Te ʼu Fehuʼi ʼa Te Kau Lautohi

Neʼe tou fiafia ʼi tatatou vakaʼi te lea fakatātā ʼa Sesu ʼo ʼuhiga mo te ʼu ōvi pea mo te ʼu tao. ʼI tatatou maʼu te fakamahino foʼou ʼaē neʼe fakahā ʼi Te Tule Leʼo ʼo te ʼaho 15 ʼo ʼOketopeli 1995, ʼe kei feala koa hatatou ʼui ʼe kau te kau Fakamoʼoni ʼa Sehova ki he gāue ʼe ina vaevae te hahaʼi?

Ei. ʼE mahino ia, neʼe tokolahi ia nātou ʼaē neʼe nātou fai te ʼu fehuʼi ʼo ʼuhiga mo te faʼahi ʼaia, koteʼuhi ʼe ʼui fēnei ia Mateo 25:31, 32: “Ka haʼu anai te Foha ʼo te tagata ʼi tona kolōlia, pea mo te kau ʼaselo fuli mo ia, pea ʼe heka anai ki tona hekaʼaga faka hau faka kolōlia. Pea ʼi ʼona muʼa ʼe tānaki anai te ʼatu puleʼaga katoa, pea ʼe ina fevaevae kehe ʼaki anai te hahaʼi, ohage ko te vaheʼi e te tagata tauhi ōvi te ʼu ōvi mai te ʼu tao.” ʼI Te Tule Leʼo ʼo te ʼaho 15 ʼo ʼOketopeli 1995, neʼe fakahā ai ko te ʼu vaega ʼaia ʼe fakahoko anai ʼi te hili ʼo te kamata ʼo te mamahi lahi. ʼE haʼu anai ia Sesu ʼi tona kolōlia mo tana kau ʼaselo, pea ʼe heka anai ʼi tona hekaʼaga fai fakamāu. ʼOsi ʼaia, pea ʼe ina vaevae anai te hahaʼi. Koteā tona faka ʼuhiga? ʼE ina fai anai he ʼu fakatotonu ʼe fakatafito ki te ʼu meʼa ʼaē neʼe nātou fai, peʼe ko te ʼu meʼa ʼaē neʼe mole nātou fai ʼi muʼa ʼo te temi ʼaia.

ʼE feala ke tou fakatatau te fakamāu ʼaia ki te ʼu meʼa ʼaē ʼe hoko mokā ʼe tonu ke fai he fakamāu ʼi te telepinale. ʼE tānaki te ʼu fakamoʼoni kehekehe lolotoga he temi loaloaga ʼi muʼa ʼo te fakahoko e te telepinale tana fakamāu. Neʼe tānaki talu mai fualoa te ʼu fakamoʼoni ʼaē ʼe fakahā ai peʼe ko te hahaʼi ʼaē ʼe maʼuʼuli ia ʼaho nei, ʼe nātou hage anai koa ko he ʼu ōvi peʼe ko he ʼu tao. Pea ʼe kei hilifaki kiai te tahi ʼu fakamoʼoni foʼou. Kae ʼi te temi ʼaē ka heka anai ia Sesu ki tona hekaʼaga hau, kua katoa anai te ʼu fakamoʼoni ki te fai fakamāu. ʼE teuteu anai ia Sesu ke ina fai te fakamāu. ʼE vaevae anai te hahaʼi ke hoko kia nātou te fakaʼauha heʼegata peʼe ko te foaki kia nātou ia te maʼuli heʼegata.

Kae logope la ko te vaevae ʼo te hahaʼi ki te maʼuli peʼe ki te mate ʼaē ʼe talanoa kiai ia Mateo 25:32 ʼe tonu ke hoko ʼi te temi ka haʼu, kae ʼe mole faka ʼuhiga leva ʼe mole hoko he vaevae ʼi muʼa ʼo te temi ʼaia. Ia Mateo kapite 13, ʼe talanoa te Tohi-Tapu ki te vaevae ʼaē ʼe hoko ʼi muʼa ʼo te temi ʼaia. ʼE feala ke tou fakatokagaʼi te meʼa ʼaē ʼe ʼui ʼi te pasina 25 mo te 26 ʼo Te Tule Leʼo ʼo te ʼaho 15 ʼo ʼOketopeli 1992, ʼi te kupu tāfito “ ʼE mavete te hahaʼi.” ʼE ina ʼui fēnei: “ ʼE ʼi ai pe mo te tahi ʼu meʼa maʼuhiga neʼe fakamatala e Sesu mo ina faka kau ki te fakaʼosi ʼo te ʼu faʼahiga meʼa ʼo te tuʼu ʼaenī. Ohage la ko te fakamavaevae ʼo te ʼu ‘foha ʼo te puleʼaga’ pea mo te ʼu ‘foha ʼo te agakovi.’ Ko Sesu neʼe palalau ki te fakamavaevae ʼaia ʼi tana lea fakatātā, ʼo palalau ai ki te gāueʼaga fulumeto neʼe haga ai te fili ʼo toe to ki ai te vao kovi.”

Neʼe talanoa Te Tule Leʼo ʼaia ki te lea fakatātā ʼa Sesu ʼaē ʼe fakahā ia Mateo 13:24-​30, pea ʼe fakamahino ai ʼi te vaega 36 ki te 43. Koutou fakatokagaʼi ʼi te vaega 38 ko te pulapula ʼo te fulumeto ʼaē ʼe lelei ʼe ina fakatātā te ʼu foha ʼo te Puleʼaga, kae ko te vao kovi ʼe ina fakatātā te ʼu foha ʼo te agakovi. ʼE fakahā mai ʼi te ʼu vaega 39 pea mo te 40, ʼe tānaki te vao kovi ʼi te ‘fakaʼosi ʼo te tuʼu ʼo te ʼu faʼahiga meʼa ʼaenī’​—lolotoga te temi ʼaenī ʼaē ʼe tou maʼuʼuli ai. ʼE tuku keheʼi te vao kovi ʼaia, pea tutu ʼi te afi.

Ko te lea fakatātā ʼaia ʼe talanoa ki te kau Kilisitiano fakanofo (ʼaē ʼe fakahigoaʼi ko te ʼu tēhina ʼo Sesu ʼi te lea fakatātā ʼo ʼuhiga mo te ʼu ōvi pea mo te ʼu tao). Kae ʼe hā lelei mai, ko te fakamavaevae maʼuhiga ʼe hoko ʼi totatou temi, ʼaē ʼe fakakeheʼi ai te kau fakanofo pea mo te hahaʼi ʼaē ʼe nātou ʼui ko nātou ko he ʼu Kilisitiano, kae ʼe nātou fakahā ko nātou ko te ʼu “foha ʼo te agakovi.”

Neʼe foaki e Sesu te tahi ʼu faʼifaʼitaki ʼo ʼuhiga mo te vaevae ʼo te hahaʼi, peʼe ko tanatou mavetevete. Koutou manatuʼi te meʼa ʼaē neʼe ina ʼui ʼo ʼuhiga mo te ala laulahi ʼaē ʼe ina taki ki te fakaʼauha: “ ʼE tokolahi ia nātou ʼe hū ai.” (Mateo 7:​13) Neʼe mole ko he talanoa pe ʼaia ki te temi ʼaē ka hoko anai ʼi te fakaʼosi. Neʼe talanoa ki he meʼa ʼe lolotoga hoko, ohage pe ko tona hoko ʼi te temi ʼaenī ki te tokosiʼi ʼo te hahaʼi ʼaē ʼe nātou maʼu te ala lauveliveli ʼaē ʼe ina taki ki te maʼuli. Koutou toe manatuʼi foki, ʼi te temi ʼaē neʼe fekauʼi ai e Sesu tana kau ʼapositolo, neʼe ina ʼui ʼe nātou maʼu anai he ʼu hahaʼi ʼe tau mo nātou ke nātou ʼiloʼi te logo lelei. Ko ʼihi ʼe mole tau anai mo nātou ke nātou ʼiloʼi te faʼahi ʼaia, pea neʼe tonu ki te kau ʼapositolo ke nātou tū te efu ʼo tonatou ʼu lalo vaʼe “moʼo fakamoʼoni” ki te taʼi hahaʼi ʼaia. (Luka 9:5) ʼE mole hoko koa la te faʼahi ʼaia ia ʼaho nei mokā fai faka mafola te kau Kilisitiano ki te hahaʼi? ʼE tali lelei e ʼihi, kae ko ʼihi ʼe nātou fakafisi ki te logo fakaʼatua ʼaē ʼe tou fakahā.

Neʼe tohi fēnei ʼi te alatike ʼo Te Tule Leʼo ʼaē neʼe talanoa ki te ʼu ōvi pea mo te ʼu tao: “Logope la ko te fakamāu ʼaia ʼaē ʼe talanoa kiai te lea fakatātā ʼe hoko anai ʼi he temi ki ʼamuli, kae ʼi te temi nei ʼe hoko te meʼa maʼuhiga. ʼI totatou ʼuhiga Kilisitiano, ʼe tou kau ʼi te gāue ʼaē ko te hāofaki ʼo te hahaʼi, ʼaki te kalagaʼi ʼo te logo ʼaē ʼe fakatupu ʼaki te fakamavaevae ʼo te hahaʼi ʼo ʼuhiga mo te faka mafola ʼo te logo ʼi te lotolotoiga ʼo te hahaʼi. (Mateo 10:32-​39).” ʼI te koga tohi ʼaia ʼo Mateo kapite 10, ʼe tou lau ai neʼe ʼui e Sesu, ko te mulimuli kia te ia ʼe fakatupu ʼaki te fakamavetevete ʼo te hahaʼi​—ko te tāmai ʼe fakafeagai anai ki tona foha, pea ko te taʼahine ʼe fakafeagai anai ki tana faʼe.

Tahi ʼaē meʼa, ko te ʼu tēhina ʼo Sesu ʼaē neʼe fakanofo ʼaki te laumālie, ʼe nātou lagiaki te faka mafola ʼo te logo ʼo te Puleʼaga ʼi te kele katoa. ʼI te logo ʼa te hahaʼi ki te logo ʼaia pea mo nātou tali peʼe fakafisi kiai, ʼe nātou fakahā ai pe ko ai te kūtuga ʼaē ʼe nātou kau kiai. ʼI totatou ʼuhiga tagata, ʼe mole feala pea ʼe mole tonu ke tou ʼui, ‘Ko ia ʼaē ko te ōvi; ko ia ʼaē ko te tao,’ ohage ko tona faka ʼuhiga ʼi te kapite 25 ʼo Mateo. Kae ko tatatou fakahā ki te hahaʼi te logo lelei ʼe ina faka fealagia kia nātou ke nātou fakahā peʼe koteā tanatou manatu​—peʼe ko nātou ko te ʼu faʼahiga hahaʼi feafeaʼi, pea ʼe nātou gaohi feafeaʼi te ʼu tēhina ʼo Sesu. Koia, ohage ko te hā lelei ʼo te ʼu fakamoʼoni mokā fai he fai fakamāu, koia ʼe hā lelei te ʼu mavaevae ʼo nātou ʼaē ʼe nātou lagolago ki te ʼu tēhina ʼo Sesu, pea mo te hahaʼi ʼaē ʼe mole nātou fia lagolago kia nātou. (Malakia 3:​18) Ohage ko tona fakahā ʼi Te Tule Leʼo, ʼe mole kei tuai pea heka anai ia Sesu ʼi tona hekaʼaga hau pea mo ina fakahoko te fakamāu, pea ʼe vaevae anai te hahaʼi ki te maʼuli heʼegata peʼe ki te mate heʼegata.