Tou Haʼele Mo Te ʼAtua—ʼAki Tatatou ʼAmanaki Ki Te Maʼuli Heʼegata
“ ʼE tou . . . haʼele anai ʼi te huafa ʼo Sehova totatou ʼAtua ʼo aʼu ki he temi ʼe mole ʼiloʼi hona gataʼaga, ei ʼo talu ai.”—Mikea 4:5.
1. He koʼe koa ʼe feala ke fakahigoaʼi ia Sehova ko te “Hau ʼo te heʼegata”?
KO SEHOVA ʼATUA neʼe mole ʼi ai hona kamataʼaga. ʼE tau mo feʼauga ke fakahigoaʼi ia ia ko “te Matuʼa ʼo te ʼu ʼAho,” mai tona ʼuhiga ʼaē ʼe maʼuli ia talu mai te ʼu temi ʼāfea. (Taniela 7:9, 13) Pea ʼe maʼuli anai ia Sehova ʼo talu ai. Ko ia tokotahi pe te “Hau ʼo te heʼegata.” (Fakahā 10:6; 15:3) Pea kia mata ʼo te ʼAtua, ko taʼu e afe ʼe hage pe “ko te ʼaho ʼaē kua ʼosi, pea mo ni ʼu hola ʼi te pōʼuli.”—Pesalemo 90:4.
2. (a) Koteā te fakatuʼutuʼu ʼa te ʼAtua maʼa te hahaʼi talagafua? (b) Koteā ʼaē ʼe tonu ke tou fakatafito kiai tatatou ʼu ʼamanaki pea mo tatatou ʼu fakatuʼutuʼu?
2 Mai tona ʼuhiga ʼaē ʼe heʼegata te Matapuna ʼo te maʼuli, koia neʼe feala ke ina foaki ki te ʼuluaki taumatuʼa ko Atama mo Eva, te ʼamanaki ki te maʼuli heʼegata ʼi te Palatiso. Kae ʼuhi ko tanā talagataʼa, neʼe puli kia Atama te fealagia ʼaē ke maʼuli heʼegata, pea neʼe ina tuku ki tona hōloga te agahala pea mo te mate. (Loma 5:12) Kae neʼe mole maumauʼi e te agatuʼu ʼa Atama te fakatuʼutuʼu olisinale ʼa te ʼAtua. Ko te finegalo ʼo te ʼAtua ke maʼuʼuli ʼo talu ai te hahaʼi talagafua pea ʼe ina fakahoko anai tana fakatuʼutuʼu ʼaia. (Isaia 55:11) Koia ʼe tau mo feʼauga ke tou fakatafito tatatou ʼu ʼamanaki pea mo tatatou ʼu fakatuʼutuʼu ki te tauhi kia Sehova, ʼaki tatatou ʼamanaki ki te maʼuli heʼegata. ʼE tou fia manatuʼi tuʼumaʼu “te ʼaho ʼo Sehova,” kae ʼe maʼuhiga ke tou manatuʼi ko te meʼa ʼaē ʼe tou loto kiai ʼe ko tatatou haʼele mo te ʼAtua ʼo talu ai.—2 Petelo 3:12.
Ko Sehova ʼe ʼi Ai Tona Temi Kua Ina Fakakatofa
3. ʼE tou ʼiloʼi feafeaʼi ko Sehova ʼe ʼi ai ‘tona temi kua ina fakakatofa’ ke ina fakahoko ai tana ʼu fakatuʼutuʼu?
3 ʼE tou fia ʼiloʼi lelei te fakahoko ʼo te finegalo ʼo te ʼAtua, heʼe tou haʼele mo ia. ʼE tou ʼiloʼi ko Sehova ʼe ko Ia ʼaē e ina fakakatofa te ʼu temi, pea ʼe tou falala ʼe ina fakahoko tuʼumaʼu tana ʼu fakatuʼutuʼu ʼi te temi ʼaē kua ina fakakatofa. Ohage la, “ ʼi te hoko mai ʼo te fakaʼosi ʼo te temi, neʼe momoli mai e te ʼAtua tona ʼAlo.” (Kalate 4:4) Neʼe ʼui ki te ʼapositolo ko Soane ʼe ʼi ai he temi kua fakakatofa ki te fakahoko ʼo te ʼu meʼa faka polofeta ʼaē neʼe fakahā kia ia. (Fakahā 1:1-3) ʼE ʼi ai “te temi kua fakakatofa ke fakamāuʼi ai te kau mate.” (Fakahā 11:18) Ko taʼu e 1 900 tupu ki muʼa atu, ko te laumālie maʼoniʼoni neʼe ina uga te ʼapositolo ko Paulo ke ina ʼui, ko te ʼAtua “kua ina fakakatofa he ʼaho ʼe tonu ke ina fakamāuʼi ai te kele katoa ʼi te faitotonu.”—Gāue 17:31.
4. ʼE tou ʼiloʼi feafeaʼi ko Sehova ʼe ina fia fakaʼauha te tuʼu agakovi ʼo te ʼu faʼahiga meʼa ʼaenī?
4 ʼE fakaʼauha anai e Sehova te tuʼu agakovi ʼo te ʼu faʼahiga meʼa ʼaenī, he kua ʼulihi tona huafa ʼi te mālama ʼo te temi ʼaenī. Kua tokolahi ʼaupito te kau agakovi. (Pesalemo 92:7) ʼAki tanatou ʼu palalau pea mo tanatou ʼu gāue, ʼe nātou vaʼiganoaʼi te ʼAtua, pea ʼe ko he meʼa fakaloto mamahi kia ia tana sio ʼaē ki te fakatagaʼi ʼo tana ʼu kaugana pea mo tonatou vāʼi. (Sakalia 2:8) Koia ʼe mole tou punamaʼuli ai ki te fakatotonu ʼa Sehova ke fakaʼauha te kautahi katoa ʼa Satana! Kua fakakatofa e te ʼAtua te temi tonu ʼaē ka fakahoko ai te meʼa ʼaia, pea ʼe fakahā lelei mai e te fakahoko ʼo te ʼu lea faka polofeta ʼa te Tohi-Tapu, ʼe tou maʼuʼuli ʼi “te temi ʼo te fakaʼosi.” (Taniela 12:4) ʼE mole kei tuai pea ina tapuakina anai ia nātou fuli ʼaē ʼe ʼoʼofa kia te ia.
5. Neʼe malave feafeaʼi kia Lote pea mo Hapakuke te ʼu meʼa ʼaē neʼe hoko ʼi tonā ʼu tafaʼaki?
5 Ko te kau kaugana ʼa Sehova ʼo te temi ʼāfea neʼe nātou fakaʼamu ke nātou sio ki te pulihi ʼo te agakovi. Ko te tagata faitotonu ko Lote “neʼe lotomamahi ʼaupito ʼi te aga fakalialia ʼa te hahaʼi ʼaē neʼe nātou meʼa noaʼi te lao.” (2 Petelo 2:7) Neʼe toe lotomamahi foki mo te polofeta ko Hapakuke ʼuhi ko te ʼu meʼa ʼaē neʼe hoko ʼi tona tafaʼaki, koia neʼe ina kole mamahi fēnei: “ ʼE tonu ke aʼu ki ʼafea, Ê Sehova, taku kalaga ʼaē ke hāofaki ʼau, ka mole ke logo kiai? ʼE tonu ke aʼu ki ʼafea, taku pāui ʼaē kia te koe ke ke tokoni mai kia te ʼau ʼuhi ko te agamālohi, ka mole ke fai koe he hāofaki? He koʼe koa ʼe ke fakamamata kia te ʼau te meʼa ʼaē ʼe kovi pea mo ke haga sioʼi te mamahi? Pea he koʼe ʼe tuʼu ʼi ʼoku muʼa ia te kaihaʼa ʼo te ʼu koloā pea mo te aga mālohi, pea he koʼe ʼe ʼi ai he ʼu kē, pea he koʼe ʼe hoko te fefihiʼaki?”—Hapakuke 1:2, 3.
6. Neʼe tali feafeaʼi e Sehova te faikole ʼa Hapakuke, pea koteā ʼaē ʼe tou ako ai?
6 Neʼe tali fakakoga e Sehova kia Hapakuke ʼaki te palalau ʼaenī: “Ko te meʼa ʼaē neʼe hā ʼe kei tuku ia ki te temi ʼaē kua fakakatofa kiai, pea ʼe fakatupu lotohoha ia ʼo aʼu ki te fakaʼosi, pea ʼe mole loi anai ia. Tatau aipe peʼe tuai, haga talitali kiai; heʼe hoko moʼoni anai ia. ʼE mole tauhala anai ia.” (Hapakuke 2:3) Neʼe fakahā ai e Sehova kua ina ‘fakakatofa te temi’ ʼaē ka ina fai ai te meʼa ʼaē ʼe ina loto kiai. Tatau aipe peʼe hage kua tauhala mai te temi ʼaia, kae ʼe fakahoko moʼoni anai e Sehova tana fakatuʼutuʼu!—2 Petelo 3:9.
Tou Tauhi Tuʼumaʼu ʼAki He Lotomālohi
7. Logope la neʼe mole ʼiloʼi totonu e Sesu peʼe hoko anai ʼafea te ʼaho ʼo Sehova, kae neʼe ina fai feafeaʼi tana ʼu gāue?
7 ʼE ʼaoga koa ke tou ʼiloʼi te temi tonu ʼaē kua fakakatofa e te ʼAtua ke feala ai hatatou haʼele mo ia ʼaki he lotomālohi? Kailoa. Koʼeni te ʼu faʼifaʼitaki. Neʼe fia ʼiloʼi e Sesu te temi ʼaē ka fakahoko ai te finegalo ʼo te ʼAtua ʼi te kele ohage ko selo. Neʼe akoʼi e Kilisito ki tana kau tisipulo ke nātou faikole fēnei: “Ko tamatou Tāmai ʼe ʼi selo, ke tāpuhā tou huafa! Ke hoko mai tou puleʼaga! Ke fai tou finegalo ʼi te kele, ohage ko selo!” (Mateo 6:9, 10) Logope neʼe ʼiloʼi e Sesu ʼe hoko anai te meʼa ʼaē neʼe ina kole kiai, kae neʼe mole ina ʼiloʼi papau peʼe hoko anai ʼafea. ʼI te lea faka polofeta ʼaē neʼe ina fai ʼo ʼuhiga mo te fakaʼosi ʼo te tuʼu ʼo te ʼu faʼahiga meʼa ʼaenī, neʼe ina ʼui fēnei: “Ki te ʼaho ʼaia mo te hola ʼaia, ʼe mole he tahi ʼe ina ʼiloʼi, pe ko te kau ʼaselo ʼo te lagi pe ko te ʼAlo, kaʼe gata pe ki te Tāmai.” (Mateo 24:36) Mai tona ʼuhiga ʼaē ʼe maʼuhiga tāfito te tuʼulaga ʼa Sesu Kilisito ʼi te fakahoko ʼo te ʼu fakatuʼutuʼu ʼa te ʼAtua, koia ʼe kau totonu anai ki te fakaʼauha ʼo te ʼu fili ʼo tana Tāmai ʼaē ʼi selo. Kae ʼi te nofo ʼa Sesu ʼi te kele, māʼiape la mo ia neʼe mole ina ʼiloʼi peʼe hoko anai ʼafea te faʼahi ʼaia. Neʼe vaivai koa ʼi tana tauhi kia Sehova ʼuhi ko te faʼahi ʼaia? Kailoa! ʼI tanatou sio ki te gāue mālohi ʼa Sesu ʼi tana fakamaʼa te fale lotu, “neʼe manatuʼi e tana ʼu tisipulo neʼe tohi fēnei: ‘Ko te fakamalotoloto ʼaē ki tou fale, ʼe ina mofi anai ʼau.’ ” (Soane 2:17; Pesalemo 69:9) Neʼe maʼumaʼua ia Sesu ʼi te gāue ʼaē neʼe hinoʼi kia ia, pea neʼe ina fakahoko tuʼumaʼu te gāue ʼaia ʼaki he lotomālohi. Neʼe tauhi ki te ʼAtua ʼaki tana ʼamanaki ki te maʼuli heʼegata.
8, 9. Koteā te tali ʼaē neʼe fai ki te kau tisipulo ʼi tanatou fai tanatou fehuʼi ʼo ʼuhiga mo te toe fakatuʼu ʼo te Puleʼaga, pea koteā ʼaē neʼe nātou fai?
8 Neʼe toe feiā mo te kau tisipulo ʼa Kilisito. Neʼe felāveʼi ia Sesu mo nātou ʼi muʼa ʼo tana hake ki selo. ʼE fakamatala fēnei mai e te Tohi-Tapu: “Pea ʼi te temi ʼaē neʼe nātou fakatahitahi ai, neʼe nātou fehuʼi fēnei kia ia: ‘ ʼAliki, ʼe ko te temi koa ʼaenī ka ke toe fakatuʼu ai te puleʼaga maʼa Iselaele?’ ” Ohage ko tonatou Pule, neʼe nātou fakaʼamu ki te hoko mai ʼo te Puleʼaga. Kae neʼe tali fēnei e Sesu: “ ʼE mole ʼa koutou te ʼiloʼi ʼo te temi pea mo te fasiga taʼu ʼaē ʼe pule faʼifaʼitaliha kiai te Tāmai. Kae ʼe koutou maʼu anai te mālohi mokā hifo atu anai te laumālie maʼoniʼoni kia koutou pea ʼe koutou liliu anai ko haku kau fakamoʼoni ʼi Selusalemi pea mo Sutea katoa pea mo Samalia ʼo kaku ki te potu taupotu ʼo te kele.”—Gāue 1:6-8.
9 ʼE mole ʼui mai e te Tohi-Tapu neʼe lotomamahi te kau tisipulo ʼi tana tali ʼaia. Kae neʼe nātou gāue mālohi ʼi te fai faka mafola. Hili kiai ni ʼu vāhaʼa, neʼe kua fonu ia Selusalemi ʼi tonatou akonaki. (Gāue 5:28) Pea hili kiai taʼu e 30, neʼe kua lahi ʼaupito te mafola ʼo te logo lelei ʼo feala ai ke ʼui e Paulo, ko te logo lelei neʼe faka mafola “ ʼi te ʼu meʼa fuli ʼaē neʼe fakatupu ʼi te lalo lagi.” (Kolose 1:23) Logope la neʼe mole ‘toe fakatuʼu te Puleʼaga ʼo Iselaele’ ʼi tonatou temi maʼuli pea neʼe mole fakatuʼu ʼi selo, ohage ko tanatou manatu kiai, kae neʼe hoko atu pe tanatou tauhi fakamalotoloto kia Sehova ʼaki te ʼamanaki ki te maʼuli heʼegata.
Tou Sivi Te ʼu Meʼa ʼAē ʼe Nātou Uga Tatou Ke Tou Tauhi Ki Te ʼAtua
10. Mai tona ʼuhiga ʼaē ʼe mole tou ʼiloʼi te temi ʼaē ka fakaʼauha ai e te ʼAtua te malamanei ʼa Satana, koteā ʼaē ʼe feala ke tou fakahā?
10 Ko te ʼu kaugana ʼa Sehova ʼo te temi ʼaenī, kua fualoa tanatou holi ke nātou sio ki te fakaʼosi ʼo te tuʼu ʼo te ʼu faʼahiga meʼa ʼaenī. Kae ko te meʼa ʼaē ʼe tou loto tāfito kiai, ʼe mole ko totatou faka ʼāteaina pea mo tatatou hū ki te mālama foʼou ʼaē neʼe fakapapauʼi mai e te ʼAtua. ʼE tou fia sio ki te tāpuhā ʼo te huafa ʼo Sehova pea mo te faka lākatonuʼi ʼo tona pule faʼifaʼitaliha. Koia la ʼaē ʼe tou fakafiafia ai he neʼe mole fakahā mai e te ʼAtua ‘te hola pea mo te ʼaho’ ʼaē kua ina fakakatofa ki te fakaʼauha ʼo te malamanei ʼa Satana. ʼE ko he faka fealagia ʼaia kia tatou ke tou fakahā totatou lotomālohi ke tou haʼele ʼo talu ai mo te ʼAtua heʼe tou ʼofa kia te ia, kae mole ʼuhi pe ko te kua ōvi mai ʼo te fakaʼosi peʼe ko he tahi ʼu manatu kovi.
11, 12. Neʼe fakapale feafeaʼi te agatonu ʼa Sopo, pea koteā tona pikipikiga mo tatou?
11 ʼAki tatatou nofo agatonu ki te ʼAtua, ʼe toe feala ai foki ke tou fakahā neʼe loi te Tevolo ʼi tana ʼui ʼaē ko te tagata faitotonu ko Sopo, ʼo feiā mo te hahaʼi fuli, neʼe tauhi ki te ʼAtua he neʼe ina fia maʼu hana ʼu meʼa. ʼI te ʼosi fakamatala ʼa Sehova ko Sopo ko he tagata ʼe mole hana lākahala, ʼe faitotonu pea mo manavasiʼi ki te ʼAtua, neʼe fai e Satana te palalau kākā ʼaenī: “ ʼE mole ʼi ai koa la he tupuʼaga ʼo te manavasiʼi ʼa Sopo ki te ʼAtua? Neʼe mole ke fakatuʼu koa la he ʼā moʼo puipui ʼo ia, pea mo tona ʼapi, pea mo te meʼa fuli pe ʼaʼana? Te gāue ʼo ʼona nima, neʼe ke tapuakinaʼi, pea ko tana faga manu kua mafola ʼi te kele. Kae moʼo fetogi, fakalelei muʼa, ka ke faoʼi atu tou nima ki ai, pea ke fā ki te ʼu meʼa fuli ʼaʼana, pea ke sio peʼe mole laukovi anai kia te koe ki tou fofoga.” (Sopo 1:8-11) ʼI tana nofo agatonu ʼi te ʼahiʼahi ʼaia, neʼe fakahā e Sopo neʼe gutuloi ia Satana.
12 Kapau ʼe feiā tatatou agatonu, pea ʼe feala ke tou fakahā ai ʼe hala te tukugakovi ʼa Satana ʼaē neʼe ina ʼui ʼe tou tauhi pe ki te ʼAtua heʼe tou ʼiloʼi kua vave hoko mai te temi ʼaē ka fakapale ai tatou. Ko tatatou mole ʼiloʼi pe ko te temi fea ʼaē ka fakahoko ai te lagavaka ʼo te ʼAtua ki te kau agakovi, ʼe ko he faka fealagia ʼaia ke tou fakahā ai ʼe tou ʼofa moʼoni kia Sehova pea ʼe tou fia haʼele ʼi tona ʼu ala ʼo talu ai. ʼE hā ai anai ʼe tou agatonu ki te ʼAtua pea ʼe tou falala ki tana faʼahiga fakatokatoka ia meʼa fuli. Tahi ʼaē meʼa, ko tatatou mole ʼiloʼi te ʼaho pea mo te hola ʼaia, ʼe tokoni kia tatou ke tou nofo tokaga pea mo nofo ʼalaʼala ʼi te faʼahi fakalaumālie, heʼe mahino kia tatou ʼe feala ke hoko mai te fakaʼosi ʼi he temi pe, ohage ko te haʼu ʼa he tagata kaihaʼa ʼi te pōʼuli. (Mateo 24:42-44) ʼI tatatou haʼele mo Sehova ʼi te ʼaho fuli, ʼe tou fakafiafia tona loto pea ʼe feala ʼaki ai ke ina tali ki te Tevolo ʼaē ʼe manukinuki kia te ia.—Tāʼaga Lea 27:11.
Tou Fai Tatatou Fakatuʼutuʼu Ki Te Heʼegata!
13. Koteā te ʼui ʼa te Tohi-Tapu ʼo ʼuhiga mo te fakatuʼutuʼu ki te ka haʼu?
13 Ko nātou ʼaē ʼe nātou haʼele mo te ʼAtua ʼe nātou ʼiloʼi ʼe ko he agapoto tanatou fai he ʼu fakatuʼutuʼu fakapotopoto ʼo ʼuhiga mo te ka haʼu. ʼI tanatou ʼiloʼi te ʼu fihifihia pea mo te ʼu tuʼakoi ʼo te temi matuʼa, ko te tokolahi ʼo te hahaʼi ʼe nātou faiga ke nātou fakaʼaogaʼi lelei tonatou temi tūpulaga pea mo tonatou mālohi, ke maui mālie tonatou ka haʼu ʼi te faʼahi ʼo te paʼaga. Kae e feafeaʼi ki tatatou ka haʼu fakalaumālie ʼaē ʼe maʼuhiga age? ʼE ʼui mai ia Tāʼaga Lea 21:5: “Ko te ʼu fakatuʼutuʼu ʼo te tagata poto ʼe fua manuʼia moʼoni, kae ko ia ʼaē ʼe gāue fakavilivili ʼe hoge anai ia.” ʼE ko he agapoto ke kita fai he ʼu fakatuʼutuʼu ʼi takita manatuʼi tokita ʼamanaki ki te maʼuli heʼegata. Mai tona ʼuhiga ʼaē ʼe mole tou ʼiloʼi peʼe hoko mai ʼafea te fakaʼosi ʼo te malamanei ʼaenī, koia ʼe tonu ai ke tou fakakaukauʼi lelei te ʼu meʼa ʼaē ka ʼaoga kia tatou ʼi te ka haʼu. Kae tou aga fakapotopoto pea mo tou fakamuʼamuʼa te ʼu meʼa ʼa te ʼAtua ʼi totatou maʼuli. Ko te hahaʼi ʼaē ʼe mole tui ki te ʼAtua, ʼe lagi nātou manatu ʼe ko he agavale te fakatafito ʼo totatou maʼuli ki te fai ʼo te finegalo ʼo te ʼAtua. Kae ʼe moʼoni koa te manatu ʼaia?
14, 15. (a) Koteā te lea fakatātā ʼaē neʼe fai e Sesu ʼo ʼuhiga mo te ʼu fakatuʼutuʼu ki te ka haʼu? (b) He koʼe koa ʼe feala hatatou ʼui ko te tagata maʼu koloā ʼo te lea fakatātā ʼa Sesu neʼe hala tana fakakaukau?
14 Neʼe fai e Sesu te lea fakatātā ʼo ʼuhiga mo te faʼahi ʼaia. Neʼe ina ʼui fēnei: “Ko te ʼu kele ʼo te tagata maʼu koloā neʼe fua ʼo lahi ʼaupito. Koia neʼe fēnei leva tana fakakaukauʼi ʼi tona loto, ʼo ʼui maʼana: ‘Koteā ʼapē te meʼa ʼaē ka ʼau fai, ʼi te temi nei ʼi te mole kei ʼi ai ʼo he faʼahi ke tānaki kiai taku ʼu magisi?’ Pea neʼe ʼui maʼana: ‘Koʼeni te meʼa ʼaē ka ʼau fai: ʼe ʼau maumauʼi toku ʼu faleoko pea ʼe ʼau toe laga niʼihi ʼe lalahi ake pea ʼe ʼau tānaki fuli anai kiai taku ʼu magisi pea mo taku ʼu meʼa lelei fuli; pea ʼe ʼau ʼui age anai ki toku nefesi: “Toku nefesi, ʼe lahi ʼaupito tau ʼu meʼa lelei kua tāʼofi ki he ʼu taʼu e lahi; mālōlō koe, kai, ʼinu, pea mo ke fakafiafia.” ’ Kae neʼe ʼui maʼa te ʼAtua ki ai: ‘ ʼAē tagata vale, ʼi te po pe ʼaenī ʼe kumi atu anai kia te koe tou nefesi. Pea ko te ʼu meʼa ʼaē neʼe ke tānaki, ko ai anai ka ina maʼu?’ ʼE feiā anai ki te tagata ʼaē ʼe ina tānaki he ʼu koloā maʼa ia totonu, kaʼe ʼe mole maʼu koloā ki te ʼAtua.”—Luka 12:16-21
15 Neʼe fia fakatokagaʼi mai koa e Sesu ko te tagata maʼu koloā ʼaia neʼe mole tonu ke gāue feiā ke ina maʼu te ʼu meʼa fuli ʼaē neʼe ʼaoga anai kia ia ʼi te ka haʼu? Kailoa, heʼe fakaloto mālohiʼi mai e te Tohi-Tapu ke tou gāue kinakina. (2 Tesalonika 3:10) Kae neʼe hala te fakakaukau ʼa te tagata maʼu koloā ʼaia, he neʼe mole ina fai he meʼa ke “maʼu koloā ki te ʼAtua.” Tatau aipe pe neʼe feala kia ia ke fualoa tana maʼuli lelei ʼaki tana ʼu koloā ʼaia, kae neʼe tonu ke mate ʼi he ʼaho. Neʼe mole lelei tana fakasiosio ki te ka haʼu, he neʼe mole manatu ki te maʼuli heʼegata.
16. He koʼe koa ʼe feala ke tou falala kia Sehova ʼo ʼuhiga mo he ka haʼu fīmālie?
16 Ko tatatou haʼele mo Sehova ʼaki te ʼamanaki ki te maʼuli heʼegata, ʼe ko he meʼa ʼaoga pea mo fakapotopoto. ʼE ko te fakatuʼutuʼu lelei ʼaia e tahi ʼo ʼuhiga mo te ka haʼu. ʼE ko he agapoto takita fai he ʼu fakatuʼutuʼu ʼo ʼuhiga mo te ako, mo te gāue pea mo te ʼu maʼua faka famili, kae ʼe tonu ke kita manatuʼi tuʼumaʼu ʼe mole līaki anai e Sehova ʼi he temi tana ʼu kaugana agatonu. Neʼe hiva fēnei te Hau ko Tavite: “Neʼe ʼau tūpulaga, pea kua ʼau matuʼa foki, kae neʼe mole ʼau sio ki te agatonu kua līaki feiā, pea neʼe mole ʼau sio ki tona hākoga ʼe kumi pane.” (Pesalemo 37:25) ʼO toe feiā pe, neʼe fakapapau mai e Sesu ʼe tokoni anai te ʼAtua kia nātou fuli ʼaē ʼe nātou kumi muʼa te Puleʼaga pea mo nātou haʼele ʼi te ʼu ala faitotonu ʼo Sehova.—Mateo 6:33.
17. ʼE tou ʼiloʼi feafeaʼi kua ōvi mai te fakaʼosi?
17 Logope la ʼe tou tauhi ki te ʼAtua ʼaki te ʼamanaki ki te maʼuli heʼegata, kae ʼe tou manatuʼi tuʼumaʼu te kua ōvi mai ʼo te ʼaho ʼo Sehova. ʼE hā lelei mai te kua ōvi mai ʼo te ʼaho ʼaia heʼe kua hoko te ʼu lea faka polofeta ʼa te Tohi-Tapu. ʼI te sēkulō ʼaenī, kua lahi te ʼu tau, te ʼu mahaki, te ʼu mafuike, te ʼu hoge pea mo te ʼu fakataga ʼo te kau Kilisitiano moʼoni, pea ʼe lolotoga faka mafola te logo lelei ʼo ʼuhiga mo te Puleʼaga ʼo te ʼAtua. Ko te ʼu meʼa fuli ʼaia ʼe kau ki te ʼu agaaga ʼo te temi fakaʼosi ʼo te tuʼu ʼo te ʼu faʼahiga meʼa ʼaenī. (Mateo 24:7-14; Luka 21:11) ʼI te malamanei ʼe tokolahi te hahaʼi “ ʼe kaumeʼa pe . . . mo nātou totonu, kaumeʼa mo te paʼaga, fiatuʼu, fialahi, laukovi ki te ʼAtua, talagataʼa ki te ʼu mātuʼa, maʼuli galo, heʼe agatonu, heʼeʼofa, logogataʼa, fasituʼu, heʼe fakatātāʼofi, fekai, mole manako ki te meʼa ʼaē ʼe lelei, kākā, fiatuʼu, fonu ʼi te fialahi, kaumeʼa mo te ʼu fakafiafia kae mole kaumeʼa mo te ʼAtua.” (2 Timoteo 3:1-5) ʼI te ʼu ʼaho fakamuli ʼaenī, ʼe maʼuli kinakina te kau kaugana ʼa Sehova. ʼE tou fakaʼamu mālohi ki te ʼaho ʼaē ka pulihi ai anai e te Puleʼaga ʼo Sehova te agakovi fuli! Kae ʼi tatatou fakatalitali ki te ʼaho ʼaia, tou lotomālohi ke tou haʼele mo te ʼAtua ʼaki tatatou ʼamanaki ki te maʼuli heʼegata.
Tou Tauhi ʼAki Te ʼAmanaki Ki Te Maʼuli Heʼegata
18, 19. Koteā ʼaē ʼe ina fakahā mai ko te kau agatonu ʼo te temi muʼa neʼe nātou tauhi ki te ʼAtua ʼaki te ʼamanaki ki te heʼegata?
18 ʼI tatatou haʼele mo Sehova, tou manatuʼi te tui ʼa Apele, mo Enoke, mo Noe, mo Apalahamo pea mo Sala. ʼI tana ʼosi talanoa kia nātou, neʼe tohi fēnei e Paulo: “Neʼe mamate ia nātou fuli ʼaia ʼi te tui, kae neʼe mole heʼeki nātou maʼu te fakahoko ʼo te fakapapau, kae neʼe nātou sio mamaʼo kiai pea neʼe nātou tali pea neʼe nātou tala fakahāhā ko nātou ko te kau matāpule pea ko te ʼu hahaʼi ʼe nonofo faka temi ʼi te fenua.” (Hepeleo 11:13) Ko te hahaʼi agatonu ʼaia neʼe nātou “fakaʼamu ki he potu ʼe lelei age, ko tona faka ʼuhiga, ki he potu ʼe ʼa te lagi.” (Hepeleo 11:16) ʼAki te tui neʼe nātou talitali ki te potu ʼe lelei age ʼi te takitaki ʼo te Puleʼaga Faka Mesianike ʼo te ʼAtua. ʼE feala ke tou tui papau ʼe fakapale anai nātou e te ʼAtua pea mo ina foaki anai kia nātou te maʼuli heʼegata ʼi te potu ʼaia ʼaē ʼe lelei age—te Palatiso ʼi te kele ʼaē ka takitaki anai e te Puleʼaga.—Hepeleo 11:39, 40.
19 Ko te polofeta ko Mikea neʼe ina fakahā te lotomālohi ʼo te hahaʼi ʼa Sehova ke nātou tauhi kia te ia ʼo talu ai. Neʼe ina tohi fēnei: “Ko te hahaʼi fuli ʼe nātou haʼele anai ʼi te huafa ʼo tonatou ʼatua; kae ko tatou, ʼe tou haʼele anai ʼi te huafa ʼo Sehova totatou ʼAtua ʼo aʼu ki he temi ʼe mole ʼiloʼi hona gataʼaga, ei ʼo talu ai.” (Mikea 4:5) ʼO aʼu ki tona mate, neʼe tauhi agatonu ia Mikea kia Sehova. ʼE mahino ia, ka fakatuʼuake anai ia ia ʼi te mālama foʼou, ko te polofeta ʼaia ʼe haga haʼele anai mo te ʼAtua ʼo talu ai. ʼE ko he faʼifaʼitaki lelei ʼaupito kia tatou ʼaē ʼe tou maʼuʼuli ʼi te temi ʼo te fakaʼosi!
20. Koteā ʼaē ʼe tonu ke tou lotomālohi kiai?
20 ʼE leleiʼia e Sehova tatatou ʼofa ki tona huafa. (Hepeleo 6:10) ʼE ina ʼiloʼi ʼe ko he meʼa faigataʼa kia tatou tatatou nofo agatonu kia te ia ʼi te malamanei ʼaenī ʼaē ʼe puleʼi e te Tevolo. “ ʼE mole te malamanei” kae “ko ʼaē ʼe ina fai te finegalo ʼo te ʼAtua ʼe nofo ia ʼo talu ai.” (1 Soane 2:17; 5:19) Koia ʼaki te tokoni ʼa Sehova, tou lotomālohi ʼo kātakiʼi te ʼu ʼahiʼahi ʼaē ʼe tau mo tatou ʼi te ʼaho fuli. Tou manatuʼi tuʼumaʼu te ʼu tapuakina taulekaleka ʼaē neʼe fakapapauʼi mai e tatatou Tāmai ʼofa ʼaē ʼi selo, pea tou fakatafito kiai totatou maʼuli. ʼE feala anai ke tou maʼu te ʼu tapuakina ʼaia mo kapau ʼe tou haʼele tuʼumaʼu mo te ʼAtua ʼo tou manatuʼi totatou ʼamanaki ki te maʼuli heʼegata.—Suta 20, 21.
ʼE Feafeaʼi Anai Hakotou Tali?
◻ Koteā te fakatuʼutuʼu ʼa te ʼAtua maʼa te hahaʼi talagafua?
◻ He koʼe koa ʼe mole heʼeki fakaʼauha e te ʼAtua te mālama aga heʼe faka lotu ʼaenī?
◻ He koʼe koa ko tatatou mole ʼiloʼi totonu peʼe hoko anai ʼafea te ʼaho ʼo te ʼAtua, ʼe mole tonu ke ina fakavaivaiʼi totatou lotomālohi?
◻ Koteā te ʼu fua lelei ʼaē ʼe tou maʼu ʼi tatatou haʼele mo te ʼAtua ʼaki te ʼamanaki ki te heʼegata?
[Paki ʼo te pasina 17]
Moʼo haʼele mo te ʼAtua ʼe tonu ke tou tauhi fakamalotoloto kia te ia ohage ko te kau ʼuluaki tisipulo ʼa Kilisito