Koteā Te Tupuʼaga ʼo Te Kaugana Kia Sehova?

“KO TE ʼaho ʼo Sehova kua ōvi mai! Ko te ‘toe mamahi lahi’ kua ōvi mai, pea ʼe mole koutou maʼuʼuli anai mo kapau ʼe mole koutou kaugana ki te ʼAtua.” Kapau ʼe talanoa feiā atu he tahi kia koutou, koteā te meʼa ʼe koutou fai anai? — Sofonia 2:2, 3; Mateo 24:21.

ʼIo, ʼe tonu ke tou taupau ʼi totatou ʼatamai te ʼaho ʼo Sehova, pea ke tou maʼuʼuli ʼi te toe mamahi lahi fakamataku ʼe fakalogo ki te tauhi agatonu ki te ʼAtua. Kae ko te ʼu meʼa ʼaia ʼe tonu koa ko te ʼu meʼa tāfito ʼo te tupuʼaga ʼaē ʼo tatatou foaki he tauhi taputapu kia Sehova ʼAtua? He koʼe koa ʼe koutou kaugana kia Sehova?

ʼE ʼaoga he manatu ʼe tāu

Kapau ʼe mole kaugana he tahi ki te ʼAtua ʼaki he manatu ʼe lelei, ʼe feala ke ina tuku tana kaugana ki te ʼAtua mo kapau ko tana ʼu fakaʼamu ʼe mole hoko ʼi te temi ʼaē neʼe ina ʼamanaki kiai. Ohage la, ko ʼihi neʼe nātou fakaʼamu ki te toe liliu mai ʼa Sesu Kilisito ʼi te taʼu 1843 peʼe ko te taʼu 1844, ko te ʼu taʼu kua hili atu kae neʼe mole hoko tanatou ʼu fakaʼamu. ʼE maʼuhiga ki te faʼahi ʼaia te meʼa neʼe tohi e George Storrs, ko te tagata faitohi ʼo te Bible Examiner pea ki muli age neʼe ko he kaumeʼa ʼo Charles Taze Russell, ko te ʼuluaki pelesitā ʼo te Sosiete Watch Tower. ʼI te Bible Examiner ʼo te māhina ʼo sepetepeli 1846, neʼe tohi e Storrs ʼo fēnei:

“Ko te maʼua ʼaē ko te kaugana ki te ʼAtua ʼe maʼuhiga age ia ʼi te ʼaho. (...) Ko te meʼa ʼe hoko anai mo kapau ʼe fakalaka te ʼu taʼu 1846 pea mo 1847 ohage ko te meʼa ʼe tonu ke hoko anai, kae neʼe mole hoko te fakamoʼoni ʼaē ʼo te haʼu ʼa Sesu, ʼe kovi anai ia. Ko te meʼa ʼaē neʼe hoko ʼe fakamoʼoni ki te faʼahi ʼaia — ʼe ʼau talanoa ki te meʼa ʼaē neʼe hoko ʼi te ʼu taʼu 1843 pea mo 1844. ʼE ʼifea koa ʼi te temi nei ia te tokolahi ʼaē neʼe nātou faka mafola ʼe nātou ‘fia kaugana ki te ʼAtua’ ohage ko te meʼa neʼe tonu ke nātou fai ʼaki te kalaga ʼaia ko te temi ʼo te lua haʼu ʼo te ʼAliki? Pea ko te logo ʼe ina ʼui — ʼIFEA!!! Ko te tokotahi pe ʼi te toko hogofulu ʼe maʼu kei haga haʼele ʼi te tui koteʼuhi moʼo lagolago tanatou gāue faka kilisitiano. Koteā te tupuʼaga ʼo te mole kei haʼele ʼo nātou ʼaē? Neʼe nātou faiga ki te faʼahi ʼaia ʼaki te ʼu manatu ʼe mole lelei. Ko tanatou manatu pe kia nātou ʼaē neʼe nātou tokagaʼi ai te faʼahi ʼaia pea mo fakamālohiʼi nātou. ʼE nātou hage ko te tagata agahala ʼaē ʼe manatu ʼe ōvi ki te mate ʼi tona palepale mahaki peʼe ko he afā ʼi te tai. Kapau ʼe tonu ke mate, ʼe liliu anai ia ko te kilisitiano. Kapau ʼe ina ʼiloʼi ʼe mole tuʼutāmaki, ʼe mole feiā anai tana manatu.”

Ke tou kaugana ʼaki he ʼu manatu ʼe lelei

Ko te manatu pe kia kita pea mo te mataku ki te faka ʼauha ʼe feala ke uga ʼihi ke mole nātou fai mo he loto katoa te finegalo ʼo Sehova. ʼE feala pe ki ʼihi ʼi tanatou holi ki te maʼuli ʼi te palatiso ke nātou kaugana anai ki te ʼAtua ʼaki pe te manatu ʼaia. Kae, kapau ko te hahaʼi ʼe nātou fakamuʼamuʼa te ʼu taʼi manatu ʼaia ko te ʼaho ʼo Sehova pea mo te toe mamahi lahi ʼe mole heʼeki ōvi mai ia, ʼe feala ke mole nātou kaugana ki te ʼAtua ʼaki he lotomālohi.

ʼIo, ʼe mole ko he meʼa ʼe kovi, ia te fakafiafia ʼi te ʼu fakapapau ʼa te ʼAtua pea mo te ʼu tapuakina neʼe fakakikite. ʼE ina loto ke tou fakafiafia ʼo ʼuhiga mo te ʼu ʼamanaki ʼaia neʼe ina fai fakatomuʼa maʼa tatou ʼaē ko te kau tisipulo ʼo tona ʼAlo, ko Sesu Kilisito. Neʼe ʼui e te ʼapositolo ko Paulo, ʼo fēnei: “Koutou fiafia ʼi te ʼamanaki. Koutou faʼa kātaki ʼi te mamahi. Koutou kātaki tuʼumaʼu ʼi te faikole.” (Loma 12:12). Fakatahiʼi te fiafia ki te faikole, “ko te fiafia ʼo Sehova” ʼe ina tokoniʼi tatou ke tou faʼa kātakiʼi te ʼu fakataga pea mo atalitali fakalelei ke hoko te ʼu fakapapau ʼa te ʼAtua (Nehemia 8:10). Lolotoga ʼo te temi ʼaia, ʼe lahi te ʼu tupuʼaga ke tou kaugana ai kia Sehova. Koteā he ʼu faʼahiga tupuʼaga ʼi te ʼu tupuʼaga ʼaia?

Ko te maʼua pea mo te pilivilesio

Ko Sehova ʼi tona ʼuhiga Tuʼi ʼo te ʼatulaulau ʼe tāu mo ia pea ʼe ina loto ke tou pipiki ʼāteaina kia te ia (Ekesote 20:4, 5). Koia ko te kilisitiano fuli ʼe maʼuhiga pe kia ia tona maʼua ʼaē ki te ʼAtua tatau aipe mokā ʼe kamata te toe mamahi lahi ʼapogipogi, peʼe ko te taʼu ka haʼu, peʼe ki muli age. ʼE maʼua ke kaugana kia Sehova ʼo mole fai ʼaki he manatu pe kia kita koteʼuhi ʼe ʼofa ia ki te ʼAtua ʼaki tona loto katoa, pea mo tona nefesi, pea mo tona ʼatamai, pea mo tona mālohi (Maleko 12:30). Ko ʼihi kilisitiano ʼi te temi muʼa neʼe nātou manatu ko te ʼaho ʼo Sehova ʼe fakamataku, kae ko ʼanatou ʼamanaki neʼe mole hoko, pea kua mamate ia nātou ʼaē neʼe mole heʼeki nātou sio ki te meʼa ʼaia (1 Tesalonika 5:1-5; 2 Tesalonika 2:1-5). Kae kapau neʼe nātou nofo agatonu ʼo aʼu ki tonatou mamate, ko te kau tisipulo fakanofo ʼaia ʼa Kilisito ʼe nātou maʼu tonatou fakapale ʼi te toe fakatuʼuake mai te mate ʼo maʼuʼuli ʼi selo. — Fakahā 2:10.

Ko te kau Fakamoʼoni ʼa Sehova ʼaē kua papitema ʼe tonu ke nātou kaugana agatonu kia te ia koteʼuhi neʼe nātou fili ʼāteaina pe ke nātou fai tona finegalo. Koutou fakakaukau age muʼa! Ohage ko te ʼu ʼaselo maʼoniʼoni, ʼe feala ke tou fai te finegalo ʼo te Tuʼi ʼo te ʼatulaulau (Pesalemo 103:20, 21). ʼI te faka maʼuhiga ʼaupito e Sesu te taʼi pilivilesio ʼaia neʼe ina ʼui fēnei: “Ko taku meʼa kai ko te fai ʼo te finegalo ʼo ia ʼaē neʼe ina fekauʼi mai ʼau pea mo fakaʼosi tana gāue.” (Soane 4:34). Kapau ʼe tou maʼu te manatu ʼaia, ʼe tou tala mālohi anai te ʼu fakavikiviki ʼo Sehova pea mo fakahā ki ʼihi tana ʼu fakatuʼutuʼu, ʼaē ʼe fakahā ʼi te Tohi-Tapu. ʼI te faʼahi ʼaia, ʼe tou toe maʼu te pilivilesio ʼaē ko te tokoniʼi fakalaumālie ʼo niʼihi. Pea ʼe mahino ia, ko te fai ʼo te finegalo ʼo te ʼAtua ʼaki te loto ʼofa kia te ia ʼe ko he pilivilesio taulekaleka, ʼo mole tou tuʼania pe ko ʼafea ʼaē ʼe kamata ai te ʼaho ʼo Sehova.

Ko te fakafetaʼi ʼe pipiki ki te fia gāue

Ko te loto fakafetaʼi ki te ʼofa ʼo te ʼAtua ʼi tana foaki mai tona ʼAlo ko te sakilifisio faitotogi, ʼe tonu ke ina uga tatou ke tou kaugana kia Sehova. ʼI muʼa atu neʼe tou mamaʼo ia Sehova ʼAtua ʼuhi ko te agahala. Kae, neʼe ʼui e Sesu, ʼo fēnei: “Ko te ʼAtua ʼi tona ʼofa lahi ʼaē ki te malamanei neʼe ina foaki ai tona ʼAlo ʼulu tokotahi, koteʼuhi ko ʼaē ʼe haga tui kia te ia ke ʼaua naʼa faka ʼauha, kae ke ina maʼu te maʼuli heʼegata.” (Soane 3:16). Neʼe fai e Sehova te fakatuʼutuʼu ki te faʼahi ʼaia, ohage ko tona tohi e Paulo: “ ʼE fakahā e te ʼAtua kia tatou tona ʼofa totonu ʼo ia ʼi te faʼahi ʼaenī ko Kilisito neʼe puluhia ia maʼa tatou ka kei tou agahala.” (Loma 5:8). Ko te fakafetaʼi ki te fakahā ʼofa ʼaia ʼo te ʼAtua ʼe tonu ke ina uga tatou ke tou kaugana kia te ia ʼaki te loto katoa.

ʼI tatatou leleiʼia te ʼu meʼa ʼofa fakalaumālie pea mo fakasino ʼaē ʼe foaki mai e Sehova, ʼe ko he tahi ʼaenā tupuʼaga ke tou kaugana agatonu kia te ia. Ko te Folafola ʼa te ʼAtua ʼe ko he taki moʼoni — ko he mālama ki totatou ala. Ko te ʼu tohi ʼaē ʼe tufa mai “e te tagata kaugana agatonu mo poto” ʼe nātou tokoni kia tatou ke tou mulimuli ki te finegalo ʼo te ʼAtua (Mateo 24:45-47; Pesalemo 119:105). Pea ʼaki tatatou ʼuluaki kumi muʼa te Puleʼaga, ko Sehova ʼe ina toe foaki mai kia tatou te ʼu meʼa fakasino (Mateo 6:25-34). ʼE koutou lolotoga fakahā koa tokotou loto fakafetaʼi ʼo ʼuhiga mo te ʼu meʼa ʼaia?

Ko te fakafetaʼi ki te haga ʼa te ʼAtua ʼo faka ʼāteaina tatou mai te lotu hāla ʼe ko he tahi ʼaenā tupuʼaga ke tou kaugana agatonu kia Sehova. Ko te paomutu ʼaē ko te Papiloni Lahi “ ʼe heka ʼi te ʼu fuga vai”, ʼaē ʼe fakatā “ko te hahaʼi pea mo te tokolahi pea mo te ʼu puleʼaga pea mo te ʼu lea”. (Fakahā 17:1, 15.) Kae, ʼe mole heka ia ki te ʼu kaugana ʼa Sehova, ohage ke ina fakahalaʼi ʼi te faʼahi ʼaē ʼo tana ʼu akonaki faka lotu peʼe puleʼi nātou. Ohage la, ʼe nātou fakafeagai ki te akonaki hāla ʼaē ʼo ʼuhiga mo te nefesi ʼo te tagata ʼe tuputupua. ʼE nātou ʼiloʼi ko te tagata neʼe fakatupu “ko te nefesi maʼuli”, ko te kau mate “ ʼe mole nātou ʼiloʼi he meʼa”, pea ʼe ʼi ai anai te toe fakatuʼuake (Senesi 2:7; Tagata Tānaki 9:5, 10; Gāue 24:15). Koia ʼe mole nātou matataku pea ʼe mole nātou atolasioʼi te kau mate. Ko tokotou loto fakafetaʼi ki te taʼi ʼāteaina fakalaumālie ʼaia ʼe ina fai koa ke koutou fakafeagai ki te ʼapositasia pea ke koutou pipiki maʼu ki te tauhi maʼa ʼo Sehova? — Soane 8:32.

ʼAki tatatou leleiʼia te tokoni ʼa Sehova ʼi te ʼaho fuli, ʼe tonu ko he meʼa ke fakamālohiʼi tatatou fia kaugana agatonu kia te ia. Neʼe tala e te tagata faitohi ʼo te pesalemo, ʼo fēnei: “Fakafetaʼi kia Sehova ʼaē ʼe ina ʼamo te kavega maʼa tatou ʼi te ʼaho fuli.” (Pesalemo 68:19). Pea tahi ʼaē, neʼe ʼui e te tagata ʼo te pesalemo, ʼo fēnei: “Ka līaki anai ʼau e taku tāmai pea mo taku faʼe, ko Sehova ʼe ina tali anai ʼau.” (Pesalemo 27:10). ʼIo, ko he tahi ʼe kaugana agatonu kia Sehova ʼe feala ke ina hili tana kavega ki te ʼAtua, ohage ko he ʼu faigataʼaʼia pea mo he ʼu fakataga. ʼE tou lolotoga fakahā koa tatatou leleiʼia te tokoni moʼoni ʼa Sehova ʼaki hatatou kaugana agatonu kia te ia? — Pesalemo 145:14.

Tou fakavikiviki kia Sehova pea mo tona ʼuhiga hau

Ko he fia faka kolōliaʼi te huafa ʼo Sehova, ʼe tonu ke ina uga tatou ke tou kaugana kia te ia. ʼE talanoa ki te kau ʼaselo ʼe nātou faka kolōlia ki te ʼAtua ʼaki te ʼu palalau ʼaenī: “ ʼE tāu mo koe, Sehova ʼio tomatou ʼAtua, ke ke maʼu te kolōlia, pea mo te fakaʼapaʼapa, pea mo te mālohi, he ko koe ʼaē neʼe ke fakatupu te meʼa fuli, pea ʼaki tou finegalo neʼe maʼuli te ʼu meʼa ʼaia pea mo nātou tupu.” (Fakahā 4:11). Neʼe faka kolōliaʼi e Tavite te ʼAtua ʼaki te hiva ʼaenī: “ ʼE ke maʼu, ê Sehova, te lahi, pea mo te mālohi, pea mo te matalelei, pea mo te takimuʼa, pea mo te ʼalikiʼaga (...) ʼE ke maʼu te puleʼaga, ê Sehova (...) Ko te koloā pea mo te kolōlia ʼe hifo mai ia koe, pea ʼe ke pule ki te ʼu meʼa fuli pe (...) Pea ʼi te temi nei, ê ʼAtua, ʼe mātou fakafetaʼi kia te koe pea mo mātou fakavikiviki ki tou huafa taulekaleka.” (1 Fakamatala 29:10-13). ʼI totatou ʼuhiga kaugana kia Sehova, ʼe mole tou logoʼi koa ʼe māʼua ke tou faka kolōliaʼi ia ia ʼaki ʼotatou ʼu gutu feiā aipe ki ʼatatou ʼu aga, ʼe tou fakatalitali ki te fakahoko ʼo tana ʼu fakapapau? — 1 Kolonito 10:31.

Ko te holi mālohi ke palalau ʼo ʼuhiga mo te Puleʼaga ʼo te ʼAtua ʼe ko he tahi meʼa maʼuhiga ke tou kaugana kia Sehova. Ko te tupuʼaga ʼaoga ʼaia ʼe ʼiloga lelei ʼi te ʼu palalau ʼo te pesalemo ʼaenī: “Ko tau ʼu gāue fuli ʼe nātou vikiʼi anai koe, ê Sehova, pea ko te kau agatonu ʼe nātou fakafetaʼi anai kia te koe. Pea ʼe nātou fakahā anai te kolōlia ʼo tou ʼafioʼaga, pea ʼe nātou talanoa anai ki tou mālohi, moʼo fakahā ki te ʼu foha ʼo te ʼu tagata tana ʼu aga mālohi pea mo te kolōlia ʼo te fakaofoofo ʼo tona puleʼaga. Ko tou puleʼaga ʼe ko he puleʼaga ki te ʼu temi fuli ʼe mole ʼiloʼi hona gataʼaga, pea ko tau pule ʼe tologa ʼi te ʼu taʼiake fuli e fefakahoahoaʼaki.” (Pesalemo 145:10-13). Ko te tala ʼo te logo ʼo te Puleʼaga ʼe ko te fakatotonu faka kilisitiano pea ko te toe gāue maʼuhiga ʼaupito ʼe lolotoga fai ʼi te temi nei (Mateo 24:14; 28:19, 20). ʼE ia koutou koa te holi mālohi ke koutou fakavikiviki ia Sehova pea mo tala ki ʼihi tona Puleʼaga?

Ko te tāpuhā ʼo te huafa ʼo Sehova pea mo te fakatonuhia ʼo tona pule faʼitaliha, ʼe tonu ko he meʼa maʼuhiga kia tatou ke tou fia kaugana agatonu ai kia te ia. ʼE feala ke tou faikole ʼo ʼuhiga mo te tāpuhā ʼo te huafa ʼo Sehova pea mo te fakatonuhia ʼo tona pule faʼitaliha (Mateo 6:9). ʼE feala ke tou mulimuli ki te ʼu meʼa ʼe tou faikole ki ai ʼi hatatou kau tuʼumaʼu ki te minisitelio faka kilisitiano pea mo fakahā te moʼoni ʼo ʼuhiga mo te ʼu meʼa maʼuhiga. — Esekiele 36:23; 39:7.

Ko te fiafia pea mo te fakafimālie

ʼI tatatou kaugana agatonu kia Sehova, ʼe tou leleiʼia tatatou fakafiafia tona loto pea mo fakahā ko te Tevolo ʼe gutu loi. Logope ko Satana ʼe loi ʼo ʼuhiga mo te hahaʼi ʼe kaugana ki te ʼAtua ʼaki te ʼu manatu ʼe mole lelei, ko tatatou tauhi agatonu kia Sehova ʼaē ʼe fai ʼaki te ʼofa, ʼe ina fakahā ko te ʼu fakakovi ʼa Satana ʼe loi (Sopo 1:8-12). ʼE ko he tupuʼaga tāfito ʼaia ke tou haga fai te meʼa ʼe talanoa ki ai ia Tāʼaga Lea 27:11: “Ke ke poto ia koe, ʼe hoku foha pea ke ke fakafiafia toku loto, koteʼuhi ke feala kau tali kia ia ʼaē ʼe manukinuki kia te ʼau.” Koia ʼaē, ka tou kaugana agatonu kia Sehova māʼiape la he ʼu faʼahiga meʼa ʼe fai e Satana moʼo fakahalaʼi tatou, ʼe mahino papau ia ko tatatou agatonu ʼe ina fakaloto mālohiʼi ʼotatou ʼu kaugā fagona ʼi te tui. — Filipe 1:12-14.

Ko te fiafia pea mo te fakafimālie ki te kau ki te taʼukai fakalaumālie, ʼe tonu ke ina toe uga tatou ke tou kaugana agatonu kia Sehova. Neʼe maʼu e Sesu te manuʼia ʼi tana tokoniʼi te hahaʼi, tāfito ʼi te ʼu faʼahi fakalaumālie. ʼE ʼui fēnei ia Mateo 9:35-38: “Neʼe foli ia Sesu ʼi te ʼu kolo fuli pea mo te ʼu kolo vao fuli, ʼo akonaki ʼi tonatou ʼu sinakoka, pea mo faka mafola te logo lelei ʼo te puleʼaga, pea mo fakamālōlō ia te ʼu faʼahiga mahaki pea mo te ʼu faʼahiga māʼimoa kehekehe. ʼI tana mamata ki te hahaʼi, neʼe ʼofa mamahi ia kia nātou, he neʼe nātou ʼāhua pea mo mavetevete, ohage he faga ōvi ʼe mole honatou tagata tauhi. Pea ina ʼui ai ki ʼana tisipulo: ‘ ʼIo ko te taʼukai ʼe lahi, kae tokosiʼi te kaugāue. Koutou faikole ki te ʼAliki ʼo te taʼukai ke ina fekauʼi mai he kaugāue ki tana taʼukai.’ ” Kapau ko te taʼukai ʼe loaloaga age ʼi he ʼamanaki neʼe tou fakatuʼutuʼu kiai, ʼe ko he ʼaluʼaga faigamalie anai kia tatou ke tou fiafia pea mo fakafimālie ke tou tokoniʼi fakalaumālie ʼihi. ʼE ko he tahi pe ʼaenā ʼaluʼaga ke tou fakahā ai te ʼofa ki te kāiga ʼaē ʼe ko he aga ʼe tonu ke tou fai. — Mateo 22:39.

Koteā te tupuʼaga ʼo tatatou kaugana ki te ʼAtua?

Neʼe tou vakaʼi pe te ʼu faʼahi ʼe mole lahi ʼo te ʼu tuʼuga tupuʼaga tāfito ke tou kaugana agatonu kia Sehova. ʼE lelei ke tou kole te ʼu meʼa tāfito ʼa tatou moʼo kaugana ki te ʼAtua, koteʼuhi ʼe tahi fakamaʼuaʼi anai pe ia tatou takitokotahi kia te ia (Loma 14:12; Hepeleo 4:13). Pea ko nātou ʼaē ʼe nātou haga maʼu te ʼu manatu ʼe mole lelei ʼe mole nātou mau anai te ʼofa ʼo te ʼAtua.

Koteā te meʼa ʼe feala ke tou falala ki ai mo kapau ʼe tou tokaga tāfito ki te tāpuhā ʼo te huafa ʼo Sehova pea tou foaki ki te ʼAtua te tauhi taputapu ʼaki te ʼu manatu ʼe lelei? ʼE mahino ia, ko Sehova ʼe ina tapuaki anai tatou pea mo tatatou minisitelio! (Tāʼaga Lea 10:22.) ʼE tou toe maʼu anai te maʼuli heʼegata koteʼuhi neʼe tou kaugana agatonu kia Sehova.

[Haʼuʼaga ʼo te paki pasina 8]

SIX SERMONS, by George Storrs (1855)

[Paki ʼo te pasina 9]

Ko te toko lauʼi afe neʼe nātou kaugana kia Sehova ʼi Saponia.

[Paki ʼo te pasina 10]

Ko te kaugana kia Sehova ʼi Kote Ivoale.