Te ʼu Fehuʼi ʼa Te Kau Lautohi

ʼE fakatuʼuake anai koa te hahaʼi ʼaē ʼe mamate ʼi muʼa ʼo te toe mamahi lahi logope la ʼe mole nātou tali ʼi te temi nei te tui faka kilisitiano moʼoni?

ʼE lelei kia tatou fuli ke tou tekeʼi hatatou fia fakamāuʼi niʼihi, ke tou mahino ʼo ʼuhiga mo te tonu fakaʼosi, ko te fakamāu ʼa Sehova ʼaki ia Sesu Kilisito koia pe ʼe maʼuhiga age (Soane 5:22; Gāue 10:42; 2 Timoteo 4:1). Kae ʼe tuku mai e te Tohi-Tapu te ʼu tali ki te fehuʼi ʼaē ʼi ʼoluga.

Ko te faka mafola ʼo te logo lelei ʼo te Puleʼaga ʼo te ʼAtua ʼi te malamanei ʼe ko he faʼahi maʼuhiga ia ʼo te ‘fakaʼiloga ʼo te ʼafio ʼa Sesu’. Neʼe ʼiloga te fakaʼiloga ʼaia talu te kamata ʼo te sēkulō ʼaenī. Ko te fakatuʼutuʼu ʼo te gāue faka mafola ke ina vaevae te hahaʼi ʼo te ʼu puleʼaga kehekehe ʼo mulimuli ki te fakahoko ʼo te fakatā ʼa Sesu ʼaē ʼo ʼuhiga mo te ʼu “ōvi” pea mo te ʼu “tao”. ʼAki te fakahoko ʼo te gāue faka mafola ʼaia pea mo te gāue fakamavaevae, ko te “toe mamahi lahi” ʼe ina faka ʼauha anai te ʼu faʼahiga meʼa ʼo te tuʼu agakovi ʼaenī. — Mateo 24:3, 21, 22; 25:31-46.

Ko Sehova pea mo tona ʼAlo, ʼe nā fakafuafua anai te hahaʼi fuli ʼaē neʼe nātou fakafisi ki te logo ʼo te Puleʼaga pea neʼe mamate ʼi muʼa ʼo te kamata ʼo te toe mamahi lahi, ʼe nātou kau ki te kalasi ʼo te ʼu tao. Neʼe ʼui e Sesu ko te kau tao “ ʼe nātou ʼolo anai ki te mate heʼegata”. Koia, ʼe feala ke tou ʼui ko nātou ʼaē ʼe fakafuafua e te ʼAtua ko te ʼu tao ʼe mole nātou maʼu anai te toe fakatuʼuake. ʼE hage tonatou tautea ko nātou ʼaē “ ʼe nātou maʼu te tautea faka ʼauha heʼegata” ʼi te temi ʼo te toe mamahi lahi. — 2 Tesalonika 1:9.

Kae, koteā te ʼui kia nātou ʼaē neʼe mole nātou maʼu he fealagia lahi ki te logo ʼo te Puleʼaga ke feala hanatou fili he tonu ʼe lelei peʼe kovi ki te moʼoni ia muʼa ʼo tanatou mamate lolotoga ʼo te ʼu “ ʼaho fakamuli ʼaenī”? — 2 Timoteo 3:1.

Tokolahi neʼe nātou mamate ʼi te temi ʼaē neʼe hoko ai te faka mafola ia muʼa ʼo te toe mamahi lahi, ʼe nātou maʼu anai te toe fakatuʼuake. ʼE ʼiloga te faʼahi ʼaia ʼi te ʼu vaega ʼe tou lau ia Fakahā 6:7, 8 ʼo ʼuhiga mo te ʼu tagata heka hōsi fakatā. Tokolahi neʼe nātou mamate ʼi te ʼu tau, ʼi te ʼu hoge, pea mo te ʼu taʼi mahaki fakamataku. ʼUhi ʼaē ko te “Hatesi” ʼaē ʼe ina toʼo te ʼu vikitima ʼaia ʼo te “Mate”, ʼe fakatuʼuake anai nātou lolotoga ʼo te ʼAfio ʼa Kilisito ʼi te ʼu taʼu e afe, mokā liufaki fuli e te Hatesi te ʼu mate ʼaē ʼe ia ia (Fakahā 20:13). Lagi ko ʼihi ia nātou ʼaia ka fakatuʼuake neʼe kua nātou fagono ki te logo ʼo te Puleʼaga ʼi muʼa ʼo tonatou mate.

ʼE tou fakamālo ʼi te mole haga ʼa Sesu ʼo tuku ki te tagata ke nātou fakafuafua ia nātou ʼaē ʼe kau ki te ʼu ōvi feiā aipe mo nātou ʼaē ʼe kau ki te ʼu tao! ʼE mole feala ke ʼiloʼi totonu e te tagata heʼe haohaoa peʼe ko fealagia ʼe fia neʼe tāu mo he tahi ke ina logoʼi pea mo tali te logo lelei? ʼE feala koa ke tou ʼiloʼi te meʼa ʼaē ʼi tona loto peʼe ʼofa moʼoni ki te faitotonu? ʼE feala koa ke tou fakafuafua te meʼa neʼe hoko ki tona famili ʼi tana tali te logo lelei, feiā aipe mo tana lotu neʼe kau ki ai talu tana tupu, peʼe ko ʼihi age ʼu meʼa? ʼE mahino ia, ʼe mole tou maʼu fuli te ʼu meʼa ʼaia. Kae, ʼe feala ke tou fakamoʼoni ko Sehova ʼAtua pea mo Sesu Kilisito ʼe nā lava fakafuafua te ʼu meʼa ʼaia pea mo maʼu te ʼu fakamāu ʼe haohaoa, totonu pea mo faitotonu. — Teutalonome 32:4; Isaia 11:1-5.

Koia, ʼe mole tonu ke tou kumi ia nātou ʼaē neʼe hoki mamate, pe ko ai anai ʼe feala ke fakatuʼuake peʼe kailoa. Ko he faʼahi ʼe mole fakagafua ke tou kau ki ai (Vakaʼi ia Luka 12:13, 14). ʼE lelei age hatatou mulimuli ki te ʼu tonu faitotonu ʼo te ʼu Tuʼi Fakamāu, ʼaē ko Sehova ʼAtua pea mo Sesu Kilisito. ʼE tou maʼu ai anai te ʼatamai tokalelei ʼi totatou ʼuhiga ʼaē ko te kau Fakamoʼoni ʼa Sehova. ʼE toe tokoni aipe kia tatou ke tou tokaga fakalelei ki te meʼa ʼaē neʼe hinoʼi mai ke tou fai — ‘koutou ʼolo pea mo koutou fai he kau tisipulo ʼi te hahaʼi ʼo te fenua fuli pe (...) ʼo akonakiʼi ia nātou ke nātou taupau te ʼu meʼa fuli pe neʼe fakatotonu e Sesu’. — Mateo 28:19, 20.

[Haʼuʼaga ʼo te paki pasina 31]

Leicester sheep, Meyer