Koutou Fakaliliu Te Akonaki ʼAē ʼe Ina Fakatupu Hāofaki Ko Hokotou Faʼahiga Maʼuli
“Ko te aga faka lotu ʼe ʼaoga ia ki te meʼa fuli.”—1 Timoteo 4:8.
1, 2. ʼE kaku kifea te tokaga ʼaē ʼa te hahaʼi ki tonatou maʼuli mālōlō, pea koteā tona fua?
TOKOLAHI te hahaʼi ʼe nātou tali anai te ʼui ʼaē ko he maʼuli haohaoa lelei ʼe ko he meʼa maʼuhiga. ʼE nātou tuku he temi pea mo he paʼaga lahi moʼo taupau ʼo nātou pea mo tokaga ke nātou maʼu te ʼu faitoʼo ʼe ʼaoga kia nātou. Ohage la, ʼi te ʼAtu ʼu Fenua ʼo Amelika, ko te falā ʼaē neʼe fakaʼaogaʼi ki te tokaga ʼaē ki te maʼuli haohaoa ʼi te taʼu neʼe mole heʼeki faʼa fualoa neʼe lau ʼe laka ʼi te 900 miliale tola. ʼE fakafuafua ʼe laka ʼi te 3 000 tola ʼi te taʼu fuli ki te tagata takitokotahi, te fafine, pea mo te fānau ʼi te fenua ʼaia, pea ko te fakafuafua ki te tagata takitokotahi ʼi te ʼu fenua ʼaē kua laga, ʼe teitei tatau.
2 Koteā ʼaē neʼe ʼaumai e te fakaʼaogaʼi fuli ʼaia ʼo te temi, te mālohi, pea mo te falā ʼaia? ʼE mole ʼi ai anai he tahi ʼe fakafeagai ki te ʼui ʼaē, teitei pe ʼi te ʼu potu fuli, kua ʼalu ki muʼa ʼi te faʼahi ʼo te ʼu faitoʼo, ʼo laka age ʼi te ʼu temi ʼaē ʼo te hisitolia. Kae, ʼe mole ina fakaliliu ai ko he faʼahiga maʼuli haohaoa. Kae, ʼi tona akonaki ʼe fakahāhā ai te polokalama ʼe fakatuʼutuʼu ai he tokaga ki te maʼuli ki te ʼu ʼAtu ʼu Fenua ʼo Amelika, neʼe fakahā e te pelesita, ʼi tuʼa atu ʼo te ʼu “totogi mamafa ʼo te agamālohi ʼi te fenua ʼaia,” ʼe maʼu e te hahaʼi ʼo te ʼAtu ʼu Fenua ʼo Amelika “te ʼu fakafuafua lahi ʼaupito ʼo te SITA, ʼo te suluka, pea mo te ʼinu kava fakavale, te faitatama ʼa te tamaliki fafine ʼaē ʼe kei liliki, mo te fānauʼi ʼo te tamaliki ʼe mole faʼa mamafa ʼi tonatou tupu” ʼi he tahi age fenua kua laga. Koteā tona manatu fakaʼosi? “ ʼE tonu ke fetogi tatatou faʼahiga maʼuli mo kapau ʼe tou loto moʼoni ke tou liliu ko he hahaʼi haohaoa.”—Kalate 6:7, 8.
Ko He Faʼahiga Maʼuli Haohaoa
3. ʼI tana tokagaʼi ʼaē te faʼahiga maʼuli ʼa te kau Keleka ʼo te temi ʼaē, neʼe koteā te tokoni neʼe tuku mai e Paulo?
3 ʼI te ʼuluaki sēkulō, neʼe ʼiloa te kau Keleka ʼi tanatou tokakaga ʼaē ki te fakamataleleiʼi ʼo tonatou sino, ki te hiki meʼa mamafa, pea mo te ʼu faigaoʼi fakataupiepie. Moʼo fakafeagai ki te faʼahi ʼaia, neʼe faitohi ia Paulo, ʼaki te takitaki ʼa te ʼAtua, ki te tūpulaga ʼaē ko Timoteo: “Ko te fakagāueʼi ʼo te sino ʼe ʼaoga siʼisiʼi pe ia, kae ko te aga faka lotu ʼe ʼaoga ia ki te meʼa fuli, heʼe ina maʼu te fakapapau ʼo te maʼuli ʼaenī pea mo te maʼuli ʼaē ka haʼu.” (1 Timoteo 4:8) Koia, neʼe fakahā e Paulo te meʼa kua mahino kiai te hahaʼi ʼi te temi ʼaenī, ko tona faka ʼuhiga, ʼe mole foaki e te ʼu faitoʼo peʼe ko te ʼu meʼa fakasino he faʼahiga maʼuli haohaoa moʼoni. Kae, ʼe fakamoʼoni mai e Paulo, ko te meʼa maʼuhiga ko te maʼuliʼi ʼo te aga faka lotu pea mo te fīmālie ʼi te faʼahi fakalaumālie.
4. Koteā te ʼu tapuakina ʼe maʼu ʼi te aga faka lotu?
4 Ko te taʼi maʼuli ʼaia ʼe ʼaoga ki “te maʼuli ʼo te temi ʼaenī” koteʼuhi ʼe ina foaki he puipui ki te ʼu meʼa fakatupu tuʼutāmaki fuli ʼaē ʼe hilifaki kia nātou totonu e te hahaʼi heʼe aga faka lotu, peʼe ko te hahaʼi ʼaē “ ʼe nātou maʼu te faʼahiga aga faka lotu.” (2 Timoteo 3:5; Tāʼaga Lea 23:29, 30; Luka 15:11-16; 1 Kolonito 6:18; 1 Timoteo 6:9, 10) Ko nātou ʼaē ʼe nātou tuku ke takitaki tonatou maʼuli e te aga faka lotu ʼe nātou maʼu he fakaʼapaʼapa haohaoa ki te ʼu lao ʼa te ʼAtua pea mo tana ʼu fakatotonu, pea ko te meʼa ʼaia ʼe ina uga ia nātou ke nātou fakaliliu te akonaki fakatupu hāofaki ko honatou faʼahiga maʼuli. Ko te taʼi maʼuli ʼaia ʼe ina tuku age kia nātou he maʼuli mālōlō, he maʼuli fīmālie pea mo he fiafia ʼi te faʼahi fakalaumālie pea mo te faʼahi fakasino. Pea ʼe nātou “tānaki [feiā], ohage ko he koloā moʼoni, he fakatafito matalelei ki te ka haʼu, koteʼuhi ke nātou maʼu katoa te maʼuli moʼoni.”—1 Timoteo 6:19.
5. Koteā te ʼu fakatotonu ʼe foaki e Paulo ʼi te lua kapite ʼo tana tohi ʼaē kia Tito?
5 Mai tona ʼuhiga ʼaē ko te maʼuli ʼaē ʼe takitaki e te akonaki fakatupu hāofaki ʼa te ʼAtua ʼe ina ʼaumai te ʼu tapuakina ʼi te temi nei pea mo te temi ka haʼu, ʼe ʼaoga ke tou ʼiloʼi lelei peʼe lava feafeaʼi hatatou fakaliliu te akonaki fakatupu hāofaki ʼa te ʼAtua ko hatatou faʼahiga maʼuli. ʼE tuku mai e Paulo te tali ʼi tana tohi ʼaē kia Tito. ʼE tou tokakaga tāfito anai ki te lua kapite ʼo te tohi ʼaia, ʼaē ʼe ina fakahinohino kia Tito ke ina “haga tala te meʼa ʼaē ʼe tau mo te akonaki fakatupu hāofaki.” ʼE mahino ia ʼe feala kia tatou fuli, tūpulaga mo matuʼa, tagata mo fafine, ke tou maʼu he ʼu lelei mai te “akonaki fakatupu hāofaki” ʼaia ʼi te temi nei.—Tito 1:4, 5; 2:1.
Ko Te Tokoni Ki Te Kau Tagata Matutuʼa
6. Koteā te tokoni neʼe tuku e Paulo ki “te kau tagata kua matutuʼa,” pea koʼe koa ʼe ko he aga ʼofa ʼi tona faʼahi te fai ʼo te faʼahi ʼaia?
6 ʼUluaki, neʼe ʼi ai te tokoni ʼa Paulo ki te kau tagata matutuʼa ʼo te kokelekasio. Koutou lau ia Tito 2:2. “Ko te kau tagata matutuʼa,” ʼi tonatou ʼuhiga kūtuga, ʼe fakaʼapaʼapaʼi pea mo faka ʼuhigaʼi ohage ko he kau faʼifaʼitaki ʼo te tui pea mo te agatonu. (Levitike 19:32; Tāʼaga Lea 16:31) ʼUhi ko te potu ʼaia, ʼe feala ke tuʼania he fai tokoni ʼa ʼihi ki te ʼu tagata kua matutuʼa ʼo ʼuhiga mo he ʼu faʼahi ʼe mole faʼa maʼuhiga fau. (Sopo 32:6, 7; 1 Timoteo 5:1) Koia, ʼe ko he agaʼofa ʼi te faʼahi ʼo Paulo hana ʼuluaki palalau ki te kau tagata matuʼa, pea ʼe ko he faʼahi ʼe lelei anai kia nātou hanatou fakaʼaogaʼi te ʼu palalau ʼa Paulo pea mo nātou vakavakaʼi fakalelei, ohage ko Paulo, peʼe nātou fai koa he faʼifaʼitaki lelei.—1 Kolonito 11:1; Filipe 3:17.
7, 8. (a) Koteā te faka ʼuhiga ʼo te “fai fakafeauga lelei pe ʼi te ʼu meʼa fuli ʼo ʼuhiga mo te ʼu aga”? (b) He koʼe koa ko te “fakamalotoloto” ʼe fakamatatau ʼi te “fonu ʼi te manatu fakapotopoto”?
7 ʼUluaki ia meʼa fuli, ʼe tonu ki te kau tagata matutuʼa Kilisitiano ke nātou “fai fakafeauga lelei pe ʼi te ʼu meʼa fuli ʼo ʼuhiga mo te ʼu aga.” Logope ko te kupu ʼuluaki ʼe feala ke faka ʼuhiga ki te agamāhani ʼo te ʼinu (“fakapotopoto,” Kingdom Interlinear), ʼe toe faka ʼuhiga pe foki ki te nofo tokaga, ki te sio totonu, peʼe ko te fakamatatau ʼi te ʼu meʼa fuli. (2 Timoteo 4:5; 1 Petelo 1:13) Koia, peʼe ʼi te ʼinu kava peʼe ko he tahi age pe ʼu meʼa, ʼe tonu ke fakapotopoto te kau tagata matutuʼa, kae mole tonu ke nātou fakavalevale fau.
8 Koia, ʼe tonu foki ke nātou toe “fakamalotoloto” pea mo te “fonu ʼi te manatu fakapotopoto.” Ko te fakamalotoloto, pea mo te tau ʼaē mo te fakaʼapaʼapa, ʼe haʼu māhani mo te taʼu. Kae, ko ʼihi ʼi te ʼaluʼaga ʼo tanatou fakamalotoloto fau, ʼe mole nātou matali te ʼu aga mālohi ʼa te kau tūpulaga. (Tāʼaga Lea 20:29) Ko te tupuʼaga ʼaia ʼo te fakamatatau ʼo te “fakamalotoloto” ʼi te “fonu ʼi te manatu fakapotopoto.” ʼE ʼaoga ke taupau maʼu e te kau tagata matumatuʼa te fakamalotoloto ʼaē ʼe ʼalutahi mo tonatou taʼu, kae ʼi te moʼi lakaga pe ʼaia ke nātou fakafuafua tatau, ke nātou maʼu te pule katoa ʼo te ʼu meʼa ʼaē ʼe nātou logoʼi.
9. He koʼe koa ʼe tonu ki te kau tagata matutuʼa ke nātou mālohi ʼi te tui pea mo te ʼofa kae tāfito ʼi te faʼa kātaki?
9 Koia, ʼe tonu ki te kau tagata matutuʼa ke nātou “mālohi ʼi te tui, ʼi te ʼofa, ʼi te faʼa kātaki.” E lahi tana ʼu tohi, neʼe fakaʼaogaʼi ai e Paulo te tui pea mo te ʼofa, fakatahi mo te ʼamanaki. (1 Kolonito 13:13; 1 Tesalonika 1:3; 5:8) ʼI henī, neʼe ina fetogi “te ʼamanaki” ʼaki te “faʼa kātaki.” Neʼe lagi fetogi e Paulo te kupu ʼaia, mai tona ʼaluʼaga ʼaē, ka matuʼa he tahi, ʼe manatu ia kua līakina ia ia. (Tagata Tānaki 12:1) Kae, ohage ko tona fakahā e Sesu, “ko ʼaē ka faʼa kātaki anai ʼo kaku ki te fakaʼosi, ʼe ko ia ia ʼaē ka maʼuli anai.” (Mateo 24:13) Pea tahi ʼaē meʼa, ʼe tau mo te kau tagata matutuʼa ke faʼifaʼitaki ia nātou ʼi te tahi ʼu ʼaluʼaga, heʼe mole gata pe ʼi tanatou kua matutuʼa pea mo te ʼu meʼa ʼaē neʼe tau mo nātou ʼi tonatou maʼuli, kae ʼuhi ko tanatou ʼu kalitate fakalaumālie mālohi—te tui, te ʼofa, pea mo te faʼa kātaki.
Ki Te Kau Finematuʼa
10. Koteā te tokoni ʼe foaki e Paulo ki “te kau finematuʼa” ʼi te kokelekasio?
10 Neʼe tuku leva e Paulo tana tokaga ki te kau finematuʼa ʼaē ʼi te kokelekasio. Koutou lau ia Tito 2:3. “Ko te kau finematuʼa” ʼe ko te ʼu hahaʼi muʼamuʼa ʼi te ʼu fafine ʼo te kokelekasio, ʼo kau ai te ʼu ʼohoana ʼo “te kau tagata ʼāfea” pea mo te ʼu faʼe pea mo te ʼu kui fafine ʼo ʼihi. ʼI tonatou ʼuhiga ʼaia, ʼe feala ke lahi tanatou fakalotoʼi, ki te meʼa ʼaē ʼe lelei peʼe ko te meʼa ʼaē ʼe kovi. Ko te tupuʼaga ʼaia ʼo te kamata e Paulo tana ʼu palalau ʼaki te kupu “ ʼo toe feiā aipe,” ʼaē ʼe faka ʼuhiga ʼaki ʼe toe maʼu e “te kau finematuʼa” te ʼu faʼahiga maʼua ke nātou fakahoko, ohage la ko te fakahoko ʼo tonatou tuʼulaga ʼi te kokelekasio.
11. Koteā te aga faka lotu?
11 ʼUluaki, neʼe ʼui e Paulo “ke maʼu e te kau finematuʼa he ʼulugaaga ʼa ni hahaʼi aga faka lotu.” Ko te kupu “aga” ʼe ko te fakahā ʼaia ki tuʼa ʼo te agaaga ʼaē ʼo loto pea mo te ʼuhigaʼi tagata, ʼaē ʼe hā ʼi te ʼu aga pea mo te meʼa ʼaē ʼe hā ki tuʼa. (Mateo 12:34, 35) Koia, koteā te aga ʼaē ʼe tonu ke maʼu e he kau finematuʼa Kilisitiano kua matumatuʼa? Ke nātou “aga faka lotu.” Neʼe fakaliliu mai te kupu faka Keleka ʼaē ʼe faka ʼuhiga “ki te meʼa ʼaē ʼe tau mo te ʼu hahaʼi, mo te ʼu aga pea mo te ʼu meʼa ʼaē kua foaki ki te ʼAtua.” ʼE mahino ia ko he tokoni feʼauga ki te faʼifaʼitaki ʼaē ʼe tonu ke nātou tuku ki ʼihi, tāfito ia te kau fafine kei finemui ʼi te kokelekasio.—1 Timoteo 2:9, 10.
12. Koteā te fakaʼaogaʼi kovi ʼo ʼuhiga mo te ʼalelo ʼe tonu ke tekeʼi e te hahaʼi fuli?
12 Pea hoa mai kiai te ʼu agaaga kovi e lua: “ke mole fasituʼu, peʼe popūla ki te ʼinu lahi ʼo te vino.” Ko he meʼa ʼe lelei te fakatahiʼi ʼo te ʼu agaaga ʼaia e lua. ʼE fakamatala fēnei e te Polofesea ko E. F. Scott: “ ʼI te ʼu temi ʼāfea ʼaē neʼe gata ʼaki pe tanatou meʼa ʼinu ki te vino, neʼe ko te ʼu temi fakafiafia ʼaē neʼe ʼi ai te vino, ʼaē neʼe laukovi ai te ʼu finematuʼa ki tanatou ʼu kāiga.” ʼI te agamāhani, ʼe lahi age te tokaga ʼa nātou fafine ki te hahaʼi ia nātou tagata, ʼaē ʼe ko he meʼa lelei ia. Kae, ko te tokaga ʼe feala ke liliu ko he fai fatufatu pea ʼo ʼuta ai mo he fai fasituʼu, tāfito mokā kua palalau hoholo tupu ko te ʼinu. (Tāʼaga Lea 23:33) ʼE mahino ia, ʼe ʼaoga kia nātou fuli ʼaē ʼe faiga ki te faʼahiga maʼuli fakatupu hāofaki, tagata mo fafine, ke nātou tokakaga ki te hele ʼaia.
13. E feafeaʼi he lava liliu ʼa te kau finematuʼa ko he hahaʼi fai akonaki?
13 Moʼo fakaʼaogaʼi ki he ʼaluʼaga lelei ʼi he temi ʼe ʼaoga kiai, ʼe fakaloto mālohiʼi te kau finematuʼa ke “nātou akonaki te meʼa ʼaē ʼe lelei.” ʼI te tahi koga tohi, neʼe fakahā lelei e Paulo, ʼe mole tonu ke fai akonaki te kau fafine ʼi te kokelekasio. (1 Kolonito 14:34; 1 Timoteo 2:12) Kae, ko te faʼahi ʼaia ʼe mole ina tāʼofi te kau fafine ke tufa te ʼatamai mālama maʼuhiga ʼa te ʼAtua ʼi tonatou loto fale pea mo feiā ki te hahaʼi ʼo tuʼa. (2 Timoteo 1:5; 3:14, 15) ʼE feala ke toe lahi foki te meʼa ʼe nātou fakahoko ʼi tanatou liliu ko he ʼu faʼifaʼitaki faka Kilisitiano ki te kau fafine kei finemui ʼi te kokelekasio, ohage ko tona fakahā ʼi te ʼu vaega ʼaē ʼe hoa mai.
Ki Te Kau Fafine Kei Finemui
14. E feafeaʼi he lava fakahā e te ʼu fafine Kilisitiano kei finemui he fakaʼaluʼalu lelei ʼo tonatou maʼuli ʼi te tokaga ʼaē ki te ʼu maʼua ʼo nātou?
14 ʼI tana fakaloto mālohiʼi te kau finematuʼa ke “nātou akonaki te meʼa ʼaē ʼe lelei,” neʼe talanoa tāfito ia Paulo ki te kau fafine kei finemui. Koutou lau ia Tito 2:4, 5. Logope ʼe lahi te ʼu meʼa ʼe faka ʼuhiga ki te ʼu gāue ʼo te loto fale, ʼe mole tonu ke lahi fau te faiga ʼa te kau fafine Kilisitiano ʼo nātou tuku te ʼu meʼa fakasino ʼaē ʼe nātou tokakaga kiai ke maʼuhiga ʼi tonatou maʼuli. Kae, ʼe tonu ke nātou “manatu fakapoto, aga fakapoipoi, . . . agalelei,” pea kia meʼa fuli, ʼe teuteu ke lagolago ki te fakatuʼutuʼu ʼo te pule faka Kilisitiano, “koteʼuhi ke ʼaua naʼa fai he palalau kovi ki te folafola ʼa te ʼAtua.”
15. He koʼe ʼe tonu ke viki te tokolahi ʼi te kau fafine kei finemui ʼaē ʼi te ʼu kokelekasio?
15 ʼI te temi nei, ko te fakatuʼutuʼu ʼo te famili kua lahi age tona fetogi ʼi te temi ʼo Paulo. E lahi te ʼu famili ʼe tahi ʼalu ʼuhi ko te tui, pea ko ʼihi ʼe ko te tokotahi pe ʼe ina taupau te famili, ko te tagata peʼe ko te fafine. Māʼia mo te ʼu famili ʼaē ʼe ʼui ʼe ko te ʼu famili ʼo te ʼu fakatuʼutuʼu ʼāfea, kua tahitahiga te ʼu fafine peʼe ko te ʼu faʼe ʼe gāue ʼaho katoa ʼi tonatou loto fale. Ko te ʼu faʼahi fuli ʼaia ʼe fakatupu ai te maʼua pea mo te fihifihia mālohi ki te kau fafine Kilisitiano kei finemui, kae ko te potu ʼaia ʼe mole ina toʼo ia nātou tonatou ʼu maʼua faka Tohi-Tapu. Koia, ʼe ko he fiafia lahi te sio ki te ʼu fafine Kilisitiano, kei finemui pea mo agatonu, ʼe nātou gāue kinakina moʼo fakamatatau tanatou ʼu tuʼuga maʼua pea mo haga tuku aipe ki muʼa te ʼu meʼa ʼo te Puleʼaga, logo aipe ko ʼihi ʼe nātou pionie vaeluaʼi temi peʼe pionie katoa. (Mateo 6:33) ʼE nātou tau moʼoni mo he fakavikiviki!
Ki Te Kau Talavou
16. Koteā te tokoni ʼa Paulo ki te kau talavou, pea he koʼe koa ʼe tō tonu te tokoni ʼaia?
16 Neʼe palalau leva ia Paulo ki te kau talavou, ʼo kau ai ia Tito. Koutou lau Ia Tito 2:6-8. Ka tou fakatokagaʼi te ʼu aga fakatupu ʼauha pea mo mole fakakaukau ʼa te kau tūpulaga tokolahi ʼi te temi nei—te suluka, te toloke pea mo te ʼinu fakavale, te ʼu felāveʼi fakasino heʼeʼaoga, pea mo ʼihi ʼatu ʼu faʼahiga meʼa, ohage ko te ʼu fai gaoʼi kovi pea mo te ʼu musika kovi pea mo te ʼu fakafiafia—ʼio, ʼe ko he tokoni ia ʼi tona temi tonu ki te kau tūpulaga Kilisitiano ʼaē ʼe nātou fia muliʼi he faʼahiga maʼuli fakatupu hāofaki pea mo fīmālie.
17. E feafeaʼi koa he lava liliu ʼa he talavou ʼo “fakapotopoto” pea mo liliu ko he “faʼifaʼitakiʼaga ʼi te fai ʼo ni ʼu gāue matamatalelei”?
17 ʼO mole hage ko te kau tūpulaga ʼo te mālama, ko te Kilisitiano ʼaē kei tūpulaga ʼe tonu ke “nātou manatu fakapoto” pea ke liliu “ ʼi te meʼa fuli ko he faʼifaʼitakiʼaga ʼi te fai ʼo ni ʼu gāue matamatalelei.” Neʼe fakamahino e Paulo ko te fakapotopoto ʼe mole maʼu e nātou ʼaē ʼe nātou ako ʼo kehe pe ke nātou mahino ki te Tohi-Tapu, kae ʼe maʼu te fakapotopoto e nātou ʼaē “ ʼaki tanatou fai tuʼumaʼu, kua nātou maʼu te ʼatamai ʼe māhani ʼi te ʼiloʼi ʼo te lelei mo te kovi.” (Hepeleo 5:14) Ko he meʼa matamatalelei te sio ki te kau tūpulaga ʼe nātou fakaʼaogaʼi ʼaki he lotolelei tonatou temi pea mo tonatou mālohi ke nātou kau mālohi ki te ʼu tuʼuga gāue ʼi te kokelekasio faka Kilisitiano, kae ʼe mole faka pulinoa tonatou mālohi ʼo te temi tūpulaga ʼi te kumi ʼo te ʼu meʼa ʼa nātou takitokotahi! ʼAki tanatou fai ʼaia, ohage ko Tito, ʼe feala ke nātou liliu ko ʼu faʼifaʼitaki ʼo “te ʼu gāue lelei” ʼi te kokelekasio faka Kilisitiano.—1 Timoteo 4:12.
18. Koteā te faka ʼuhiga ʼo te agatonu ʼi te akonaki, agapoto, pea mo maʼa ʼi te palalau?
18 ʼE fakamanatuʼi ki te kau talavou ʼe tonu ke nātou “fakahā te fakahagatonu ʼi [tanatou akonaki], te fakamalotoloto, mo te lea haohaoa ʼe mole feala ke faka lākahalaʼi nātou.” Ko te akonaki ʼaē ʼe ‘agatonu,’ ʼe tonu ke fakatafito mālohi ki te Folafola ʼa te ʼAtua; koia, ʼe tonu ki te kau talavou ke nātou ako fakaleleiʼi te Tohi-Tapu. Ohage pe ko te kau tagata kua matutuʼa, ʼe tonu ke fakamalotoloto mo te kau talavou. ʼE ʼaoga ke nātou ʼiloʼi ko te ʼuhiga minisi ʼo te Folafola ʼa te ʼAtua ʼe ko he maʼua ʼe maʼuhiga, pea koia ʼe tonu ke nātou maʼu “he aga ʼe tau mo te logo lelei.” (Filipe 1:27) ʼO toe feiā aipe ko ʼanatou palalau ʼe tonu ke “maʼa” pea koia ʼe “mole feala ke tauteaʼi.” ʼAki tona fai ʼaia, e lagi mole ʼi ai he tupuʼaga ke meo ai te kau fakafeagai.—2 Kolonito 6:3; 1 Petelo 2:12, 15.
Ki Te Kau Sinifu Pea Mo Te Hahaʼi Faifekau
19, 20. E feafeaʼi kia nātou ʼaē ʼe gāue maʼa ʼihi hahaʼi hanatou “fakamataleleiʼi te akonaki ʼo totatou Hāofakiʼaga, te ʼAtua”?
19 Moʼo tuku muli, neʼe haga ia Paulo kia nātou ʼaē ʼe gāue maʼa ʼihi hahaʼi. Koutou lau ia Tito 2:9, 10. ʼE mole hahaʼi ia tatou ʼi te temi nei ʼe ko he ʼu sinifu peʼe tagata faifekau, kae tokolahi ʼe nātou gāue maʼa ʼihi. Koia, ko te ʼu fakatuʼutuʼu ʼaē ʼe lau e Paulo ʼe toe faka ʼuhiga lelei pe kia tatou ʼi te temi nei.
20 Ko te “fakalogo ki tanatou pule ia meʼa fuli” ʼe faka ʼuhiga ʼe tonu ke fakahā e te kau gāue Kilisitiano he fakaʼapaʼapa fakamalotoloto ki tanatou patolo pea mo tanatou pule gāue. (Kolose 3:22) ʼE tonu ke ʼiloa ia nātou ko he kau gāue agatonu ʼe nātou gāue ʼaho katoa, ko tonatou maʼua ʼaia ki te patolo. Pea ʼe tonu ke nātou taupau he aga faka Kilisitiano māʼoluga ʼi tonatou ʼu fale gāue, ʼo mole nātou tokagaʼi te meʼa ʼaē ʼe lau e nātou ʼaē ʼe gāue ʼi ai. Ko te ʼu meʼa fuli ʼaia moʼo “fakamataleleiʼi ʼi te meʼa fuli pe ia te akonaki ʼaē ʼo totatou Hāofakiʼaga, te ʼAtua.” ʼE tou tau logo ki te ʼu fua matalelei mokā tali te moʼoni e te ʼu hahaʼi fakamalotoloto ʼaē neʼe nātou sisio ki te aga lelei ʼo tanatou ʼu kaugā gāue peʼe ko te aga ʼo hanatou kau gāue ko he kau Fakamoʼoni. Ko te fakapale ʼaia ʼe foaki e Sehova kia nātou ʼaē ʼe nātou muliʼi te akonaki fakatupu hāofaki, tatau aipe peʼe tonu ke nātou mulimuli kiai ʼi te ʼu fale gāue.—Efesi 6:7, 8.
Ko He Hahaʼi Maʼa
21. He koʼe koa neʼe foaki e Sehova te akonaki fakatupu hāofaki, pea ʼe tonu ke tou tali feafeaʼi?
21 Ko te akonaki fakatupu hāofaki ʼaē neʼe fakahā e Paulo ʼe mole ko he ʼu fakatuʼutuʼu pe ʼo ʼuhiga mo te aga ʼaē ʼe tonu ke fai peʼe ko he faʼahi maʼuhiga ʼo te aga ʼaē ʼe tonu ke fai, ʼe feala hatatou vakaʼi mokā tou loto kiai. Neʼe toe hoko atu te fakamatalatala ʼa Paulo te ʼuhiga ʼo te faʼahi ʼaia. Koutou lau ia Tito 2:11, 12. ʼI tuʼa atu ʼo tona ʼofa pea mo tana agalelei heʼe tau kia tatou, neʼe foaki mai e Sehova ʼAtua te akonaki fakatupu hāofaki ke feala hatatou ako te maʼuliʼi ʼo he maʼuli fīmālie pea ʼe ʼi ai tona ʼuhiga ʼi te ʼu temi maʼuhiga ʼaenī pea mo fakatupu tuʼutāmaki. Kua koutou tokalelei koa moʼo tali pea mo fakaliliu te akonaki fakatupu hāofaki ko hokotou faʼahiga maʼuli ʼaia? ʼE faka ʼuhiga anai te fai ʼo te potu ʼaia ko tokotou hāofaki.
22, 23. Koteā te ʼu tapuakina ʼe tou maʼu ʼi tatatou fakaliliu te akonaki fakatupu hāofaki ko hatatou faʼahiga maʼuli?
22 ʼO laka atu ʼi te faʼahi ʼaia, ko te fakaliliu ʼo te akonaki fakatupu hāofaki ko tokotou faʼahiga maʼuli, ʼe ina foaki atu he pilivilesio makehe pea mo he ʼamanaki fakafiafia ki te temi ka haʼu. Koutou lau ia Tito 2:13, 14. ʼIo, ko te fakaliliu ʼo te akonaki fakatupu hāofaki ko hatatou faʼahiga maʼuli ʼe ina fakaliliu tatou ko he hahaʼi maʼa, ʼe tō kehe mai te mālama hehema ʼaē ʼe ʼamanaki ki te fakaʼauha. Ko te ʼu palalau ʼa Paulo ʼe ʼalu tatau mo te ʼu fakamanatu ʼaenī ʼa Moisese ki te ʼu foha ʼo Iselaele ʼi Sinaï: “Kae kia Sehova, . . . ʼe ina hili māʼoluga anai ia koe ʼi te ʼu fenua ʼaē neʼe ina fai, ʼo tupu ai he fakavikiviki, pea mo te logona, pea mo te matalelei, kae ʼe ke hage anai ko he hahaʼi maʼa kia Sehova, tou ʼAtua, ohage ko tana fakapapau.”—Teutalonome 26:18, 19.
23 ʼOfa pe ke tou faka maʼuhigaʼi tuʼumaʼu te pilivilesio ʼo te ʼuhiga hahaʼi maʼa ʼaē ʼe nātou fakaliliu te akonaki fakatupu hāofaki ko honatou faʼahiga maʼuli! Tou nonofo tokaga tuʼumaʼu moʼo fakamamaʼo mai te ʼu holi ʼo te mālama pea mo ʼaē ʼe heʼe faka lotu, ʼo tou nofo maʼa pea ke tou tau feʼauga ke fakaʼaogaʼi tatou e Sehova ʼi tana gāue lahi ʼaē ʼe lolotoga fai ʼi te temi nei.—Kolose 1:10.
ʼE Kei Koutou Manatuʼi Koa?
◻ He koʼe koa ko te aga faka lotu ʼe ʼaoga ki te meʼa fuli?
◻ E feafeaʼi ki he ʼu tagata pea mo he ʼu fafine kua matutuʼa hanatou taupau te akonaki fakatupu hāofaki ko honatou faʼahiga maʼuli?
◻ Koteā te akonaki fakatupu hāofaki ʼa Paulo maʼa te kau talavou pea mo te kau fafine kei finemui ʼi te kokelekasio?
◻ Koteā te pilivilesio pea mo te tapuakina ʼe feala ke tou maʼu mo kapau ʼe tou fakaliliu te akonaki fakatupu hāofaki ko hotatou faʼahiga maʼuli?
[Paki ʼo te pasina 18]
Tokolahi ʼi te temi nei ʼe nātou maʼuliʼi te tokoni ʼaē ia Tito 2:2-4