“ ʼE Mole Līaki Anai e Sehova Tana Hahaʼi”

“ ʼE lahi te ʼu malaʼia ʼo ia ʼaē ʼe faitotonu, kae ko Sehova ʼe ina faka ʼāteaina ia ia mai te ʼu malaʼia fuli ʼaia.”​—Pesalemo 34:19.

1, 2. (a) ʼE tapuakina feafeaʼi e Sehova tana hahaʼi ia ʼaho nei? (b) Koteā ʼaē ʼe hoko ki te tokolahi ʼo te kau Kilisitiano, pea koteā te ʼu fehuʼi ʼaē ʼe tou lagaʼi?

MOʼO fakahoko ʼo te lea faka polofeta ʼo te Tohi-Tapu, ʼe nonofo te hahaʼi tauhi ʼa Sehova ʼi te palatiso fakalaumālie. (2 Kolonito 12:​1-4) Ko te kau Fakamoʼoni ʼa Sehova ʼe nātou kau ki te foʼi famili fakatautehina ʼi te malamanei katoa, ʼe maʼu ai te ʼofa pea mo te logo tahi. (Soane 13:35) ʼE nātou maʼu he ʼatamai mālama lahi pea mo loloto ʼo ʼuhiga mo te ʼu moʼoni ʼo te Tohi-Tapu. (Isaia 54:13) ʼE nātou loto fakafetaʼi kia Sehova ʼi tana foaki age kia nātou, te pilivilesio ʼaē ke nātou kau ʼi te ʼu hahaʼi ʼaē neʼe fakaafe ki tona fale fehikitaki fakalaumālie!​—Pesalemo 15:1.

² Logope la ko te hahaʼi fuli ʼo te kautahi ʼa Sehova ʼe nātou fīmālie ʼi te faʼahi fakalaumālie, kae ʼe hage mai ia ko ʼihi ʼe nātou maʼuʼuli ʼi he faʼahiga tokalelei pea mo he faʼahiga fīmālie, pea ko ʼihi ʼe nātou tau mo te ʼu faʼahiga mamahi kehekehe. Tokolahi te kau Kilisitiano ʼe nātou tau mo he ʼaluʼaga fakaʼofaʼofa talu mai fualoa pea kia nātou ʼe mole hanatou ʼamanaki ki he fakafimālie. Koia ʼe mole tonu ke tou punamaʼuli ai mo kapau ʼe nātou lotovaivai ʼi te ʼu ʼaluʼaga ʼaia. (Tāʼaga Lea 13:12) Ko te ʼu tuʼutāmaki ʼaē ʼe hoko, ʼe ko he fakahā koa ʼaia ʼo te mole leleiʼia e te ʼAtua te tahi ʼu Kilisitiano? ʼE foaki koa e Sehova he puipui makehe ki te tahi ʼu Kilisitiano kae ina līaki ʼihi?

3. (a) ʼE ko te hala koa ʼa Sehova te ʼu faigataʼaʼia ʼaē ʼe hoko ki tana hahaʼi? (b) He koʼe māʼia mo te hahaʼi tauhi agatonu ʼa Sehova, ʼe hoko kia nātou te ʼu mamahi?

³ ʼE tali fēnei e te Tohi-Tapu: “Ke ʼaua naʼa ʼui e he tahi ʼi te ʼahiʼahi, ‘ ʼe ʼahiʼahiʼi ʼau e te ʼAtua.’ Koteʼuhi ʼe mole feala ke ʼahiʼahiʼi e te ʼAtua ʼaki he ʼu meʼa ʼe kovi pea ko ia totonu ʼe mole ina ʼahiʼahiʼi he tahi.” (Sake 1:​13) Ko Sehova ʼe ina puipui pea mo tokoni ki tana hahaʼi. (Pesalemo 91:​2-6) “ ʼE mole līaki anai e Sehova tana hahaʼi.” (Pesalemo 94:14) ʼE mole faka ʼuhiga leva ʼe mole hoko anai he ʼu mamahi ki tana hahaʼi tauhi agatonu. ʼE puleʼi te tuʼu ʼo te ʼu faʼahiga meʼa faka malamanei ʼaenī e te ʼu hahaʼi heʼe haohaoa. Ko te tokolahi ʼe aga fakahehema, pea ko ʼihi ia nātou ʼe nātou agakovi ʼaupito. ʼE mole he tahi ia nātou ʼe ina kumi te poto ʼaē ʼe foaki mai e Sehova. Ko te tupuʼaga la ʼaia ʼo te mamahi ʼaupito ʼo te malamanei. ʼE ʼui fakahagatonu e te Tohi-Tapu ʼe mole feala ke hāo tuʼumaʼu te hahaʼi ʼa Sehova ʼi te ʼu meʼa kovi ʼaē ʼe hoko, ʼuhi ko te heʼe haohaoa pea mo te agakovi ʼa te tagata.​—Gāue 14:22.

ʼE Tonu Ke Mamahi Te Kau Kilisitiano Agatonu

4. Koteā ʼaē ʼe tonu ke hoko ki te kau Kilisitiano ʼi tanatou maʼuʼuli ʼi te tuʼu ʼo te ʼu faʼahiga meʼa agakovi ʼaenī, pea koteā tona tupuʼaga?

⁴ Logope la ʼe mole nātou kau ki te malamanei, kae ʼe maʼuʼuli te kau tisipulo ʼa Sesu ʼi te lotolotoiga ʼo te tuʼu ʼo te ʼu faʼahiga meʼa ʼaenī. (Soane 17:15, 16) ʼE fakahā mai e te Tohi-Tapu ko Satana te mālohi ʼaē ʼe ina puleʼi te mālama ʼaenī. (1 Soane 5:​19) Koia, ʼe tonu ke ʼiloʼi e te kau Kilisitiano ʼe hoko anai kia nātou, ʼi he temi pe, he ʼu fihifihia mamafa. ʼI tana manatu ki te faʼahi ʼaia, ʼe ʼui fēnei e te ʼapositolo ko Petelo: “Koutou nonofo ʼalaʼala, koutou nonofo tokaga. Ko tokotou fili, ia te Tevolo, ʼe feʼaluʼaki ohage ko he laione ʼe gugulu, ʼo ina kumi ke ina kai he tahi. Kae ke koutou fakafeagai kia ia, ʼo koutou mālohi ʼi te tui, heʼe koutou ʼiloʼi ko te ʼu meʼa ʼaia ʼo ʼuhiga mo te ʼu mamahi ʼe hoko ki te famili katoa ʼo tokotou ʼu tēhina ʼi te malamanei.” (1 Petelo 5:​8, 9) ʼE moʼoni, ʼe tonu ke hoko he ʼu mamahi ki te kau Kilisitiano fuli.

5. Neʼe fakahā feafeaʼi e Sesu ʼe hoko anai ki te kau Kilisitiano agatonu he ʼu meʼa kovi ʼi tonatou maʼuli?

⁵ Tatau aipe la peʼe tou ʼofa lahi kia Sehova pea mo tou agatonu ki tana ʼu pelesepeto, kae ʼe hoko anai kia tatou he ʼu meʼa kovi ʼi totatou maʼuli. Neʼe fakahā lelei e Sesu te faʼahi ʼaia ʼi tana lea fakatātā ʼaē ʼe tuʼu ia Mateo 7⁠:​24-27, ʼaē neʼe ina fakahā ai te kehekehe ʼo nātou ʼaē ʼe nātou fakalogo ki tana ʼu folafola pea mo nātou ʼaē ʼe mole nātou fakalogo kiai. Neʼe ina fakatatau tana ʼu tisipulo fakalogo ki he tagata poto ʼe ina laga tona fale ʼi he fuga maka mālohi. Neʼe ina fakatatau ia nātou ʼaē ʼe mole nātou fakalogo ki tana ʼu folafola ki he tagata vale ʼe ina laga tona fale ʼi te ʼone. ʼI te hoko ʼo te afā fakamataku, ʼe ko te ʼapi pe ʼaē neʼe laga ʼi te fuga maka ʼe hāo. Koutou fakatokagaʼi te fale ʼo te tagata poto, neʼe “tō te ʼua ʼo lalahi ʼaupito, pea hoko mai mo te ʼu puvai, pea agi te matagi ʼo lalahi ʼaupito ki te fale ʼaia, ka neʼe mole holo ia.” Neʼe mole fakapapau e Sesu ʼe maʼuli tuʼumaʼu anai te tagata poto ʼi te tokalelei pea mo te fīmālie. Kae neʼe teuteu te tagata poto ke ina tauʼi te afā. ʼE tou toe maʼu te manatu ʼaia ʼi te lea fakatātā ʼo te tagata tūtū pulapula. ʼI te lea fakatātā ʼaia, ʼe fakamahino ai e Sesu ko te kau tisipulo fakalogo “ ʼaki he loto fiafia pea mo lelei,” ʼe nātou “fua [anai] ʼaki te loto faʼa kātaki.”​—Luka 8:​4-​15.

6. ʼI te lea fakatātā ʼa Paulo ʼo ʼuhiga mo te ʼu meʼa ʼaē ʼe mole ulo gataʼa, ko ai ʼaē ʼe hoko kiai he ʼu ʼahiʼahi mālohi?

⁶ ʼI tana faitohi ki te kau Kolonito, neʼe fakaʼaogaʼi e te ʼapositolo ko Paulo te ʼu lea fakatātā moʼo fakahā te ʼaoga ʼaē ke tou maʼu he ʼu kalitate mālohi, ʼe feala anai ke nātou tokoni mai kia tatou ke tou tauʼi te ʼu fihifihia. ʼE fakatatau te ʼu kalitate fakaʼatua ki te ʼu meʼa ʼaē ʼe ulo gataʼa, ohage ko te aulo, mo te siliva, pea mo te ʼu maka maʼuhiga. (Vakaʼi ia Tāʼaga Lea 3:​13-​15; 1 Petelo 1:​6, 7.) ʼI te tahi faʼahi, ʼe fakatatau te ʼu meʼa ʼo te kakano ki he ʼu meʼa ʼe ulo gafua. ʼE ʼui fēnei ai e Paulo: “Ko te gāue ʼa te tagata takitahi ʼe hā anai ia, heʼe fakahā anai e te ʼaho, koteʼuhi ʼe hā anai ia ʼaki te afi; pea ʼe ko te afi totonu ʼaia ʼe ina fakahā mai anai peʼe koteā te faʼahiga gāue ʼa te tagata takitokotahi. Kapau ko te gāue ʼa he tahi neʼe ina laga kiai, ʼe tuʼu maʼu, pea ʼe ina maʼu anai he fakapale.” (1 Kolonito 3:​10-​14) ʼI henī, ʼe toe fakahā e te Tohi-Tapu ʼe hoko anai kia tatou fuli he ʼu faʼahiga ʼahiʼahiʼi mālohi.

7. ʼO mulimuli ki te meʼa ʼaē ʼe ʼui ia Loma 15⁠:​4, ʼe tokoni feafeaʼi mai te Tohi-Tapu kia tatou ke tou kātakiʼi te ʼu ʼahiʼahiʼi?

⁷ ʼE lahi te ʼu fakamatala ʼi te Tohi-Tapu ʼo ʼuhiga mo te ʼu kaugana agatonu ʼa te ʼAtua neʼe nātou kātakiʼi te ʼu tuʼutāmaki, pea ʼi ʼihi temi neʼe hoko fualoa te faʼahi ʼaia. Kae neʼe mole līaki ia nātou e Sehova. Neʼe lagi manatuʼi e te ʼapositolo ko Paulo te ʼu faʼifaʼitaki ʼaia ʼi tana ʼui fēnei: “Ko te ʼu meʼa fuli pe ʼaē neʼe tohi ʼi te temi muʼa neʼe tohi ia moʼo akoʼi ʼo tatou, koteʼuhi ke tou maʼu te ʼamanaki ʼaki tatatou faʼa kātaki pea mo te fakaloto fīmālie ʼaē ʼe haʼu mai te Tohi-Tapu.” (Loma 15:4) Tou vakaʼi te ʼu faʼifaʼitaki ʼo te ʼu tagata e toko tolu, ʼaē neʼe logope la tanatou vāhaʼa lelei mo te ʼAtua, kae neʼe hoko kia nātou te ʼu tuʼuga tuʼutāmaki.

Te ʼu Meʼa ʼAē ʼe Tou Ako ʼAki Te ʼu Fakamatala ʼa Te Tohi-Tapu

8. Koteā ʼaē neʼe fakagafua e Sehova ke hoko kia Sosefo, pea neʼe hoko lolotoga temi e fia?

⁸ Neʼe leleiʼia e Sehova te foha ʼo Sakopo, ko Sosefo talu mai tana kei veliveli. Kae logope la neʼe mole hana hala, kae neʼe hoko kia ia te ʼu tuʼuga tuʼutāmaki. Neʼe puke ia ia e tona ʼu tēhina pea neʼe nātou gaohi koviʼi. Neʼe fakatau ia ia ke ʼalu ʼo maʼuli popūla ʼi te fenua matāpule, pea neʼe tukugakoviʼi hala ʼi te fenua ʼaia, ʼo ʼave ai ki te “fale pilisoni.” (Senesi 40:15) ʼI ai, “neʼe gaohi koviʼi tona ʼu vaʼe ʼaki te ʼu seini, [pea] neʼe haʼi tona nefesi ʼaki te ʼu ukamea.” (Pesalemo 105:17, 18) Lolotoga tona maʼuli popūla pea mo tana nofo pilisoni, ʼe mahino papau ia neʼe faikole tuʼumaʼu ia Sosefo kia Sehova ke ina fakahāo ia ia. Kae lolotoga taʼu e 13, logope la neʼe fakaloto mālohiʼi ia ia e Sehova ʼi he ʼu ʼaluʼaga kehekehe, kae ʼi te ʼaho fuli pe neʼe ʼala ake ʼe kei maʼuli popūla pe pea mo nofo ʼi fale pilisoni.​—Senesi 37:2; 41:46.

9. Koteā ʼaē neʼe tonu ke kātakiʼi e Tavite lolotoga ni ʼu taʼu?

⁹ ʼE toe feiā pe mo Tavite. ʼI te temi ʼaē neʼe fili ai e Sehova he tagata ʼe tau mo ia ke pule ki Iselaele, neʼe ina ʼui fēnei: “Neʼe ʼau maʼu ia Tavite te foha ʼo Sese, ko he tagata ʼe leleiʼia e toku loto.” (Gāue 13:22) Logope la neʼe leleiʼia e Sehova ia ia, kae neʼe lahi ʼaupito te ʼu mamahi ʼaē neʼe tau mo Tavite. ʼI tana ʼiloʼi ʼaē neʼe kumi ia ia ke matehi, neʼe nono lolotoga ni ʼu taʼu ʼi te toafa, ʼi te ʼu ʼana, ʼi te ʼu maka makafaʼafaʼa, pea ʼi te fenua matāpule. Neʼe tuli ia ia ohage ko he manu fekai, pea neʼe lotovaivai ai pea mo mataku. Kae neʼe ina kātakiʼi ʼaki te mālohi ʼa Sehova. Neʼe feala ke ʼui tonu fēnei e Tavite ʼaki te ʼu meʼa ʼaē neʼe hoko kia ia: “ ʼE lahi te ʼu malaʼia ʼo ia ʼaē ʼe faitotonu, kae ko Sehova ʼe ina faka ʼāteaina ia ia mai te ʼu malaʼia fuli ʼaia.”​—Pesalemo 34:19.

10. Koteā te tuʼutāmaki lahi ʼaē neʼe hoko kia Napote pea mo tona famili?

¹⁰ ʼI te temi ʼo te polofeta ko Elia, neʼe ko hahaʼi e toko 7 000 neʼe mole nātou tulolo ki te ʼatua loi ko Paale. (1 Hau 19:18; Loma 11:4) Ko Napote, ʼaē ʼe mahino ia neʼe kau ia nātou ʼaia, neʼe hoko kia ia te aga fakakākā. Neʼe fakalainoaʼi ia ia ʼo tukugakoviʼi neʼe palalau kovi ki te ʼAtua. ʼI te tala ʼaē neʼe lākahala, neʼe fakatūʼa ia ia ʼaki te fakatotonu faka hau ke matehi, ʼo taumakaʼi, pea neʼe ʼepo tona toto e te ʼu kuli. Māʼia mo tona ʼu foha, neʼe toe matehi mo nātou! Kae neʼe mole ʼi ai hana hala. Ko te ʼu tagata ʼaē neʼe fai fakamoʼoni ʼo fakafeagai kia ia neʼe nā loi. Ko te ʼu meʼa fuli ʼaia ʼaē neʼe hoko, neʼe ko te fakatuʼutuʼu ʼa te Fineʼaliki ko Sesapele, ke feala ki te hau ke ina maʼu te vite ʼa Napote.​—1 Hau 21:​1-​19; 2 Hau 9:​26.

11. Koteā ʼaē ʼe ʼui mai kia tatou e te ʼapositolo ko Paulo ʼo ʼuhiga mo te ʼu tagata pea mo te ʼu fafine agatonu ʼi te hisitolia ʼo te Tohi-Tapu?

¹¹ Ko te ʼu tagata e toko tolu ko Sosefo, mo Tavite, pea mo Napote ʼe nātou kau ʼi te ʼu tagata pea mo te ʼu fafine tokolahi ʼaē ʼe talanoa kiai te Tohi-Tapu, neʼe hoko kia nātou te ʼu tuʼutāmaki. Neʼe tohi e te ʼapositolo ko Paulo te fakamanatu ʼo te hisitolia ʼo te ʼu kaugana ʼa Sehova ʼaē neʼe maʼuʼuli lolotoga te ʼu temi. ʼI te fakamatala ʼaia neʼe talanoa ai ʼo ʼuhiga mo nātou ʼaē “neʼe ʼahiʼahiʼi . . . ʼaki te manukinuki pea mo te ʼu huipi, māʼia mo te ʼu noʼo pea mo te ʼu fale pilisoni. Neʼe tuki makaʼi nātou, neʼe ʼahiʼahiʼi nātou, neʼe tuʼusi nātou ʼaki te tutuʼu, neʼe nātou mamate he neʼe tuʼusi ʼonatou kia ʼaki te heletā, neʼe nātou feʼoloʼaki mo te ʼu kiliʼi akeno, te ʼu kiliʼi tao, neʼe nātou tau mo te faigataʼaʼia, neʼe fakatagaʼi ia nātou, neʼe gaohi koviʼi ia nātou, pea neʼe mole tau te malamanei mo nātou. Neʼe nātou feʼoloʼaki ʼi te ʼu toafa pea mo te ʼu moʼuga, pea mo te ʼu ʼana ʼo te kele.” (Hepeleo 11:36-​38) Kae neʼe mole līaki ia nātou e Sehova.

ʼE Tokaga Ia Sehova Kia Nātou ʼAē ʼe Tau Mo Ni ʼu Mamahi

12. Koteā te ʼu mamahi ʼaē ʼe hoko ki te kau Fakamoʼoni ʼa Sehova ia ʼaho nei?

¹² E feafeaʼi ki te hahaʼi ʼa Sehova ia ʼaho nei? ʼI totatou ʼuhiga kautahi, ʼe feala ke tou falala ki te puipui fakaʼatua pea mo tou hāo ʼi te ʼu ʼaho fakamuli pea mo te mamahi lahi. (Isaia 54:17; Fakahā 7:​9-​17) Kae ʼi totatou ʼuhiga takitokotahi, ʼe tou ʼiloʼi “ko te ʼu temi pea mo te ʼu meʼa fakafokifā” ʼe hoko ki te hahaʼi fuli. (Tagata Tānaki 9:​11) Ia ʼaho nei ʼe tokolahi te kau Kilisitiano agatonu ʼe hoko kia nātou te ʼu tuʼutāmaki. Ko ʼihi ʼe nātou māsisiva ʼaupito. ʼE talanoa te Tohi-Tapu ki te ʼu Kilisitiano ʼaē “ ʼe hala mo tāmai pea mo te ʼu fafine vitua” ʼaē ʼe tau mo te ʼu mamahi. (Sake 1:​27) ʼE mamahi ʼihi ʼuhi ko te ʼu tuʼutāmaki fakakelekele, mo te ʼu tau, mo te ʼu fai fakapō, mo te ʼu kākā ʼa te kau takitaki, mo te mahaki, pea mo te mate.

13. Koteā te ʼu faigataʼaʼia ʼaē neʼe mole heʼeki fualoa tonatou hoko?

¹³ Ohage la, ʼi tanatou ʼu tānaki ʼo te taʼu 1996, ʼaē neʼe nātou fai ki te Kolesi Pule ʼo te kau Fakamoʼoni ʼa Sehova, neʼe fakamatala e te ʼu filiale ʼo te Sosiete Watch Tower ko ʼihi ʼi totatou ʼu tēhina mo tuagaʼane ʼe lolotoga nonofo pilisoni ʼi te ʼu ʼaluʼaga fakalialia, ʼuhi ko tanatou pipiki ki te ʼu pelesepeto ʼo te Tohi-Tapu. Ko kokelekasio e tolu ʼi te Potu Toga ʼo Amelika neʼe mavetevete ʼi te temi ʼaē neʼe fakamālohiʼi ai e te ʼu kūtuga solia te ʼu lauʼi teau kau Fakamoʼoni ke nātou mavae mai ai. ʼI te Potu Hihifo ʼo Afelika, neʼe mamate te ʼu Fakamoʼoni neʼe puke lolotoga te tau faka sivile. ʼI te fenua ʼi te lotomalie ʼo Amelika, neʼe fakaʼāsili kovi te ʼaluʼaga faigataʼa ʼo te ʼu tēhina ʼi te faʼahi faka paʼaga ʼuhi ko te afā mālohi ʼaē neʼe tō ai. ʼI te tahi ʼu fenua, ko te masiva pea mo te hoge ʼe mole lagi ko he ʼu fihifihia mamafa, kae ʼe feala ke vaivai te fiafia ʼo ʼihi ʼuhi ko te ʼu meʼa kovi ʼaē ʼe hoko. Ko te tokolahi ʼe nātou mafasia ʼuhi ko te ʼu faigataʼaʼia ʼo te maʼuli ʼo te temi ʼaenī. ʼUhi ko te mole fia fagono ʼa te hahaʼi, ʼe feala pe foki ke lotovaivai ai niʼihi ʼi tanatou faka mafola te logo lelei ʼo te Puleʼaga.

14. (a) Koteā ʼaē ʼe tou ako mai te faʼifaʼitaki ʼa Sopo? (b) Koteā te meʼa lelei ʼaē ʼe tonu ke tou fai mokā hoko kia tatou he meʼa fakaloto mamahi?

¹⁴ ʼE mole tonu ke faka ʼuhiga te ʼu ʼaluʼaga ʼaia moʼo fakamoʼoni ʼaki ai ʼe mole ʼofa te ʼAtua. Koutou manatuʼi ia Sopo pea mo te ʼu mamahi ʼaē neʼe hoko kia ia. Neʼe ko “te tagata ʼe mole hana lākahala pea ʼe totonu ia.” (Sopo 1:8) Neʼe lagi mamahi te loto ʼo Sopo ʼi te temi ʼaē neʼe tukugakoviʼi ai ia ia e Elifasi ʼi tana ʼui ʼaē neʼe ina fai te meʼa kovi! (Sopo, te ʼu kapite 4, 5, 22) ʼE mole tonu ke tou foimo manatu ʼe hoko kia tatou te ʼu tuʼutāmaki he neʼe tou fakaloto mamahiʼi ia Sehova ʼi he faʼahiga ʼaluʼaga, peʼe mole kei ina tapuakina tatou. Kapau ʼe tou maʼu he ʼu manatu kovi ʼi tatatou tauʼi te ʼu mamahi, pea ʼe feala ke fakavaivai ai tatatou tui. (1 Tesalonika 3:​1-3, 5) Ka hoko kia tatou he ʼu mamahi, pea ʼe lelei age hatatou metitasio ki te ʼaluʼaga ʼaē ko Sehova mo Sesu ʼe nā ōvi ki te kau faitotonu, tatau aipe pe koteā te meʼa ʼaē ʼe hoko kia nātou.

15. ʼE tou ʼiloʼi feafeaʼi ʼe tokaga ʼaupito ia Sehova ki te ʼu meʼa ʼaē ʼe hoko ki tana hahaʼi?

¹⁵ ʼE fakaloto fīmālieʼi tatou e te ʼapositolo ko Paulo ʼi tana ʼui ʼaē: “Ko ai anai ʼaē ka ina fakamavae tatou mai te ʼofa ʼo Kilisito? Ko te mamahi ʼapē, pe ko te faigataʼa ia, pe ko te fakataga, pe ko te hoge, pe ko te telefua, pe ko te tuʼutāmaki, pe ko te heletā? Heʼe kua ʼau ʼiloʼi papau ʼe mole he mate, he maʼuli, he ʼu ʼaselo, he ʼu puleʼaga, he ʼu meʼa ʼo te temi nei, he ʼu meʼa ka hoko mai, he ʼu mālohi, he māʼoluga, he loloto, pe ko he tahi age meʼa neʼe fakatupu ʼe ina lavaʼi anai ke ina fakamavae tatou mai te ʼofa ʼo te ʼAtua ʼaē ʼe ia Kilisito Sesu totatou ʼAliki.” (Loma 8:​35, 38, 39) ʼE tokaga ʼaupito ia Sehova kia tatou pea ʼe ina ʼiloʼi lelei totatou ʼu mamahi. Lolotoga te kei feholaʼaki ʼa Tavite, neʼe ina tohi fēnei: “Ko te ʼu mata ʼo Sehova ʼe tuku ki te kau faitotonu, pea ko ʼona taliga ʼe logo ki tanatou pāui ke hāofaki ia nātou. Ko Sehova ʼe ōvi kia nātou ʼaē ʼe lavea tonatou loto.” (Pesalemo 34:15, 18; Mateo 18:​6, 14) ʼE tokaga tatatou Tāmai ʼaē ʼe ʼi selo kia tatou pea ʼe manavaʼofa kia nātou ʼaē ʼe tau mo ni ʼu mamahi. (1 Petelo 5:​6, 7) ʼE ina foaki mai te ʼu meʼa ʼaē ʼe ʼaoga kia tatou ke tou kātakiʼi te ʼu mamahi kehekehe ʼaē ʼe hoko kia tatou.

Te ʼu Meʼa ʼOfa ʼa Sehova ʼAē ʼe Tokoni Mai Kia Tatou

16. Koteā te meʼa ʼaē ʼe foaki mai e Sehova moʼo tokoni kia tatou ke tou kātakiʼi te ʼu mamahi, pea e feafeaʼi?

¹⁶ Logope la ʼe mole feala ke tou ʼamanaki ke tou ʼāteaina ʼi totatou maʼuli mamahi ʼi te tuʼu ʼo te ʼu faʼahiga meʼa ʼāfea ʼaenī, kae ʼe “mole līʼakina ia [tatou].” (2 Kolonito 4:​8, 9) Neʼe fakapapauʼi mai e Sesu ʼe ina foaki anai he tokoni ki tana ʼu tisipulo. Neʼe ina ʼui fēnei: “ ʼE ʼau fai anai he kole ki te Tāmai, pea ʼe ina foaki atu anai kia koutou he tahi tokoni ke nofo mo koutou ʼo talu ai, ko te laumālie ʼo te moʼoni.” (Soane 14:16, 17) ʼI te Penikosite ʼo te taʼu 33 ʼo totatou temi, neʼe ʼui e te ʼapositolo ko Petelo ki te hahaʼi ʼaē neʼe fakalogo ki tana akonaki, neʼe feala ke nātou maʼu “te meʼa ʼofa ʼo te laumālie maʼoniʼoni.” (Gāue 2:​38) ʼE tokoni koa te laumālie maʼoniʼoni kia tatou ʼi te temi nei? Ei! ʼE foaki mai kia tatou e te mālohi gāue ʼo Sehova te ʼu fua matalelei: “Te ʼofa, te fiafia, te tokalelei, te kātaki fualoa, te finegaloʼofa, te agalelei, te tui, te agamālū, te loto lolomi.” (Kalate 5:​22, 23) Ko te ʼu meʼa fuli ʼaia ʼe ko he ʼu kalitate ʼe tokoni mai kia tatou ke tou kātakiʼi te ʼu mamahi.

17. Koteā te ʼu moʼoni faka Tohi-Tapu ʼaē ʼe nātou fakaloto mālohiʼi tatatou tui pea mo totatou lotomālohi ʼaē ke tou atalitali ʼaki he faʼa kātaki kia Sehova?

¹⁷ ʼE toe tokoni mai foki te laumālie ke tou mahino ko te ʼu mamahi ʼo te temi ʼaenī, ʼe “faka temi pea mo maʼamaʼa” mo kapau ʼe tou fakatatau ki te fakapale ʼo te maʼuli heʼegata. (2 Kolonito 4:​16-​18) ʼE tou ʼiloʼi papau ʼe mole galoʼi anai e te ʼAtua tatatou gāue pea mo te ʼofa ʼaē ʼe tou fakahā kia ia. (Hepeleo 6:​9-​12) ʼI tatatou lau te ʼu palalau ʼaē ʼe haʼu mai te ʼAtua ʼi te Tohi-Tapu, ʼe fakaloto fīmālieʼi tatou ʼaki te ʼu faʼifaʼitaki ʼo te ʼu kaugana agatonu ʼo te temi muʼa, ʼaē neʼe nātou kātakiʼi te ʼu tuʼuga tuʼutāmaki kae neʼe ʼui ʼe nātou manuʼia. ʼE tohi fēnei e Sake: “ ʼU tēhina, ʼo ʼuhiga mo te ʼutaki ʼo te mamahi pea mo te loto faʼa kātaki, koutou mulimuli ki te faʼifaʼitaki ʼa te kau polofeta ʼaē neʼe nātou palalau ʼaki te huafa ʼo Sehova. Koutou vakaʼi, ʼe mātou kalagaʼi ʼe manuʼia ia nātou ʼaē neʼe nātou faʼa kātaki.” (Sake 5:​10, 11) ʼE fakapapauʼi mai e te Tohi-Tapu ia te “mālohi ʼaē ʼe laka age ʼi te mālohi māhani” moʼo tokoni mai kia tatou ke tou kātakiʼi te ʼu ʼahiʼahiʼi. ʼE toe tapuakina foki ia tatou e Sehova ʼaki te ʼamanaki ʼo te fakatuʼuake. (2 Kolonito 1:​8-​10; 4:7) ʼI tatatou lau te Tohi-Tapu ʼi te ʼaho fuli pea mo metitasio ki te ʼu fakapapau ʼaia, ʼe fakaloto mālohiʼi ai anai tatatou tui pea mo totatou lotomālohi ʼaē ke tou atalitali ki te ʼAtua.​—Pesalemo 42:5.

18. (a) Ia 2 Kolonito 1:​3, 4, koteā ʼaē ʼe fakaloto mālohiʼi ai tatou ke tou fai? (b) ʼE lava liliu ʼo feafeaʼi te kau tagata taupau Kilisitiano ko he ʼu hahaʼi ʼe nātou foaki he ʼu fakaloto fīmālie?

¹⁸ ʼO hilifaki kiai, neʼe foaki mai e Sehova te palatiso fakalaumālie ʼaē ʼe feala ke tou maʼu ai te ʼofa moʼoni ʼo totatou ʼu tēhina mo tuagaʼane Kilisitiano. ʼE ko he maʼua ʼo tatou fuli ke tou fefakaloto fīmālieʼaki. (2 Kolonito 1:​3, 4) Tāfito te kau tagata taupau faka Kilisitiano ʼe feala ke nātou liliu ko he ʼu hahaʼi ʼe nātou foaki he ʼu fakaloto fīmālie. (Isaia 32:2) ʼI tonatou ʼuhiga “meʼa ʼofa ko he ʼu tagata,” ʼe tonu ke nātou fakaloto mālohi ia nātou ʼaē ʼe mamahi, mo fai he ʼu “palalau fakaloto fīmālie ki te ʼu nefesi ʼaē ʼe lotomamahi” pea mo “lagolago kia nātou ʼe vaivavai.” (Efesi 4:​8, 11, 12; 1 Tesalonika 5:​14) ʼE fakaloto mālohiʼi te kau tagata ʼāfea ke nātou fakaʼaogaʼi lelei te ʼu nusipepa ʼo Te Tule Leʼo pea mo te Réveillez-vous!, ʼo feiā mo te ʼu tohi ʼaē ʼe foaki mai e “te tagata kaugana agatonu mo poto.” (Mateo 24:45-​47) ʼE maʼu ʼi te ʼu tohi ʼaia te ʼu tuʼuga tokoni ʼe fakatafito ki te Tohi-Tapu, pea ʼe feala ke tokoni kia tatou ke tou fakatokatoka​—pea mo tou tekeʼi—​te ʼu fihifihia ʼaē ʼe tupu ai tatatou tuʼania. Tou fakaʼamu ke tou faʼifaʼitakiʼi ia Sehova ʼaki tatatou fefakaloto fīmālieʼaki pea mo fefakaloto mālohiʼaki ʼi te ʼu temi faigataʼa!

19. (a) Koteā ʼaē ʼe tokoni kia tatou ke tou tekeʼi te ʼu fihifihia? (b) Moʼo fakaʼosi, ko ai ʼaē ʼe tonu ke tou falala ki ai, pea koteā te ʼu meʼa ʼaē ka nātou faka fealagia anai kia tatou ke tou kātakiʼi te ʼu ʼahiʼahi?

¹⁹ ʼI tanatou haʼele ki muʼa ʼi te ʼu ʼaho fakamuli pea mo te fakaʼāsili kovi ʼo te ʼaluʼaga ʼo te tuʼu ʼo te ʼu faʼahiga meʼa ʼaenī, ʼe fai e te kau Kilisitiano ia meʼa fuli ke nātou tekeʼi te ʼu tuʼutāmaki. (Tāʼaga Lea 22:3) Ko te fakafuafua lelei, mo he ʼatamai poto, pea mo tatatou ʼiloʼi te ʼu pelesepeto ʼo te Tohi-Tapu ʼe tokoni kia tatou ke tou fai he ʼu tonu ʼe fakapotopoto. (Tāʼaga Lea 3:​21, 22) ʼE tou fakalogo ki te Folafola ʼa Sehova pea mo tou mulimuli kiai ke ʼaua naʼa tou hoko tō ki he ʼu hala. (Pesalemo 38:4) Kae ʼe tou ʼiloʼi ko tatatou ʼu faiga ʼe mole feala anai ke nātou pulihi katoa te ʼu mamahi ʼi totatou maʼuli. ʼI te tuʼu ʼo te ʼu faʼahiga meʼa ʼaenī, tokolahi te kau faitotonu ʼe hoko kia nātou te ʼu fihifihia lahi. Kae ʼe feala ke tou tauʼi totatou ʼu faigataʼaʼia ʼaki te falala katoa ʼaē, ko “Sehova ʼe mole ina līaki anai tana hahaʼi.” (Pesalemo 94:14) Pea kua tou ʼiloʼi, ʼe mole kei tuai pea ʼe pulihi anai te tuʼu ʼo te ʼu faʼahiga meʼa ʼaenī pea mo tana ʼu meʼa fakatupu mamahi. Koia, tou fakaʼamu ʼaki he lotomālohi ke “ ʼaua naʼa tou fiu ʼi te fai ʼo te meʼa ʼaē ʼe lelei, heʼe tou utu anai ʼi tona temi totonu, mo kapau ʼe mole tou fiu.”​—Kalate 6:⁠9.

Koteā ʼAē Neʼe Tou Ako?

◻ Koteā te ʼu ʼahiʼahiʼi ʼaē ʼe hoko ki te kautahi katoa ʼa te kau Kilisitiano?

◻ Koteā te ʼu faʼifaʼitaki ʼo te Tohi-Tapu ʼaē ʼe tokoni kia tatou ke tou mahino ai, ko te ʼu mamahi ʼaē ʼe hoko kia tatou ʼe mole ko he fakamoʼoni ʼaia ʼe līʼakina ia tatou e Sehova?

◻ ʼE lave feafeaʼi kia Sehova te ʼu mamahi ʼaē ʼe hoko ki tana hahaʼi?

◻ Koteā te ʼu meʼa ʼofa ʼaē ʼe foaki mai e Sehova, ʼe tokoni kia tatou ke tou kātakiʼi te ʼu ʼahiʼahiʼi?

[Paki ʼo te pasina 10]

Ko Tavite, mo Napote, pea mo Sosefo ʼe ko te ʼu tagata toko tolu ʼaia neʼe hoko kia nātou te ʼu mamahi