ʼE Fakaaʼu Te Logo Lelei Ki Te ʼu Hahaʼi ʼe Tokolahi Age

ʼI TAKU manatuʼi te hahaʼi ʼo toku kolo, neʼe mahino kia ʼau, ko te tokolahi ʼe nātou ʼiloʼi pe te kau Fakamoʼoni ʼa Sehova ʼi te ʼu meʼa ʼaē ʼe tohi ʼi te ʼu sulunale peʼe ko te ʼu meʼa ʼaē ʼe ʼui ʼi te ʼu tala logo. Neʼe ʼau manatu ai ʼe tonu ke ʼau palalau mo te hahaʼi ʼaia, ke feala hanatou ʼiloʼi pe ko ai te kau Fakamoʼoni ʼa Sehova pea mo te ʼu meʼa ʼaē ʼe nātou tui moʼoni kiai. Kae koteā te tokoni ʼaē ʼe ʼau lava fai? ʼE tagata ʼāfea toku ʼohoana, pea neʼe ina foaki mai he takitaki pea mo he ʼu tokoni lelei.

Neʼe ma maʼu te manatu tāfito ʼi te alatike ko tona kupu tāfito: “Ko he ʼu nusipepa ʼe nātou foaki he fakaloto fīmālie moʼoni,” ʼaē neʼe hā ʼi te Réveillez-vous! Fakafalani ʼo te ʼaho 8 ʼo Sanualio 1995. ʼO ʼuhiga mo te gāue ʼa te tēhina, ʼe ʼui fēnei e te alatike: “ ʼE ina fakatuʼutuʼu ke ina kole ki ʼihi kau Fakamoʼoni tanatou ʼu Réveillez-vous! ʼaē kua ʼāfea. Pea ʼe ʼalu ʼo ʼaʼahi te ʼu kautahi ʼaē ʼi tana manatu ʼe nātou fia lau tāfito anai te ʼu alatike ʼo te ʼu nusipepa.”

ʼAki te tokoni ʼo toku ʼohoana, neʼe ʼau maʼu taku ʼu nusipepa ʼe lauʼi teau. ʼI te ʼu nusipepa ʼaia, neʼe ʼau filifili ai te ʼu alatike ʼe ʼaoga anai ki te hahaʼi ʼaē ka ʼau palalau anai mo nātou.

ʼI taku fakaʼaogaʼi te tohi ʼo te ʼu numelo telefoni, pea mo te ʼu tohi ʼaē ʼe tuʼu ai te ʼu tuʼasila ʼo te ʼu kautahi kehekehe, neʼe ʼau fai ai te lisi ʼo te ʼu fale mahaki, te ʼu otele ʼo te hahaʼi tūpulaga pea mo te ʼu fale ʼaē ʼe taupau ai te hahaʼi matutuʼa. Neʼe ʼau toe tohi foki ʼi taku lisi te ʼu pule ʼo te ʼu tānuma, te ʼu pule mo te ʼu tagata fai tokoni ʼo te ʼu faleako, mo te kau tōketā pea mo te ʼu pule ʼo te ʼu fale pilisoni pea mo te hahaʼi ʼaē ʼe gāue ʼi te ʼu telepinale. Neʼe toe kau ki taku lisi te ʼu pule ʼo te ʼu kautahi ʼaē ʼe tokoni ki te hahaʼi ʼinu kava pea mo te kau toloke, te ʼu kautahi ʼaē ʼe tokaga ki te ʼaluʼaga ʼo te kele, ki te kau māʼimoa pea mo nātou ʼaē neʼe lāvevea ʼi te tau, pea mo te ʼu kautahi ʼaē ʼe nātou fai he ʼu kumi ki te meʼa kai. Neʼe ʼau toe tohi mo te ʼu pilō ʼaē ʼe tokaga ki te maʼuli mālōlō, ki te ʼu selevisi sosiale, pea ki te ʼu faʼahi ʼo te maʼuli faka famili.

Te ʼu Meʼa ʼAē ʼe ʼAu Palalau Anai Kiai

ʼI taku ʼaʼahi te hahaʼi ʼaia, neʼe ʼau ʼuluaki fakahā lelei age toku higoa. ʼOsi ʼaia pea neʼe ʼau fakahā age ʼe mole ʼau fualoa anai.

ʼI taku tahi felāveʼi mo te tagata takitaki, neʼe ʼau ʼui fēnei: “Ko ʼau ko te Fakamoʼoni ʼa Sehova. Kae neʼe mole ʼau haʼu ke tā fai palalau ʼo ʼuhiga mo te lotu, heʼe mole lagi lelei tona fai lolotoga tau ʼu hola gāue.” ʼI te agamāhani ʼe liliu ai te hahaʼi ʼo agalelei. ʼI taku faka ʼalutahi taku ʼu palalau mo te ʼu meʼa ʼaē ʼe ʼaoga kia ia ʼaē ʼe ma fai palalau, ʼe ʼau toe hoko atu ʼo ʼui fēnei: “Ko te ʼu faʼahi e lua ʼaē ʼe tupu ai taku haʼu. ʼUluaki, ʼe ʼau fia fakahā atu taku leleiʼia te gāue ʼaē ʼe fai e tokotou pilō. ʼE mole tonu ke meʼa noaʼi te fakaʼaogaʼi e he tahi tona temi pea mo tona mālohi ke maui mālie te maʼuli ʼa te hahaʼi. Ko te faʼahi ʼaia ʼe mahino ia ʼe tonu ke vikiʼi.” ʼE lahi te ʼu ʼaluʼaga neʼe punamaʼuli ai te hahaʼi ʼi taku ʼu palalau ʼaia.

ʼI te temi ʼaia ʼe ina fia ʼiloʼi ai te tahi tupuʼaga ʼo taku ʼaʼahi. ʼE ʼau toe hoko atu ʼo ʼau ʼui fēnei: “Koʼeni te lua koga ʼo taku haʼu: ʼI tamatou nusipepa te Réveillez-vous!, ʼaē ʼe tā ʼi te malamanei katoa, neʼe ʼau filifili te ʼu alatike ʼe talanoa tāfito ʼo ʼuhiga mo takotou gāue pea mo te ʼu faigataʼaʼia ʼaē ʼe pipiki kiai. ʼE ʼau ʼiloʼi papau ʼe koutou fia ʼiloʼi anai pe koteā te manatu ʼo te nusipepa ʼaē ʼe tufa ʼi te malamanei katoa, ki te ʼu faigataʼaʼia ʼaia. Koia, ʼe ʼau fia tuku atu te ʼu nusipepa ʼaenī.” ʼI ʼihi temi, neʼe nātou fakahā mai ʼe nātou leleiʼia taku ʼu faiga.

ʼE ʼAu Punamaʼuli Pea Mo Fiafia ʼi Te ʼu Fua ʼo Taku Gāue

ʼI taku fakaʼaogaʼi te ʼu ʼuluaki palalau ʼaia, ko te tokolahi neʼe nātou tali lelei ʼau; neʼe gata pe ki te tokotahi ʼi te ʼu hahaʼi e 17 neʼe fakafisi mai. ʼE lahi te ʼu meʼa neʼe hoko neʼe fakapunamaʼuli pea mo fakafiafia.

Ohage la, ʼi taku ʼosi faiga tuʼa fā pea mo ʼau kātaki ʼo atalitali, neʼe hoki feala ai ke ʼau palalau mo te tagata pule ʼo te ʼu faleako ʼo te tisitilike. Neʼe maʼumaʼua ʼaupito. Kae neʼe agalelei pea neʼe ma fai palalau ʼi he kiʼi temi nounou. ʼI te temi ʼaē neʼe ʼau mavae ai, neʼe ina ʼui fēnei mai: “ ʼE ʼau leleiʼia moʼoni tau ʼu faiga, ʼe ʼau lau fakalelei anai takotou ʼu tohi.”

ʼI te tahi lakaga, neʼe ʼau fai faka mafola ʼi te telepinale ʼo te tisitilike, ʼo ʼau fai palalau mo te tuʼi fakamāu kua matumatuʼa. ʼI taku hū ki tona pilō, neʼe fakasiosio mai, pea neʼe hage neʼe ʼita.

Neʼe ina ʼui fēnei: “ ʼE gata pe ki te Feliatolu uhu ʼaē ʼe ʼau ava ai ki te hahaʼi, pea ʼe hoki feala ai ke ʼau tali ki te ʼu meʼa ʼaē ʼe koutou fia ʼiloʼi.”

Neʼe ʼau foimo tali atu aipe ʼo ʼau ʼui fēnei: “Fakalelei age ki taku haʼu ʼaenī heʼe ʼau sio ʼe ke maʼumaʼua. ʼE ʼau fiafia anai ʼi haku toe liliu mai ʼi he tahi ʼaho. Kae neʼe ʼau haʼu ʼo ʼaʼahi mai koe heʼe ʼi ai te meʼa ʼe ʼau fia palalau atu kiai.”

ʼI te temi ʼaia, neʼe fia fakalogo ai te tuʼi fakamāu. Neʼe ina fehuʼi mai te meʼa ʼaē neʼe ʼau loto kiai, kae neʼe mole kei ʼitaʼita. Neʼe ʼau toe ʼui age ki ai ʼe ʼau toe liliu mai anai ʼi te Feliatolu.

Kae neʼe ʼau punamaʼuli ʼi tana ʼui fakakinau mai: “Fakalelei age kae ke haʼu muʼa ʼo heka. Koteā ʼaē ʼe ke loto kiai?”

Neʼe hoko ʼaki ai tamā fai palalau lelei, pea neʼe fakalelei mai ʼi tana ʼitaʼita ʼi te kamata, he neʼe maʼumaʼua ʼaupito.

ʼOsi ʼaia pea neʼe fehuʼi mai e te tuʼi fakamāu: “ ʼE ke ʼiloʼi koa te meʼa ʼaē ʼe ʼau leleiʼia ʼi te kau Fakamoʼoni ʼa Sehova? ʼE nātou maʼu te ʼu pelesepeto ʼe ʼi ai tonatou fakatafitoʼaga lelei, pea ʼe nātou mulimuli fakalelei kiai. Neʼe faigaʼi e Itilele ia meʼa fuli, kae neʼe mole kau te kau Fakamoʼoni ki te tau.”

ʼI tamā hū ki te pilō, neʼe ʼiloʼi māua e te kau sikalaipe. Neʼe ʼui fakahagatonu mai e te sikalaipe pule, “ ʼE mole tali e te pelesita te ʼu faʼahiga kautahi kehekehe.”

Neʼe ʼau tali fakalelei age: “Kae ʼe ina tali anai māua, koteʼuhi ko māua ko te ʼu Fakamoʼoni ʼa Sehova. ʼE mole ma ʼōmai ʼo kole he meʼa, pea ʼe mole loaloaga anai tamā ʼaʼahi, ko minuta pe e tolu.” Neʼe ʼau faikole mālohi ʼi toku loto, “Sehova, fai ke ina tali tamā fekau!”

Neʼe tali fēnei e te sikalaipe, ohage ʼe mole ina fakatokagaʼi māua: “ ʼE ʼau ʼalu ʼo vakaʼi peʼe ina tali koulua,” pea neʼe ʼalu ai. Hili lagi minuta e lua, ʼaē neʼe hage kia ʼau ko he temi loaloaga ʼaupito, pea neʼe ʼasi mai mo te pelesita. Neʼe mole gū mai te tagata ʼaia, kae neʼe ina fakahā mai tona pilō, ʼaē neʼe hoa kia pilō e lua.

ʼI tamatou kamata fai palalau, neʼe liliu ʼo agalelei. Neʼe ina tali lelei te ʼu nusipepa makehe ʼo te Réveillez-vous! ʼaē neʼe ma foaki age ki ai. Neʼe ma fakamālo kia Sehova ki te fealagia ʼaia ke ma fai faka mafola moʼo fakahā te ʼuhiga ʼo tamā gāue.

Ka ʼau toe manatuʼi te ʼu meʼa fakatalakitupua ʼaē neʼe hoko, ʼe ʼau leleiʼia ʼaupito te ʼu palalau ʼaē neʼe fai e te ʼapositolo ko Petelo: “ ʼE moʼoni, kua ʼau mahino ko te ʼAtua ʼe mole fakapulepule, kae ʼi te puleʼaga fuli pe ko te tagata ʼaē ʼe manavasiʼi kia te ia pea mo ina maʼuliʼi te faitotonu ʼe ina tali leleiʼi ia ia.” (Gāue 10:34, 35) Ko te finegalo ʼo te ʼAtua, ʼe ko te foaki ki te hahaʼi fuli ʼaē ʼe maʼuʼuli ʼi te ʼu ʼaluʼaga kehekehe, mo te ʼu lea kehekehe peʼe ko te ʼu tuʼulaga kehekehe, te fealagia ʼaē ke nātou ʼiloʼi tana fakatuʼutuʼu ʼo ʼuhiga mo te malamanei pea mo te kele.​—Ko he tahi ʼi te kau lautohi.