Kua Ōvi Mai Te Mālo ʼo Te Tauhi Moʼoni

“ ʼE liliu anai ia Sehova ko te hau ʼo te kele katoa.”​—Sakalia 14:9.

1. Koteā te meʼa ʼaē neʼe hoko ki te kau Kilisitiano fakanofo ʼi te ʼUluaki Tau Faka Malamanei, pea neʼe fakakikite feafeaʼi te faʼahi ʼaia?

LOLOTOGA te ʼuluaki tau faka malamanei, neʼe hoko te ʼu ʼahiʼahi ki te kau Kilisitiano fakanofo pea neʼe pilisoniʼi nātou ʼi te ʼu fenua ʼaē neʼe fetauʼaki ai te hahaʼi. Ko tanatou ʼu sakilifisio fakavikiviki kia Sehova neʼe lahi ʼaupito tona faka tuʼakoi, pea neʼe nātou tō ai ki he ʼaluʼaga fakapōpula ʼi te faʼahi fakalaumālie. Ko te ʼu meʼa fuli ʼaia neʼe fakakikite ia Sakalia 14:2, ʼe talanoa ai ki te ʼohofi katoa ʼo Selusalemi. Ko te kolo ʼaē ʼe talanoa kiai te lea faka polofeta ʼaia, ʼe ko te “Selusalemi ʼaē ʼi selo,” te Puleʼaga ʼo te ʼAtua ʼaē ʼe ʼi selo pea ʼe ko te tuʼuʼaga ʼo “te hekaʼaga faka hau ʼo te ʼAtua pea mo te Akeno.” (Hepeleo 12:22, 28; 13:14; Fakahā 22:3) Ko te hahaʼi fakanofo ʼa te ʼAtua ʼaē neʼe nonofo ʼi te kele neʼe nātou fakatātā te kolo ʼaia. Ko te hahaʼi faitotonu neʼe nātou hāo ʼi te ʼohofi ʼaē neʼe hoko, pea neʼe mole nātou fia mavae “mai te kolo.”a

2, 3. (a) Neʼe mālo feafeaʼi te tauhi ʼa Sehova talu mai te taʼu 1919? (b) Talu mai te taʼu 1935, koteā te meʼa ʼaē kua hoko?

² ʼI te taʼu 1919 neʼe faka ʼāteaina te kau fakanofo agatonu mai tonatou ʼaluʼaga popūla, pea ʼi te moʼi temi pe ʼaia neʼe nātou fakaʼaogaʼi ai te faigamālie ʼo te temi tokalelei ʼi te hili ʼo te tau. ʼI tonatou ʼuhiga kau fakafofoga ʼo te Selusalemi ʼaē ʼe ʼi selo, neʼe nātou fakaʼaogaʼi te fealagia lahi ʼaē ko te faka mafola ʼo te logo lelei ʼo te Puleʼaga ʼo te ʼAtua, pea mo tokoni ki te tānaki ʼo te toe ʼo te toko 144 000. (Mateo 24:14; 2 Kolonito 5:​20) ʼI te taʼu 1931, neʼe nātou toʼo te higoa faka Tohi-Tapu ʼaē ko te kau Fakamoʼoni ʼa Sehova.​—Isaia 43:10, 12.

³ Talu mai ai, neʼe haga haʼele aipe te kau Fakamoʼoni ʼaē neʼe fakanofo e te ʼAtua ki muʼa. Māʼiape la mo Itilele pea mo tana kautau Nasi, neʼe mole feala ke nātou tāʼofi te gāue ʼa te kau Fakamoʼoni ʼaia. Logope la tonatou fakatagaʼi ʼi te malamanei katoa, neʼe fua lelei tanatou gāue ʼi te kele katoa. Tāfito ʼi te taʼu 1935, neʼe fakatahitahi kia nātou te “toe hahaʼi tokolahi” mai te ʼu fenua kehekehe, ohage ko tona fakakikite ʼi te tohi Fakahā. Ko te kau Kilisitiano ʼaia kua nātou foaki tonatou maʼuli ki te ʼAtua, pea mo nātou papitema, pea kua nātou “fō ʼonatou ʼu kofu loloa pea mo nātou fakahihina ʼi te taʼataʼa ʼo te Akeno,” ʼaē ko Sesu Kilisito. (Fakahā 7:​9, 14) Kae, ko te toe hahaʼi tokolahi ʼaia ʼe mole ko he kau fakanofo, ʼo nātou maʼu te ʼamanaki ʼaē ke ʼolo ʼo maʼuʼuli ʼi selo. ʼE nātou ʼamanaki ke nātou maʼu te tofiʼa ʼaē neʼe pulihi e Atama mo Eva, ko tona faka ʼuhiga, ko te maʼuli haohaoa ʼi te palatiso ʼi te kele. (Pesalemo 37:29; Mateo 25:34) Ia ʼaho nei, ko te toe hahaʼi tokolahi ʼe lau ko te toko nima miliona tupu. Ko te tauhi moʼoni ʼa Sehova ʼe lolotoga mālo, kae ʼe mole heʼeki hoko tona mālo fakaʼosi.

Te Kau Matāpule ʼi Te Fale Lotu Fakalaumālie ʼo Te ʼAtua

4, 5. (a) ʼE tauhi ʼifea te toe hahaʼi tokolahi kia Sehova? (b) Koteā te ʼu pilivilesio ʼaē ʼe nātou maʼu, pea ʼe nātou fakahoko te lea faka polofeta fea?

⁴ Ohage ko te meʼa ʼaē neʼe fakakikite, ko te toe hahaʼi tokolahi ʼe nātou foaki “te tauhi taputapu [ki te ʼAtua] ʼi te ʼaho mo te po ʼi tona fale lotu.” (Fakahā 7:​15, te kiʼi nota ʼi te lalo pasina) Mai tona ʼaluʼaga ʼaē ko nātou ʼe mole ko he kau Iselaelite fakalaumālie pea mo pelepitelo, koia ʼe mahino ia neʼe sio ia Soane kia nātou ʼe nātou tutuʼu ʼi te fale lotu ʼi te malaʼe ʼaē ʼe tuʼu ʼi tuʼa ʼo te kau Senitile. (1 Petelo 2:5) Neʼe faka kolōliaʼi ai te fale lotu fakalaumālie ʼo Sehova, pea neʼe fakahahaʼi ʼona tafaʼaki e te toe hahaʼi tokolahi, ʼo nātou fakavikiviki fakatahi kia te ia mo te toe ʼo te Iselaele fakalaumālie!

⁵ Ko te toe hahaʼi tokolahi ʼaē ʼe mole nātou tauhi ki te ʼAtua ohage ko he ʼu foha fakalaumālie, neʼe fakatātā e te malaʼe faka pelepitelo ʼaē neʼe tuʼu ʼi loto ʼo te fale lotu. ʼE mole lau ko nātou ko te hahaʼi faitotonu ke nātou liliu ko he ʼu foha ʼe vaheʼi e te ʼAtua, ko hona ʼu foha fakalaumālie. (Loma 8:​1, 15) Kae, ʼi tanatou tui ki te totogi ʼaē neʼe foaki e Sesu, ʼe nātou maʼa ia muʼa ʼo Sehova. ʼE lau ko nātou ko te ʼu hahaʼi faitotonu, ko tona ʼu kaumeʼa. (Vakaʼi ia Sake 2:​21, 23.) Tahi ʼaē meʼa, ʼe nātou maʼu te pilivilesio ʼaē ko te foaki ʼo he sakilifisio ʼe lelei ki te ʼaletale fakalaumālie ʼo te ʼAtua. Koia, ʼo ʼuhiga mo te toe hahaʼi tokolahi ʼaia, ʼe hoko kiai te fakahoko faka kolōlia ʼo te lea faka polofeta ʼaē ia Isaia 56:​6, 7: “Ko te kau matāpule ʼaē neʼe fakatahitahi kia Sehova ke feala hanatou tauhi kia te ia pea mo nātou ʼofa ki te huafa ʼo Sehova, . . . ʼe ʼau ʼaumai anai nātou ki toku moʼuga maʼoniʼoni pea ʼe ʼau fakafiafia anai nātou ʼi toku fale faikole. ʼE ʼau tali anai tanatou ʼu holokoseta pea mo tanatou ʼu sakilifisio ʼi toku ʼaletale. Heʼe ko toku fale ʼe fakahigoa anai ko te fale faikole maʼa te hahaʼi fuli.”

6. (a) Koteā te ʼu faʼahiga sakilifisio ʼaē ʼe foaki e te kau matāpule? (b) Ko te foʼi tane vai ʼaē neʼe tuku ʼi te malaʼe ʼa te kau pelepitelo, ʼe ina fakamanatuʼi teā ki te kau matāpule ʼaia?

⁶ ʼI te ʼu sakilifisio ʼaia ʼe fai e te kau matāpule, ʼe kau kiai “te fua ʼo te ʼu laugutu [ohage ko te ʼu mōlaga pulapula ʼaē neʼe teuteuʼi fakalelei] ʼaē ʼe nātou fagonogono ki te huafa [ʼo te ʼAtua]” pea mo tanatou “fai te meʼa ʼaē ʼe lelei pea mo vaevae mo niʼihi.” (Hepeleo 13:15, 16) Tahi ʼaē meʼa, ko te foʼi tane vai lahi ʼaē neʼe tonu ke fakaʼaogaʼi e te ʼu pelepitelo moʼo fakamaʼa ʼo nātou, ʼe ko he fakamanatu maʼuhiga ki te kau matāpule ʼaia. ʼE toe maʼua foki mo nātou ke nātou maʼa ʼi te faʼahi fakalaumālie pea mo tanatou ʼu aga, ʼi tanatou mahino māmālie ki te Folafola ʼa te ʼAtua.

Te Potu Tapu Pea Mo Tona ʼu Agaaga

7. (a) ʼE faka ʼuhiga feafeaʼi e te toe hahaʼi tokolahi te ʼu pilivilesio ʼo te kau pelepitelo maʼoniʼoni? (b) Koteā te tahi ʼu pilivilesio ʼaē neʼe foaki ki ʼihi kau matāpule?

⁷ ʼE ʼi ai koa he faka ʼuhiga ʼo te Potu Tapu pea mo tona ʼu agaaga ki te toe hahaʼi tokolahi ʼaē ko te kau matāpule? ʼE mole feala anai ke nātou maʼu te ʼaluʼaga ʼaē ʼe fakatātā e te Potu Tapu. ʼE mole nātou toe tutupu ohage he ʼu foha fakalaumālie ʼo te ʼAtua ke nātou ʼolo ʼo maʼuʼuli ʼi selo. ʼE tupu ai koa hanatou maheka pea mo hanatou mānumānu kiai? Kailoa. Kae, ʼe nātou leleiʼia tonatou pilivilesio ʼaē ko te lagolago ki te toe ʼo te toko 144 000, pea ʼe nātou loto fakafetaʼi ki te fakatuʼutuʼu ʼa te ʼAtua ke ina taupau te ʼu foha fakalaumālie ʼaia, ʼaē ka nātou kau anai mo Kilisito ki te faka fealagia ki te malamanei ke nātou maʼu te maʼuli haohaoa. Tahi ʼaē meʼa, ko te toe hahaʼi tokolahi ʼo te kau matāpule ʼe nātou leleiʼia te agalelei lahi ʼo te ʼAtua ʼi tana foaki kia nātou te ʼamanaki ʼaē ke nātou maʼuli ʼo heʼegata ʼi te Palatiso. Ko ʼihi ʼi te kau matāpule ʼaia, ohage ko te kau Netinime ʼo te temi muʼa, ʼe nātou maʼu te ʼu pilivilesio ʼaē ko te lagolago ki te kau pelepitelo maʼoniʼoni ʼo ʼuhiga mo te gāue taupau.b (Isaia 61:5) Ia nātou ʼaia ʼe fakanofo e Sesu “te ʼu tama ʼaliki ʼi te kele katoa.”​—Pesalemo 45:16.

8, 9. Koteā ʼaē ʼe ʼaoga ai ke tokagaʼi e te toe hahaʼi tokolahi te ʼu agaaga ʼo te Potu Tapu?

⁸ Logope la ʼe mole nātou hū anai ki te Potu Tapu ʼo te temi ʼaenī, ko te toe hahaʼi tokolahi ʼo te kau matāpule ʼe nātou maʼu te ʼu ako maʼuhiga mai te ʼu agaaga ʼo te Potu Tapu ʼaia. Ohage pe ko te ʼaoga tuʼumaʼu ʼaē ke fakafonu te lolo ʼo te tuʼulaga mālama, ʼo toe feiā aipe ʼe ʼaoga ke maʼu e te kau matāpule te laumālie maʼoniʼoni, moʼo tokoni kia nātou ke nātou mahino māmālie ki te ʼu moʼoni ʼo te Folafola ʼa te ʼAtua ʼaē ʼe foaki mai e “te tagata kaugana agatonu mo poto.” (Mateo 24:45-​47) Tahi ʼaē meʼa, ko te laumālie ʼo te ʼAtua ʼe tokoni kia nātou ke nātou tali te fakaafe ʼaenī: “Ko te laumālie pea mo te fafine ʼohoana [te toe ʼo te kau fakanofo] ʼe nā ʼui tuʼumaʼu: ‘Haʼu!’ Pea ko ʼaē ʼe fagono ke ina ʼui fēnei: ‘Haʼu!’ Pea ko ʼaē ʼe fia ʼinu ke haʼu; ko ʼaē ʼe loto kiai, ke ina toʼo noa te vai ʼo te maʼuli.” (Fakahā 22:17) Koia, ko te tuʼulaga mālama ʼe ina fakamanatuʼi ki te toe hahaʼi tokolahi tonatou maʼua ʼaē ke nātou mālama ʼi tonatou ʼuhiga Kilisitiano, pea ke nātou līaki te ʼu aga, he faʼahiga manatu, he faʼahiga palalau, peʼe ko he gāue ʼe feala ke fakatupu mamahi ki te laumālie maʼoniʼoni ʼo te ʼAtua.​—Efesi 4:​30.

⁹ Ko te laupapa ʼaē ʼe hili ai te ʼu pane ʼo te fakafofoga, ʼe ina fakamanatuʼi ki te toe hahaʼi tokolahi ʼaia, kapau ʼe nātou fia nonofo mālohi ʼi te faʼahi fakalaumālie, pea ʼe tonu ke nātou kai tuʼumaʼu ki te meʼa kai fakalaumālie ʼaē ʼe haʼu mai te Tohi-Tapu pea mo te ʼu tohi ʼa “te tagata kaugana agatonu mo poto.” (Mateo 4:4) Ko te ʼaletale ʼo te iseso ʼe ina fakamanatuʼi kia nātou te maʼuhiga ʼaē ke nātou faikole fakamalotoloto kia Sehova ke tokoni kia nātou ke nātou taupau maʼu tanatou agatonu. (Luka 21:36) Ko tanatou ʼu faikole ʼe tonu ke nātou fai ʼaki he ʼu palalau fakavikiviki ʼe haʼu mai tonatou loto, pea mo nātou fai he ʼu fakafetaʼi. (Pesalemo 106:1) Tahi ʼaē meʼa, ko te iseso ʼo te ʼaletale ʼe ina fakamanatuʼi kia nātou, ʼe tonu ke nātou fakavikiviki ki te ʼAtua ʼi te tahi ʼu faʼahi, ohage ko tanatou hiva fakamalotoloto te ʼu katiko ʼi te ʼu fono faka Kilisitiano, pea mo tanatou teuteuʼi fakalelei ke nātou “tala ia muʼa ʼo te kaugamālie ʼo ʼuhiga mo te fakamaʼuli.”​—Loma 10:10.

Te Mālo Katoa ʼo Te Tauhi Moʼoni

10. (a) Ko te ʼamanaki lahi fea ʼaē ʼe tou fakatalitali kiai? (b) Koteā te meʼa ʼaē ʼe tonu ke ʼuluaki hoko?

¹⁰ Ia ʼaho nei, “ko te hahaʼi tokolahi” ʼe nātou ʼōmai mai te ʼu fenua fuli ki te fale tauhi ʼa Sehova. (Isaia 2:​2, 3) Moʼo fakamoʼoni kiai, ʼe ʼui fēnei e Fakahā 15:4: “Ko ai ʼaē ka mole manavasiʼi moʼoni anai kia te koe, Ê Sehova, pea mo ina faka kolōliaʼi tou huafa, ʼuhi ko koe tokotahi ʼaē ʼe agatonu? Heʼe ʼōmai anai te ʼatu puleʼaga katoa pea ʼe nātou atolasio anai ʼi ʼou muʼa, heʼe kua fakahā tau ʼu lao faitotonu.” ʼE talanoa ia Sakalia kapite 14 ki te meʼa ʼe hoa mai. ʼI te temi ka haʼu, ko te agakovi ʼa te hahaʼi tokolahi ʼi te kele ʼe fakaʼāsili kovi anai ʼi tanatou fakatahi fakaʼosi moʼo tauʼi ʼo Selusalemi​—te kau fakafofoga ʼo te Selusalemi ʼaē ʼe ʼi selo ʼaē ʼe maʼuʼuli ʼi te kele. Pea ko Sehova ʼi tona ʼuhiga Tagata Tau, ʼe “ ʼalu moʼoni anai ʼo tauʼi te ʼu puleʼaga ʼaia” ʼaē ʼe nātou fakalaga ia te tau ʼaia.​—Sakalia 14:2, 3.

11, 12. (a) ʼE tali feafeaʼi anai e Sehova te fakalaga tau ʼaē ka fai ʼi te malamanei katoa ki tana kau atolasio ʼi tona fale lotu? (b) Koteā anai te ikuʼaga ʼo te tau ʼa te ʼAtua?

¹¹ “Koʼeni te tautea ka fakahoko anai e Sehova ki te ʼu hahaʼi fuli ʼaia ka fakalaga tau moʼoni anai ki Selusalemi: Ko te kakano ʼo te hahaʼi ʼe pala anai, kae kei nātou tutuʼu pe ʼi ʼonatou vae; pea ʼe pala anai mo tonatou ʼu kanoʼi mata, pea ko tonatou ʼalelo ʼe pala anai ʼi tonatou gutu. Pea ʼi te ʼaho ʼaia, ʼe tupu anai mai ia Sehova he maveuveu ia nātou fuli; ʼio pea ʼe nātou tahi fā anai ki te nima ʼo tonatou ʼu kaumeʼa, pea ko tonatou nima ʼe hiki anai ki tonatou kaumeʼa.”​—Sakalia 14:12, 13.

¹² Tatau aipe peʼe moʼoni te tautea ʼaia peʼe ko he ʼu palalau fakatātā, kae ʼe tonu anai ke tou talitali ki tona fakahoko pea ʼe ʼi ai anai tona ʼu fua. Kae, ko te meʼa ʼaē kua tou ʼiloʼi papau, lolotoga te temi ʼaē ka ʼamanaki ai, e te ʼu fili ʼa te ʼAtua ke nātou tauʼi te kau kaugana ʼa Sehova ʼi te malamanei katoa, ʼe tāʼofi anai nātou e te ʼu meʼa fakamanamana ʼe hoko ʼaki te māfimāfi ʼaupito ʼo te ʼAtua. Ko tonatou ʼu gutu ʼe fakalogologo anai. ʼE hage anai ia kua pala tonatou ʼu ʼalelo ʼaē neʼe laukovi ki te ʼAtua. Ko tanatou fakatuʼutuʼu fakatahi ʼe liliu anai ia ʼo nenefu, ohage kua pala tonatou ʼu mata. Ko tonatou mālohi fakasino, ʼaē neʼe tupu ai tonatou mālohi moʼo fakalaga tau, ʼe pulinoa anai ia. ʼI te maveuveu, ʼe nātou fematematehiʼaki anai nātou. Koia ʼi te kele, ko te ʼu fili fuli ʼo te tauhi ʼa te ʼAtua ʼe fakaʼauha anai. ʼIo, ʼe tonu anai ke fakamoʼoni te ʼu puleʼaga fuli ki te pule faʼitaliha ʼa Sehova ʼi te ʼatulaulau. ʼE hoko anai te lea faka polofeta ʼaenī: “ ʼE liliu anai ia Sehova ko te hau ʼo te kele katoa.” (Sakalia 14:9) ʼOsi ʼaia, pea ko Satana mo tana kau temonio ʼe haʼi anai nātou, pea kamata ai te ʼAfio ʼa Kilisito ia Taʼu e Afe, ʼo foaki te ʼu tapuakina lahi ki te malamanei.​—Fakahā 20:​1, 2; 21:​3, 4.

Te Fakatuʼuake ʼi Te Kele

13. Ko ai te ʼu hahaʼi ʼaē “ ʼe kei toe ʼi te ʼu puleʼaga fuli”?

¹³ ʼE hoko atu te lea faka polofeta ʼa Sakalia ʼi te kapite 14, ʼi te vaega 16: “ ʼE tonu anai ke hoko te meʼa ʼaenī, ko nātou fuli ʼaē ʼe kei toe ʼi te ʼu puleʼaga ʼaē ʼe ʼōmai ʼo tauʼi ia Selusalemi, ʼe tonu anai ke nātou hake ʼi te taʼu fuli ke nātou ʼolo ʼo tulolo ʼi muʼa ʼo te Hau, ia Sehova ʼo te ʼatu kautau, pea mo nātou fai te lafeti ʼo te ʼu Fale Lau.” ʼO mulimuli ki te Tohi-Tapu, ko te hahaʼi fuli ʼaē ʼe maʼuʼuli ia ʼaho nei ʼaē ʼe hoko atu tonatou maʼuli ʼi te tuʼu ʼo te faʼahiga meʼa agakovi ʼaenī pea ko nātou ko te ʼu fili ʼo te tauhi moʼoni, ʼe hoko anai kia nātou te “tautea fakamāu ʼo te fakaʼauha heʼegata.” (2 Tesalonika 1:​7-9; toe vakaʼi mo Mateo 25:31-​33, 46.) ʼE mole fakatuʼuake anai nātou. Koia, ʼe mahino ia, ko te hahaʼi ʼaē ʼe “kei toe ʼi te ʼu puleʼaga” ʼe ko te hahaʼi ʼo te puleʼaga ʼaē neʼe mamate ʼi muʼa ʼo te tau fakaʼosi ʼa te ʼAtua pea ko nātou ʼaia ʼe nātou maʼu te ʼamanaki ʼo te fakatuʼuake ʼaē ʼe fakatafito ki te Tohi-Tapu. Neʼe fakapapau fēnei e Sesu: “ ʼE hoko mai te hola ʼaē ko nātou fuli ʼaē ʼe nonofo ʼi te ʼu falemaka fakamanatu ʼe nātou logo anai ki tona leʼo pea ʼe nātou hū mai anai ki tuʼa, ko nātou ʼaē neʼe nātou fai te ʼu meʼa ʼe lelei, ki he fakatuʼuake ʼo te maʼuli, ko nātou ʼaē neʼe nātou fai te ʼu meʼa ʼe kovi, ki he fakatuʼuake ʼo te fakamāu.”​—Soane 5:​28, 29.

14. (a) Koteā te meʼa ʼaē ʼe tonu ke fai e te kau fakatuʼuake ke nātou maʼu te maʼuli heʼegata? (b) Koteā anai ʼaē ka hoko kia ia ʼaē ka fakafisi ki te foaki ʼo tona maʼuli kia Sehova pea mo mulimuli ki te tauhi moʼoni?

¹⁴ Ko te kau fakatuʼuake fuli ʼaia, ʼe tonu ke nātou fai he meʼa ke liliu tonatou fakatuʼuake ko he fakatuʼuake ki te maʼuli kae mole ko he fakatuʼuake ki te fakamāu. ʼE tonu ke nātou ʼolo ki te ʼu malaʼe fakakelekele ʼo te fale lotu ʼa Sehova pea ke nātou tulolo ʼo foaki tonatou maʼuli ki te ʼAtua ʼaki ia Sesu Kilisito. Ko ʼaē ʼe fakatuʼuake pea mo fakafisi ki te fai ʼo te meʼa ʼaia, ʼe hoko anai ki ai te tautea ʼaē ka hoko ki te ʼu puleʼaga ʼo te temi nei. (Sakalia 14:18) ʼE mole he tahi ʼe ina ʼiloʼi peʼe tokofia anai te kau fakatuʼuake ʼaē ka fakatahi fakafiafia ki te toe hahaʼi tokolahi moʼo fai te lafeti ʼo te ʼu Fale Lau ʼo totatou temi. ʼE mahino ia, ʼe tokolahi ʼaupito anai, pea ko te fale lotu lahi fakalaumālie ʼa Sehova ʼe toe fakaʼāsili anai tona kolōlia!

Te Lafeti ʼo Te ʼu Fale Lau ʼo Totatou Temi

15. (a) Neʼe koteā te ʼu agaaga maʼuhiga ʼo te Lafeti ʼo te ʼu Fale Lau ʼi te Iselaele ʼāfea? (b) He koʼe neʼe foaki te ʼu vitulo e 70 lolotoga te lafeti?

¹⁵ ʼI te taʼu fuli, neʼe fakamaʼua ki te Iselaele ʼāfea ke ina fai te lafeti ʼo te ʼu Fale Lau. Neʼe fai te lafeti ʼaia ʼi te vāhaʼa katoa pea neʼe ina fakaʼosi te tānaki ʼo te taʼukai ʼo Iselaele. Neʼe ko he temi fakafiafia moʼo fai ʼo he ʼu fakafetaʼi. ʼI te lolotoga ʼo te vāhaʼa, neʼe tonu ke nātou nonofo faka temi ʼi he ʼu fale lau neʼe ʼato ʼaki he ʼu lauʼakau, tāfito ʼaki te ʼu pālema. Ko te Lafeti ʼaia neʼe ina fakamanatuʼi ki Iselaele pe neʼe feafeaʼi te hāofaki e te ʼAtua tanatou ʼu kui mai Esipito, pea neʼe tokaga feafeaʼi ia kia nātou ʼi tanatou nonofo ʼi te ʼu fale lau ia taʼu e 40 ʼi te toafa ʼo aʼu ki tanatou kaku ki te Kele ʼo te Fakapapau. (Levitike 23:39-​43) Lolotoga te Lafeti, neʼe sakilifisioʼi te ʼu vitulo e 70 ʼi te ʼaletale ʼo te fale lotu. Kua ʼiloʼi papau, ko te agaaga ʼaia ʼo te Lafeti neʼe ina fakakikite te gāue haohaoa pea mo katoa neʼe fakahoko e Sesu Kilisito moʼo hāofaki ʼo te hahaʼi. Ko te ʼu fua lelei ʼo tona sakilifisio faitotogi, ʼe hoko moʼoni anai ki te ʼu hōloga e tokolahi ʼaupito ʼo te ʼu famili e 70 ʼo te malamanei, ʼaē ko te ʼu hōloga ʼo Noe.​—Senesi 10:​1-​29; Faka au 29:12-34; Mateo 20:28.

16, 17.(a) Neʼe kamata ʼanafea te Lafeti ʼo te ʼu Fale Lau ʼo totatou temi, pea neʼe hoko feafeaʼi? (b) ʼE kau feafeaʼi te toe hahaʼi tokolahi ki te lafeti ʼaia?

¹⁶ Kae ko te lafeti ʼo te ʼu Fale Lau neʼe ina fakahā te tānaki fakafiafia ʼo te hahaʼi agahala ki te fale lotu lahi fakalaumālie ʼo Sehova. Ko te fakahoko foʼou ʼo te Lafeti ʼaia, neʼe kamata ʼi te Penikosite ʼo te taʼu 33 ʼo totatou temi, ʼaki te kamata tānaki fakafiafia ʼo te kau Iselaelite fakalaumālie ki te kokelekasio faka Kilisitiano. (Gāue 2:​41, 46, 47) Ko te kau fakanofo ʼaia neʼe kua mahino kia nātou “ ʼe ko he ʼu hahaʼi ʼe nonofo faka temi” ʼi te mālama ʼa Satana, koteʼuhi ko tonatou “nofoʼaga [moʼoni] ʼe ʼi selo.” (1 Petelo 2:​11; Filipe 3:​20) Ko te Lafeti fakafiafia ʼaia, neʼe tuku faka temi ʼuhi ko te ʼapositasia ʼaē neʼe hoko ʼi te Keletiate. (2 Tesalonika 2:​1-3) Kae, neʼe toe fai te Lafeti ʼaia ʼi te taʼu 1919 ʼaki te tānaki ʼo te toe ʼo te toko 144 000 kau Iselaelite fakalaumālie, ʼo hoa kiai mo te tānaki ʼo te toe hahaʼi tokolahi ʼaē ʼe talanoa kiai ia Fakahā 7:​9, ʼaē ʼe ʼōmai mai te ʼu fenua kehekehe.

¹⁷ ʼE ʼui ko te toe hahaʼi tokolahi ʼaia ʼe nātou toʼo te ʼu pālema ʼi ʼonatou nima, koia ʼe hā ʼaki ai, mo nātou foki la ʼe nātou kau fakafiafia ki te lafeti ʼo te ʼu Fale Lau ʼo totatou temi. ʼI tonatou ʼuhiga kau Kilisitiano ʼaē kua foaki tonatou maʼuli ki te ʼAtua, ʼe nātou kau fakafiafia ki te gāue ʼaē ko te tānaki ʼo he kau atolasio ʼe lahi age ki te fale lotu ʼa Sehova. Tahi ʼaē meʼa, ʼi tonatou ʼuhiga agahala, ʼe mahino kia nātou ʼe ko he meʼa ʼofa neʼe foaki age e Sehova kia nātou ke nātou maʼuʼuli ʼo talu ai ʼi te kele. Ko nātou pea mo te kau fakatuʼuake, ʼe tonu ke nātou tui ki te sakilifisio faitotogi ʼo Kilisito, ʼo aʼu ki tanatou maʼu te maʼuli haohaoa ʼi te fakaʼosi ʼo te ʼu Taʼu e Afe ʼo te ʼAfio ʼa Kilisito.​—Fakahā 20:5.

18. (a) Koteā anai te meʼa ʼaē ka hoko ʼi te fakaʼosi ʼo te ʼu Taʼu e Afe ʼo te ʼAfio ʼa Sesu Kilisito? (b) ʼE mālo feafeaʼi anai te tauhi moʼoni ʼa Sehova?

¹⁸ Pea, ko te kau atolasio ʼa te ʼAtua ʼi te kele ʼe nātou tutuʼu anai ʼi ʼona muʼa ʼo mole kei ʼaoga kia nātou te kau pelepitelo, he kua nātou maʼuli haohaoa. Pea ko Sesu Kilisito ʼe “ina fakatoʼo anai te puleʼaga ki tona ʼAtua pea mo Tāmai.” (1 Kolonito 15:24) ʼE tuku ake anai ia Satana “ ʼi he kiʼi temi nounou” moʼo ʼahiʼahiʼi ʼo te malamanei ʼaē kua haohaoa. Ko te hahaʼi heʼe faitotonu ʼe fakaʼauha anai nātou ʼo talu ai, ʼo kau ai mo Satana pea mo tana kau temonio. Ko nātou ʼaē ka nonofo agatonu ʼe nātou maʼu anai te maʼuli heʼegata. ʼE nātou nonofo anai ʼo talu ai ʼi te Palatiso fakakelekele. Koia ʼe fakaʼosi lelei anai pea mo faka kolōlia, te Lafeti ʼo te ʼu Fale Lau ʼo totatou temi. Ko te tauhi moʼoni ʼe mālo anai ʼi te kolōlia heʼegata ʼo Sehova pea mo te fiafia heʼegata ʼo te malamanei.​—Fakahā 20:​3, 7-​10, 14, 15.

[Kiʼi nota ʼi te lalo pasina]

Ko Te ʼu Fehuʼi Fakamanatu

◻ Neʼe feafeaʼi ia “Selusalemi” ʼi te lolotoga ʼohofi ʼaē neʼe hoko ʼi te ʼuluaki tau faka malamanei?​—Sakalia 14:2.

◻ Koteā te meʼa ʼaē neʼe hoko ki te hahaʼi ʼa te ʼAtua talu mai te taʼu 1919?

◻ Ko ai ia ʼaho nei ʼe kau ki te lafeti ʼo te ʼu Fale Lau ʼo totatou temi?

◻ ʼE feafeaʼi anai te mālo katoa ʼo te tauhi moʼoni?

[Paki ʼo te pasina 23]

Neʼe fakaʼaogaʼi te ʼu pālema moʼo fakahoko ʼaki te Lafeti ʼo te ʼu Fale Lau