Ko Te ʼu Ōvi ʼa Sehova ʼe ʼAoga Kia Nātou Te Manavaʼofa

“Ke koutou ʼiloʼi ko Sehova te ʼAtua. . . . Ko tatou ko tana hahaʼi pea ko te ʼu ōvi ʼo tana gāueʼaga.”​—⁠Pesalemo 100:⁠3.

1. ʼE gaohi feafeaʼi e Sehova tana kau kaugana?

KO SEHOVA ʼe ko te Tagata Tauhi Ōvi Lahi. Kapau ko tatou ko tana ʼu kaugana, ʼe ina gaohi tatou ohage ko hana ʼu ōvi pea ʼe tokaga fakalelei kia tatou. Ko tatatou Tāmai ʼaē ʼi selo ʼe ina fakafimālieʼi tatou pea mo ina fakafiafia tatou, pea ʼe ina taki tatou “ ʼi te ʼu ala ʼo te faitotonu ʼuhi ko tona huafa.” (Pesalemo 23:​1-4) Ko te Tagata Tauhi ōvi agalelei, ko Sesu Kilisito, ʼi tona ʼofa lahi ʼaē kia tatou, neʼe ina foaki tona nefesi maʼa tatou.​—⁠Soane 10:​7-15.

2. Koteā te agaaga ʼo te hahaʼi ʼa te ʼAtua?

² ʼI tatatou maʼu tona manavaʼofa, ʼe feala ke tou ʼui fakatahi mo te tagata fai pesalemo: “Koutou tauhi kia Sehova ʼaki te loto fiafia. Koutou hū ki ai ʼaki he kalaga fakafiafia. Ke mahino kia koutou ko Sehova te ʼAtua. Ko ia ʼaē neʼe ina faʼu tatou, kae mole ko tatou totonu pe. Ko tatou ko tana hahaʼi pea ko te ʼu ōvi ʼo tana gāueʼaga.” (Pesalemo 100:​2, 3) ʼIo, ʼe tou fiafia pea ʼe tou nonofo ʼi te fīmālie. ʼE hage neʼe hāofaki tatou mai te ʼu manu fekai, koteʼuhi ʼe tou nonofo ʼi he lotoʼā ʼe mālohi tona ʼu kaupā maka.​—⁠Faka au 32:16; 1 Samuele 24:3; Sofonia 2:⁠6.

Te ʼu Tagata Tauhi Ōvi ʼe Nātou Lotolelei ʼo Taupau Te Faga Ōvi

3. ʼE gaohi feafeaʼi e te ʼu tagata ʼāfea Kilisitiano ʼaē neʼe fakanofo ia te faga ōvi ʼa te ʼAtua?

³ ʼE mole fakapunamaʼuli tatatou fiafia ʼi tatatou kau ki te faga ōvi ʼa te ʼAtua! Neʼe fakanofo te ʼu tagata ʼāfea ke nātou takitaki tatou. ʼE mole ko nātou “ko ni ʼu ʼaliki,” ʼe pule fakahau kia tatou, peʼe nātou faiga ke nātou puleʼi tatatou tui. (Faka au 16:13; Mateo 20:​25-28; 2 Kolonito 1:24; Hepeleo 13:⁠7) Kae, ko nātou ko te ʼu tagata tauhi ōvi manavaʼofa, ʼe nātou mulimuli ki te tokoni ʼaenī ʼa te ʼapositolo ko Petelo: “Koutou fafaga te faga ōvi ʼa te ʼAtua ʼaē ʼe koutou taupau, ʼaua naʼa koutou fai ʼaki he fakamaʼua ʼo koutou, kae ʼaki te lotolelei; ʼo mole koutou fai ʼuhi ko te manako ki te ʼu koloā heʼe faitotonu, kae ʼaki te fia fai fakavilivili; ʼo mole koutou fai ohage ko he ʼu hahaʼi ʼe pule kia nātou ʼaē ko te tōfiga ʼa te ʼAtua, kae ke koutou liliu ko ni ʼu faʼifaʼitakiʼaga ki te faga ōvi.” (1 Petelo 5:​2, 3) Neʼe ʼui fēnei e te ʼapositolo ko Paulo ki te ʼu tagata ʼaē neʼe kaugā gāue mo ia: “Koutou tokakaga kia koutou totonu pea mo te faga ōvi fuli, ʼaia kua fakanofo ai koutou e te laumālie maʼoniʼoni ko he kau tagata taupau, moʼo fafaga te kokelekasio ʼa te ʼAtua, ʼaē neʼe ina maʼu ʼaki te taʼataʼa ʼo tona ʼAlo totonu.” Koia ʼe loto fakafetaʼi te ʼu ōvi ʼo ʼuhiga mo te ʼu tagata ʼaia, ʼaē neʼe fakanofo ʼaki te laumālie maʼoniʼoni, koteʼuhi ʼe nātou “gaohi fakaleleiʼi te faga ōvi”!​—⁠Gāue 20:​28-30.

4. Neʼe ʼiloa feafeaʼi ia Charles T. Russell ʼi tana faʼahiga felogoi ʼaē mo te faga ōvi?

⁴ Neʼe foaki e Sesu ki te kokelekasio “te ʼu meʼa ʼofa ko te ʼu tagata,” ko ʼihi ko te ʼu “pasitea,” peʼe ko he ʼu tagata tauhi ōvi, ʼe nātou gaohi fakaleleiʼi te faga ōvi ʼa Sehova. (Efesi 4:​8, 11; King James Version) Neʼe kau ia Charles T. Russell, te ʼuluaki pelesita ʼo te Sosiete Watch Tower ki te ʼu faʼahiga tagata ʼaia. Neʼe fakahigoaʼi ia ia ko te Pasitea Russell ʼuhi ko te ʼu gāue ʼaē neʼe ina fai ʼaki he lotoʼofa pea mo manavaʼofa, moʼo fafaga ʼo te faga ōvi ʼi te takitaki ʼa te tagata Pule Tauhi Ōvi, ʼaē ko Sesu Kilisito. Ia ʼaho nei, ʼe fakanofo te ʼu tagata ʼāfea e te Kolesi Pule ʼo te kau Fakamoʼoni ʼa Sehova, pea ʼe tou tokakaga ke ʼaua naʼa tou fakaʼaogaʼi te ʼu faʼahiga kupu ohage ko “pasitea,” “tagata ʼāfea,” peʼe “faiako” ohage ko he ʼu higoa faka tuʼulaga. (Mateo 23:​8-12) Kae, ko te ʼu tagata ʼāfea ʼo te temi ʼaenī, ʼe nātou fai tanatou gāue tauhi ōvi ke fua lelei ki te faga ōvi ʼo te gāueʼaga ʼa Sehova.

5. He koʼe ʼe tonu ke ʼiloʼi e te hahaʼi ʼaē ʼe foʼofoʼou mai, ia te ʼu tagata ʼāfea ʼaē neʼe fakanofo ʼi te kokelekasio faka Kilisitiano?

⁵ ʼI tonatou ʼuhiga kau tagata tauhi ōvi, ʼe maʼuhiga te gāue ʼa te kau tagata ʼāfea ʼo ʼuhiga mo te tuputupu fakalaumālie ʼo te ʼu hahaʼi ʼaē ʼe foʼofoʼou mai ki te moʼoni. Koia, ko te tohi foʼou ʼaē ko Te ʼAtamai Mālama ʼAē ʼe Ina Taki Ki Te Maʼuli Heʼegata ʼe ina ʼui fēnei ʼi te pasina 168: “Koutou faiga ke koutou ʼiloʼi lelei pe ko ai te ʼu tagata ʼāfea ʼaē neʼe fili ʼi te kokelekasio. Kua nātou ʼiloʼi pe koteā te faka ʼuhiga ʼo te maʼuliʼi ʼo te ʼatamai mālama ʼo ʼuhiga mo te ʼAtua, koteʼuhi ʼe nātou maʼuliʼi te ʼu meʼa ʼaē ʼe fakamaʼua e te Tohi-Tapu ki te ʼu tagata taupau. (1 Timoteo 3⁠:​1-7; Tito 1⁠:​5-9) Ke ʼaua naʼa koutou fakameʼameʼa ʼi te fakaōvi ki he tahi ia nātou ʼaia, mokā ʼe ʼaoga kia koutou he tokoni fakalaumālie ke koutou līaki ai he agamāhani peʼe ko he aga ʼe fakafeagai ki te ʼu fakatotonu ʼa te ʼAtua. ʼE koutou tokagaʼi anai ʼe muliʼi e te ʼu tagata ʼāfea te tokoni ʼaenī ʼa te ʼapositolo ko Paulo: ‘Koutou fai he ʼu palalau fakafimālie ki te ʼu nefesi ʼaē ʼe lotovaivai, koutou lagolago kia nātou ʼaē ʼe vaivai, [pea] mo koutou maʼu te kātaki fualoa ki te hahaʼi fuli pe.’​—⁠1 Tesalonika 2⁠:​7, 8; 5⁠:⁠14.”

Ka ʼe Fia Fai Faka Mafola Te Hahaʼi Foʼou

6. Koteā te fakatuʼutuʼu ʼaē ʼe tonu ke tou mulimuli kiai mo kapau ko ia ʼaē ʼe ina ako te Tohi-Tapu, kua fia liliu ko he kaugā fai faka mafola ʼo te Puleʼaga?

⁶ Kapau ko he tahi neʼe ina ako te Tohi-Tapu, kua ina maʼu te ʼatamai mālama pea mo ʼalu ki te ʼu fono, e lagi kua fia liliu ia ko he kaugā fai faka mafola ʼo te Puleʼaga, ko he tahi ʼe ina faka mafola te logo lelei. (Maleko 13:10) Kapau koia ʼaia, pea ʼe tonu anai ki te tēhina pe ko te tuagaʼane ʼaē ʼe ina fai tana ako, ke ina fakaʼui ki te tagata taupau pelesita, pea ʼe fakatuʼutuʼu anai e te tagata taupau pelesita ke ʼolo he tagata ʼāfea ʼo te Komite ki te Gāue ʼo te Kokelekasio pea mo he tahi tagata ʼāfea, ʼo palalau mo ia ʼaē ʼe ina ako te Tohi-Tapu pea mo ia ʼaē ʼe ina fai tana ako. ʼE fakatafito anai te fai palalau ki te tohi Organisés pour bien remplir notre ministère, ʼi te pasina 98 pea mo te 99. Kapau ʼe sio te ʼu tagata ʼāfea ʼaia, kua tui ia ia ʼaē ʼe fia fai faka mafola ki te ʼu akonaki tāfito ʼo te Tohi-Tapu, pea mo ina maʼuliʼi te ʼu lekula ʼa te ʼAtua, pea ʼe nā fakahā age anai ki ai kua feala hana kau ki te fai faka mafola.a ʼI te temi ʼaē ʼe ina foaki ai tana pepa tānaki gāue, pea ʼe tohi anai tana gāue ʼaia ʼi te kate ʼe tohi ai tona higoa, ʼo tuku ʼi te ʼu tosie ʼo te kokelekasio. ʼI te temi leva ʼaia, kua feala ke ina foaki he pepa ʼe tuʼu ai tana gāue ʼi te fai faka mafola, ohage ko te lauʼi miliona hahaʼi ʼaē ʼe nātou ‘fakahā te folafola ʼa te ʼAtua’ ʼaki he loto fiafia. (Gāue 13:⁠5) ʼE fakahā anai ki te kokelekasio kua kau ia ia ki te kau fai faka mafola.

7, 8. Ko te ʼu faʼahi fea ʼo te minisitelio ʼe feala ke tou tokoni ai ki te kaugā fai faka mafola ʼaē mole heʼeki papitema?

⁷ ʼE ʼaoga ke tokoni te kau tagata ʼāfea pea mo ʼihi kau Kilisitiano kua fakapotopoto ʼi te faʼahi fakalaumālie ki te kaugā fai faka mafola ʼaē ʼe mole heʼeki papitema. Ohage la, ko ia ʼaē ʼe ina fai te Ako Tohi ʼo te kokelekasio ʼaē ʼe kau ki ai, ʼe tonu anai ke tokaga ki tana tuputupu ʼi te faʼahi fakalaumālie. ʼE lagi mata faigataʼa anai ki te kaugā fai faka mafola foʼou ʼaia, te palalau fakalelei ʼi te fai faka mafola ʼi te ʼu ʼapi. (Gāue 20:20) Koia e lagi ʼe ina leleiʼia anai he tokoni ʼe foaki age, pea ʼe ʼaoga ke fai tāfito te faʼahi ʼaia ʼe ia ʼaē ʼe ina fai tana ako ʼi te tohi Te ʼAtamai Mālama. ʼE ʼaoga te faʼahiga tokoni ʼaia, koteʼuhi neʼe teuteuʼi foki la e Sesu Kilisito tana kau tisipulo ki te minisitelio.​—⁠Maleko 6:​7-13; Luka 10:​1-22.

⁸ ʼE maʼuhiga ke tou teuteu fakatomuʼa mo kapau ʼe tou loto ke fua lelei totatou minisitelio. Koia, e lagi ʼuluaki fai muʼa e te ʼu kaugā fai faka mafola ʼaia e lua, te ʼu faʼifaʼitaki ʼaē ʼe tuʼu ʼi Te Minisitelio ʼo Te Puleʼaga, ʼaē ʼe tuku mai ʼi te māhina fuli. Ka kamata tanā fai faka mafola, ʼe feala ke fai te ʼuluaki matapā ʼe ia ʼaē kua māhani ʼi te fai faka mafola. ʼI te hili ʼo te fai fakamālo, pea ʼe feala leva ki te ʼu kaugā fai faka mafola ʼaia e lua ke nā fai te gāue. Kapau ʼe nā gāue fakatahi ʼi te minisitelio lolotoga he ʼu vāhaʼa, e lagi feala ke nā maʼu he ʼu ʼaʼahi, ʼo feiā aipe mo he ako Tohi-Tapu ʼe fai ʼaki te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Ko te kaugā fai faka mafola ʼaē kua faiva ʼi te gāue, ʼe feala ke ina fai te ako ʼi he kiʼi temi pea ʼe ina tuku age anai ki te kaugā fai faka mafola foʼou. ʼE ko he meʼa fakafiafia anai ki te toko lua ʼaia mo kapau ʼe fakahā ʼe ia ʼaē ʼe ina ako te Tohi-Tapu, tona loto fakafetaʼi ki te ʼatamai mālama ʼo ʼuhiga mo te ʼAtua!

9. Koteā te ʼu fakatuʼutuʼu ʼe fai mokā ʼe fia papitema he kaugā fai faka mafola?

⁹ ʼI te tuputupu ʼa te kaugā fai faka mafola ʼi te faʼahi fakalaumālie, ʼe feala ke ina foaki tona maʼuli ki te ʼAtua ʼi te faikole pea mo papitema. (Vakaʼi ia Maleko 1:​9-11.) Kapau kua fia papitema, pea ʼe tonu ke ina fakahā ki te tagata taupau pelesita ʼo te kokelekasio, pea ʼe fai anai e te tagata taupau pelesita he fakatuʼutuʼu ke ʼolo te ʼu tagata ʼāfea ʼo toe vakaʼi mo ia, te ʼu fehuʼi ʼaē ʼe tuʼu ʼi te ʼu pasina 175 ki te 218 ʼo te tohi Organisés pour bien remplir notre ministère. Kapau ʼe feala, pea ʼe fakatuʼutuʼu e te ʼu tagata ʼāfea e toko tolu, ke nātou vaheʼi tolu te ʼu koga e fā ʼaē ʼe tuʼu ai te ʼu fehuʼi. Kapau ʼe nātou tokagaʼi kua mahino lelei te kaugā fai faka mafola ki te ʼu akonaki ʼo te Tohi-Tapu pea kua ina maʼuliʼi te ʼu meʼa ʼaē ʼe ina akoʼi, ʼe nātou ʼui age anai ki ai kua feala hana papitema. ʼI tana foaki tona maʼuli ki te ʼAtua pea mo tana ʼalu ʼaē ʼo papitema, ʼe liliu anai ia ko he tahi kua ‘fakaʼiloga’ ki te maʼuli.​—⁠Esekiele 9:​4-6.

ʼE ʼAoga ʼAupito Te ʼu Fono

10. ʼE feafeaʼi anai he tuputupu ʼa he tahi ʼi te ʼatamai mālama ʼo ʼuhiga mo te Tohi-Tapu, ʼi tana ʼosi ako te tohi ʼo Te ʼAtamai Mālama pea mo papitema?

¹⁰ Ka ʼosi ako e he tahi te tohi ʼaē Te ʼAtamai Mālama pea mo papitema, e lagi mole kei ʼaoga ke ina toe ako he tahi age tohi mo ia, ohage la ko te tohi Unis dans le culte du seul vrai Dieu.b ʼE mahino ia, ko ia ʼaē neʼe hoki papitema ʼe lahi anai te ʼu meʼa ʼaē ka ina ako, ʼi tana teuteuʼi te ʼu fono faka Kilisitiano pea mo tana ʼalu tuʼumaʼu kiai. Tahi ʼaē meʼa, ʼe lahi anai tana toe mālama ki te tahi ʼu puani, mo kapau ko tana fia ako te moʼoni ʼe ina uga anai ia ia ke ina lau pea mo ina ako ʼāteaina te ʼu tohi faka Kilisitiano, pea mo palalau ki te ʼu manatu faka Tohi-Tapu mo tona ʼu kaugā fagona ʼi te tui. Kae koteā te meʼa ʼe feala ke fai mo kapau ʼe ʼaoga ki ai he tokoni?

11. (a) Koteā te tokoni neʼe foaki e Pilisila pea mo Akila kia Apolose? (b) Koteā te tokoni ʼe feala ke tou foaki ki he tahi neʼe hoki papitema pea kua fia ʼohoana?

¹¹ Tatau aipe mo Apolose, ʼaē “neʼe poto ʼi te fakaʼaogaʼi ʼo te Tohi-Tapu” pea neʼe faiakonaki lelei ʼo ʼuhiga mo Sesu, neʼe ina maʼu te fua lelei mai te ʼu Kilisitiano neʼe kua fakapotopoto ʼi te moʼoni ko Pilisila pea mo Akila, “neʼe nā ʼave ia ia pea neʼe nā fakamahino lelei age kia ia te ala ʼo te ʼAtua.” (Gāue 18:​24-26; vakaʼi ia Gāue 19:​1-7.) Koia, e lagi ko he tahi neʼe hoki papitema ʼe ina fakatuʼutuʼu anai ke fakatahi mo he tahi pea ke nā ʼohoana. ʼE feala ke tokoni ki ai he Kilisitiano kua fakapotopoto ʼi te faʼahi fakalaumālie, ke ina maʼu te ʼu manatu ʼo ʼuhiga mo te ʼu faʼahi ʼaia ʼi te ʼu tohi ʼa te Sosiete Watch Tower. Ohage la, ʼe feala ke ina maʼu he ʼu tokoni ʼo ʼuhiga mo te ʼu faʼahi ʼaia ʼi te tohi Les jeunes sʼinterrogent​—⁠Réponses pratiques, ʼi te faʼahi 7.c Ko ia ʼaē neʼe ina fai tana ako Tohi-Tapu, ʼe lagi feala anai ke palalau mo ia ki te alatike ʼaia, kae mole liliu anai te fai palalau ʼaia ko he ako ʼe fai tuʼumaʼu.

12. Koteā te ʼu tokoni ʼe feala ke tou foaki ki he taumatuʼa neʼe hoki papitema, ʼe tau mo te ʼu fihifihia ʼi tona maʼuli faka taumatuʼa?

¹² Tou vakaʼi te tahi faʼifaʼitaki. E lagi felāveʼi he taumatuʼa neʼe hoki papitema mo he ʼu fihifihia, heʼe faigataʼa tana mulimuli ki te ʼu pelesepeto fakaʼatua. ʼE feala ke nā ʼolo ki he tagata ʼāfea, pea ʼe feala anai ki te tagata ʼāfea ʼaia ke ina fakaʼaogaʼi tona temi ʼi he ʼu afiafi, ʼo vakaʼi mo nāua he ʼu vaega faka Tohi-Tapu, pea mo fakatokagaʼi ia nāua ki te ʼu manatu ʼaē ʼe maʼu ʼi te ʼu tohi ʼo te Sosiete Watch Tower. Kae, ʼe mole fai anai e te tagata ʼāfea he ako Tohi-Tapu mo te taumatuʼa ʼaia.

Kapau Ko Ia ʼAē Neʼe Hoki Papitema ʼe Ina Fai He Hala

13. He koʼe ʼe tonu ke manavaʼofa te ʼu tagata ʼāfea ʼo te kokelekasio kia ia ʼaē neʼe hoki papitema, mokā agahala kae ʼe loto fakahemala?

¹³ ʼE mulimuli te ʼu tagata ʼāfea ki te faʼifaʼitaki ʼo te Tagata Tauhi Ōvi Lahi, ko Sehova, ʼaē ʼe ina ʼui fēnei: “ ʼE ʼau fafaga tonu anai taku faga ōvi, . . . ʼe ʼau faitoʼo anai te ōvi ʼaē ʼe lavea pea ʼe ʼau toe fakamālohiʼi anai ia ia ʼaē kua mahaki.” (Esekiele 34:​15, 16; Efesi 5:⁠1) ʼO mulimuli ki te manatu ʼaia, neʼe tokoniʼi e te tisipulo ko Suta ke fakahā he loto manavaʼofa ki te kau Kilisitiano fakanofo ʼaē kua lotolotolua, pea mo nātou ʼaē neʼe agahala. (Suta 22, 23) Kapau ʼe fakamaʼua ke lahi te fakapotopoto ʼa te kau Kilisitiano ʼaē kua fualoa ʼi te moʼoni, ʼe mahino ia ʼe tonu ke fakahā te manavaʼofa kia ia ʼaē neʼe hoki papitema,​—⁠heʼe ko te ōvi,⁠—​pea ʼe loto fakahemala. (Luka 12:48; 15:​1-7) Koia ko te ʼu tagata ʼāfea ʼaē ʼe nātou ‘faifakamāu maʼa Sehova,’ ʼe nātou gaohi fakalelei anai te ʼu ōvi ʼaia, pea mo tokakaga lelei pea mo fakatonutonuʼi nātou ʼaki te agamālū.​—⁠2 Fakamatala 19:6; Gāue 20:​28, 29; Kalate 6:⁠1.d

14. Koteā te meʼa ʼaē ʼe tonu ke fai, mokā fai e he kaugā fai faka mafola neʼe hoki papitema he agahala mamafa, pea koteā te ʼu tokoni ʼe feala ke foaki ki ai?

¹⁴ Kae kapau ko te kaugā fai faka mafola ʼaē neʼe hoki papitema neʼe ko he tahi neʼe ʼinu kava ʼi te temi muʼa, pea neʼe toe tō ki te hala ʼaia ʼo tuʼa tahi peʼe tuʼa lua. Peʼe lagi kua fualoa tana tuku tana suluka, pea neʼe toe tō ki te hala ʼaia ʼo suluka fakafūfū ʼo tuʼa tahi peʼe lua. Tatau aipe pe neʼe kole e te tēhina foʼou ʼaia ki te ʼAtua ke ina fakamolemole te meʼa ʼaē neʼe ina fai, ʼe tonu ke ʼalu ki he tagata ʼāfea ke tokoni age kia ia, ke ʼaua naʼa liliu te agahala ʼaia ko hana agamāhani. (Pesalemo 32:​1-5; Sake 5:​14, 15) Kapau ʼe ina fakahā tana hala ʼaia ki he tagata ʼāfea, pea ʼe faiga anai te tagata ʼāfea ʼaia ke ina fakatonutonuʼi ia ia ʼaki he loto manavaʼofa. (Pesalemo 130:⁠3) ʼE lagi feʼauga anai te tokoniʼi ʼo ia ʼaki te Tohi-Tapu ke feala hana fakatonutonuʼi tona ala. (Hepeleo 12:​12, 13) ʼE palalau anai te tagata ʼāfea ʼaia mo te tagata taupau pelesita ʼo te kokelekasio, ke nā vakaʼi pe koteā te tahi ʼu meʼa ʼe feala ke fai moʼo tokoni ki ai.

15. ʼI ʼihi lakaga, koteā anai te meʼa ʼaē ʼe ʼaoga ke fai, mo kapau ʼe agahala he tahi neʼe hoki papitema?

¹⁵ ʼI ʼihi lakaga ʼe mole tonu ke gata ʼaki pe te ʼu faʼahiga tokoni ʼaia. Kapau ʼe fakatupu tuʼutāmaki tana agahala ki te faga ōvi, peʼe kau kiai mo niʼihi faigataʼaʼia mamafa, ʼe hinoʼi anai e te kolesi ʼo te ʼu tagata ʼāfea he ʼu tagata ʼāfea e lua ke nā sivi te faʼahi ʼaia. Kapau ʼe fakatokagaʼi e te ʼu tagata ʼāfea ʼaia ko te fihifihia ʼe mamafa, pea ʼe ʼaoga ke fakatuʼutuʼu he komite faifakamāu, ʼe tonu ke nātou fakahā te faʼahi ʼaia ki te kolesi ʼo te ʼu tagata ʼāfea. Koia ko te kolesi ʼo te ʼu tagata ʼāfea ʼe ina hinoʼi anai he komite faifakamāu moʼo tokoniʼi ʼo ia ʼaē neʼe agahala. ʼE tonu anai ke gaohi fakaleleiʼi ia ia e te komite faifakamāu ʼaia. ʼE tonu ke nātou faiga ke nātou fakatonutonuʼi ia ia ʼaki te Tohi-Tapu. Kapau ʼe ina tali lelei te ʼu tokoni ʼofa ʼa te komite faifakamāu, ʼe nātou vakaʼi anai peʼe feala hana fai he akonaki ʼi te Fale ʼo te Puleʼaga pea mo fai hana ʼu tali ʼi te ʼu fono.

16. Koteā te meʼa ʼe feala ke fai e te ʼu tagata ʼāfea moʼo tokoni kia ia ʼaē neʼe agahala?

¹⁶ Kapau ʼe tali lelei e ia ʼaē neʼe agahala te ʼu tokoni ʼaē ʼe foaki age, ʼe feala ke fakatuʼutuʼu e he tagata ʼāfea peʼe ko he toko lua ʼo te komite faifakamāu ke nā ʼaʼahi ia ia ʼi te gāue faka tauhi ōvi, moʼo fakaloto mālohiʼi ʼo tana tui pea mo toe fakatupu ia ia tana loto fakafetaʼi ki te ʼu lekula faitotonu ʼa te ʼAtua. ʼI ʼihi temi, ʼe feala ke nā gāue mo ia ʼi te fai faka mafola. ʼE feala ke nā fai he ʼu fai palalau faka Tohi-Tapu mo ia, ʼo nā fakaʼaogaʼi te ʼu alatike ʼo Te Tule Leʼo pea mo te Réveillez-vous! ʼaē ʼe ʼaoga ki tona fihifihia, kae ʼe mole nā fakatuʼutuʼu anai ke nā fai hana ako Tohi-Tapu ʼi te vāhaʼa fuli. ʼAki te faʼahiga tokaga ʼaia, ʼe feala ke fakaloto mālohiʼi ai ia ia ʼaē neʼe agahala, ke ina tauʼi te ʼu vaivaiʼaga ʼo te kakano mokā toe hoko mai.

17. Koteā te ʼu meʼa ʼe tonu ke fai mo kapau neʼe agahala he tahi kua papitema, kae mole fakahemala pea mo ina līaki tana agahala?

¹⁷ ʼE mahino ia, kapau neʼe mole heʼeki faʼa fualoa takita papitema, ʼe mole ko he takuʼaki ʼaia moʼo fakahoko ʼo he agahala. (Hepeleo 10:​26, 27; Suta 4) Kapau ko he tahi kua papitema pea ina fai he agahala kae mole fakahemala pea mo ina līaki tana agahala, ʼe fakamavae anai ia ia ʼi te kokelekasio. (1 Kolonito 5:​6, 11-13; 2 Tesalonika 2:​11, 12; 2 Soane 9-11) Kapau ʼe ʼaoga ke fakahoko te faʼahi ʼaia, ʼe fili anai e te kolesi pule ʼo te ʼu tagata ʼāfea he komite faifakamāu. Kapau ʼe hoko he fakamavae, ʼe tonu anai ke fakahā fakanounou te logo ʼaia ki te kokelekasio ʼo ʼui fēnei: “Ko . . . kua fakamavae.”e

Tou Tokoni Kia Nātou Ke Nātou “Laka Fakavilivili Ki Te ʼUhiga Hahaʼi Lalahi”

18. He koʼe ʼe tou ʼiloʼi papau ko te kau Kilisitiano ʼaē neʼe hoki papitema pea mo ʼihi age, ʼe lahi anai te ʼu meʼa ʼe nātou ako ʼo ʼuhiga mo Sehova pea mo tona finegalo?

¹⁸ Ko te tokolahi ʼo te kau kaugana ʼa te ʼAtua ʼe nātou nonofo anai ʼi tana faga ōvi. Meʼa lelei foki la, heʼe feala anai kia tatou fuli ke tou fakaōvi ki tatatou Tāmai ʼaē ʼe ʼi selo, koteʼuhi ʼe lahi anai te ʼu meʼa ʼaē ka tou ako ʼo ʼuhiga mo ia pea mo tona finegalo. (Tagata Tānaki 3:11; Sake 4:⁠8) ʼE mahino ia, ko te lauʼi afe hahaʼi ʼaē neʼe papitema ʼi te Penikosite ʼo te taʼu 33 ʼo totatou temi, neʼe kei lahi te ʼu meʼa ʼaē neʼe tonu ke nātou akoʼi. (Gāue 2:​5, 37-41; 4:⁠4) Neʼe ko te meʼa ʼaia ʼaē neʼe fai e te kau Senitile, he neʼe mole nātou ʼiloʼi he meʼa ʼo ʼuhiga mo te Tohi-Tapu. Ohage la, ko te meʼa ʼaia neʼe hoko moʼoni kia nātou ʼaē neʼe papitema ʼi te hili ʼo te faiakonaki ʼa Paulo ʼi te Aréopage ʼi Ateni. (Gāue 17:​33, 34) ʼO toe feiā pe la, ia ʼaho nei, ko te hahaʼi ʼaē neʼe hoki papitema ʼe kei lahi te ʼu meʼa ʼe ʼaoga ke nātou ako, pea ʼe ʼaoga kia nātou he temi pea mo he tokoni moʼo fakaloto mālohiʼi ʼo nātou, ke nātou haga fai te meʼa ʼaē ʼe totonu ia mata ʼo te ʼAtua.​—⁠Kalate 6:9; 2 Tesalonika 3:⁠13.

19. ʼE lava feafeaʼi hatatou tokoni kia nātou ʼaē neʼe hoki papitema ke nātou “laka fakavilivili ki te ʼuhiga hahaʼi lalahi”?

¹⁹ ʼI te taʼu fuli ʼe papitema te lauʼi afe hahaʼi, pea ʼe ʼaoga ke tou tokoni kia nātou ke feala hanatou “laka fakavilivili ki te ʼuhiga hahaʼi lalahi.” (Hepeleo 6:⁠1-3) ʼAki te ʼu palalau, te faʼifaʼitaki, pea mo te tokoni ʼaoga ʼi te minisitelio, ʼe feala ke koutou tokoni ki niʼihi ke nātou kofuʼi te ʼuhigaʼi tagata foʼou pea mo nātou “haga haʼele ʼi te moʼoni.” (3 Soane 4; Kolose 3:​9, 10) Kapau ko koutou ko he kaugā fai faka mafola kua fakapotopoto ʼi te faʼahi fakalaumālie, e lagi feala ke kole atu e te kau tagata ʼāfea, ke koutou tokoni ki he tahi ʼe foʼofoʼou ʼi te gāue fai faka mafola, peʼe ke koutou palalau mo ia ki he ʼu puani faka Tohi-Tapu lolotoga he ʼu vāhaʼa, moʼo fakaloto mālohiʼi ʼo tana tui ki te ʼAtua, ke fakaʼāsili age tana leleiʼia ia te ʼu fono faka Kilisitiano, pea mo te tahi ʼu meʼa ʼi te faʼahi fakalaumālie. Ko te ʼu felogoi ʼa te ʼu tagata tauhi ōvi mo te faga ōvi, ʼe hage ko he tāmai ʼe ina foaki he palalau fakaloto mālohi pea mo he faʼe ʼe agalelei. (1 Tesalonika 2:​7, 8, 11) Kae, ʼe mole feala ke tokakaga te ʼu tagata ʼāfea pea mo te ʼu tagata faifekau faka minisitelio ki te ʼu meʼa fuli ʼaē ʼe ʼaoga ki te kokelekasio. Ko tatou fuli ʼe tou hage ko he famili ʼe fetokoniʼaki. ʼE feala ke tou fai takitokotahi he meʼa moʼo tokoni ki ʼotatou ʼu kaugā fagona ʼi te moʼoni. Mo koutou foki, ʼe feala ke koutou foaki he ʼu palalau fakaloto mālohi, moʼo fakafimālieʼi ʼo ia ʼaē ʼe lotovaivai, pea mo lagolago kia ia ʼaē ʼe vaivai.​—⁠1 Tesalonika 5:​14, 15.

20. Koteā te meʼa ʼe feala ke koutou fai moʼo faka mafola ʼo te ʼatamai mālama ʼo ʼuhiga mo te ʼAtua, pea mo gaohi fakaleleiʼi te faga ōvi ʼo te gāueʼaga ʼa Sehova?

²⁰ ʼE ʼaoga ki te malamanei te ʼatamai mālama ʼo ʼuhiga mo te ʼAtua, pea ʼi tokotou ʼuhiga kau Fakamoʼoni ʼa Sehova, ʼe feala ke koutou kau fakafiafia ki te faka mafola ʼo te ʼatamai mālama ʼo ʼuhiga mo te ʼAtua. ʼE tonu ke gaohi fakalelei te ʼu ōvi ʼa Sehova, pea ʼe feala ke koutou fai te faʼahi ʼaia ʼaki te ʼofa, ʼo koutou lagolago ki te fakahoko ʼo te faʼahi ʼaia. ʼOfa pe ke tapuakina e Sehova tokotou minisitelio, pea ke ina fakapale koutou ʼuhi ko takotou ʼu faiga fakamalotoloto moʼo tokoni ki te faga ōvi ʼo tana gāueʼaga.

[Nota ʼi te lalo pasina]

ʼE Feafeaʼi Anai Hakotou Tali?

◻ ʼE gaohi feafeaʼi e Sehova tana faga ōvi?

◻ Koteā te meʼa ʼaē ʼe tonu ke fai mo kapau kua fia kau he tahi ki te fai faka mafola?

◻ Koteā te ʼu tokoni ʼe feala ke foaki e te ʼu kaugā fagona ʼi te tui kia nātou ʼaē neʼe hoki papitema?

◻ Koteā te tokoni ʼaē ʼe feala ke foaki e te ʼu tagata ʼāfea kia nātou ʼaē neʼe agahala kae nātou maʼu te loto fakahemala?

◻ ʼE lava feafeaʼi hakotou tokoni ki he tahi neʼe hoki papitema ke “laka fakavilivili ki te ʼuhiga hahaʼi lalahi”?

[Paki ʼo te pasina 16]

Neʼe ʼiloa ia Charles Russell ko he tagata tauhi ōvi ʼe ʼofa ki te faga ōvi

[Paki ʼo te pasina 18]

Ko te ʼu tagata ʼāfea loto manavaʼofa, ʼe nātou gaohi fakaleleiʼi te faa ōvi ʼa te ʼAtua