ʼE Fakapapau Mai He Maʼuli ʼe Lelei Age

ʼE KOUTOU loto koa ke koutou ʼāteaina mai te ʼu fihifihia ʼaē ʼe nātou fakaliliu te maʼuli ʼo faigataʼa? ʼE koutou loto koa ke koutou maʼuʼuli ʼi he mālama ʼe lelei ai te maʼuli ohage ko te paki ʼo te takafi ʼo te nusipepa ʼaenī? Koutou fakasiosio lelei te paki ʼaia. ʼE mahu te meʼa kai ʼa te hahaʼi. ʼE nātou fiafia moʼoni anai ʼi te meʼa kai lelei ʼaia. ʼE nātou fiafia fuli. Ko te hahaʼi mai te ʼu lanu kehekehe ʼe nātou maʼuʼuli ʼi te tokalelei. Māʼia mo te ʼu manu ʼe nātou maʼuʼuli ʼi te tokalelei! ʼE mole ʼi ai he tau. ʼE mole he tahi ʼe masiva. ʼE mole he tahi ʼe mahaki. ʼE nātou maʼuʼuli ʼi he ʼaluʼaga ʼe matalelei, ko te ʼu ʼakau ʼe matalelei, pea ko te vai ʼe maʼa. ʼI nofoʼaga matalelei leva!

ʼE liliu anai koa te kele ʼaenī ohage ko te meʼa ʼaē ʼe tuʼu ʼi te paki? Ei, ʼe liliu anai te kele ko he palatiso. (Luka 23:43) Ko te ʼAtua, ʼaē neʼe ina faʼu te kele, neʼe ina teuteuʼi ke maʼu e te hahaʼi he maʼuli ʼe lelei age ʼi te palatiso ʼi te kele. Pea ʼe feala ke koutou nofo ʼi te palatiso ʼaia!

Ko Te Maʼuli Fea ʼAē ʼe Koutou Leleiʼia?

ʼE feafeaʼi anai te kehekehe ʼo te Palatiso fakakelekele ʼaē ka haʼu, mo te mālama ʼaē ʼe tou maʼuʼuli ai ʼi te temi nei? Ia ʼaho nei, ko te hahaʼi e tahi miliale tupu ʼe nātou pakupaku ʼi te ʼaho fuli. Kae, ʼi te Palatiso ʼaē neʼe teuteuʼi e te ʼAtua ki te kele, ʼe mahu anai te meʼa kai ʼaē ka maʼu e te hahaʼi. ʼE fakapapau mai e te Tohi-Tapu: “ ʼE mahino papau ia ʼe fai anai e Sehova ʼo te ʼatu kautau maʼa te hahaʼi fuli pe . . . he kātoaga meʼa kai kua lelei tona loloʼi, he kātoaga ʼo he ʼu vino kua tuku ke toka tona veveli.” (Isaia 25:6) ʼE mole ʼi ai anai he temi ʼe tou hoge meʼa kai ai, koteʼuhi ʼe ʼui fēnei e te Tohi-Tapu: “ ʼE mahu anai te magisi ʼi te kele; ʼi te tumutumu ʼo te ʼu moʼuga ʼe tapuke anai ʼi ai.”—Pesalemo 72:16.

Ia ʼaho nei, tokolahi ʼe nātou maʼuʼuli ʼi te ʼu fale fakaʼofaʼofa, peʼe faigataʼa kia nātou te totogi ʼo ʼonatou ʼapi. Ko ʼihi ʼe mole ʼi ai honatou nofoʼaga pea ʼe nātou momoe ʼi te ala. Ohage ko tona fakahā e te Kautahi Faka Malamanei ʼo Te Maʼuli Mālōlō, ko te toko 100 miliona tamaliki ʼi te malamanei ʼe mole ʼi ai honatou nofoʼaga. Kae ʼi te Palatiso ʼaē ka haʼu, ko te hahaʼi fuli ʼe nātou tahi maʼu anai tona ʼapi. ʼE ʼui fēnei e te Tohi-Tapu: “ ʼE mahino papau ia, ʼe nātou laga anai ni ʼu fale pea mo nātou nofoʼi anai; pea ʼe mahino papau ia ʼe nātou tō anai he ʼu fuʼu vite pea mo nātou kai anai tona ʼu fua.”—Isaia 65:21.

Tokolahi ʼe nātou fai te ʼu gāue ʼe mole nātou leleiʼia. ʼI ʼihi temi ʼe nātou gāue kinakina ʼi he ʼu ʼaho katoa ki he kiʼi totogi ʼe mole faʼa maʼuhiga. Ko te toko 1 ʼi te toko 5 ʼi te malamanei ʼe maʼuli ʼaki he totogi ʼe veliveli age ʼi te 50 000 ʼi te taʼu fuli. Kae, ʼi te Palatiso ʼaē ka haʼu, ʼe fiafia anai te hahaʼi ʼi tanatou gāue pea ʼe nātou sisio anai ki te fua lelei ʼo tanatou gāue. ʼE fakapapau fēnei mai e te ʼAtua: “Ko taku ʼu hahaʼi ʼaē neʼe ʼau fili, ʼe nātou fakaʼaogaʼi anai ʼo aʼu ki tona gataʼaga te gāue ʼo ʼonatou nima. ʼE mole nātou kinakina noa anai”—Isaia 65:22, 23.

ʼI te temi nei, ko te ʼu mahaki kua mafola ʼi te ʼu potu fuli ʼo te malamanei. Ko te tokolahi ʼe nātou kivi. Ko ʼihi ʼe nātou tuli. Ko ʼihi ʼe mole feala ke nātou haʼele. Kae ʼi te Palatiso, ʼe ʼāteaina anai te hahaʼi mai te ʼu mahaki. ʼE ʼui fēnei e Sehova: “ ʼE mole he tahi ʼe ina toe ʼui anai: ‘ ʼE ʼau mahaki.’ ” (Isaia 33:24) Kia nātou ʼaē kua tau mo te ʼu mamahi ʼaia, ʼe fakatupu fiafia te fakapapau ʼaenī: “ ʼI te temi ʼaia ʼe ʼalaʼi anai te ʼu mata ʼo te kau kivi, pea ko te ʼu taliga ʼo te kau tuli ʼe ava anai. ʼI te temi ʼaia ko te ketu ʼe kake anai ohage he tia [tagata] pea ko te ʼalelo mate ʼe kalaga fakafiafia anai.”—Isaia 35:5, 6.

ʼI te temi nei, ʼe ʼi ai te mamahi pea mo te kinakina, te lotomamahi pea mo te mate. Kae ʼi te Palatiso ʼi te kele, ko te ʼu meʼa fuli ʼaia ʼe mole toe maʼu anai ia. Ei, māʼia mo te mate ʼe mole toe maʼu anai! ʼE ʼui fēnei e te Tohi-Tapu: “Ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he tagilāulau, he mamahi. Ko te ʼu meʼa ʼāfea kua puli ia.”—Fakahā 21:3, 4.

Koia, ʼe mahino ia ko te Palatiso fakakelekele ʼaē ʼe fakapapau e Sehova ʼe faka ʼuhiga anai ki te malamanei ko he maʼuli ʼe lelei age. Kae e feafeaʼi hatatou tui papau ʼe hoko anai te faʼahi ʼaia? Ko te temi fea ʼaē ka hoko anai te faʼahi ʼaia, pea ʼe hoko feafeaʼi anai? Koteā ʼaē ʼe tonu ke koutou fai ke koutou maʼuʼuli ai?