Ko Te Kau Faka Mafola ʼo Te Puleʼaga ʼe Nātou Fakamatala
ʼE Nātou “Mū Ohage Ko He ʼu Mālama ʼi Te Malamanei”
KO TE KAU FAKAMOʼONI ʼA SEHOVA ʼe ʼiloga lelei ia nātou pea ʼe tautau fai he ʼu fakamatala kovi ʼo ʼuhiga mo nātou, ʼuhi ko tanatou mole tali te ʼu foʼi huki toto. Kae, ko te faʼahi ʼaia, ʼe fakatafito mālohi ki te Tohi-Tapu. ʼE hā mai ai ko te ʼAtua ʼe ina tauteaʼi te fakaʼaogaʼi kovi ʼo te toto, koteʼuhi ʼe maʼuhiga te toto ki ʼona mata. (Senesi 9:3, 4; Levitike 17:14) ʼI tanatou sivi te Tohi-Tapu ʼo ʼuhiga mo te faʼahi ʼaia, ʼe ʼui e te kau Fakamoʼoni ʼa Sehova ko te fakatotonu ʼa te Tohi-Tapu ʼaē ke ‘fakamamaʼo mai te toto’ ʼe hā lelei mai ai, ʼe kau kiai te fakaʼaogaʼi ʼo te ʼu foʼi huki toto ʼi te temi nei.—Gāue 15:19, 20, 28, 29.
ʼI te ʼu taʼu ʼaenī kua hili, neʼe lagolago te ʼu tōketā, ʼo feiā aipe ki te ʼu telepinale ʼo ʼihi ʼu fenua, ki te kau Fakamoʼoni ʼa Sehova ʼo ʼuhiga mo te fehuʼi ʼaia. Ohage la, ko he faʼe kei finemui ʼi Tanemaka ʼaē neʼe ina ʼiloʼi te manatu ʼa te Tohi-Tapu ʼo ʼuhiga mo te toto, neʼe mate ʼuhi he neʼe fakaʼī e te motokā. ʼUhi ko tana mole tali te foʼi huki toto, neʼe fakafeagai tana ʼu tōketā ʼi te māhina katoa ki te kau Fakamoʼoni ʼa Sehova ʼaki te sulunale, te televisio, pea mo te lātio.
Neʼe kole e te ʼu mātuʼa ʼa te fafine ke fai he kumi ʼo ʼuhiga mo te tupuʼaga ʼo tona mate, pea ʼi ʼApelili ʼo te taʼu 1994 neʼe fakahā te tonu e te Kautahi ʼAē ʼe Ina Sivi Te ʼu Tukugakoviʼi ʼo ʼUhiga Mo Te ʼu Mahaki ʼi Tanemaka. Neʼe ina tala ai neʼe mate te fafine, mole ʼuhi ko tana fakafisi ʼaē ki te toto, kae ʼuhi ko te mole lelei ʼo te gāue ʼa te ʼu tōketā. Neʼe fakatafito te tonu ʼaia ki te ʼu kumi ʼaē neʼe fai e te Kautahi ʼo ʼUhiga Mo Te ʼu Meʼa Faka Tōketā, pea mo te ʼu takitaki ʼaē ʼe tokakaga ki te maʼuli mālōlō. ʼI te tohi neʼe fai ki te hahaʼi ʼaē ʼe tokakaga ki te maʼuli mālōlō ʼi Tanemaka, neʼe tala e te Kautahi Faka Puleʼaga ʼo ʼUhiga Mo Te Maʼuli Mālōlō, ko te maʼua ʼo te ʼu tōketā, ko te foaki ʼo te faitoʼo ʼaē ʼe lelei ki te kau Fakamoʼoni ʼa Sehova, ʼo nātou fakaʼapaʼapa ki tanatou mole tali te foʼi huki toto.
Koʼeni te tahi faʼifaʼitaki ʼo te tama ko Dan, ko he Fakamoʼoni neʼe mate ʼi tona taʼu 15, ʼuhi ko te mahaki ʼaē ko te leucémie. ʼI te faʼahi ʼaia, neʼe fakaʼapaʼapa te ʼu tōketā ki te tonu lototoʼa ʼaē neʼe fai e Dan ʼi tana fakafisi ʼaē ki te foʼi huki toto. Ko te meʼa ʼaia neʼe mafola ʼo hoko ai mo te tukugakoviʼi ʼo te ʼu tōketā e te ʼu sulunale, mo te televisio, pea mo te lātio ʼo ʼuhiga mo te mate ʼo Dan. Kae, ʼe tokolahi neʼe mole nātou lototahi mo te ʼu talanoa kovi ʼaia.
Ohage la, ko te tagata pule ʼo te faleako ʼaē neʼe ako ai ia Dan neʼe ʼalu ia ki te Fale ʼo te Puleʼaga ʼo fakalogo ki te akonaki ʼo tona ʼavaifo. Neʼe ina fakahā tana punamaʼuli ʼi te ʼu logo heʼe faitotonu ʼaē neʼe fakamatala ʼo ʼuhiga mo te mate ʼo Dan. ʼI tana ʼosi fakaōvi ki tona kaugā gāue Fakamoʼoni ʼo fai ki ai tana ʼu tuʼuga fehuʼi ʼo ʼuhiga mo te kau Fakamoʼoni ʼa Sehova, neʼe ina tali te foʼi fime viteo Les Témoins de Jéhovah: un nom, une organisation. Neʼe punamaʼuli ia ʼi tana sioʼi te foʼi fime viteo ʼaia, ʼo ina fakatuʼutuʼu ai ke sioʼi e te kau faiako katoa ʼo te faleako. Ki muli age, neʼe fakahā te foʼi fime viteo ʼaia ki te kau ako fuli, ʼi te ʼu kalasi fuli.
Ko te minisi ʼo ʼuhiga mo te maʼuli mālōlō ʼi Tanemaka neʼe mole ina leleiʼia foki te tukugakoviʼi ʼaē neʼe fai ki te ʼu tōketā ʼa Dan. Neʼe ina ʼui neʼe fai e te ʼu tōketā te meʼa ʼaē neʼe tonu ke nātou fai, ʼi tanatou fakaʼapaʼapa ki te tonu fakapotopoto ʼaē neʼe fai e Dan, pea ko tana tui neʼe fakatafito ki te ʼu manatu ʼe lelei.
ʼE lauʼi miliona te hahaʼi fai faka mafola ʼo te Puleʼaga ʼe nātou fakahā tanatou fakalogo ki te ʼu lao ʼa te ʼAtua. ʼUhi ko tanatou fakalogo, ʼe nātou ʼiloga lelei, ʼo nātou “mū ohage ko he ʼu mālama ʼi te malamanei.”—Filipe 2:12, 15.