Ko Sehova, Ia Ia ʼe Ina Fai Te ʼu Meʼa Fakaofoofo

“ ʼE ke lahi pea ʼe ke fai te ʼu meʼa fakaofoofo; ʼe ke ʼAtua, ia koe tokotahi.” — Pesalemo 86:10.

1, 2. a) Neʼe feafeaʼi te lave ki te malamanei te ʼu meʼa ʼaē neʼe fai e te tagata? b) ʼE feala koa ke tou maʼu ʼifea te falala ʼo ʼuhiga mo he ʼu meʼa ʼe lelei ake?

ʼE FEALA ki he tagata ʼi te temi nei ke ina fakalakilaki ia ia ʼo ʼuhiga mo tana ʼu meʼa fakaofoofo neʼe ina fai — ohage ko te ʼu masini hila, te fai felogoi, te viteo, te motokā, te vakalele, te ʼu olotinatea. Ko te ʼu meʼa ʼaia neʼe nātou faʼufaʼu te malamanei ko he ʼu kolo. Kae, ʼe ko he toe nofoʼaga! ʼO mole ʼui ke maʼu e te hahaʼi fuli te tokalelei, te manuʼia, te mahu kae ko te malamanei ʼe felāveʼi mo te ʼu tau, te ʼu fakapō, te ʼu agamālohi, te fakahehema, te ʼu mahaki pea mo te masiva. Pea ko te ʼu mahafu nukelea ʼaē ʼe tufa haʼele ʼi te kele katoa, logope tana kua fakasiʼisiʼi ʼe feala pe tana molehi te tagata ʼi te kele. Ko te kau fakatau ʼo te mate, pea mo te hahaʼi faʼu mahafu tau, ʼe hoko atu pe tanatou fai ʼo te ʼu gāue ʼaupito ʼi te kele. Ko te tagata maʼu meʼa ʼe fakatuputupu tana ʼu koloā, pea ki te tagata masiva ʼe ʼāsili masiva pe ia. ʼE feala koa ke maʼu ʼe he tahi hana puleʼaki?

² Ei! ʼE ʼi ai te Tagata ʼe ina fakapapau mai te hāofaki, “ko he tahi ʼe māʼoluga age ia ʼi ʼaē ʼe māʼoluga”, ko Sehova ʼAtua (Tagata Tānaki 5:8). Neʼe ina ta te tohi ʼaē ʼo te ʼu tohi ʼo te ʼu pesalemo, ke tou maʼu ai te fīmālie pea mo te ʼu tokoni poto lolotoga ʼo te ʼu temi mamahi. ʼE tou maʼu ʼi te ʼu pesalemo ʼaia ia te Pesalemo 86, ʼaē ʼe tuʼu ai te ʼu kupuʼi palalau ʼaenī: “Ko te faikole ʼa Tavite.” ʼE ko he faikole ʼe feala ke koutou tāʼofi maʼa koutou.

Mamahi kae agatonu

3. ʼI te ʼu temi ʼaenī, koteā te faʼifaʼitaki fakaloto mālohi ʼe tuku mai e Tavite kia tatou?

³ Neʼe tohi e Tavite te pesalemo ʼaia ʼi te temi mamahi. Ia ʼaho nei, ko tatou ʼaē ʼe maʼuʼuli lolotoga “ ʼo te ʼu ʼaho fakamuli” ʼo te tuʼu ʼa Satana, ko “te ʼu temi maʼuhiga ʼaupito mo faigataʼa” ʼaia ʼe felāveʼi mo te ʼu fihifihia feiā (2 Timoteo 3:1; vakaʼi ia Mateo 24:9-13). Ohage ko tatou, ko Tavite neʼe nofo tuʼania pea mo lotovaivai ʼuhi ko te ʼu fihifihia ʼaē neʼe tau mo ia. Kae neʼe mole ina fakagafua pe ʼi he temi ke fakagaʼegaʼe e te ʼu fakataga ʼaia tana falala agatonu ʼaē ki tona Tupuʼaga. Neʼe fēnei tana tagi: “Fakalelei oke tali, ê Sehova! Tali mai, koteʼuhi ʼe ʼau mamahi pea mo masiva. Ke ke taupau toku nefesi, koteʼuhi ʼe ʼau agatonu! Ke ke hāofaki tau kaugana — ko koe ko toku ʼAtua — ʼe ʼau falala kia te koe.” — Pesalemo 86:1, 2.

4. ʼE tonu koa ke feafeaʼi tatatou fakahā ʼo tatatou falala?

⁴ ʼE feala ke tou falala, ohage ko Tavite, ko te “ ʼAtua ʼo te fakafimālie katoa”, ko Sehova, ʼe fagono ki ʼatatou ʼu failoke agavaivai (2 Kolonito 1:3, 4). Ke tou falala katoa ki totatou ʼAtua, ʼe feala hatatou muliʼi te tokoni ʼaenī ʼa Tavite: “Tuku tau kavega kia Sehova, pea ko ia, ʼe ina lagolago anai koe. ʼE mole ina fakagafua anai ke tūkia te faitotonu.” — Pesalemo 55:22.

Felogoi lelei mo Sehova

5. a) Neʼe feafeaʼi te haga ʼa ʼihi fakaliliu lelei ʼo te Tohi-Tapu ʼo maumauʼi te ʼu hāla ʼa te kau sekelipa Sutea? b) ʼE feafeaʼi te haga ʼa te pesalemo 85 pea mo te pesalemo 86 ʼo fakavikiviki ia Sehova (Vakaʼi te kiʼi nota ki lalo ake)?

⁵ ʼI te Pesalemo 86, ʼe fakaʼaoga tuʼa 11 e Tavite te kupu ʼaē ko te “ê Sehova”. ʼE ko he faikole fakamalotoloto ʼa Tavite, pea mo he felogoi lelei mo Sehova! Ki muli age, ko te faʼahiga fakaʼaoga feiā ʼo te huafa ʼo te ʼAtua neʼe kovi ki te kau sekelipa Sutea, tāfito te kau Sopherim. Neʼe nātou maʼu te manavahe ʼo fakaʼaogaʼi kovi te huafa ʼaia. ʼI tanatou mole fia fakamoʼoni ʼaē ko te tagata neʼe fakatupu ʼo paki ki te ʼAtua, neʼe mole nātou tuku ki te ʼAtua te ʼu kalitate ʼaē ʼe toe ʼiloga pe ʼi te tagata. ʼE tuʼa 7 ʼi te ʼu tala ʼaia ʼe tuʼa 11, te huafa taputapu ʼi te koga faka hepeleo ʼo te pesalemo ʼaia, neʼe nātou fetogi te tite ʼaki te ʼAdhônây (ʼAliki) te huafa ʼaē ko YHWH (Sehova). ʼE feala ke tou fakafetaʼi ʼi te haga ʼaē ʼo te Tohi-Tapu Les Saintes Ecritures — Traduction du monde nouveau ʼo toe tohi te huafa taputapu ʼi te Folafola ʼa te ʼAtua feiā aipe mo ʼihi ʼatu ʼu fakaliliu ʼa te Tohi-Tapu. Ko tona fua, ko tatatou felogoi mo Sehova ʼe fakamatala fakaleleia.

6. ʼE feafeaʼi hatatou faʼahiga fakahā ko te huafa ʼo Sehova ʼe maʼuhiga kia tatou?

⁶ ʼE toe ʼui e te faikole ʼa Tavite fēnei: “Fakahā mai kia ʼau te ʼofa, ê Sehova, koteʼuhi ʼe ʼau pāuʼi atu kia te koe ʼi te ʼaho katoa. Fakafiafia te nefesi ʼo tau kaugana, koteʼuhi kia koe, ê Sehova, ʼe ʼau hiki atu toku nefesi.” (Pesalemo 86:3, 4). Koutou fakatokagaʼi ko Tavite ʼe haga pāuʼi kia Sehova “ ʼi te ʼaho katoa”. ʼIo, neʼe tau faikole ʼi te pōʼuli, ohage ko te temi ʼaē neʼe hola haʼele ai ʼi te toafa (Pesalemo 63:6, 7). ʼO toe feiā aipe mo te temi nei, ko te temi ʼaē ʼe nātou felāveʼi ai mo te fakaʼaliki peʼe ko ʼihi fihifihia fakapō ʼe nātou kalaga leʼo lahi aipe kia Sehova. Neʼe nātou puna’maʼuli foki ʼi ʼihi temi ʼi te ʼu ikuʼaga fakafiafiab. ʼE maʼuhiga te huafa ʼo Sehova kia tatou, ohage ko tona maʼuhiga ʼaē kia “Sesu Kilisito, ko te foha ʼo Tavite”, ʼi te temi ʼaē neʼe maʼuli ai ʼi te kele. Neʼe akoʼi e Sesu ki tana kau tisipulo ke nātou faikole ʼo tāpuhā te huafa ʼo Sehova pea ke nātou fakahā te ʼuhiga ʼo te huafa ʼaia. — Mateo 1:1; 6:9; Soane 17:6, 25, 26.

7. Koteā te ʼu faʼifaʼitaki ʼe tou maʼu ʼo ʼuhiga mo te fakahikihiki e Sehova te nefesi ʼo tana kau kaugana, pea ʼe feafeaʼi anai hatatou tali?

⁷ Neʼe momoli e Tavite tona nefesi, tona maʼuli katoa, kia Sehova. ʼE ina fakaloto mālohiʼi tatou ke tou faʼifaʼitakiʼi ia ia, ʼo ina ʼui fēnei ia Pesalemo 37:5: “Tuku tou ala kia Sehova, pea ke ke falala kia ia, pea ʼe gāue totonu anai pe ia ki ai.” ʼE mole ʼalu noa anai tatatou faikole kia Sehova ʼo ʼuhiga mo hana fakafiafia totatou nefesi. ʼE tokolahi te kau kaugana agatonu ʼa Sehova neʼe tuʼumaʼu aipe tanatou maʼu te fiafia lahi ʼi te gāue ʼa te ʼAtua — logope la te ʼu faigataʼaʼia, te ʼu fakataga, pea mo te ʼu mahaki. Ko ʼotatou ʼu tēhina ʼaē neʼe nātou mamahi ʼi te ʼu tau ʼi te ʼu koga meʼa ʼi Afelika, ohage ko Angola, Lipelia, Mozambique, pea mo Zaire, neʼe nātou fakamuʼamuʼa ʼi tonatou maʼuli tanatou gāue ʼaē kia Sehovac. Neʼe ina uga moʼoni nātou ke nātou fakafiafia ʼi te ʼu utu manavaʼofa fakalaumālie. Koia neʼe nātou faʼa kātaki aipe, ʼo toe feiā aipe kia tatou (Loma 5:3-5). Pea ʼi te temi ʼaē ʼe tou faʼa kātaki ai, ʼe tou ʼiloʼi papau te meʼa ʼaenī: “Ko te fakakikite ʼe kei tuku ia ki he temi fakakatofa, pea ʼe nofo gaʼagaʼaki ʼo aʼu ki te fakaʼosi (..) ʼE mole tauhala anai ia.” (Hapakuke 2:3). ʼAki he falala katoa kia Sehova, ʼe tonu ke tou nonofo “gaʼagaʼaki ʼo aʼu ki te fakaʼosi”.

Te ʼofa ʼo Sehova

8. Koteā te faʼahiga felogoi lelei ʼe feala ke tou maʼu mo Sehova, pea neʼe ina fakahā feafeaʼi tona finegaloʼofa?

⁸ Ki muli age ʼe fai e Tavite te faikole fakaloto māfana: “Ko koe, ê Sehova, ʼe ke agalelei pea mo fakamolemole gafua; pea mo mahu ʼi te loto ʼofa kia nātou fuli ʼaē ʼe nātou fetapā kia te koe. Fagono mai ki taku faikole, ê Sehova! Pea ke ke tokagaʼi te leʼo ʼo taku ʼu kolekole. ʼI te ʼaho ʼo toku mamahi ʼe ʼau fetapā anai kia te koe, koteʼuhi ʼe ke tali mai anai.” (Pesalemo 86:5-7). “Ê Sehova” — tuʼumaʼu pe ʼe tou fakafiafia ʼo ʼuhiga mo te talanoa ʼaia! ʼE feala ke tou taupau te felogoi ʼaia ʼaki te faikole. Neʼe faikole ia Tavite ʼi te tahi ʼaluʼaga, ʼo fēnei: “Ko te ʼu agahala ʼo toku temi tūpulaga pea mo taku ʼu fakafeagai, ʼaua naʼa ke manatuʼi! ʼO ʼuhiga mo tou loto ʼofa, ke ke manatuʼi ia te ʼau, ʼuhi ko tau agalelei, ê Sehova!” (Pesalemo 25:7). Ko Sehova ko te natula moʼoni ʼo te agalelei — ʼi tana foaki te totogi ko Sesu, ʼi tana fakahā te manavaʼofa ki te kau agahala fakahemala, pea mo tona loto ʼofa ki tana kau Fakamoʼoni agatonu pea mo ʼofaina. — Pesalemo 100:3-5; Malakia 3:10.

9. Koteā te fakapapau ʼaoga ʼe tonu ke tokagaʼi fakalelei e te kau agahala kua fakahemala?

⁹ ʼE tonu koa ke tou ʼiʼita ki ni ʼu hāla ʼāfea? ʼI te temi nei, kapau ʼe tou fakatotonu te ʼu ala ʼo totatou ʼu vaʼe, ʼe tou mālohi mokā ʼe tou manatuʼi te fakapapau ʼa Petelo ʼe haʼu anai te ʼu “temi fakamokomoko” mai ia Sehova ʼo ʼuhiga mo nātou ʼaē ʼe fakahemala (Gāue 3:19). Tou pipiki kia Sehova ʼo faikole ʼaki totatou totogi ko Sesu, neʼe ʼui fēnei: “Koutou ʼomai kia te ʼau, ia koutou fuli ʼaē ʼe kinakina pea mo mafasia, pea ʼe ʼau fakafimālie anai koutou. Koutou toʼo kia koutou taku ʼakau toho pea ke koutou ako ia te ʼau, heʼe ʼau agamālū pea mo loto agavaivai, pea ʼe koutou maʼu anai he fīmālie ki ʼokotou nefesi.” Kapau ʼe faikole te kau Fakamoʼoni agatonu kia Sehova ʼaki te huafa maʼuhiga ʼo Sesu, ʼe nātou maʼu leva te fakafimālie. — Mateo 11:28, 29; Soane 15:16.

10. ʼE feafeaʼi te faka maʼuhigaʼi e te tohi ʼo te Pesalemo te finegaloʼofa ʼo Sehova?

¹⁰ ʼE tuʼa teau tupu te talanoa ʼa te tohi ʼo te ʼu Pesalemo ki te “loto ʼofa” ʼo Sehova. ʼE ko he loto ʼofa feiā ʼe mahu moʼoni ia! ʼE fakahā e te ʼu vaega tahi ki te fā ʼo te Pesalemo 118 ki te ʼu kaugana ʼa te ʼAtua ke nātou fakafetaʼi kia Sehova, ʼi tana liuga fā te talanoa ʼaē, “koteʼuhi ko tona loto ʼofa ʼe mole ʼiloʼi te ʼu temi ʼe gata ai”. ʼE tuʼa 26 te fakahā e te Pesalemo 136 te kalitate maʼuhiga ʼaē ko te “loto ʼofa”. Kapau ʼe tou hēhē ʼi he faʼahiga ʼaluʼaga — ohage ko te ʼui ʼaenī ia Sake 3:2, “Ko tatou fuli, ʼe tou tautau tūkia pe” — ʼe tonu ke tou foimo kumi te fakamolemole ʼa Sehova, ʼo falala ki tana manavaʼofa pea mo tona loto ʼofa. Ko tona loto ʼofa ʼe ko he fakahā ʼaia ʼo tona ʼofa agatonu kia tatou. Kapau ʼe tou haga fai fakahagatonu te finegalo ʼo te ʼAtua, ʼe ina fakahā anai tona ʼofa agatonu ʼo ina fakamālohiʼi tatou ke tou faʼa tekeʼi te ʼahiʼahi fuli. — 1 Kolonito 10:13.

11. ʼE feafeaʼi koa he faʼahiga gāue ʼa he ʼu tagata ʼāfea moʼo tokoniʼi he tahi ʼe ina maʼu te ʼu manatu ʼe fakafeagai kia ia totonu?

¹¹ ʼE lagi ʼe feala pe ke hoko he ʼu ʼaluʼaga ʼe tou tūkia ai ʼi niʼihi. ʼI te fakaʼaliki ʼo ʼihi ʼi tanatou kei veliveli, neʼe nātou maʼu ai leva te ʼu manatu ʼe fakafeagai kia nātou feiā aipe mo te manatu ʼaē ʼe mole honatou ʼaoga. ʼE feala kia ia ke ina fetapā kia Sehova, ʼo falala ko tana kole ʼe logoʼi e Sehova (Pesalemo 55:16, 17). ʼE feala ke tokaga he tagata ʼāfea ʼaki he loto ʼofa ʼo tokoniʼi he tahi ʼe felāveʼi mo he meʼa feiā ke ina ʼiloʼi ʼe mole ko hana hāla ʼa ia. Pea tahi foki ʼaē, ko he tau telefoni ʼa te tagata ʼāfea ʼaia, ʼe toe feala pe ke tokoni ki te tagata peʼe ko te fafine ke ina ‘fua tana kavega’. — Kalate 6:2, 5.

12. Neʼe feafeaʼi te tuputupu ʼo te ʼu tuʼania, pea ʼe feafeaʼi hatatou tauʼi ʼo te ʼu meʼa ʼaia?

¹² ʼE lahi age ʼihi ʼu ʼaluʼaga fakatupu mamahi ʼe tauʼi e te hahaʼi ʼa Sehova ʼi te temi nei. ʼO kamata atu ʼi te ʼUluaki Tau faka malamanei ʼi te taʼu 1914, ko te ʼu mamahi maʼuhiga neʼe kamata lave ki te kele. Ohage ko tona fakakikite e Sesu, ko te ʼu meʼa fuli ʼaia “ko te kamataʼaga ʼo te ʼu nunuʼa ʼo te tuʼania”. Ko te ʼu tuʼania ʼe ʼāsili ʼosi ʼi tatatou fakaōvi ki “te fakaʼosi ʼo te ʼu faʼahiga meʼa ʼo te tuʼu ʼaenī”. (Mateo 24:3, 8.) Ko te Tevolo ʼaē “kua nounou tona temi” ʼe feʼaluʼaki ʼo aʼu ki tona temi faka ʼauha (Fakahā 12:12). “Ohage ko he laione ʼe gugulu” ʼe feʼaluʼaki ke ina kai he tahi, ko te Fili lahi ʼaia ʼe ina fakaʼaoga te ʼu meʼa fakakākā moʼo fakamavaevae ia tatou ʼi te faga ōvi ʼa te ʼAtua pea mo faka ʼauha tatou (1 Petelo 5:8). Kae ʼe mole mālo anai ia! Koteʼuhi ohage pe ko Tavite, ʼe tou tuku tatatou falala katoa ki totatou ʼAtua e tahi, ko Sehova.

13. ʼE feala ke maʼu feafeaʼi e te ʼu mātuʼa pea mo tanatou fānau te finegaloʼofa ʼo Sehova?

¹³ ʼE mahalo pe, neʼe fakahoko e Tavite ki te loto ʼo tona foha ko Salomone te maʼuhiga ʼaē ʼo te falala ki te ʼofa ʼa Sehova. Koia, neʼe feala pe ke akoʼi e Salomone tona foha ʼo fēnei: “Tuku tau falala kia Sehova mo tou loto katoa pea mo ʼaua naʼa ke falala ki tou ʼatamai ʼāteaina. ʼI tou ʼu ala fuli tokagaʼi ia ia, pea ko ia, ʼe ina fakatonutonu anai tou ʼu ala. ʼAua naʼa ke fia poto kia koe totonu pe. Manavasiʼi kia Sehova pea ke ke lituʼa mai te kovi.” (Tāʼaga Lea 3:5-7). ʼO toe feiā aipe mo te temi nei, ʼe tonu ke akoʼi e te ʼu mātuʼa ki tanatou ʼu fānau pe ʼe feafeaʼi te falala kia Sehova ʼaki te faikole pea mo te tauʼi ʼaē ʼo te ʼu fakafeagai fakamālohi ʼa te mālama — ohage ko te fakahāla ʼi te faleako pea mo te ʼu fakahāla ke fai te ʼu aga heʼeʼaoga. Ko te maʼuliʼi ʼo te moʼoni mo takotou ʼu fānau ʼi te ʼaho fuli pe ʼe feala ke fakaʼiloga ʼi tonatou ʼu loto he ʼofa moʼoni kia Sehova feiā aipe mo he falala kia te ia. — Teutalonome 6:4-9; 11:18, 19.

Te ʼu gāue māʼoluga ʼa Sehova

14, 15. Koteā te ʼu faʼahiga gāue ʼa Sehova ʼe mole hona fakatatau?

¹⁴ ʼAki te tui moʼoni, ʼe ʼui e Tavite fēnei: “ ʼE mole he tahi ʼi te ʼu ʼatua ʼe tatau mo koe, ê Sehova, ʼe mole he ʼu gāue ʼe hage ko tau ʼu gāue.” (Pesalemo 86:8). Ko te ʼu gāue ʼa Sehova ʼe lahi age, ʼe māʼoluga age, ʼe fakaʼalikisia, ʼi he meʼa ʼe feala ke fakakaukau kiai te tagata. Ohage ko tona fakahā e te poto ʼo te tagata ʼo te temi nei, ko te ʼatulaulau ʼaē neʼe fakatupu — tona laulahi, te felogoi ʼo te ʼu meʼa fuli, tana fakaofoofo — ʼe lahi age tona ʼuhiga fakaofoofo ʼi he meʼa neʼe mamata kiai ia Tavite. Koia neʼe ina ʼui ai te meʼa ʼaenī: “ ʼE kalagaʼi e te lagi te kolōlia ʼo te ʼAtua; pea ko te laulahi ʼe ina tala te gāue ʼo tona ʼu nima.” — Pesalemo 19:1.

¹⁵ Neʼe fakamatalatala taulekaleka te ʼu gāue ʼa Sehova feiā aipe mo tana faʼahiga fai ʼo tana ʼu gāue ʼaia pea mo teuteuʼi te kele ke ina foaki mai te ʼaho mo te po, te ʼu faʼahiga temi kehekehe ʼo te taʼu, te temi to pea mo te temi taʼukai, feiā aipe mo te ʼu lelei ʼaupito ʼe maʼu e te tagata ki ʼamuli. Pea ʼe fakaofoofo te faʼu ʼaē ʼo tatou totonu feiā aipe mo te ʼu meʼa ʼaē ʼe tou maʼu, koia ʼe feala hatatou fakafiafia ki te ʼu gāue ʼaē ʼa Sehova ʼi ʼo tatou ʼu tafa! — Senesi 2:7-9; 8:22; Pesalemo 139:14.

16. ʼE fakahā feafeaʼi e Sehova te makehe ʼo tona finegaloʼofa, pea koteā te ʼu gāue ʼe tupu mai ai ʼe mole honatou fakatatau?

¹⁶ ʼI te ʼosi talagataʼa ʼo ʼatatou ʼuluaki mātuʼa ki te ʼAtua, neʼe tupu ai leva te ʼu tuʼania ʼi te kele ʼo aʼu mai kia ʼaho nei, ʼaki te ʼofa ʼo Sehova neʼe ina fakatuʼutuʼu te gāue fakaofoofo ʼi tana fekauʼi mai tona ʼAlo ki te kele moʼo faka mafola te Puleʼaga ʼo te ʼAtua pea ke mate ko he totogi maʼa te malamanei. Pea ʼe ko he ʼu meʼa fakaofoofo foki! Pea neʼe haga ia Sehova ʼo toe fakatuʼuake mai te mate ia Kilisito ke liliu ʼo Hau (Mateo 20:28; Gāue 2:32, 34). Neʼe toe fili e te ʼAtua ʼi te ʼu hahaʼi agatonu “te fakatupu foʼou” ʼe nātou pule anai mo Kilisito ohage ko he “lagi foʼou” finegaloʼofa ki he “kele foʼou” ʼe kau ai anai te toko miliale ʼe toe fakatuʼuake mai te mate (2 Kolonito 5:17; Fakahā 21:1, 5-7; 1 Kolonito 15:22-26). Koia ko te ʼu gāue ʼa Sehova ʼe hoko atu anai ki tona ikuʼaga faka kolōlia! ʼIo, ʼe feala ke tou ʼui fēnei: “Ê Sehova, (...) ʼe lahi ʼaupito, tou finegaloʼofa, ʼaē neʼe ke taupau fakalelei maʼa nātou ʼe manavasiʼi kia te koe!” — Pesalemo 31:17-19.

17. ʼO ʼuhiga mo te ʼu gāue ʼa Sehova, ʼe feafeaʼi te fakahoko ʼi te temi nei ʼo te Pesalemo 86:9?

¹⁷ Ko te ʼu gāue ʼa Sehova ʼi te temi nei ʼe pipiki ki te fakamatala ʼa Tavite ia Pesalemo 86:9: “Ko te ʼu puleʼaga fuli neʼe ke fai ʼe ʼomai anai, pea ʼe nātou tulolo anai ʼi ʼou muʼa, ê Sehova, pea mo nātou tuku anai te kolōlia ki tou huafa.” ʼI te ʼosi pāuʼi ʼi te lotolotoiga ʼo te malamanei te toe ʼo te kau kilisitiano fakanofo ʼo tana fakatupu foʼou, ko te “kiʼi faga ōvi” ʼaē ʼe nātou kau ki te Puleʼaga, neʼe tokaga ia Sehova ʼo fakatahiʼi mai te lotolotoiga ʼo te ʼu “puleʼaga fuli” “te toe hahaʼi tokolahi” ko te “tahi ʼu ōvi”, ko te toko miliona ʼe nātou haga tui ki te taʼataʼa neʼe liligi e Sesu. Neʼe ina laga ia nātou ʼaia ko te kautahi mālohi, ko te sosiete faka malamanei ʼaia e tahi ʼo te ʼu kaumeʼa ʼo te tokalelei ʼi te kele ia ʼaho nei. ʼI tanatou mamata ki te meʼa ʼaia, ʼe tulolo te kau ʼaselo ia muʼa ʼo Sehova, ʼo nātou ʼui fēnei: “Ko te tapuakina, pea mo te kolōlia, pea mo te poto, pea mo te ʼu fakafetaʼi, pea mo te fakaʼapaʼapa, pea mo te pule, pea mo te mālohi ʼe foaki ki totatou ʼAtua ki he temi heʼegata.” ʼE toe fakavikiviki foki e te toe hahaʼi tokolahi te huafa ʼo Sehova, ʼo nātou gāue kia ia “ ʼi te ʼaho mo te po” ʼaki te falala ʼaē ʼe nātou maʼuʼuli anai ʼi te fakaʼosi ʼo te tuʼu ʼaenī pea mo maʼuʼu’li heʼegata ʼi te palatiso ʼi te kele. — Luka 12:32; Fakahā 7:9-17; Soane 10:16.

Te ʼaliʼaliki ʼo Sehova

18. Neʼe fakahā feafeaʼi e Sehova ko ia ʼe ‘ ʼAtua tokotahi’?

¹⁸ ʼE fakahā e Tavite ʼi te vahe ʼe hoa mai te tuʼulaga ʼAtua ʼo Sehova, ʼo ina ʼui fēnei: “ ʼE ke lahi pea ʼe ke fai te ʼu meʼa fakaofoofo; ʼe ke ʼAtua, ia koe tokotahi.” (Pesalemo 86:10). ʼI muʼa atu, neʼe fakahā e Sehova ko ia ‘ko te ʼAtua e tahi’. Ko te Falaone agamālohi ʼo Esipito neʼe ina fakafihiʼi ia Moisese, ʼo ui maʼana: “Ko ai ia Sehova ke ʼau fakalogo ki tona leʼo ʼo fakamavae ia Iselaele? ʼE mole ʼau ʼiloʼi ia Sehova.” Kae neʼe mole tuai tana mahino ki te lahi ʼaē ʼo Sehova. Neʼe fakalainoa e te ʼAtua Māfimāfi te ʼu ʼatua ʼo Esipito pea mo tana kau pelepitelo gāue fakatemonio ʼi tana tuku te ʼu tautea fakamataku, ohage ko tana matehi te ʼu ʼuluaki foha ʼa te kau Esipito, pea mo faka ʼauha ia Falaone pea mo tana kautau ʼi te tai Kula. ʼIo, ʼe mole he tahi ʼe tatau mo Sehova ʼi te ʼu ʼatua! — Ekesote 5:2; 15:11, 12.

19, 20. a) Ko ʼafea ʼaē ka hā lelei anai te hiva ʼaē ia Fakahā 15:3, 4? b) ʼE feafeaʼi hatatou kau ʼi te temi nei ki te ʼu gāue ʼa Sehova?

¹⁹ ʼI tona ʼuhiga ʼAtua tokotahi, neʼe haga fai aipe e Sehova te ʼu meʼa fakaofoofo ʼi tana fakatuʼutuʼu ke ina hāofaki tana kau ʼatolasio fakalogo ʼi te Esipito fakatā ʼo te temi nei — ko te mālama ʼa Satana. Neʼe ina tala tana ʼu fakamāu fakaʼatua ʼi te kele katoa ohage ko he fakamoʼoni ʼaki te gāue faka mafola lahi ʼi te hisitolia katoa, ʼo ina fakahoko te lea faka polofeta ʼa Sesu ia Mateo 24:14. Kua vave te temi “fakaʼosi”, mokā fakahā anai e Sehova tona ʼaliʼaliki ʼi te potu fuli pe ʼo ina molehi te agakovi fuli ʼi te kele (Pesalemo 145:20). Pea ko te hiva ʼa Moisese pea mo te hiva ʼa te Akeno ʼe aʼu anai ʼo leʼo lahi: “Lahi pea mo fakaofoofo tau ʼu gāue, Sehova ʼAtua, Māfimāfi. Totonu pea mo moʼoni tou ʼu ala, Hau ʼo te heʼegata. Ko ai anai he tahi ʼe mole manavasiʼi kia te koe, pea ʼe mole ina faka kolōlia tou huafa? heʼe ko koe pe ʼe ke agatonu tokotahi.” — Fakahā 15:3, 4.

²⁰ ʼE tonu ke tou faiga fakamalotoloto ʼo tala ki niʼihi te ʼu fakatuʼutuʼu fakaofoofo ʼa te ʼAtua (Vakaʼi ia Gāue 2:11). Ko Sehova ʼe ina haga aipe ʼo fai he ʼu meʼa ʼe lahi pea mo fakaofoofo ʼi totatou temi pea mo he temi ki muli age, ohage ko tona fakamatala e te alatike ka hoa mai anai.

[Nota ʼi te lalo pasina]

ʼE kei koutou manatuʼi koa?

◻ He koʼe ʼe ʼaoga ke tou fakaʼaoga maʼa tatou te faikole ʼaē ia Pesalemo 86?

◻ ʼE feafeaʼi hatatou maʼu he felogoi lelei mo Sehova?

◻ ʼE fakahā feafeaʼi e Sehova tona finegaloʼofa kia tatou?

◻ Koteā te ʼu faʼahiga gāue ʼa Sehova ʼe mole hona fakatatau?

◻ ʼI te ʼaluʼaga ʼo tona lahi, ʼe feafeaʼi te ‘ ʼAtua tokotahi’ ʼo Sehova?

[Paki ʼo te pasina 10]

ʼI te kua vave pe ʼo te tuʼu ʼo te “kele foʼou”, ko te ʼu gāue fakaofoofo ʼa Sehova ʼe nātou fakamoʼoni aipe ki tona kolōlia pea mo tona finegaloʼofa.