Ko Te Toe Liliu Mai Te Efu ʼo Feafeaʼi?

“HEʼE ke efu pea ʼe ke toe liliu anai ki te efu.” ʼI te logo ʼa te ʼuluaki tagata, ia Atama ki te ʼu palalau ʼaia, neʼe ina ʼiloʼi te meʼa ʼaē ʼe fakatalitali ia kiai. Neʼe faʼu ia ia ʼaki te efu ʼo te kele pea ʼe toe liliu pe anai ia ki te efu. ʼE mate anai ia ʼuhi ko tana talagataʼa ʼaē ki tona Tupuʼaga, ia Sehova ʼAtua.​—Senesi 2:​7, 15-​17; 3:​17-​19.

ʼE fakahā mai e te Tohi-Tapu ʼe faʼu te tagata ʼaki te efu. ʼE ina toe ʼui fēnei: “Ko te nefesi ʼaē ʼe agahala​—⁠ko ia ia ʼaē ka mate.” (Esekiele 18:4; Pesalemo 103:14) Ko te mate ʼe ina foaki ia te mamahi ki te lauʼi miliona hahaʼi pea ʼe liuliuga ai te fai ʼo te ʼu fehuʼi ʼo ʼuhiga mo te gaohi ʼo te ʼu sino ʼo te kau mate.

Te ʼu Agaaga ʼo Te Temi ʼĀfea Pea Mo Te Temi Nei

Neʼe feafeaʼi koa te gaohi ʼo te sino ʼo te hahaʼi ʼa te ʼAtua ʼi te ʼu temi ʼāfea? ʼI te kamataʼaga, ʼe talanoa te Tohi-Tapu ki te ʼu meʼa kehekehe ʼe pipiki ki te mate, ʼo kau ai te faitoka ʼi te kele. (Senesi 35:8) Ko te pateliaka ko Apalahamo mo tona ʼohoana, ko Sala, ʼo toe feiā aipe mo tona foha ko Isaake pea mo tona mokopuna ko Sakopo neʼe tanu ia nātou ʼi te ʼana ʼo Makpéla. (Senesi 23:​2, 19; 25:9; 49:30, 31; 50:13) Ko te ʼu tuʼi fakamāu Iselaelite ko Seteone pea mo Samisoni neʼe tanu ‘ ʼi te koga meʼa ʼaē neʼe tanu ai tanā ʼu tāmai.’ (Kau Fakamāu 8:​32; 16:31) Ko te meʼa ʼaia ʼe hā mai ai neʼe ʼi ai te falemaka faka famili neʼe fai tāfito e te hahaʼi ʼa te ʼAtua ʼi te temi muʼa. ʼI te mate ʼo Sesu Kilisito ʼi te ʼuluaki sēkulō ʼo totatou temi, neʼe tuku tona sino ʼi te falemaka foʼou. (Mateo 27:57-​60) ʼI te agamāhani, neʼe ʼai te sino ʼo te hahaʼi ki te kele peʼe ki te faitoka. Kei lahi te ʼu koga meʼa ʼi te kele ʼe fai feiā.

Kae, ia ʼaho nei ʼi te tahi ʼu koga meʼa ʼi te malamanei, ʼi te mole feʼauga ʼo te kele pea mo tona totogi kovi, ʼe tuputupu ai te faigataʼaʼia ʼo te maʼu ʼo he ʼu faitoka. Koia, ʼe fai e ʼihi te tahi ʼu puleʼaki moʼo tuku kiai te kau mate.

Ko te veuki ʼo te ʼu lefulefu ʼi te ʼosi tutu ʼo te sino kua liliu ia ko he aga māhani. ʼI Pilitania ko te ʼu mate e 40 ki te teau ʼi te temi nei kua gaohi feiā. ʼI Suède, ko te toko 80 ki te teau ʼe mamate ʼi te ʼu kolo lalahi ʼe tutu tonatou ʼu sino, ko ʼihi ʼu vao matuʼa ʼe fakaʼaogaʼi moʼo veuki ʼo te ʼu lefulefu. Pea ʼi Shanghai pea mo ʼihi ʼu kolo ʼi te ʼu tafaʼaki ʼo te tai ʼo Siaina, kua tuʼa lahi ʼi te taʼu ʼe fakatuʼutuʼu e te ʼu pule ʼo te kolo ke nātou veuki te ʼu lefulefu ki te tai.

ʼE veuki koa ʼifea te ʼu lefulefu? ʼE mole tonu ke hoko fai. Ko ʼihi ʼe feala ke nātou matataku ʼi te veuki ʼo te ʼu lefulefu naʼa fakatupu kovi ki te agaaga ʼo te kele. ʼI tona fakahagatonu, ʼe mole feala ke maʼu he taʼi mahaki ʼi te tutu ʼo te sino. ʼI ʼihi ʼu tānuma ʼi Pilitania pea mo te ʼu faʼahiga tānuma ʼaē ʼe mole ʼi ai he ʼu faitoka kae ʼe gata pe ki te ʼu higoa ʼo te kau mate ʼi Amelika, ʼe ʼi ai te ʼu koga meʼa lunaʼia peʼe ko te ʼu ʼōloto teu ʼe veuki ai. ʼE mahino ia, ʼe tonu ke tokakaga tāfito te kau Kilisitiano ki te manatu ʼa te Tohi-Tapu ʼo ʼuhiga mo te tutu pea mo te veuki ʼo te ʼu lefulefu.

Koteā Koa Te Manatu ʼa Te Tohi-Tapu?

ʼI tana talanoa ki “te hau ʼo Papiloni,” neʼe ʼui fēnei e te polofeta ko Isaia: “Neʼe līaki koe ʼo mole ʼi ai hou faitoka.” (Isaia 14:​4, 19) ʼE tonu koa ke fakatatau te veuki ʼo te ʼu lefulefu ʼe ko he meʼa fakalainoa? Kailoa, koteʼuhi ʼe mole talanoa te vaega ʼaia ki he sino neʼe tutu pea neʼe taupau peʼe ko te veuki ʼo te ʼu lefulefu.

Neʼe palalau ia Sesu Kilisito ki te fakatuʼuake fakakelekele ʼo te kau mate ʼaē ka hoko anai lolotoga tana ʼAfio ia Taʼu e Afe ʼi tana ʼui ʼaē: “Ko nātou fuli ʼaē ʼe nonofo ʼi te ʼu falemaka fakamanatu ʼe nātou logo anai ki tona leʼo [ʼoʼoku] pea ʼe nātou hū mai anai ki tuʼa.” (Soane 5:​28, 29) Kae, ʼe mole fakamaʼua ke tuku he sino ʼi he faitoka ke feala hona fakatuʼuake ohage ko tona fakamoʼoni mai ʼi te tahi lea faka polofeta ʼo ʼuhiga mo te faʼahi ʼaia. ʼE ʼui fēnei ia Fakahā 20:13: “Neʼe liufaki e te tai te kau mate ʼaē neʼe ia te ia, pea neʼe liufaki e te mate pea mo te Hatesi te kau mate ʼaē neʼe ia nāua.” Koia, ʼe mole ko te koga meʼa ʼaē ʼe maʼuhiga peʼe ko te faʼahiga ‘liliu mai te efu.’ Kae, ʼe manatuʼi koa ia ia e te ʼAtua pea mo ina fakatuʼuake? (Sopo 14:13-​15; vakaʼi ia Luka 23:42, 43.) ʼE mahino papau ia ʼe mole ʼaoga ke ʼi ai he ʼu falemaka fakaofoofo ke feala ai he manatuʼi e Sehova te hahaʼi. Ko te tutu ʼo te sino ʼe mole ina tāʼofi he tahi mai te fakatuʼuake. Pea kapau ko te veuki ʼo te ʼu lefulefu ʼe fai ʼaki he manatu ʼe lelei pea ʼe mole fai ai he ʼu toʼotoʼoga ʼo te lotu hala, ʼe mole fakafeagai ia ki te Tohi-Tapu.

Ko nātou ʼaē ʼe nātou lotolelei ki te veuki ʼo te ʼu lefulefu ʼe tonu anai ke nātou tokakaga ki te lao ʼo te fenua. ʼE tau mo feʼauga kia nātou tanatou tokagaʼi te ʼu meʼa ʼaē ʼe ʼi te loto ʼo nātou ʼaē ʼe putu pea mo ʼihi age. Ko te kau kaugana ʼa Sehova ʼe nātou fai anai he meʼa ʼo mulimuli pe ki tonatou leʼo ʼo loto ʼi te faʼahi ʼaia, ʼo mole nātou ʼulihi te higoa faka Kilisitiano lelei ʼaē ʼe nātou maʼu. Ko te faʼahi ʼaia ʼe maʼuhiga tāfito ʼi te ʼu fenua ʼaē kua fakagafua ke tutu ai te sino pea mo veuki ai te ʼu lefulefu, kae ʼe mole heʼeki tali katoa e te hahaʼi ʼo te fenua. ʼE mahino foki ia, ʼe tekeʼi fuli anai e he Kilisitiano te ʼu toʼotoʼoga peʼe ko te ʼu agaʼi fenua ʼaē neʼe fakatafito ki te tui ʼaē ki te nefesi tuputupua.

Ko Te Faka ʼĀteaina Katoa Mai Te Faitoka!

Ko ʼihi ʼe lagolago ki te veuki ʼo te ʼu lefulefu ʼo nātou ʼui ko te faka ʼuhiga ʼo te faʼahi ʼaia ko te faka ʼāteaina mai te faitoka. Kae ʼe foaki mai he fīmālie lahi, mokā ina fakahoko anai te fakapapau ʼa te Tohi-Tapu ʼi tana ʼui ʼaē “ ʼI tona ʼuhiga fili fakaʼosi, ko te mate ʼe tonu ke pulihi.”​—1 Kolonito 15:24-​28.

Ko tona faka ʼuhiga ʼaia ko te ʼu faitoka, te ʼu falemaka, ʼo feiā aipe mo te tutu ʼo te sino pea mo te veuki ʼo te ʼu lefulefu, ʼe liliu anai ia ko he ʼu aga ʼo te temi ʼāfea. Ei, ʼe mole toe ʼi ai anai te mate. ʼAki te laumālie maʼoniʼoni neʼe tohi fēnei e te ʼapositolo ko Soane: “Neʼe ʼau logo ki te leʼo mālohi ʼe haʼu mai te hekaʼaga faka hau, ʼo ina ʼui fēnei: ‘Koʼeni! Ko te fale fehikitaki ʼo te ʼAtua ʼe nofo mo te hahaʼi, pea ʼe nofo anai mo nātou, pea ʼe nātou liliu anai ko hana hahaʼi. Pea ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he tagilāulau, he mamahi. Ko te ʼu meʼa ʼāfea kua puli ia.’ ”​—Fakahā 21:​3, 4.

Ko te ʼu meʼa fuli ʼaia ʼe feala anai ke hoko mokā pulihi katoa anai e te pule ʼo te Puleʼaga ʼo te ʼAtua ia te mate ʼo te tagata ʼaē ʼe tupu mai te agahala ʼa Atama. ʼAki te temi ko te malamanei talagafua ʼe mole toe tau anai mo te ʼamanaki ʼaē ko te toe liliu ki te efu.

[Paki ʼo te pasina 29]

Ko te ʼu faʼahiga gaohi māhani ʼo te ʼu sino ʼo te kau mate

[Paki ʼo te pasina 31]

Ko te veuki ʼo te ʼu lefulefu ʼi Sagami Bay, ʼi Saponia

[Haʼuʼaga ʼo te paki]

Courtesy of Koueisha, Tokyo