Ko Te ʼu Fehuʼi ʼAnatou ʼe Lautohi

Hepeleo 9:16 ʼe ina ʼui ko te tagata ʼaē neʼe ina fai te fuakava, ʼe tonu ke mate ke hoko te fuakava ʼaia. Kae, neʼe ko te ʼAtua, neʼe ina fai te fuakava foʼou, pea neʼe mole mate ia. ʼE feafeaʼi koa he mahino ki te vaega ʼaia?

ʼE tou lau ia Hepeleo 9:15-17: “He ko ia [Kilisito] ʼaē ko te felōgoʼi ʼo te fuakava foʼou, ke ʼaki he hoko ʼo he mate moʼo hāofaki nātou mai te ʼu agahala neʼe fai ʼi te ʼuluaki fuakava, ia nātou ʼaē neʼe kalagaʼi ke feala tanatou maʼu te fakapale ʼo he tofiʼa heʼe gata. Heʼe ki te faʼahi ʼaē ʼe ʼi ai he fuakava, ʼe maʼuhiga ke foaki te mate ʼo te tagata ʼaē neʼe ina fai te fuakava. Ko he fuakava, ʼe ʼaoga mokā ʼe ʼi ai he ʼu vikitima mate, heʼe mole maʼuli ia mokā ʼe maʼuli te tagata ʼaē neʼe ina fakahoko te fuakava ʼaia.a”

Ko Sehova totonu, ko te Pule ʼo te fuakava foʼou. Ia Selemia 31:31-34, neʼe fakakikite fakalelei e te ʼAtua ko ia totonu ka ina fai te fuakava foʼou mo tana hahaʼi. Neʼe fakahā e te ʼapositolo ko Paulo te faʼahi ʼaia ia Hepeleo 8:8-13, ʼo ʼiloga mai ai ko Paulo neʼe ina mahino lelei, ko te ʼAtua ko te tafito aga ʼo te fuakava fakaʼatua ʼaia.

Ko ia ʼaē, ia Hepeleo kapite 9, ko Paulo ʼe ina fakahāhā te ʼu faʼahiga tuʼulaga ʼo Sesu ʼo ʼuhiga mo te fuakava foʼou. Ko Kilisito neʼe haʼu ohage ko te Pelepitelo Lahi ʼo te fuakava ʼaia (Hepeleo 9:11, 12). ʼI te tahi ia faʼahi, ko Sesu ʼaē ko te sakilifisio ʼo te fuakava foʼou; heʼe ko te “taʼataʼa pe ʼaē ʼo Kilisito” ka ina feala ‘fakamaʼa totatou leʼo ʼo loto ʼo ʼuhiga mo te ʼu gāue mate’. (Hepeleo 9:14). Neʼe ko Kilisito foki ko te Faka felōgoʼi ʼo te fuakava ʼaia, ohage pe ko Moisese ʼaē neʼe ko te tagata faka felōgoʼi ʼo te fuakava ʼo te Lao.

Neʼe toe fakahā foki e Paulo te ʼaoga ʼaē ʼo he mate he feala ke maʼuli ai te ʼu fuakava ʼa te ʼAtua pea mo te ʼu tagata. Ko te fuakava ʼo te Lao neʼe ko he faʼifaʼitaki. Neʼe ko Moisese ko te faka felōgoʼi ʼaia, ko ia tokotahi ʼaē neʼe feala ai te talaga fakapapau ʼa te ʼAtua pea mo te Iselaele ʼāfea. ʼIo, neʼe ko Moisese neʼe tuʼulaga maʼuhiga; neʼe ko ia ʼaē neʼe felōgoʼi mo te kau Iselaelite ʼi te temi ʼaē neʼe nātou fakahu ai ki te fuakava. Neʼe feala ke ʼui ko Moisese ʼaē neʼe hage ko te tagata ʼaē neʼe ina fakamaʼuli te fuakava ʼo te Lao, ʼaē neʼe haʼu mai ia Sehova. Kae neʼe tonu koa ke foaki e Moisese tona maʼuli moʼo fakahoko ʼo te fuakava ʼo te Lao? Kailoa. Neʼe ko te ʼu manu ʼaē neʼe nātou mōlagaʼi, ko tonatou toto ʼaē neʼe fetogi te toto ʼaē ʼo Moisese. — Hepeleo 9:18-22.

Koteā te ʼui ki te fuakava foʼou ʼaē ia Sehova pea mo te hahaʼi ʼo te Iselaele fakalaumālie? Ko Sesu Kilisito ʼaē ka tuʼulaga faka kolōlia ki te Faka felōgoʼi ʼaē ia Sehova pea mo te Iselaele fakalaumālie. Logo aipe ko Sehova ʼaē ʼe ina fakatafito te fuakava ʼaia, kae kua maʼuhiga kia Sesu Kilisito. Maʼa ia aipe neʼe ko Sesu neʼe ko te Felōgoʼi ʼo te fuakava ʼaia, ʼi tana kei maʼuli ʼi te kele, kae neʼe ina toe maʼuli foki mo nātou ʼaē neʼe ʼuluaki fili ki te fuakava ʼaia (Luka 22:20, 28, 29). Pea, neʼe ko ia pe neʼe tau mo te sakilifisio ʼaia neʼe ʼaoga ke maʼuli ai te fuakava. Ko te sakilifisio ʼaia neʼe mole ko he manu pe, kae neʼe ko te maʼuli ʼo he tagata haohaoa. Ko ia ʼaē neʼe feala ke ʼui ai e Paulo, ko Kilisito neʼe hage ko he tagata neʼe ina foaki tona maʼuli ki te fuakava foʼou. ʼOsi ʼaia ko “Kilisito neʼe ulu ia (...) ki te lagi tonu, koteʼuhi ke hā ia nei maʼa tatou ia muʼa ʼo te ʼAtua”, ko te fuakava foʼou kua maʼuli ia. — Hepeleo 9:12-14, 24.

ʼI te palalau ʼaē ʼa Paulo ʼo ʼuhiga mo Moisese pea mo Sesu ohage ko he ʼu tagata faka felōgoʼi ʼo te ʼu fuakava, neʼe mole ina ʼui ia, ko te ʼu tagata ʼaia neʼe nā fakatuʼu te ʼu fuakava ʼaia, he ko te ʼAtua tokotahi pe ʼaē neʼe ina fakamoʼoni ia. Kae, neʼe ko te ʼu tagata faka felōgoʼi ʼaia e lua ʼaē neʼe nā faka fealagia te taki ʼaē ki te ʼu fuakava. Pea ʼi te ʼu faʼahi pe ʼaia e lua, neʼe ʼaoga ai he mate — ko te ʼu manu neʼe nātou fetogi Moisese, pea ko Sesu ia neʼe ina foaki tona maʼuli kia nātou ʼaē ʼo te fuakava foʼou.

[Nota ʼi te lalo pasina]