Kua Koutou Nofo Teuteu Koa Ki Te ʼAho ʼo Sehova?
“Ko te ʼaho lahi ʼo Sehova kua ōvi mai. Kua ōvi mai, pea ʼe fakavilivili ʼaupito mai.”—Sofonia 1:14.
1. ʼE fakamatala feafeaʼi e te Tohi-Tapu te ʼaho ʼo Sehova?
“KO TE ʼaho lahi pea mo fakamataku” ʼo Sehova kua vave hoko mai ki te tuʼu ʼo te ʼu faʼahiga meʼa ʼaenī. ʼE fakamatala e te Tohi-Tapu te ʼaho ʼo Sehova ohage ko he ʼaho tau, mo fakapōʼuli, ko te ʼaho ʼo te hāūhāū, pea mo te hoha, mo te tuʼania, mo te mataku, pea mo te maumau. Kae ʼe ʼi ai te ʼu hahaʼi ʼe nātou hāo anai, koteʼuhi “ko ʼaē ʼe fetapā ki te huafa ʼo Sehova ʼe hāo anai ia.” (Soele 2:30-32; Amosi 5:18-20) Ei, ʼe fakaʼauha anai e te ʼAtua tona ʼu fili, kae ina hāofaki anai tana hahaʼi.
2. He koʼe ʼe tonu ke tou mahino ki te kua vave hoko ʼo te ʼaho ʼo Sehova?
2 Neʼe mahino ki te kau polofeta ʼa te ʼAtua kua vave hoko te ʼaho ʼo Sehova. Ohage la, neʼe tohi fēnei e Sofonia: “Ko te ʼaho lahi ʼo Sehova kua ōvi mai. Kua ōvi mai, pea ʼe fakavilivili ʼaupito mai.” (Sofonia 1:14) ʼE maʼuhiga ʼaupito te temi ʼaenī, koteʼuhi ko te Pule Fakahoko ʼa te ʼAtua, te Hau ko Sesu Kilisito, ʼe ʼamanaki nei ke ‘ina nonoʼo tana heletā ki tona kauaga, pea mo haʼele ki muʼa ʼuhi ko te moʼoni, mo te agavaivai, pea mo te faitotonu.’ (Pesalemo 45:3, 4) Kua koutou nofo teuteu koa ki te ʼaho ʼaia?
Neʼe Nātou Talitali Ki He ʼu Meʼa Lalahi
3. Koteā te ʼu meʼa ʼaē neʼe talitali kiai ʼihi Kilisitiano ʼo Tesalonika, pea koteā te ʼu tupuʼaga e lua ʼaē ʼe hā ai neʼe nātou faihala?
3 Neʼe mole hoko ki te tokolahi te ʼu meʼa ʼaē neʼe nātou talitali kiai ʼo ʼuhiga mo te ʼaho ʼo Sehova. Ko ʼihi ʼi te ʼu ʼuluaki Kilisitiano ʼo Tesalonika neʼe nātou ʼui ‘kua hoko mai te ʼaho ʼo Sehova!’ (2 Tesalonika 2:2) Kae neʼe ʼi ai te ʼu tupuʼaga e lua ʼaē ʼe ʼui ai neʼe mole heʼeki ʼamanaki ke hoko tona ʼaho. ʼI tana fakahā te tupuʼaga e tahi, neʼe ʼui fēnei e te ʼapositolo ko Paulo: “Ka nātou ʼui anai: ‘Tokalelei pea mo fīmālie!’ pea ʼe tonu anai ke hoko fakafokifā he fakaʼauha kia nātou.” (1 Tesalonika 5:1-6) ʼI “te temi ʼo te fakaʼosi” ʼaenī, ʼe tou tatali ki te fakahoko ʼo te ʼu palalau ʼaia. (Taniela 12:4) Tahi ʼaē meʼa, neʼe mole heʼeki sisio te kau Tesalonika ki te tahi fakamoʼoni, ʼo ʼuhiga mo te hoko ʼo te ʼaho ʼo Sehova, he neʼe ʼui fēnei age e Paulo kia nātou: “ ʼE mole hoko anai ʼi muʼa ʼo te hoko mai ʼo te ʼapositasia.” (2 Tesalonika 2:3) ʼI te temi ʼaē neʼe tohi ai e Paulo te ʼu palalau ʼaia (lagi ʼi te taʼu 51 ʼo totatou temi) ko “te ʼapositasia” mai te Lotu Faka Kilisitiano moʼoni neʼe mole heʼeki tuputupu katoa. Ia ʼaho nei, ʼe tou sio ki te mafola katoa ʼo te ʼapositasia ʼi te Keletiate. Logope la te mole hoko ʼo te ʼu meʼa ʼaē neʼe nātou talitali kiai, kae ko te kau fakanofo agatonu ʼaia ʼo Tesalonika, ʼaē neʼe nātou tauhi agatonu ki te ʼAtua ʼo aʼu ki tonatou mate, ʼe mahino ia kua nātou maʼu tanatou fakapale ʼi selo. (Fakahā 2:10) Mo tatou foki, ʼe fakapale anai tatou mo kapau ʼe tou nonofo agatonu ʼi tatatou talitali ki te ʼaho ʼo Sehova.
4. (a) Koteā ʼaē ʼe fakapipiki ki te ʼaho ʼo Sehova, ia 2 Tesalonika 2:1, 2? (b) Neʼe koteā te ʼu manatu ʼaē neʼe maʼu e te ʼu hahaʼi ʼaē ʼe fakahigoaʼi ko te ʼu Tāmai ʼo te ’Ēkelesia, ʼo ʼuhiga mo te toe liliu mai ʼa Kilisito pea mo te ʼu meʼa ʼaē ka hoko ʼi te ʼaho ʼaia?
4 ʼE fakapipiki e te Tohi-Tapu “te ʼaho lahi ʼo Sehova” mo “te ʼi henī ʼo totatou ʼAliki ko Sesu Kilisito.” (2 Tesalonika 2:1, 2) Ko te ʼu hahaʼi ʼaē ʼe fakahigoaʼi ko te ʼu Tāmai ʼo te ’Ēkelesia, neʼe lahi tanatou ʼu manatu kehekehe ʼo ʼuhiga mo te toe liliu mai ʼa Kilisito, mo tona ʼi henī, pea mo tana Pule ia Taʼu e Afe. (Fakahā 20:4) ʼI te lua sēkulō ʼo totatou temi, ko Papias ʼo te kolo ko Hiérapolis, neʼe talitali ia ki he temi ʼe mahu anai te meʼa kai ʼi te kele lolotoga te ʼAfio ʼa Kilisito ia taʼu e Afe. Ko te Maletile ko Justin, neʼe tuʼa lahi tana talanoa ʼo ʼuhiga mo te ʼi henī ʼa Sesu, pea neʼe manatu ia ʼe fakatuʼu anai tona Puleʼaga ʼi te Selusalemi ʼaē kua toe fakatuʼu. Neʼe akoʼi e Irénée de Lyon, ʼi te ʼosi maumauʼi ʼo te Puleʼaga Loma, ʼe hā anai ia Sesu, ʼe ina haʼi ia Satana, pea mo ʼafio ʼi te kele, ʼi Selusalemi.
5. Koteā ʼaē neʼe ʼui e ʼihi ʼu tagata faiako ʼo ʼuhiga mo te “toe liliu mai” ʼa Kilisito pea mo tana ʼAfio ia Taʼu e Afe?
5 Neʼe tohi e te tagata fai hisitolia ko Philip Schaff, ko “te akonaki ʼaē neʼe maʼuhiga tāfito” ʼi muʼa ʼo te fai ʼo te Concile ʼo Nicée ʼi te taʼu 325 ʼo totatou temi, neʼe “ko te akonaki ʼo ʼuhiga mo te nofo hau fakahāhā ʼo Kilisito ʼi tona kolōlia ʼi te kele, ʼaki te fakatuʼuake ʼo te kau maʼoniʼoni ki he ʼu taʼu e afe, ʼi muʼa ʼo te fakatuʼuake ʼo te hahaʼi fuli pea mo fakahoko te fakamāu.” ʼE ʼui fēnei e te tohi A Dictionary of the Bible, ʼaē neʼe fai e James Hastings: “Ko Tertullien, mo Irénée, pea mo Hippolyte ʼe kei nātou kumi te Liliu vave Mai [ʼa Sesu Kilisito]; kae ʼaki te ʼu Tāmai ʼo te kolo ʼo Alexandrie, ʼe tou maʼu he faʼahiga manatu foʼou. . . . ʼAki te akonaki ʼa Augustin ʼaē ʼe ina fakatatau te ʼu Tau ʼe Afe mo te temi ʼo te ’Ēkelesia fakalaga tau, ko te Toe Liliu Mai ʼe hoko ʼi he temi ka haʼu.”
Ko Te ʼAho ʼo Sehova Pea Mo Te ʼi Henī ʼa Sesu
6. He koʼe ʼe mole tonu ke tou manatu ko te ʼaho ʼo Sehova ʼe kei mamaʼo atu?
6 Ko te mole mahino lelei ki te ʼu faʼahi ʼaia neʼe iku ki te lotomamahi, kae ʼaua naʼa tou manatu ko te ʼaho ʼo Sehova ʼe kei mamaʼo atu. Kua ʼosi kamata te ʼi henī ʼa Sesu ʼi te fakapulipuli, ʼaē ʼe ʼui e te Tohi-Tapu, ʼe pipiki mo te ʼaho ʼo Sehova. Ko Te Tule Leʼo pea mo te ʼu tohi ʼa te kau Fakamoʼoni ʼa Sehova, neʼe nātou tautau foaki he ʼu fakamoʼoni faka Tohi-Tapu ki te ʼui ʼaē neʼe kamata te ʼi henī ʼa Kilisito ʼi te taʼu 1914.a Koia, koteā te meʼa ʼaē neʼe ʼui e Sesu ʼo ʼuhiga mo tana ʼi henī?
7. (a) Koteā koa te ʼu agaaga ʼo te fakaʼiloga ʼo te ʼi henī ʼa Sesu pea mo te fakaʼosi ʼo te tuʼu ʼo te ʼu faʼahiga meʼa ʼaenī? (b) Koteā ʼaē ʼe tonu ke tou fai, ke feala ai hatatou hāo?
7 ʼI muʼa ʼo tana mate, neʼe palalau ia Sesu mo tana kau ʼapositolo ʼo ʼuhiga mo tana ʼi henī. ʼI tanatou ʼosi logo ki tana fakakikite te maumauʼi ʼo te fale lotu ʼo Selusalemi, neʼe fehuʼi fēnei e tana ʼu ʼapositolo ko Petelo, mo Sake, mo Soane pea mo Atelea: “Ko ʼafea ʼaē ka hoko ai anai te ʼu meʼa ʼaia, pea koteā anai te fakaʼiloga ʼo tau ʼi henī pea mo te fakaʼosi ʼo te tuʼu ʼo te ʼu faʼahiga meʼa ʼaenī?” (Mateo 24:1-3; Maleko 13:3, 4) Moʼo tali, neʼe fakakikite e Sesu ʼe hoko anai te ʼu tau, mo te ʼu hoge, mo te ʼu mafuike, pea mo te tahi ʼu meʼa ʼo “te fakaʼiloga” ʼo tana ʼi henī pea mo te fakaʼosi ʼo te tuʼu ʼo te ʼu faʼahiga meʼa ʼaenī. Neʼe ina toe ʼui fēnei: “Kaʼe ko ʼaē ka faʼa kātaki anai ʼo kaku ki te fakaʼosi, ʼe ko ia ia ʼaē ka maʼuli anai.” (Mateo 24:13) ʼE tou hāo anai mo kapau ʼe tou faʼa kātaki ʼo nonofo agatonu ʼo aʼu ki tatatou mamate, peʼe ʼo aʼu ki te fakaʼosi ʼo te tuʼu agakovi ʼaenī.
8. ʼI muʼa ʼo te fakaʼosi ʼo te tuʼu faka Sutea, koteā te meʼa ʼaē neʼe tonu ke fai, pea koteā te meʼa ʼaē ʼe fai ʼo ʼuhiga mo te faʼahi ʼaia ia ʼaho nei?
8 ʼI muʼa ʼo te fakaʼosi, ʼe hoko anai te meʼa maʼuhiga tāfito ʼo ʼuhiga mo te ʼi henī ʼa Sesu. ʼO ʼuhiga mo te faʼahi ʼaia, neʼe ina ʼui fēnei: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” (Mateo 24:14) ʼI muʼa ʼo te maumauʼi e te kau Loma ia Selusalemi, pea mo te fakaʼosi ʼo te tuʼu ʼo te ʼu faʼahiga meʼa faka Sutea ʼi te taʼu 70 ʼo totatou temi, neʼe feala ke ʼui e Paulo ko te logo lelei “neʼe faka mafola ʼi te ʼu meʼa katoa ʼaē neʼe fakatupu ʼi te lalo lagi.” (Kolose 1:23) Kae ia ʼaho nei, ko te gāue fai faka mafola ʼe lolotoga fai e te kau Fakamoʼoni ʼa Sehova ʼi hona ʼaluʼaga ʼe lahi age, “ ʼi te kele katoa.” Lolotoga te ʼu taʼu fakamuli ʼaenī, neʼe fakagafua e te ʼAtua ke fakahoko he fai faka mafola lahi ʼi te Potu Hahake ʼo te Eulopa. ʼAki te ʼu fale tā tohi pea mo te ʼu fale gāue ʼi te malamanei katoa, kua nofo teuteu te kautahi ʼa Sehova ki he tuputupu ʼo te gāue ʼaia, māʼia ʼi “te ʼu telituale ʼaē neʼe mole heʼeki fai faka mafola ai.” (Loma 15:22, 23) ʼE uga koa koutou e tokotou loto ke koutou fai ia meʼa fuli ʼi te fai faka mafola ʼi muʼa ʼo te hoko mai ʼo te fakaʼosi? Kapau koia ʼaia, pea ʼe feala ke fakamālohiʼi koutou e te ʼAtua ke koutou kau ki te gāue fakafiafia ʼaē kei toe ke fai.—Filipe 4:13; 2 Timoteo 4:17.
9. Koteā te manatu ʼaē neʼe fakahā e Sesu, ohage ko tona tuʼu ia Mateo 24:36?
9 Ko te gāue fai faka mafola ʼo te Puleʼaga ʼaē neʼe fakakikite, pea mo te tahi ʼu meʼa ʼo te fakaʼiloga ʼo te ʼi henī ʼa Sesu, ʼe lolotoga hoko ʼi te temi nei. Koia, kua ōvi mai te fakaʼosi ʼo te tuʼu ʼo te ʼu faʼahiga meʼa ʼaenī. ʼE moʼoni, neʼe ʼui fēnei e Sesu: “Ki te ʼaho ʼaia mo te hola ʼaia, ʼe mole he tahi ʼe ina ʼiloʼi, pe ko te kau ʼaselo ʼo te lagi pe ko te ʼAlo, kaʼe gata pe ki te Tāmai.” (Mateo 24:4-14, 36) Kae ko te lea faka polofeta ʼa Sesu ʼe tokoni kia tatou ke tou nofo teuteu ki “te ʼaho pea mo te hola ʼaia.”
Neʼe Kua Nātou Nofo Teuteu
10. ʼE lava feafeaʼi hatatou ʼiloʼi ʼe feala ke tou nonofo ʼalaʼala ʼi te faʼahi fakalaumālie?
10 Ke tou hāo ʼi te ʼaho lahi ʼa Sehova, ʼe tonu ke tou nonofo ʼalaʼala pea mo tou nonofo mālohi ʼi te tauhi moʼoni. (1 Kolonito 16:13) ʼE tou ʼiloʼi ʼe feala ke tou faʼa kātaki, koteʼuhi neʼe faʼa kātaki feiā te famili neʼe pipiki ki te ʼAtua, pea neʼe nātou hāo ʼi te Tulivio ʼaē neʼe ina pulihi te hahaʼi agakovi ʼi te taʼu 2370 ʼi muʼa ʼo totatou temi. ʼI tana fakatatau te temi ʼaia mo tana ʼi henī, neʼe ʼui fēnei e Sesu: “Ohage pe ko te ʼu ʼaho ʼaē ʼo Noe, ʼe toe feiā pe anai mo te ʼi henī ʼa te Foha ʼo te tagata. Ohage pe ko te ʼu ʼaho ʼaia ʼi muʼa ʼo te tulivio: neʼe nātou kakai pea mo ʼiʼinu, ko te hahaʼi tagata neʼe nātou ʼohoana pea ko te hahaʼi fafine neʼe foaki ke ʼohoanaʼi, ʼo aʼu ki te ʼaho ʼaē neʼe hū ai ia Noe ki te aleka; pea neʼe mole nātou fakatokagaʼi he meʼa ʼo aʼu ki te haʼu ʼa te tulivio pea ʼave ai ia nātou fuli, ʼe toe feiā pe anai mo te ʼi henī ʼa te Foha ʼo te tagata.”—Mateo 24:37-39.
11. Koteā te meʼa ʼaē neʼe haga fai e Noe logope la te agamālohi ʼaē neʼe hoko ʼi tona temi?
11 Ohage ko tatou, neʼe maʼuʼuli ia Noe pea mo tona famili ʼi he mālama agamālohi. Ko “te ʼu foha ʼo te ʼAtua moʼoni,” te ʼu ʼaselo talagataʼa, neʼe nātou kofuʼi te ʼu sinoʼi tagata pea mo nātou toʼo maʼa nātou te ʼu ʼohoana, ʼo nātou liliu ai ko te ʼu tāmai ʼo te kau Nefilime ʼiloa—neʼe ko te ʼu tagata agakovi lahi, pea ʼe mahino ia neʼe nātou fakaʼāsili te agamālohi. (Senesi 6:1, 2, 4; 1 Petelo 3:19, 20) Kae ʼaki te tui, “neʼe haʼele ia Noe mo te ʼAtua moʼoni.” Neʼe “heʼe mele ʼi te lotolotoiga ʼo te ʼu hahaʼi ʼo tona temi”—te taʼiake agakovi ʼo tona temi. (Senesi 6:9-11) ʼAki tatatou falala ki te ʼAtua ʼi te faikole, ʼe feala ke tou fai mo tatou te meʼa ʼaia ʼi te mālama agamālohi pea mo agakovi ʼaenī, ʼi tatatou talitali ki te ʼaho ʼo Sehova.
12. (a) ʼI tana faʼu te aleka, koteā te tahi gāue ʼaē neʼe fai e Noe? (b) Neʼe feafeaʼi te aga ʼa te hahaʼi ʼo ʼuhiga mo te fai faka mafola ʼa Noe, pea koteā ʼaē neʼe hoko kia nātou?
12 ʼE ʼiloʼi lelei ia Noe ʼi tana faʼu te aleka moʼo hāofaki ʼo nātou ʼi te Tulivio. Tahi ʼaē meʼa, neʼe ko he “tagata faka mafola faitotonu,” kae ko te hahaʼi ʼo tona temi neʼe “mole nātou tokagaʼi” te logo ʼaē neʼe foaki age kia ia e te ʼAtua. Neʼe nātou kakai pea mo ʼiʼinu, mo ʼohoana, mo maʼu fānau, pea mo fakahoko tanatou ʼu meʼa māhani ʼo te maʼuli, ʼo aʼu ki te pulihi ʼo nātou fuli ʼi te Tulivio. (2 Petelo 2:5; Senesi 6:14) Neʼe mole nātou fia logo ki te akonaki pea mo te aga faitotonu, ohage pe ko te taʼiake agakovi ia ʼaho nei, ʼaē ʼe nātou pupunu ʼonatou taliga ki te meʼa ʼaē ʼe ʼui e te kau Fakamoʼoni ʼa Sehova ʼo ʼuhiga mo te “fakahemala ki te ʼAtua,” mo te tui kia Kilisito, mo te faitotonu, pea mo “te fakamāu ʼaē ka hoko.” (Gāue 20:20, 21; 24:24, 25) ʼE mole tou ʼiloʼi pe neʼe tokofia te hahaʼi ʼaē neʼe maʼuʼuli ʼi te kele, ʼi te temi ʼaē neʼe fakahā ai e Noe te logo ʼaē neʼe fakahā age e te ʼAtua. Kae ko te meʼa e tahi ʼe tou ʼiloʼi papau, neʼe liliu te hahaʼi ʼo te kele ʼo tokosiʼi ʼaupito ʼi te taʼu 2370 ʼi muʼa ʼo totatou temi! Neʼe molehi e te Tulivio te hahaʼi agakovi, ʼo ina hāofaki pe ia nātou ʼaē neʼe nātou nofo teuteu ki te meʼa ʼaia ʼaē neʼe fakahoko e te ʼAtua—ko Noe, pea mo te toko fitu ʼo tona famili.—Senesi 7:19-23; 2 Petelo 3:5, 6.
13. Neʼe falala katoa ia Noe ki te fakatotonu fakamāu fea, pea neʼe ina fakahā feafeaʼi te faʼahi ʼaia?
13 Neʼe mole fakahā fakatomuʼa age e te ʼAtua kia Noe te ʼaho pea mo te hola totonu ʼaē ka hoko ai te Tulivio. Kae, ʼi te taʼu 480 ʼo Noe, neʼe fakatotonu fēnei e Sehova: “Ko toku laumālie, ʼe mole feiā anai tana aga ki te tagata ʼo talu ai, heʼe toe kakano foki. Koia, ko tona ʼu ʼaho ʼe aʼu anai kia taʼu e teau ʼuafulu.” (Senesi 6:3) Neʼe falala katoa ia Noe ki te fakatotonu fakamāu ʼaia ʼa te ʼAtua. ʼI tana aʼu ki tona taʼu 500, neʼe “liliu ko te tāmai ʼo Semi, mo Kami, pea mo Safeti,” pea ko te agaʼi fenua ʼo te temi ʼaia, ʼe hoki ʼohoana tona ʼu foha mo kapau kua nātou taʼu 50 peʼe 60. ʼI te temi ʼaē neʼe ʼui ai kia Noe ke ina faʼu te aleka moʼo hāofaki ʼo nātou ʼi te Tulivio, ko tona ʼu foha pea mo ʼonatou ʼu ʼohoana neʼe nātou tokoni kia ia ʼi te gāue ʼaia. Ko te faʼu ʼo te aleka ʼe mahino ia neʼe to tonu mo te gāue ʼa Noe ʼi tona ʼuhiga “tagata fai faka mafola ʼo te faitotonu,” ʼo nofo maʼumaʼua ai lolotoga te ʼu taʼu fakaʼosi e 40 peʼe 50 ʼi muʼa ʼo te hoko ʼo te Tulivio. (Senesi 5:32; 6:13-22) Lolotoga te ʼu taʼu fuli ʼaia, ko ia pea mo tona famili neʼe nātou gāue ʼaki te tui. ʼO toe feiā mo tatou, tou fakahā tatatou tui ʼo tou faka mafola pea mo talitali ki te ʼaho ʼo Sehova.—Hepeleo 11:7.
14. Ki muli age, koteā ʼaē neʼe ʼui e Sehova kia Noe, pea koteā tona tupuʼaga?
14 ʼI te vave ʼosi ʼo te faʼu ʼo te aleka, neʼe lagi manatu ia Noe kua vave hoko te Tulivio, logope la neʼe mole ina ʼiloʼi te temi totonu ʼaē ka hoko ai. Ki muli age, neʼe ʼui fēnei age e Sehova kia ia: “ ʼE kei toe pe ia ʼaho e fitu, pea ʼe ʼau fakatō anai te ʼua ki te kele lolotoga ʼaho e fāgofulu pea mo po e fāgofulu.” (Senesi 7:4) Neʼe feʼauga te temi ʼaia ke fakahū e Noe pea mo tona famili te ʼu faʼahiga manu kehekehe ki te aleka, pea mo hū mo nātou kiai ʼi muʼa ʼo te kamata ʼo te Tulivio. ʼE mole ʼaoga ke tou ʼiloʼi te ʼaho pea mo te hola ʼaē ka kamata fakaʼauha ai te tuʼu ʼaenī; ʼe mole fakalogo kia tatou te maʼuli ʼo te ʼu manu, pea ko te hahaʼi ʼaē ʼe ʼamanaki ke maʼuʼuli, ʼe kua nātou hū ki te aleka fakatā, te palatiso fakalaumālie ʼo te hahaʼi ʼa te ʼAtua.
“Koutou Nonofo Fakaonoono”
15. (a) ʼE koutou fakamahino feafeaʼi anai te ʼu palalau ʼa Sesu ʼaē ʼe tou maʼu ia Mateo 24:40-44? (b) ʼI tatatou mole ʼiloʼi te temi totonu ʼaē ka haʼu ai ia Sesu moʼo fakahoko te lagavaka ʼo te ʼAtua, koteā ʼaē ʼe tonu ke tou fai?
15 ʼO ʼuhiga mo tana ʼi henī, neʼe fakamahino fēnei e Sesu: “Koia, ko tagata anai e toko lua ʼe ʼi te ʼu gāueʼaga: ʼe toʼo anai he tahi kaʼe tuku he tahi; ko fafine e toko lua ʼe nā lolotoga momosi fulumeto anai ʼaki te meʼa momosi nima: ʼe toʼo anai he tahi kaʼe tuku he tahi. Ke koutou nofo fakaonoono, heʼe mole koutou ʼiloʼi pe ko te ʼaho fea ʼaē ʼe haʼu ai tokotou ʼAliki. Kaʼe ke koutou ʼiloʼi te meʼa ʼaenī: kapau neʼe ʼiloʼi e te pule ʼo te ʼapi pe ko te lakaga leʼo fea ʼaē ʼe tonu ke haʼu ai te tagata kaihaʼa, kanaʼauala neʼe nofo ʼalaʼala anai ia pea ʼe mole ina tuku anai ke hūfi tona ʼapi. Koia ke toe feiā foki mo koutou ke koutou nofo teuteu, heʼe ko te Foha ʼo te tagata ʼe haʼu ʼi te hola ʼaē ʼe mole koutou manatu kiai.” (Mateo 24:40-44; Luka 17:34, 35) Ko tatatou mole ʼiloʼi te temi totonu ʼaē ka haʼu ai ia Sesu ʼo fakahoko te lagavaka ʼo te ʼAtua, ʼe fakamaʼua ai kia tatou ke tou haga nonofo tokakaga pea ʼe ko he faka fealagia ʼaia kia tatou ke tou fakahā ai ʼe tou tauhi kia Sehova ʼaki totatou loto katoa.
16. Koteā ʼaē ka hoko anai kia nātou ʼaē neʼe “tuku” pea mo nātou ʼaē neʼe “toʼo”?
16 Ko te hahaʼi ʼaē ka “tuku” ke fakaʼauha ʼaki te hahaʼi agakovi, ʼe kau anai ki ai ia nātou ʼaē neʼe kua mālama ki te moʼoni, kae kua nātou toe liliu ʼo maʼuʼuli faʼifaʼitaliha. Tou fakaʼamu ke tou kau ia nātou ʼaē ka “toʼo,” ia nātou ʼaē ʼe nātou foaki tonatou maʼuli katoa kia Sehova, pea mo fakafetaʼi moʼoni ki tana foaki mai te ʼu meʼa kai fakalaumālie ʼaki “te tagata kaugana agatonu mo poto.” (Mateo 24:45-47) ʼO aʼu ki te fakaʼosi, tou tauhi ki te ʼAtua ʼaki “te ʼofa ʼaē ʼe haʼu mai he loto ʼe maʼa pea mo he leʼo ʼo loto ʼe lelei pea mo he tui ʼe mole malualoi.”—1 Timoteo 1:5.
ʼE Maʼuhiga He ʼu Aga Fakamaʼoniʼoni
17. (a) Koteā ʼaē neʼe fakakikite ia 2 Petelo 3:10? (b) Koteā te ʼu aga pea mo te ʼu gāue ʼaē neʼe fakaloto mālohiʼi ia 2 Petelo 3:11?
17 Neʼe tohi fēnei e te ʼapositolo ko Petelo: “Ko te ʼaho ʼo Sehova ʼe haʼu anai ohage ko he tagata kaihaʼa, ko te ʼaho ʼaia ko te ʼu lagi ʼe puli anai ʼi he logoaʼa, kae ko te ʼu meʼa ʼaē kua kakaha ʼe mavetevete anai, pea ko te kele pea mo te ʼu gāue ʼaē ʼe fai ʼi ai ʼe hā anai.” (2 Petelo 3:10) Ko te ʼu lagi mo te kele fakatā ʼe mole nātou hāo anai ʼi te vela ʼo te ʼita lahi ʼo te ʼAtua. Koia, neʼe toe ʼui fēnei e Petelo: “Kapau ko te ʼu meʼa fuli ʼaia ʼe tonu ke mavetevete, ko te faʼahiga tagata feafeaʼi anai ia koutou ʼi te ʼu aga fakamaʼoniʼoni pea mo te ʼu gāue ʼaē ʼe fakaʼiloga ʼaki takotou pipiki ki te ʼAtua!” (2 Petelo 3:11) ʼE kau ki te ʼu aga pea mo te ʼu gāue ʼaia, te kau tuʼumaʼu ki te ʼu fono faka Kilisitiano, te fai ʼo te ʼu meʼa ʼaē ʼe lelei ki te hahaʼi, pea mo lahi tatatou faka mafola ʼo te logo lelei.—Mateo 24:14; Hepeleo 10:24, 25; 13:16.
18. Kapau ʼe tuputupu ia tatou te manako ki te mālama, koteā te meʼa ʼaē ʼe tonu ke tou fai?
18 “Te ʼu aga fakamaʼoniʼoni pea mo te ʼu gāue ʼaē ʼe fakaʼiloga ʼaki takotou pipiki ki te ʼAtua,” ʼe fakamaʼua ke tou “ ʼāteaina ʼi te mele fuli pe ʼo te malamanei.” (Sake 1:27) Kae e feafeaʼi mo kapau ʼe tou fakatuputupu hatatou manako ki te mālama ʼaenī? Lagi ia muʼa ʼo te ʼAtua ʼe tou nonofo ʼi he ʼaluʼaga tuʼutāmakiʼia, ʼi tatatou kumi he fakafiafia heʼemaʼa peʼe ʼi tatatou fakalogo ki he musika pe ko he ʼu hiva ʼe nātou fakahā te manatu ʼo te mālama ʼaenī ʼaē ʼe heʼe aga faka lotu. (2 Kolonito 6:14-18) Kapau koia ʼaia, tou kumi te tokoni ʼa te ʼAtua ʼi te faikole, ke ʼaua naʼa molehi tatou mo te mālama ʼaenī, kae ke tali tatou e te Foha ʼo te tagata. (Luka 21:34-36; 1 Soane 2:15-17) Kapau kua tou foaki totatou maʼuli ki te ʼAtua, ʼe mahino ia ʼe tou faiga fakamalotoloto ke tou fakatupu pea mo taupau he vāhaʼa lelei mo ia, pea ke tou nofo teuteu ki te ʼaho lahi pea mo fakamataku ʼa Sehova.
19. He koʼe ʼe feala ke ʼamanaki e te tokolahi ʼo te kau kaugā fai mafola ʼo te Puleʼaga ke nātou hāo ʼi te fakaʼosi ʼo te tuʼu ʼo te ʼu faʼahiga meʼa agakovi ʼaenī?
19 Ko Noe pea mo tona famili, ʼaē neʼe nātou pipiki ki te ʼAtua, neʼe nātou hāo ʼi te Tulivio ʼaē neʼe ina molehi te mālama ʼāfea. Ko te hahaʼi agatonu neʼe nātou hāo ʼi te fakaʼosi ʼo te tuʼu ʼo te ʼu faʼahiga meʼa faka Sutea ʼi te taʼu 70 ʼo totatou temi. Ohage la, ko te ʼapositolo ko Soane ʼaē neʼe kei tauhi mālohi pe ki te ʼAtua, lagi ʼi te taʼu 96 ki te 98 ʼo totatou temi, ʼi te temi ʼaē neʼe ina fai ai te tohi ʼo te Fakahā, mo te fakamatala ʼo tana Evaselio, pea mo te ʼu tohi e tolu neʼe ina fai ʼaki te takitaki ʼa te ʼAtua. ʼI te lauʼi afe hahaʼi ʼaē neʼe hū ki te lotu moʼoni ʼi te Penikosite ʼo te taʼu 33 ʼo totatou temi, ʼe mahino ia ko te tokolahi neʼe nātou hāo ʼi te fakaʼosi ʼo te tuʼu faka Sutea. (Gāue 1:15; 2:41, 47; 4:4) Ia ʼaho nei, tokolahi ʼi te kau kaugā fai faka mafola ʼo te Puleʼaga, ʼe feala ke nātou ʼamanaki maʼuʼuli ʼi te fakaʼosi ʼo te tuʼu ʼo te ʼu faʼahiga meʼa agakovi ʼaenī.
20. He koʼe ʼe tonu ke tou liliu ko he kau ‘fai faka mafola faiva ʼo te faitotonu’?
20 Tou liliu ko he kau ‘fai faka mafola faiva ʼo te faitotonu,’ ke feala hatatou maʼu ia te mālama foʼou ʼaē ʼe tou fakatalitali kiai. ʼE ko he pilivilesio ke tou tauhi ki te ʼAtua ʼi te ʼu ʼaho fakamuli ʼaenī. Pea ʼe ko he meʼa fakafiafia te taki ʼo te hahaʼi ki te “aleka” ʼo te temi ʼaenī, te palatiso fakalaumālie ʼaē ʼe maʼuʼuli ai te hahaʼi ʼo te ʼAtua! Tou fakaʼamu ki te toko miliona hahaʼi ʼaē ʼe nonofo ʼi te palatiso ʼaia ʼi te temi ʼaenī, ke nātou nonofo agatonu, mo ʼalaʼala ʼi te faʼahi fakalaumālie, pea ke nātou nofo teuteu ki te ʼaho lahi ʼo Sehova. Kae koteā te meʼa ʼaē ka tokoni anai kia tatou ke tou nonofo ʼalaʼala?
[Nota ʼi te lalo pasina]
a Koutou vakaʼi te ʼu kapite 10 pea mo 11 ʼo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, ʼaē neʼe tā e te Watchtower Bible and Tract Society of New York, Inc.
ʼE Koutou Tali Feafeaʼi Anai?
◻ Koteā ʼaē neʼe talitali kiai ʼihi hahaʼi ʼo ʼuhiga mo te ʼaho ʼo Sehova pea mo te ʼi henī ʼa Kilisito?
◻ He koʼe ʼe feala ke tou ʼui neʼe kua nofo teuteu ia Noe pea mo tona famili ki te Tulivio?
◻ Koteā ʼaē ka hoko anai kia nātou ʼaē ʼe “nonofo tokaga” pea mo nātou ʼaē ʼe mole nonofo tokaga?
◻ He koʼe koa ʼe maʼuhiga te ʼu aga fakamaʼoniʼoni, tāfito ʼi tatatou kua fakaōvi ki te ʼaho lahi ʼo Sehova?