‘ ʼE Feala Koa Ke ʼAu Papitema?’

ʼI TE ʼu tonu fuli ʼe tonu ke tou fai lolotoga totatou maʼuli, ʼe mahalo ko te fehuʼi e tahi ʼe maʼuhiga age, koia ʼaenī: ‘ ʼE tonu koa ke ʼau papitema?’ He koʼe koa ʼe maʼuhiga te fehuʼi ʼaia? Koteʼuhi ko te tonu ʼaē ka tou fai ki te fehuʼi ʼaia ʼe ʼi ai tona ʼuhiga tāfito ʼo mole gata ʼaki pe ia totatou maʼuli nei, kae toe feiā foki ki te ʼu lelei heʼegata ki ʼamuli.

Kua koutou felāveʼi koa mo te faʼahi ʼaia? ʼE mahalo pe kua koutou ako te Tohi-Tapu mo te kau Fakamoʼoni ʼa Sehova lolotoga te temi loaloaga. Pe ko takotou ʼu mātuʼa neʼe nātou akoʼi atu te Tohi-Tapu talu mai takotou tupu. ʼI te temi nei kua koutou aʼu ki te temi ʼe tonu ke koutou toʼo hakotou ʼu tonu ʼo ʼuhiga mo te meʼa ʼaē ʼe koutou ʼamanaki ke koutou fai anai. Ke koutou maʼu te tonu lelei ki te faʼahi ʼaia, ʼe tonu ke mahino kia koutou pe koteā te ʼuhiga ʼo te papitema, pea ko ai ʼaē kua feala ke papitema.

Te ʼuhiga ʼo te papitema

Ohage pe ko he ʼohoana, ko te papitema ko he toʼotoʼoga ʼe ina fakamoʼoni te felogoi. ʼI te fahaʼi ʼo te ʼohoana, ko te tagata pea mo te fafine ʼaia neʼe kua nā ako te feʼiloʼiʼaki lelei. Ko te toʼotoʼoga ʼo te fai ʼohoana ʼe ina fakahā ia muʼa ʼo te kaugamālie te meʼa neʼe kua fakatonutonu ki ai ʼāteaina pe, ko tona ʼuhiga ʼaē kua nā loto tokolua ke nā maʼuʼuli fakatahi ʼi te maʼuli faka taumatuʼa. ʼE nā toe maʼu aipe foki te ʼu pilivilesio ʼi te nofo faka taumatuʼa, feiā aipe mo te ʼu maʼua ʼe tonu ke nā fai fakatahi.

Ko te ʼuhiga ʼo te papitema ʼe teitei tatau. ʼI tatatou ako te Tohi-Tapu, neʼe tou akoʼi te ʼu meʼa ʼofa ʼo Sehova neʼe ina fai maʼa tatou. Neʼe ina tuku mai kia tatou mole gata ʼaki pe te maʼuli pea mo te meʼa fuli ʼe ʼaoga moʼo tou taupau, kae neʼe ina toe tuku mai foki mo tona ʼAlo ʼulu tokotahi. Koia neʼe ina avahi te ala ki te hahaʼi agahala ke feala hanatou felogoi mo Ia pea ke nātou maʼu te maʼuli heʼegata ʼi te palatiso faka kelekele. Ka tou manatu ki te ʼu meʼa fuli ʼaia, ʼe mole hake koa ia tatou he loto fia gaūgaūe?

Koteā koa te meʼa ʼe feala ke tou fai? Neʼe fēnei te tala mai ʼo te ʼAlo ʼo te ʼAtua, ia Sesu Kilisito: “Kapau ʼe ʼi ai he tahi ʼe fia mulimuli ia te ʼau, pea ke situʼa kia ia totonu pea ina fua tona pou fakamamahi pea ke haga mulimuli ia te ʼau.” (Mateo 16:24). Ei, ʼe feala ke tou liliu ko he ʼu tisipulo ʼo Sesu Kilisito, ʼo tou muliʼi tana faʼifaʼitaki ʼi tana fai ʼaē te gāue ʼo tana Tāmai, ʼaē ko Sehova. Koia, moʼo fai te faʼahi ʼaia, ʼe maʼua kia tatou ke tou līaki ia tatou totonu, ʼo tou fakatotonu fakalelei ke tou fakatomuʼa te finegalo ʼo te ʼAtua ʼi totatou maʼuli; ki te meʼa ʼaia ʼe ʼaoga te molaga ʼaē ko te foaki ʼo totatou maʼuli moʼo fai tona finegalo, moʼo fakaʼilo ʼo te potu ʼaia neʼe tou fai ʼaki he loto katoa pea mo ʼāteaina pe, neʼe fakatuʼutuʼu te toʼotoʼoga moʼo fakahā te faʼahi ʼaia. Ko te papitema ʼi te vai ko te toʼotoʼoga ʼaia ʼe ina fakahā ia muʼa ʼo te kaugamālie ia te foaki ʼo koutou ki te ʼAtua.

Ko ai ʼaē kua feala ke papitema?

Ko Sesu Kilisito neʼe ina fakatotonu ki tana kau tisipulo ke nātou ‘ ʼolo pea mo nātou fai he kau tisipulo ʼo te ʼu hahaʼi ʼo te ʼu fenua fuli, ʼo nātou papitemaʼi ʼaki te huafa ʼo te Tāmai pea mo te ʼAlo pea mo te laumālie maʼoniʼoni, ʼo nātou akonakiʼi ke nātou maʼuliʼi te ʼu meʼa fuli neʼe ina fakatotonu age’. (Mateo 28:​19, 20.) ʼE mahino mai, ʼe maʼua ke ʼi ai he faʼahiga fakakaukau mo he faʼahiga loto ʼe tau mo ia ʼaē ʼe fia papitema. ʼAki tanatou ako takitokotahi ʼo te Folafola ʼo te ʼAtua, neʼe nātou leleiʼia te maʼuhiga ʼaē kia nātou ‘ke nātou fakahemala pea mo nātou liliu’ mai tonatou maʼuli ʼāfea (Gāue 3:19). Koia, neʼe mahino kia nātou ia te ʼaoga ʼaē ke nātou kau ki te gāue faka mafola evaselio neʼe fai e Sesu Kilisito, ʼo nātou liliu ai ko hana ʼu tisipulo. Ko te ʼu meʼa fuli ʼaia neʼe hoko ʼi muʼa ʼo te papitema.

Kua koutou aʼu koa ki te tuʼuʼaga ʼaia ʼi takotou tuputupu fakalaumālie? ʼE kua koutou fia gāue koa maʼa te ʼAtua? Kapau ko ia ʼaia, koutou fakakaukauʼi ʼi te faikole ia te fakamatala faka tohi-tapu ʼo ʼuhiga mo te enuke ʼo Etiopia, ʼi te tohi ʼo Gāue kapite 8. ʼI te fakamahino age leva ki te tagata ʼaia te ʼu lea faka polofeta ʼo ʼuhiga mo Sesu Kilisito, neʼe ina fakakaukauʼi ʼi tona ʼatamai pea mo tona loto pea ina fai te fehuʼi ʼaenī: “Koteā koa ʼaē kei ina tāʼofi ʼau ke ʼau papitema nei?” Pea neʼe mole he meʼa neʼe ina tāʼofi ia ia; pea neʼe papitema atu aipe. — Gāue 8:​26-38.

ʼI te temi nei ʼe tokolahi ʼe nātou fai te fehuʼi ʼaia: “Koteā koa ʼaē kei ina tāʼofi ʼau ke ʼau papitema?” Ko tona fua ko te toko 300 945 hahaʼi neʼe nātou foaki tonatou maʼuli ʼo nātou papitema ʼi te taʼu 1991. Ko he meʼa fakatupu fiafia ki te hahaʼi fuli ʼa Sehova, pea ko te kau tagata ʼāfea ʼo te ʼu kokelekasio ʼe nātou fiafia ʼi te tokoni ki te hahaʼi ʼe agatonu ʼe faiga ke nātou tuputupu ʼo aʼu ki te papitema.

ʼE feala pe ki te ʼu tagata ʼāfea ʼo takotou kokelekasio ke nātou faka ʼui atu ke koutou talitali muʼa. Kapau ko koutou ko ni ʼu tūpulaga, ʼe mahalo ko ʼakotou ʼu mātuʼa ʼe feala ke nātou ʼui atu ke koutou talitali muʼa. Koteā koa tona tupuʼaga? ʼAua naʼa koutou lotovaivai. Koutou taupau te manatu ʼaē ko te felogoi lelei mo te Māʼoluga ʼe ko he meʼa maʼuhiga ia. ʼE fakamaʼua mai kia tatou te ʼu fakatotonu māʼoluga pea ʼe tonu ke tou taupau maʼu. Koia, ʼe tonu ke koutou fakalogo ki te ʼu tokoni kua tuku atu, ʼo koutou fakaʼaogaʼi ʼaki tokotou loto katoa. Kapau ʼe mole koutou mahino ki te ʼu meʼa neʼe tuku atu, ke ʼaua naʼa koutou ufiufi, kae ke koutou fehufehuʼi ke mahino lelei kia koutou te meʼa ʼaē ʼe tonu ke fai.

ʼI te tahi faʼahi, ko ʼihi hahaʼi ʼe nātou lotolotolua ki te fai ʼo te tonu maʼuhiga ʼaē ko te papitema. ʼE koutou kau koa ki te faʼahiga hahaʼi ʼaia? ʼE moʼoni, ʼe feala pe ke lahi te ʼu tupuʼaga ʼo takotou holomuli mai te foaki ʼo tokotou maʼuli pea mo koutou papitema. Kae kapau kua feala kia koutou ia te faʼahi ʼaia kae ʼe koutou homuli aipe, ʼe lelei hakotou fakakaukauʼi takitokotahi ia te fehuʼi ʼaenī: “Koteā ʼaē ʼe ina tāʼofi ʼau ke ʼau papitema?” Koutou vakaʼi fakalelei ʼi te faikole tokotou ʼu ʼaluʼaga pea mo vakaʼi pe koteā te ʼuhiga moʼoni ʼo takotou mole fia tali ia te fakaafe ʼa Sehova ke koutou maʼu he felogoi lelei mo ia.”

‘ ʼE kei ʼau veliveli’

Kapau ko koutou ko he ʼu tūpulaga, ʼe feala ke hake ia koutou te manatu ʼaenī ‘ ʼe kei ʼau veliveli’. ʼE moʼoni ʼi tonatou ʼuhiga tūpulaga, ʼe maʼua ke nātou fakalogo pea mo ʼofa ki ʼanatou ʼu mātua kilisitiano pea mo nātou faiga ke nātou maʼuliʼi fakalelei te ʼu pelesepeto ʼa te Tohi-Tapu. ʼI tana fai te faʼahi ʼaia, ʼe feala hanatou falala kia mata ʼa Sehova ʼe nātou hage ko he kau “maʼoniʼoni”. Ko te Tohi-Tapu ʼe ina tala mai ko te fānau ʼaē ʼe kei taupau e te ʼu mātua ʼe nātou toe maʼu pe foki te ʼofa fakaʼatua ʼaē ʼe tuku ki te ʼu mātua (1 Kolonito 7:14). Koia, ʼe mole he taʼu ʼe faka tuʼakoi e te Tohi-Tapu ʼo ʼuhiga mo te temi ʼaē ʼe tonu ai ki te ʼu mātua ke nātou taupau tanatou fānau. Koia, ʼe maʼuhiga ki te kau tūpulaga kilisitiano ke nātou fakakaukauʼi fakalelei te fehuʼi ʼaenī: ‘ ʼE feala koa ke ʼau papitema?’

Ko te Tohi-Tapu ʼe ina fakaloto mālohiʼi te kau tūpulaga ke nātou ‘manatuʼi foki tonatou Tupuʼaga lahi ʼi te ʼu ʼaho ʼo tonatou temi tūpulaga’. (Tagata Tānaki 12:1.) ʼI te fahaʼi ʼaia ʼe tou maʼu te faʼifaʼitaki ʼa Samuele, ʼaē “neʼe tauhi kia Sehova, neʼe ko he tamasiʼi ia”. ʼE feiā foki mo te faʼifaʼitaki ʼa Timoteo, ʼaē talu mai tana kei veliveli neʼe ina fakaʼaoga ʼaki te loto katoa ia te moʼoni ʼaē neʼe tuku age e tana faʼe pea mo tana kui fafine. — 1 Samuele 2:18; 2 Timoteo 1:5; 3:​14, 15.

ʼE toe feiā aipe mo te temi nei, ʼe tokolahi te kau tūpulaga neʼe nātou foaki tonatou maʼuli moʼo gāue kia Sehova. Ko Akifusa, ʼe taʼu 15, neʼe ina ʼui neʼe ʼi ai te koga ʼo te fono ki te gāue neʼe tokoni kia ia ki te fai ʼo te tonu ʼaē ʼo ʼuhiga mo te papitema. Ko Ayumi neʼe papitema ʼi tona taʼu hogofulu. Neʼe fia gāue kia Sehova koteʼuhi heʼe neʼe ʼofa moʼoni ia te ia. ʼI temi nei kua taʼu 13 pea ʼe kua fiafia ʼi tana sio ʼaē ki te taʼahine ʼaē ʼe ina fai ki ai te ako faka tohi-tapu, ʼaē ʼe toe ʼofa mo ia kia Sehova, neʼe papitema ʼi tona taʼu 12. Ko te kiʼi tokolua ʼo Ayumi, ia Hikaru, neʼe papitema mo ia ʼi tana taʼu hogofulu. Koeni te meʼa neʼe ina manatuʼi: “Ko ʼihi neʼe nātou ʼui ʼe kei ʼau veliveli fau, kae ko Sehova ʼe ina ʼiloʼi te meʼa ʼaē ʼe ʼau logoʼi. ʼI taku fakatotonu ʼaē ke ʼau foaki toku maʼuli moʼo gāue kia Sehova ʼi toku loto katoa, neʼe ʼau faiga ke ʼau papitema.”

Ko te faʼifaʼitaki ʼa te ʼu mātuʼa ko he tahi meʼa maʼuhiga, pea ʼe feala ke tou fakatokagaʼi te meʼa ʼaē neʼe hoko ki te tuagaʼane ʼe kei finemui. Ko tana matuʼa neʼe ina tapuʼi tana faʼe ke ʼaua tana fai te ako faka tohi-tapu mo ia feiā mo tona tehina pea mo tona tokolua. Neʼe ina haga ʼo ta nātou pea mo tutu tanatou ʼu tohi. Kae ʼuhi pe ko te faʼa kātaki pea mo te tui ʼo tana faʼe, ko te fānau neʼe nātou mamata ki te maʼuhiga ʼaē ʼo te gāue kia Sehova ʼAtua. Ko te kiʼi taʼahine ʼaia neʼe papitema ʼi tona taʼu 13, pea ko tona kiʼi tokolua mo tona tēhina neʼe nā muliʼi tana faʼifaʼitaki.

‘Ku ʼau matuʼa fau’

Neʼe tohi fēnei e te tagata fai pesalemo: “ ʼU matuʼa pea mo tamaliki tagata (...) fakavikiviki te huafa ʼo Sehova.” (Pesalemo 148:​12, 13). Ei, ko te hahaʼi ʼaē kua matutuʼa ʼe tonu ke nātou ʼiloʼi ia te ʼaoga ʼaē kia nātou ia te kau ki te fahaʼi ʼo Sehova. Kae ko ʼihi hahaʼi matutuʼa ʼe mole nātou fia fai he ʼu fetogi ʼi tonatou maʼuli. ʼE manatu nātou “ ʼe molemo feala ke akoʼi he meʼa foʼou ki he matuʼa”. Kae, ke tou manatuʼi ia te tagata agatonu ʼaē ko Apalahamo, neʼe taʼu 75 ʼi te temi ʼaē neʼe haga ai Sehova ʼo tala age ki ai: “Mavae mai tou fenua, mo tou ʼu kāiga, pea mo te ʼapi ʼo tau matuʼa, pea ke ʼalu ki te fenua ʼe ʼau fakahinohino atu anai.” (Gāue 7:3; Senesi 12:​1, 4). Neʼe fēnei te fakatotonu ʼa Sehova kia Moisese: “Fakamavae mai taku hahaʼi mai Esipito.” ʼI te temi ʼaia, neʼe ko te taʼu 80 ʼaia ʼo Moisese (Ekesote 3:10). Ko te ʼu tagata ʼaia pea mo ʼihi hahaʼi neʼe nātou lotolelei ʼi te temi ʼaē neʼe haga ai Sehova ʼo faka ʼui age kia nātou ke nātou fakahā tonatou ʼofa pea mo nātou foaki tonatou maʼuli kia te ia. Neʼe mole toe lotolotolua ia nātou ki te pāuʼi ʼa Sehova.

Kae ʼe feafeaʼi ʼi te temi nei? Ko Shizumu neʼe kua taʼu 78 tana putisi, ʼi te temi ʼaē neʼe kamata ai tana ako ʼo te Tohi-Tapu. Ko tona famili neʼe fakafeagai kia ia, neʼe mole nātou tali ke ina ako te Tohi-Tapu ʼi tona ʼapi totonu. Hili ʼaia te taʼu katoa, neʼe mahino ki te maʼua ʼo ia ke ina foaki tona maʼuli kia Sehova, pea neʼe papitema. Koteā te tupuʼaga ʼo tana fai te fetogi ʼaia? Neʼe fēnei tana tala: “Neʼe fualoa te kakaʼi ʼau e te lotu hāla, pea ku ʼau fia hoko atu taku maʼu te ʼu moʼoni mai ia Sehova ke heʼegata.”

‘ ʼE ina hāofaki koutou ʼi te temi nei’

Ko te temi kua nounou. Ko te ʼu maʼuli ʼo kau ai mo tokotou maʼuli, ʼe kua hoko ki ai te tuʼutāmaki. ʼE maʼuhiga ke koutou fakasiosio fakalelei te tonu ʼaē ʼo te foaki ʼo tokotou maʼuli kia Sehova pea mo fakahā foki ʼaki te papitema ʼaē ʼi te vai. Ko te ʼapositolo ko Petelo neʼe ina fakahā te maʼuhiga ʼo te fahaʼi ʼaia ʼo ʼui maʼana: “Ko te meʼa ʼaenī (...) ʼe ina hāofaki koutou ʼi te temi nei, ia te papitema.” ʼE ina fakamahino ʼi muli atu ko te papitema ʼe mole ko te “pulihi ʼo te ʼuli ʼo te kakano” (ko he tahi ia kua ina ʼosi fai te ʼu meʼa ʼe ʼaoga ʼi muʼa ʼo te papitema) “kae ko te kole ki te ʼAtua he leʼo ʼo loto ʼe lelei”. — 1 Petelo 3:21.

ʼI tana kua aʼu ki te ʼu fakatotonu ʼa Sehova, ko te tisipulo ʼaē kua papitema ʼe ina maʼu te leʼo ʼo loto ʼe lelei. ʼI tana hoko atu ʼo tana fai fakamalotoloto te gāue kia Sehova, ʼe ina maʼu te tokalelei ʼo tana fakakaukau pea mo te loto feʼauga (Sake 1:25). ʼO fakalaka ia meʼa fuli, ʼe feala hana tuku tana sio ki muʼa ʼaki te falala ki te ʼu tapuakina heʼegata mai ia Sehova ʼi te faʼahiga meʼa ʼo te tuʼu foʼou ka haʼu. ʼE fakaʼamu ke koutou maʼu te ʼu lelei ʼaia ʼi hakotou tali lelei ki te fehuʼi ʼaenī: ‘ ʼE feala koa ke ʼau papitema?’

[Paki ʼo te pasina 21]

Ko Samuele neʼe tauhi kia Sehova neʼe ko he tamasiʼi ia.

[Paki ʼo te pasina 22]

Ko Moisese neʼe taʼu 80 ʼi te haga ʼa Sehova ʼo fekauʼi ia ia.

[Paki ʼo te pasina 23]

ʼI te temi nei ko te hahaʼi tūpulaga feiā mo te hahaʼi matutuʼa ʼaē kua papitema ʼe feala hanatou fakaʼamu ki he ʼu tapuakina heʼegata ʼi te faʼahiga meʼa foʼou ʼo te tuʼu ʼa te ʼAtua.