ʼu meʼa ʼofa fakalaumālie ki niʼihi aki te fagonogono ʼo te “logo lelei ʼo te Puleʼaga”. (Mateo 24:14). ʼE tonu ke tou maʼu te manatu ʼaē ʼa Sesu ki te faʼahi ʼaia. ʼI te hoko mai ʼo tona temi mate, neʼe ina faikole fēnei: “Tamai, ( . . . ) ke mole hoko ohage ko toku loto, kae ohage ko tou loto”. (Mateo 26:39). ʼI te maʼuhiga ʼaē ʼo te foaki ki niʼihi te logo lelei ʼo te Puleʼaga, ko te kau kaugana ʼa Sehova ʼe tonu ke natou fai te finegalo ʼo te ʼAtua, kae tuku tonatou finegalo; ʼe tonu ke natou fai te loto ʼo te ʼAtua, kae tuku te meʼa ʼaē ʼe natou loto ki ai.
19. Ko ai ʼaē e nā maʼu te ʼu “nofoʼaga heʼe gata, pea ʼe feafeaʼi hatatou kaumeʼa mo nāua?
19 Ko te ʼu mōlaga manavaʼofa ʼaia ʼe ina fakamaʼua totatou temi mo ʼotatou ʼu koloa, kae kapau ʼe tou foaki ohage ko te finegalo ʼo te ʼAtua, ʼe tou ʼiloʼi papau ko totatou fakafiafia ʼe heʼe gata ānai. Koteā tona tupuʼaga? Heʼe neʼe ʼui e Sesu: “ Ke koutou faka kaumeʼa mo te ʼu koloa heʼe agatonu [“te ʼu koloa ʼo te malamanei,” Français courant], koteʼuhi, ka puli ānai, pea ʼe nā tali ānai koutou ʼi te ʼu nofoʼaga heʼe gata”. (Luka 16:9). ʼE tonu ke tou fakatuʼutuʼu ʼo fakaʼaoga ʼatatou ʼu “koloa heʼe agatonu” ke tou liliu ʼo kaumeʼa pea mo Nāua ʼe nā maʼu te ʼu “nofoʼaga heʼe gata.” Ko te meʼa fuli ʼe ʼa te Tupuʼaga, ia Sehova, pea mo tona ʼAlo ʼuluaki tupu heʼe ko ia ʼe ina maʼu te ʼu meʼa fuli (Pesalemo 50:10-12; Hepeleo 1:1, 2). Ke tou kaumeʼa mo nāua, ʼe tonu ke tou fakaʼaoga ʼotatou ʼu koloa ki he faʼahi ʼe nā leleiʼia. Ke hoko te faʼahi ʼaia, e tonu ke tou foaki lotolelei ʼi te temi ʼe tou fakaʼaogaʼi ai te ʼu meʼa fakakoloa moʼo tokoni ki niʼihi (vakaʼi ia Mateo 6:3, 4; 2 Kolonito 9:7). ʼE feala hatatou fakamālohiʼi totatou vahaʼa lelei mo Sehova ʼAtua pea mo Sesu Kilisito ʼo fakaʼaoga fakalelei tatatou ʼu fālā. Ohage la, hatatou toʼo fakafiafia ʼi ʼotatou ʼu koloa moʼo tokoni kia natou ʼe ʼaoga tāfito ki ai pea mo toe toʼo ʼi ʼotatou ʼu koloa moʼo lagolago ki te fakahaʼele ki muʼa ʼo te gāue ʼa te Puleʼaga ʼo te ʼAtua. — Tāʼaga Lea 19:17; Mateo 6:33.
20. a) He koʼe ko Sehova mo Sesu ʼe feala ke nā taki tatou ki te ʼu “nofoʼaga heʼe gata,” pea ʼe feala ke tuʼu ʼifea te ʼu nofoʼaga ʼaia? b) Koteā ānai totatou pilivilesio heʼe gata?
20 ʼI tanā tuputupua, ko Sehova ʼAtua mo Sesu Kilisito ʼe feala ko hotatou ʼu kaumeʼa heʼe gata pea mo nā taki tatou ki te ʼu “nofoʼaga heʼe gata.” Ko te ʼu nofoʼaga ʼaia ʼe feala ke tuʼu ʼi te lagi mo te kau ʼaselo maʼoniʼoni fuli, pe ʼe ʼi te Palatiso ʼi te kele ʼaē ka fakatuʼu (Luka 23:43). ʼE hoko feiā ānai heʼe ʼi te ʼofa ʼaē ʼo te ʼAtua, neʼe ina molagaʼi ia Sesu Kilisito (Soane 3:16). ʼI Tona fiafia makehe, ʼe toe haga foaki ānai e Sehova ʼAtua he ʼu meʼa ʼofa ki te meʼa maʼuli fuli pe ʼaki ia Sesu. Kae, kia tatou, ʼi te pule faka ʼatulaulau ʼa Sehova ʼAtua pea mo te hau ʼo tona ʼAlo ʼuluaki tupu ia Sesu Kilisito, ko totatou ʼAliki pea mo totatou Fakamaʼuli, ʼe tou maʼu ānai te pilivilesio heʼe gata ʼo te foaki. Ko ia ko natou fuli ʼaē ʼe natou foaki ohage ko te finegalo ʼo te ʼAtua ʼe natou maʼu ānai te fiafia heʼe gata.
Kei koutou manatuʼi koa?
◻ Koteā ʼaē neʼe tali e te ʼAtua ke hoko moʼo fai te meʼa ʼofa ʼaē ʼe lahi age?
◻ Ko te gāue feafeaʼi ʼaē neʼe fekauʼi ifo ai e te ʼAtua tona ʼAlo?
◻ Ko ai koa aē ʼe lahi age tona fiafia ʼi te ʼatulaulau katoa, pea koteā tona tupuʼaga?
◻ He koʼe ʼe feala hatatou ʼui ko natou ʼaē ʼe natou foaki ohage ko te finegalo ʼo te ʼAtua ʼe natou maʼu ānai te fiafia heʼe gata?
[Paki ʼo te pasina 10]
ʼE tou leleiʼia koa te meʼa ʼofa ʼaē ʼo te ʼAtua ia tona ʼAlo, ohage ko he totogi faka sakilifisio?
[Paki ʼo te pasina 12]
ʼE tou tomuʼa kumi koa te Puleʼaga ʼo te ʼAtua ʼo fagonogono te logo lelei pea mo lagolago ki te gāue ʼaia ʼaki ʼotatou ʼu koloa?