Te ʼu Tapuakina ʼo Sehova Ki Totatou “Fenua”

“ ʼE maʼuli anai ia meʼa fuli pe ʼi te faʼahi ʼaē ka aʼu kiai te vaitafe.”​—Esekiele 47:9.

1, 2. (a) He koʼe ʼe maʼuhiga te vai? (b) Koteā ʼaē ʼe fakatātā e te vai ʼo te vaitafe ʼaē neʼe hā kia Esekiele?

KO TE vai ʼe ko he meʼa fakaofoofo. ʼE fakalogo kiai te ʼu meʼa maʼuli fuli pe. ʼE mole feala ke tologa totatou maʼuli mo kapau ʼe mole tou ʼinu te vai. ʼE toe ʼaoga foki te vai ki totatou fakamaʼa, heʼe feala ke ina pulihi te meʼa ʼaē ʼe ʼuli. Koia ʼe tou fakaʼaogaʼi te vai moʼo fakamaʼa totatou sino, mo tatatou ʼu mutuʼi meʼa, pea mo tatatou meʼa kai. ʼI tatatou fai te ʼu meʼa ʼaia, ʼe feala ke hāofaki ai totatou maʼuli.

² ʼE fakaʼaogaʼi e te Tohi-Tapu te vai moʼo fakatātā te ʼu fakatuʼutuʼu fakalaumālie ʼaē ʼe fai e Sehova ʼo ʼuhiga mo te maʼuli. (Selemia 2:​13; Soane 4:​7-​15) ʼE kau ki te ʼu fakatuʼutuʼu ʼaia te fakamaʼa ʼo tana hahaʼi ʼaki te sakilifisio faitotogi ʼa Kilisito, pea mo te ʼatamai mālama ʼo ʼuhiga mo te ʼAtua ʼaē ʼe tou maʼu ʼi tona Folafola. (Efeso 5:​25-​27) ʼI te fale lotu ʼaē neʼe hā kia Esekiele, ko te vaitafe faka milakulo ʼaē ʼe tatafe mai te fale lotu ʼaia ʼe ina fakatātā te ʼu tapuakina ʼaia ʼe tou maʼu ai te maʼuli. Kae neʼe kamata tatafe koa ʼanafea te vaitafe ʼaia, pea koteā tona faka ʼuhiga kia tatou ia ʼaho nei?

ʼE Hali Te Vaitafe ʼi Te Fenua ʼAē Neʼe Toe Laga

3. Koteā ʼaē neʼe hoko kia Esekiele, ohage ko tona fakamatala ia Esekiele 47:​2-​12?

³ ʼI tonatou ʼuhiga hahaʼi ʼaunofo ʼi Papiloni, neʼe ʼaoga ʼaupito te ʼu fakatuʼutuʼu ʼa Sehova ki te hahaʼi ʼo Esekiele. Koia, neʼe lotomālohi ai ia Esekiele ʼi tana sio ʼe tatafe te kihiʼi moʼi vai mai te sagatualio pea mo hū ki tuʼa mai te fale lotu ʼaē neʼe hā kia ia! ʼE fakafuafua e te ʼaselo te vaitafe, ʼo ina fai ia vaha fuli ko fasiga nima e 1 000. ʼE fakaʼaluʼalu ʼo loloto, ʼo kamata mai te ponaʼi vaʼe ʼo kaku ki te tuli, pea aʼu ki te koga loto, ʼo liliu ko he vaitafe ʼe feala ke kita kaugā ai. ʼE foaki e te vaitafe te maʼuli pea mo te mahu. (Esekiele 47:​2-​11) Neʼe ʼui fēnei kia Esekiele: “ ʼI te ʼu tafaʼaki ʼo te vaitafe ʼe homo anai, ʼi te kauvai ʼo te faʼahi ʼaenī pea mo te faʼahi ʼaenā, te ʼu faʼahiga fuʼu ʼakau kehekehe ki te kai.” (Esekiele 47:​12a) ʼI te tō ʼo te vaitafe ki te Tai Mate​—ʼaē kua mate ai ia meʼa fuli pe​—ʼe toe maʼuʼuli ai te ʼu ika, pea ʼe mahu ai te ʼu ika. ʼE lahi ai te ʼu vaka gelu.

4, 5. Koteā ʼaē ʼe tatau ai te lea faka polofeta ʼa Soele ʼo ʼuhiga mo he vaitafe pea mo te meʼa ʼaē neʼe hā kia Esekiele, pea koteā tona faka ʼuhiga?

⁴ Ko te lea faka polofeta matalelei ʼaia neʼe ina fakamanatuʼi ki te kau Sutea ʼaē neʼe ʼaunofo, te tahi lea faka polofeta neʼe fai ia taʼu e luageau ki muʼa atu: “ ʼE tatafe mai anai ki tuʼa te matapuna vai mai te fale ʼo Sehova, pea ʼe ina fakavai anai te vaitafe ʼo te ʼu Akasia.”a (Soele 3:​18) Ko te lea faka polofeta ʼo Soele, ohage ko te lea faka polofeta ʼo Esekiele, ʼe ina fakakikite ʼe tatafe anai te vaitafe mai te fale ʼo te ʼAtua, te fale lotu, pea ʼe ina fakamaʼuli anai te ʼu koga meʼa magemage.

⁵ Kua fualoa te fakamahino e Te Tule Leʼo ko te lea faka polofeta ʼa Soele ʼe lolotoga hoko ʼi totatou temi.b Koia, ʼe mahino papau ia ʼe toe tatau mo te meʼa ʼaē neʼe hā kia Esekiele. Ia ʼaho nei, ʼi te fenua ʼaē neʼe toe laga e te hahaʼi ʼa te ʼAtua, neʼe lahi te ʼu tapuakina ʼaē neʼe foaki kiai e Sehova ohage pe ko te Iselaele ʼāfea.

Ko He ʼu Tapuakina Lahi

6. Koteā ʼaē neʼe tonu ke manatuʼi e te kau Sutea ʼi te afuhi ʼo te toto ki te ʼaletale?

⁶ ʼE tatafe koa maifea te ʼu tapuakina ʼaia ʼa te hahaʼi ʼa te ʼAtua ʼaē neʼe fakaliliu ki tonatou fenua? Koutou fakatokagaʼi, ko te vai ʼe tatafe mai te fale lotu ʼa te ʼAtua. ʼO toe feiā ia ʼaho nei, ko te ʼu tapuakina ʼa Sehova ʼe tatafe mai tona fale lotu lahi fakalaumālie​—ko te fakatuʼutuʼu ʼo ʼuhiga mo te tauhi maʼa. ʼE tou maʼu te tahi manatu maʼuhiga ʼi te meʼa ʼaē neʼe hā kia Esekiele. ʼI te malaʼe ʼaē ʼe tuʼu ʼi loto, ʼe tafe te vai ʼo fakalaka ʼi te ʼaletale, ʼi tona potu toga. (Esekiele 47:1) ʼE tuʼu te ʼaletale ʼi te lotomalie ʼo te fale lotu ʼaē neʼe hā. Neʼe fakamatala lelei e Sehova kia Esekiele te agaaga ʼo te ʼaletale pea mo ina fakatotonu ke afuhi kiai te toto ʼo te sakilifisio. (Esekiele 43:13-​18, 20) Neʼe ʼi ai te faka ʼuhiga lahi ʼo te ʼaletale ki te kau Iselaelite. Ko te fuakava ʼaē neʼe nātou fai mo Sehova neʼe kua fualoa tona kua fakamoʼoni kiai, ʼi te temi ʼaē neʼe afuhi ai e Moisese te toto ki te ʼaletale ʼi te vaʼe Moʼuga ʼo Sinai. (Ekesote 24:​4-8) Ko te afuhi ʼo te toto ki te ʼaletale ʼaē neʼe hā kia Esekiele, neʼe ko he fakamanatu ʼaia kia nātou, ʼi tanatou ʼosi liliu ki tonatou fenua ʼaē neʼe toe laga, ʼe lahi anai te ʼu tapuakina ʼaē ka foaki age e Sehova kia nātou mo kapau ʼe nātou mulimuli ki te fuakava ʼaē neʼe nātou fai mo ia.​—Teutalonome 28:​1-​14.

7. He koʼe ʼe maʼuhiga ki te kau Kilisitiano ia ʼaho nei te faka ʼuhiga ʼo te ʼaletale fakatātā?

⁷ ʼO toe feiā pe, ʼe tapuakina te hahaʼi ʼa te ʼAtua ʼo te temi ʼaenī ʼaki te fuakava​—ʼe ko he fuakava ʼe lelei age, ʼe ko te fuakava foʼou. (Selemia 31:31-​34) Kua toe fualoa foki te kua fakamoʼoni ʼo te fuakava ʼaia ʼaki te taʼataʼa ʼo Sesu Kilisito. (Hepeleo 9:​15-​20) Ia ʼaho nei, tatau aipe pe tou kau ʼi te kau fakanofo, ʼaē ʼe kau ki te fuakava ʼaia, peʼe tou kau ʼi te “tahi ʼu ōvi,” ʼaē ʼe nātou maʼu te ʼu fua lelei ʼo te fuakava ʼaia, kae ʼe maʼuhiga ʼaupito kia tatou fuli te ʼaletale fakatātā. ʼE ina fakatātā te finegalo ʼo te ʼAtua ʼaē ʼe pipiki ki te sakilifisio ʼo Kilisito. (Soane 10:16; Hepeleo 10:10) Ohage pe ko te tuʼu ʼaē ʼo te ʼaletale fakatātā ʼi te lotomalie ʼo te fale lotu fakalaumālie, ʼo toe feiā aipe ko te sakilifisio faitotogi ʼo Kilisito ʼe ko te faʼahi tāfito ʼaia ʼo te tauhi maʼa. ʼE ko te tafitoʼaga ki te fakamolemole ʼo tatatou ʼu agahala, pea mo tatatou ʼu ʼamanaki fuli ʼaē ki te ka haʼu. (1 Soane 2:2) Koia, ʼe tou faiga ke ʼalutahi totatou maʼuli mo te lao ʼaē ʼe pipiki ki te fuakava foʼou ʼaia, “te lao a Kilisito.” (Kalate 6:2) Kapau ʼe tou fai tuʼumaʼu te faʼahi ʼaia, pea ʼe tou maʼu anai te ʼu fua lelei ʼo te ʼu fakatuʼutuʼu ʼaē ʼe fai e Sehova ʼo ʼuhiga mo te maʼuli.

8. (a) Koteā ʼaē neʼe mole maʼu ʼi te malaʼe ʼaē neʼe tuʼu ʼi loto ʼo te fale lotu ʼaē neʼe hā kia Esekiele? (b) ʼI te fale lotu ʼaē neʼe hā, koteā ʼaē neʼe fakaʼaogaʼi e te kau pelepitelo moʼo ʼonatou fakamaʼa?

⁸ ʼI te tahi ʼu tapuakina ʼaia, ʼe ko tatatou maʼa ia muʼa ʼo Sehova. ʼI te fale lotu ʼaē neʼe hā kia Esekiele, neʼe mole maʼu ʼi te malaʼe ʼaē ʼe tuʼu ʼi loto, te meʼa neʼe maʼuhiga ʼaupito, neʼe tuʼu ʼi te malaʼe ʼo te tapenakulo pea mo te fale lotu ʼo Salomone​—ko te foʼi māʼanuʼaga lahi, neʼe fakahigoa ki muli age ko te tai, ʼaē neʼe fakamaʼa ai te kau pelepitelo. (Ekesote 30:18-​21; 2 Fakamatala 4:​2-6) ʼI te meʼa ʼaē neʼe hā kia Esekiele, koteā ʼaē neʼe fakaʼaogaʼi e te kau pelepitelo moʼo ʼonatou fakamaʼa? Neʼe nātou fakaʼaogaʼi te vai ʼaē ʼe tatafe mai te malaʼe ʼaē ʼe tuʼu ʼi loto! Ei, ʼe tapuakina anai nātou e Sehova ʼaki te fealagia ʼaē ke nātou maʼa pea mo maʼoniʼoni.

9. Ia ʼaho nei, ʼe lava feafeaʼi ki te kau fakanofo pea mo te toe hahaʼi tokolahi ke nātou maʼa?

⁹ ʼO toe feiā ia ʼaho nei, neʼe tapuakina te kau fakanofo ʼi tanatou liliu ʼo maʼa ia muʼa ʼo Sehova. ʼE nātou maʼoniʼoni ia mata ʼo Sehova, ʼo ina tala ʼe nātou faitotonu. (Loma 5:​1, 2) E feafeaʼi ki te “toe hahaʼi tokolahi,” ʼaē ʼe fakatātā e te ʼu telepi ʼaē ʼe mole kau ki te kau pelepitelo? ʼE nātou tauhi ʼi te malaʼe ʼaē ʼe tuʼu ʼi tuʼa, pea ko te vai ʼaia ʼe fakalaka ʼi te potu ʼaia ʼo te fale lotu ʼaē neʼe hā. Koia ʼaē neʼe sio ai te ʼapositolo ko Soane ki te toe hahaʼi tokolahi ʼe nātou kofuʼi he ʼu kofu hina maʼa, ʼi tanatou tauhi ʼi te malaʼe ʼo te fale lotu fakalaumālie! (Apokalipesi 7:​9-​14) Tatau aipe peʼe feafeaʼi tonatou gaohi e te mālama aga fakalialia ʼaenī, kae ʼe feala ke nātou ʼiloʼi papau, kapau ʼe nātou tui ki te sakilifisio faitotogi ʼo Kilisito, pea ʼe nātou maʼa anai ia mata ʼo Sehova. ʼE nātou fakahā feafeaʼi tanatou tui? ʼI tanatou mulimuli ki te ʼu tafuga vaʼe ʼo Sesu, ʼo nātou falala katoa ki te sakilifisio faitotogi.​—1 Petelo 2:​21.

10, 11. Koteā te tahi faʼahi maʼuhiga ʼo te vai fakatātā, pea koteā tona pikipikiga mo te toe vaitafe lahi?

¹⁰ Ohage ko te meʼa ʼaē neʼe tou vakaʼi ki muʼa atu, ʼe ʼi ai te tahi faʼahi maʼuhiga ʼo te vai fakatātā ʼaia​—ko te ʼatamai mālama. ʼI te Iselaele ʼaē neʼe toe laga, neʼe tapuakina e Sehova tana hahaʼi ʼaki te ako Tohi-Tapu ʼaē neʼe fai e te kau pelepitelo. (Esekiele 44:23) ʼO toe feiā pe, neʼe tapuakina e Sehova tana hahaʼi ia ʼaho nei, ʼaki te ako ʼo tona Folafola moʼoni, ʼe ina fakaʼaogaʼi te “kautahi fakapelepitelo o te hau.” (1 Petelo 2:9) Ko te ʼatamai mālama ʼo ʼuhiga mo Sehova ʼAtua, ʼo ʼuhiga mo tana ʼu fakatuʼutuʼu ki te malamanei, pea tāfito ʼo ʼuhiga mo Sesu Kilisito pea mo te Puleʼaga faka Mesianike, neʼe tuputupu māmālie lolotoga te ʼu ʼaho fakamuli ʼaenī. ʼE loloto ʼaupito te meʼa kai fakalaumālie ʼaē ʼe tou maʼu!​—Taniela 12:4.

¹¹ Ohage ko te ʼāsili loloto ʼo te vaitafe ʼaē neʼe fakafuafua e te ʼaselo, ʼo toe feiā pe mo te ʼu tapuakina ʼaē ʼe tatafe mai ia Sehova ʼo ʼuhiga mo te maʼuli neʼe tuputupu ʼaupito, ke feala ke maʼu e te hahaʼi kaugamālie ʼaē ʼe hū ki totatou fenua ʼaē kua tapuakina ʼi te faʼahi fakalaumālie. Neʼe toe fakakikite fēnei e te tahi lea faka polofeta ʼo ʼuhiga mo te toe fakatuʼu ʼo te hahaʼi ʼo te ʼAtua: “Ko te tokosiʼi ʼe liliu anai ko te lauʼi afe, pea ko ia ʼaē ʼe veliveli ʼe liliu anai ko te puleʼaga mālohi. Ko ʼau, Sehova, ʼe ʼau fakavaveʼi anai te faʼahi ʼaia ʼi tona temi totonu.” (Isaia 60:22) Kua hoko te ʼu palalau ʼaia​—he ko te lauʼi miliona hahaʼi kua nātou fakatahi mo tatou ʼi te tauhi maʼa! Neʼe foaki e Sehova te “vai” lahi ke maʼu e nātou fuli ʼaē ʼe nātou maliu mai kia te ia. (Apokalipesi 22:17) ʼE ina tuku ki tana kautahi ʼaē ʼe ʼi te kele ke ina tufa te ʼu Tohi-Tapu pea mo te ʼu tohi faka Tohi-Tapu ki te malamanei katoa, ʼi te ʼu lea ʼe lauʼi teau. Pea kua fakatuʼutuʼu te ʼu fono pea mo te ʼu fakatahi ʼi te malamanei katoa, ke feala ki te hahaʼi fuli ke nātou maʼu te ʼu vai maʼa ʼo te moʼoni. ʼE tonu ke malave feafeaʼi te ʼu fakatuʼutuʼu ʼaia ki te hahaʼi?

ʼE Foaki e Te Vai Ia Te Maʼuli!

12. (a) ʼI te meʼa ʼaē neʼe hā kia Esekiele, he koʼe ʼe lava fua feiā te ʼu fuʼu ʼakau? (b) ʼI te ʼu ʼaho fakamuli, koteā ʼaē ʼe fakatātā e te ʼu fuʼu ʼakau ʼaia ʼe fua?

¹² Ko te vaitafe ʼaē neʼe hā kia Esekiele, ʼe ina foaki te maʼuli pea mo te maʼuli mālōlō. ʼE ʼui fēnei kia Esekiele ʼo ʼuhiga mo te ʼu fuʼu ʼakau ʼaē ʼe homo ʼi te ʼu tafaʼaki ʼo te vaitafe: “ ʼE mole fefe anai tonatou ʼu lau, pea ʼe mole hala anai mo fua. . . . Pea ʼe liliu anai tonatou ʼu fua ko he meʼa ke kai pea mo tonatou ʼu lau ko he meʼa faitoʼo.” He koʼe koa ʼe lava fua feiā te ʼu fuʼu ʼakau ʼaia? “ ʼUhi ko tanatou vai​—ʼe tatafe tonu mai te sagatualio.” (Esekiele 47:12b) Ko te ʼu fuʼu ʼakau fakatātā ʼaia ʼe ko he fakahā fakatomuʼa ʼo te ʼu fakatuʼutuʼu fuli ʼaē ka fai e te ʼAtua, ʼaki te sakilifisio faitotogi ʼo Sesu, moʼo fakaliliu te malamanei ke haohaoa. ʼI te temi ʼaenī, ʼi te kele, ʼe takitaki e te toe ʼo te kau fakanofo te tufa ʼo te meʼa kai fakalaumālie pea mo te fakamālōlō ʼi te faʼahi fakalaumālie. Ka maʼu fuli anai e te toko 144 000 tanatou fakapale ʼi selo, pea ko te ʼu tapuakina ʼo tanatou gāue faka pelepitelo ʼi tonatou ʼuhiga kaugā hau mo Kilisito, ʼe hoko atu anai ʼi te ka haʼu, ʼo aʼu ki te pulihi katoa ʼo te mate ʼaē neʼe tupu mai ia Atama.​—Apokalipesi 5:​9, 10; 21:​2-4.

13. Koteā te fakamālōlō ʼaē neʼe hoko ʼi totatou temi?

¹³ Ko te vaitafe ʼaē neʼe hā kia Esekiele, ʼe tō ki te Tai Mate pea ʼe ina fakamālōlō ia meʼa fuli ʼaē ʼe aʼu ki ai. ʼE fakatātā e te tai te mate fakalaumālie. Kae ʼe hoko te maʼuli “ ʼi te faʼahi fuli pe ʼaē ʼe aʼu kiai te vaitafe ʼaē kua tuputupu ʼo tuʼa lua tona laulahi.” (Esekiele 47:9) ʼO toe feiā pe ʼi te ʼu ʼaho fakamuli, neʼe fakamaʼuli te hahaʼi ʼi te faʼahi fakalaumālie ʼi te faʼahi pe ʼaē neʼe tafe ai te vai ʼo te maʼuli. Ko te ʼuluaki hahaʼi ʼaē neʼe fakamaʼuli neʼe ko te toe ʼo te kau fakanofo ʼi te taʼu 1919. Neʼe fakamaʼuli nātou ʼi te faʼahi fakalaumālie, he neʼe hage kua nātou mamate, he neʼe mole kei fai hanatou gāue. (Esekiele 37:​1-​14; Apokalipesi 11:​3, 7-​12) Talu mai ai, kua mafola te ʼu vai maʼuli ʼaia ki te tahi ʼu hahaʼi ʼaē neʼe mamate ʼi te faʼahi fakalaumālie, pea kua fakamaʼuli nātou pea mo nātou faʼufaʼu te toe hahaʼi tokolahi ʼo te tahi ʼu ōvi ʼaē ʼe tuputupu tuʼumaʼu, pea mo nātou ʼoʼofa pea mo tauhi kia Sehova. Kua ōvi mai te temi ʼaē ka mafola ai te faʼahi ʼaia ki te hahaʼi kaugamālie ʼaē ka fakatuʼuake.

14. Ia ʼaho nei, koteā ʼaē ʼe ina fakatātā lelei te gelu lahi ʼaē ʼe fai ʼi te Tai Mate?

¹⁴ ʼAki te fakamaʼuli ʼaia ʼi te faʼahi fakalaumālie ʼe fakahoko ai te gāue. ʼE fakatātā te faʼahi ʼaia ʼaki te mahu ʼo te gelu ʼi te tai ʼaē neʼe mate ʼi muʼa atu. Neʼe ʼui fēnei e Sesu ki tana kau tisipulo: “E au fakanofo anai [koutou] ko he u tautai tagata.” (Mateo 4:​19) ʼI te ʼu ʼaho fakamuli, neʼe kamata te gelu ʼaki te fakatahiʼi ʼo te toe ʼo te kau fakanofo, kae neʼe mole gata ai. Ko te vai ʼaē ʼe ina foaki te maʼuli ʼaē ʼe tatafe mai te fale lotu ʼa Sehova, ʼo kau kiai te tapuakina ʼaē ʼe tou maʼu ʼi te ʼatamai mālama, ʼe aʼu ki te hahaʼi ʼo te ʼu fenua fuli pe. ʼI te faʼahi pe ʼaē ʼe aʼu kiai, ʼe hoko ai te fakamaʼuli ʼi te faʼahi fakalaumālie.

15. Koteā ʼaē ʼe hā ʼaki ai ʼe mole ko te hahaʼi fuli ʼaē ka nātou tali anai te ʼu fakatuʼutuʼu ʼa te ʼAtua ki te maʼuli, pea koteā ʼaē ka hoko kia nātou?

¹⁵ ʼE mahino ia, ʼe mole tali lelei anai e te hahaʼi fuli te logo ʼaē ʼe ina foaki te maʼuli; pea ʼe mole toe tali lelei fuli anai e nātou ʼaē ka fakatuʼuake ʼi te ʼu Taʼu e Afe ʼaē ka Pule ai Kilisito. (Isaia 65:20; Apokalipesi 21:8) ʼE tala e te ʼaselo ʼe ʼi ai te ʼu faʼahi ʼo te tai ʼe mole fakamālōlō. Ko te ʼu ano ʼaia, ʼaē ʼe mole maʼuli ai he meʼa, ʼe ‘tuku ki te māsima.’ (Esekiele 47:11) ʼE toe hage pe ko totatou temi, ʼe mole tali fuli anai e te hahaʼi te vai ʼaē ʼe foaki age e Sehova ke nātou maʼu ai te maʼuli. (Isaia 6:​10) ʼI Halamaketone, ko nātou fuli ʼaē neʼe nātou filifili ke nātou mamate pea mo mahahaki ʼi te faʼahi fakalaumālie, ʼe lī anai nātou ki te māsima, ko tona faka ʼuhiga ʼe fakaʼauha anai nātou ʼo heʼegata. (Apokalipesi 19:11-​21) Kae ko nātou ʼaē neʼe nātou ʼinu ki te ʼu vai ʼaia, ʼo nātou nonofo agatonu, ʼe feala ke nātou ʼamanaki ʼe nātou hāo anai pea mo sio anai ki te fakahoko fakamuli ʼo te lea faka polofeta ʼaia.

ʼE Tafe Te Vaitafe ʼi Te Palatiso

16. Ko te temi fea ʼaē ka hoko fakamuli ai te meʼa ʼaē neʼe hā kia Esekiele ʼo ʼuhiga mo te fale lotu, pea ʼe hoko feafeaʼi anai?

¹⁶ Ohage ko te tahi ʼu lea faka polofeta ʼo ʼuhiga mo te toe laga, ko te hā ʼo te fale lotu kia Esekiele ʼe ʼi ai tona fakahoko fakamuli lolotoga te ʼu Taʼu e Afe. ʼI te temi ʼaia, ʼe mole kei maʼuʼuli anai te kalasi ʼo te kau pelepitelo ʼi te kele. “E natou hoko anai ko he u pelepitelo a te Atua mo Kilisito pea e natou pule anai fakatahi mo ia [ʼi selo] lolotoga tau e afe.” (Apokalipesi 20:6) ʼE gāue fakatahi anai te kau pelepitelo ʼaia ʼi selo mo Kilisito, moʼo fakahoko te ʼu fua lelei fuli ʼo te sakilifisio faitotogi ʼo Kilisito. ʼE hāofaki anai te hahaʼi faitotonu, pea ʼe nātou toe liliu anai ʼo haohaoa!​—Soane 3:​17.

17, 18. (a) ʼE fakamatala feafeaʼi ia Apokalipesi 22:​1, 2 te vaitafe ʼaē ʼe ina foaki te maʼuli, pea ʼe ko te temi tāfito fea ʼaē ʼe faka ʼuhiga kiai te meʼa ʼaia neʼe hā? (b) ʼI te Palatiso, he koʼe ʼe tafe lahi anai te ʼu vai ʼo te maʼuli?

¹⁷ ʼE moʼoni, ʼi te temi ʼaia ko te vaitafe ʼaē neʼe sio kiai ia Esekiele ʼe tafe lahi anai mo te ʼu vai ʼo te maʼuli. ʼE ko te temi tāfito ʼaia ka fakahoko ai te lea faka polofeta ʼaē ʼe tuʼu ia Apokalipesi 22:​1, 2: “Nee ina fakaha mai kia te au he vaitafe tasilo o te vai mauli nee hage ko te kilisitale, nee tafe mai te afioʼaga o te Atua mo te Akeno. I te lotomalie o te malae o te kolo mo te maga o te vaitafe, nee tuu ai he akau o te mauli, nee taukai hogofulu-ma-lua. Nee fua i te mahina takitahi pea nee fakaʼaoga ona lau ki te faitoo o te u puleaga.”

¹⁸ Lolotoga te ʼu Taʼu e Afe, ʼe fakamālōlō anai te ʼu mahaki fuli pe​—ʼi te faʼahi fakasino, mo te faʼahi fakaʼatamai, pea mo totatou loto. ʼE fakatātā lelei te faʼahi ʼaia e “te faitoo o te u puleaga” ʼaki te ʼu fuʼu ʼakau fakatātā. ʼAki te ʼu fakatuʼutuʼu ʼaē ʼe takitaki e Kilisito pea mo te toko 144 000, “ ʼe mole he tahi ʼe ina toe ʼui anai: ‘ ʼE ʼau mahaki.’ ” (Isaia 33:24) Pea ʼe mafola lahi anai te vaitafe ʼi te temi ʼaia. ʼE tonu anai ke fakalahi pea mo fakaloloto, ke feala ki te lauʼi miliona hahaʼi, peʼe ko te lagi lauʼi miliale ʼaē ka fakatuʼuake, ke nātou ʼinu ki te ʼu vai maʼa ʼaia ʼo te maʼuli. Ko te vaitafe ʼaē neʼe hā, neʼe ina faitoʼo te Tai Mate, ʼo ina foaki te maʼuli ki te ʼu faʼahi fuli pe ʼaē neʼe aʼu kiai tona ʼu vai. ʼI te Palatiso, ʼe fakamaʼuli anai te hahaʼi tagata mo te hahaʼi fafine, ʼi te ʼu faʼahi fuli, heʼe pulihi te mate ʼaē neʼe tupu mai ia Atama, mo kapau ʼe nātou tui ki te ʼu fua lelei ʼo te totogi ʼa Kilisito ʼaē ka nātou maʼu. ʼE fakakikite ia Apokalipesi 20:12 ko “he u tohi” ʼe avahi anai ʼi te temi ʼaia, moʼo foaki he tahi ʼu manatu ki te kau fakatuʼuake. Meʼa fakaʼofaʼofa foki, heʼe māʼia ʼi te Palatiso, ʼe fakafisi anai ʼihi ki tonatou faitoʼo. Ko te hahaʼi agatuʼu ʼaia ʼe ko nātou ʼaē ka ‘tuku ki te māsima,’ ki te fakaʼauha heʼegata.​—Apokalipesi 20:​15.

19. (a) ʼE fakahoko feafeaʼi anai te vaevae ʼo te fenua ʼi te Palatiso? (b) ʼI te Palatiso koteā ʼaē ʼe fakatātā e te kolo? (c) Koteā te faka ʼuhiga ʼo te tuʼu mamaʼo ʼa te kolo mai te fale lotu?

¹⁹ Pea ʼi te temi ʼaia, ʼe toe fakahoko fakamuli mo te vaevae ʼo te fenua ʼaē neʼe hā kia Esekiele. Neʼe sio Esekiele ki te vaevae fakalelei ʼo te fenua ʼaia; koia, ʼe feala ke falala te kau Kilisitiano takitokotahi, ʼe nātou tahi maʼu anai hona moʼi kele, peʼe ko hona tofiʼa ʼi te Palatiso. ʼO toe feiā pe, ʼe fakafimālie anai te loto ʼa te hahaʼi ke nātou tahi maʼu tona ʼapi pea mo tokaga kiai. (Isaia 65:21; 1 Kolonito 14:33) Ko te kolo ʼaē neʼe sio kiai Esekiele, ʼe ina fakatātā lelei te ʼu gāue ʼaē ʼe fakatuʼutuʼu e Sehova ke fai ʼi te kele foʼou. ʼE mole kei nonofo anai te kalasi ʼo te kau fakanofo mo te hahaʼi. ʼE fakahā te faʼahi ʼaia ʼi te meʼa ʼaē neʼe hā, he neʼe tuʼu te kolo ʼi he fenua “ ʼe mole taputapu,” ʼo mamaʼo mai te fale lotu. (Esekiele 48:15) Logope la ʼe kaugā hau te toko 144 000 mo Kilisito ʼi selo, kae ʼe ʼi ai te ʼu tagata fakafofoga ʼo te Hau ʼi te kele. ʼE tapuakina lahi anai tana hahaʼi ʼaki te takitaki ʼofa ʼo te kalasi ʼo te pule. Kae ʼe tuʼu moʼoni anai te Puleʼaga ʼi selo, kae mole ʼi te kele. Ko te hahaʼi fuli ʼi te kele, ʼo kau ai mo te kalasi ʼo te pule, ʼe nātou fakalogo anai ki te Puleʼaga faka Mesianike.​—Taniela 2:​44; 7:​14, 18, 22.

20, 21. (a) He koʼe ʼe tāu te kolo mo tona higoa? (b) Koteā te ʼu fehuʼi ʼaē ʼe tonu ke tou fai kia tatou ʼi tatatou kua mahino ki te meʼa ʼaē neʼe hā kia Esekiele?

²⁰ Koutou fakatokagaʼi te ʼu palalau fakaʼosi ʼo te lea faka polofeta ʼo Esekiele: “Mai te ʼaho ʼaia, ʼe fakahigoa anai te kolo: ko Sehova Totonu ʼe Nofo Ai.” (Esekiele 48:35) ʼE mole fakatuʼu anai te kolo ʼaia moʼo foaki ki te ʼu tagata te mālohi peʼe ko te ʼiloa; pea ʼe mole lagolago anai ki he ʼu fakatuʼutuʼu fakatagata. ʼE ko te kolo ʼa Sehova, pea ʼe hā ai, ʼi hona ʼu ʼaluʼaga fakapotopoto, tana manatu pea mo tona ʼofa. (Sakopo 3:​17) ʼE tou ʼiloʼi papau ai ʼe tapuakina anai e Sehova tana hahaʼi ʼaē ʼe nātou faʼufaʼu te “kele foʼou” ʼo talu ai.​—2 Petelo 3:​13.

²¹ ʼE mole tou fiafia koa la ʼi tatatou ʼamanaki ʼaia kua vave hoko mai? Pea ʼe lelei anai ke tou tahi fai te ʼu fehuʼi ʼaenī: ‘E feafeaʼi taku aga ʼo ʼuhiga mo te ʼu tapuakina fakatalakitupua ʼaē neʼe hā kia Esekiele? ʼE ʼau lagolago agatonu koa ki te gāue ʼaē ʼe fai e te kau tagata taupau ʼofa, ʼaē ʼe kau kiai te toe ʼo te kau fakanofo pea mo nātou ʼaē ka nātou faʼufaʼu te kalasi ʼo te pule? Kua liliu koa te tauhi maʼa ko te meʼa tāfito ʼaia ʼo toku maʼuli? ʼE ʼau fakaʼaogaʼi lahi koa te ʼu vai maʼuli ʼaē ʼe tafe lahi ia ʼaho nei?’ Tou fakaʼamu ke tou tahi haga fai feiā pea mo tou fiafia ʼi te ʼu fakatuʼutuʼu ʼaē ʼe fai e Sehova ki te heʼegata!

[Nota ʼi te lalo pasina]

ʼE Koutou Tali Feafeaʼi Anai?

◻ Koteā ʼaē ʼe fakatātā e te ʼu vai ʼaē ʼe tatafe mai te fale lotu?

◻ Koteā te faitoʼo ʼaē ʼe fakahoko e Sehova ʼaki te vaitafe fakatātā, pea he koʼe ʼe ʼāsili loloto te vaitafe?

◻ Koteā ʼaē ʼe fakatātā e te ʼu fuʼu ʼakau ʼaē ʼi te ʼu kauvai ʼo te vaitafe?

◻ Koteā ʼaē ka fakatātā e te kolo lolotoga te Pule ia Taʼu e Afe, pea he koʼe ʼe tāu te kolo mo tona higoa?

[Paki ʼo te pasina 23]

Ko te vaitafe ʼo te maʼuli ʼe ina fakatātā te ʼu fakatuʼutuʼu ʼaē ʼe fai e te ʼAtua ʼo ʼuhiga mo te maʼuli